Skip to content

Skip to table of contents

Liafuan atu loke

Liafuan atu loke

“Banati-tuir sira neʼebé simu promesa nuʼudar liman-rohan liuhusi fiar no pasiénsia.”—EBREU 6:12.

1, 2. Kuandu katuas área nian ida koʼalia kona-ba fiar-naʼin sira iha Bíblia laran, nia sente oinsá? Tanbasá mak diʼak mai ita atu sai belun ho ema fiar-naʼin sira-neʼe?

KUANDU irmán ida rona katuas área nian neʼebé idade ona hatoʼo diskursu, nia hatete: “Irmaun neʼe koʼalia kona-ba ema iha Bíblia laran hanesan sira mak ninia belun neʼebé diʼak ba tempu kleur ona.” Irmán neʼe koʼalia loos kona-ba katuas área nian neʼe. Ba tinan barak irmaun neʼe estuda ho didiʼak Maromak nia Liafuan, tan neʼe kuandu nia koʼalia kona-ba fiar-naʼin sira iha Bíblia laran, neʼe hanesan nia konta kona-ba ninia belun sira neʼebé nia koñese ho didiʼak.

2 Ita sente oinsá se ema fiar-naʼin sira iha Bíblia laran sai Ita-nia belun rasik? Ita sei kontente tebes, loos ka lae? Karik Ita sei kontente atu laʼo hamutuk no koʼalia ho sira. Hanoin toʼok Ita bele uza tempu atu koñese diʼak liután mane ho feto fiar-naʼin sira hanesan Noé, Abraão, Rute, Elias no Ester. Klaru katak Ita sei kontente atu rona no halo tuir sira-nia liafuan no konsellu neʼebé folin-boot tebes!—Lee Provérbios (Amsal) 13:20. *

3. (a) Oinsá mak ita bele hetan buat diʼak husi fiar-naʼin sira iha tempu Bíblia nian? (b) Ita sei koʼalia kona-ba pergunta saida deʼit?

3 Bíblia dehan katak Maromak sei “fó moris-hiʼas ba ema diʼak”, entaun kuandu fiar-naʼin sira neʼebé Bíblia konta hetan moris-hiʼas, ita bele duni sai belun ho sira. (Apóstolu 24:15) Maibé ohin loron mós ita bele hetan buat diʼak hodi aprende kona-ba fiar-naʼin sira-neʼe, neʼebé hatudu fiar iha tempu Bíblia nian. Oinsá? Apóstolu Paulo hatán hodi dehan: “Banati-tuir sira neʼebé simu promesa nuʼudar liman-rohan liuhusi fiar no pasiénsia.” (Ebreu 6:12) Nuʼudar ita estuda kona-ba mane no feto fiar-naʼin sira-neʼe, mai ita hanoin kona-ba pergunta balu: Fiar katak sá, no tanbasá mak ita presiza ida-neʼe? Oinsá mak ita bele banati-tuir ema sira iha Bíblia laran neʼebé hatudu fiar?

Fiar katak sá, no tanbasá mak ita presiza ida-neʼe?

4. Ema barak hanoin saida kona-ba fiar? Tanbasá mak hanoin hanesan neʼe la loos?

4 Fiar mak hahalok ida neʼebé diʼak tebes. Mane no feto sira neʼebé ita sei estuda iha livru neʼe, sira hafolin duni hahalok neʼe. Maibé ema barak ohin loron, ladún  hatene fiar neʼebé loos katak sá. Sira hanoin katak sira bele fiar buat naran deʼit maski la iha buat ida neʼebé hatudu katak ida-neʼe mak loos. Maibé fiar neʼebé loos laʼós hanesan neʼe no laʼós buat neʼebé ita sente deʼit. No mós, fiar deʼit katak Maromak iha, neʼe mós la toʼo tanba Bíblia dehan katak “anju aat sira mós fiar neʼe no nakdedar”.—Tiago 2:19.

5, 6. (a) Ita-nia fiar envolve buat rua saida neʼebé ita-nia matan la bele haree? (b) Tanbasá mak ita bele fiar duni ba Maromak nia promesa sira? Fó toʼok ezemplu.

5 Haree toʼok oinsá mak Bíblia esplika kona-ba fiar neʼebé loos katak sá. (Lee Ebreu 11:1.) Apóstolu Paulo hatete katak fiar neʼebé loos envolve buat rua neʼebé ita-nia matan la bele haree. Primeiru mak kona-ba buat sira neʼebé iha duni agora, maibé ita-nia matan “la bele haree”. Porezemplu, ita-nia matan la bele haree buat sira neʼebé iha lalehan, hanesan ita la haree Maromak Jeová, ninia Oan-Mane, ka Maromak nia Governu neʼebé ukun daudaun ona iha lalehan. Segundu mak kona-ba “ita-nia esperansa”, ka buat neʼebé ita hein atu akontese iha futuru. Agora daudaun ita seidauk bele haree buat neʼebé Maromak nia Ukun sei halo iha mundu foun. Entaun, ida-neʼe dehan katak ita-nia fiar ba buat sira-neʼe saugati deʼit ka lae?

6 Lae duni! Paulo esplika katak ita iha razaun diʼak atu fiar ba buat sira-neʼe. Kuandu Paulo dehan, fiar mak “laran-metin katak ita-nia esperansa sei sai loos”, iha lia orijinál nia uza liafuan neʼebé mós iha arti dokumentu legál neʼebé fó sai katak rikusoin ruma mak ita-nian. Porezemplu, hanoin toʼok katak ema ida deside atu fó ba Ita rai kiʼikoan ida neʼebé iha ona uma. Karik nia sei fó ba Ita dokumentu legál nian no dehan: “Neʼe mak Ita-nia uma foun.” Klaru katak ema neʼe la dehan katak Ita sei hela iha surat-tahan neʼe, maibé neʼe dehan katak dokumentu legál neʼe hatudu duni katak uma neʼe mak Ita-nian ona. Ita-nia fiar bele kompara ho dokumentu legál neʼe. Sin, ita fiar duni katak buat hotu neʼebé Maromak Jeová promete iha ninia Liafuan sei sai loos.

7. Fiar neʼebé loos envolve saida?

7 Entaun, tanba ita haree ona oinsá Maromak Jeová kumpre ninia liafuan sira iha tempu uluk, neʼe book ita atu tau ita-nia fiar neʼebé metin loos ba nia. Ita-nia fiar ajuda ita atu haree Maromak Jeová nuʼudar ita-nia Aman neʼebé domin, no fiar duni katak buat hotu neʼebé nia promete ona sei sai loos. Maibé fiar neʼebé loos envolve buat barak tan. Hanesan ema ida presiza han hodi bele kontinua moris, nuneʼe mós, fiar presiza  hatudu liuhusi hahalok, selae, fiar neʼe sei mate.—Tiago 2:26.

8. Tanbasá mak fiar importante tebes?

8 Tanbasá mak fiar importante tebes? Apóstolu Paulo fó resposta. (Lee Ebreu 11:6.) Se ita la iha fiar, ita la bele hakbesik no halo Maromak kontente. Tuir loloos, Maromak kria ita ema atu halo buat ida. Saida mak neʼe? Neʼe mak atu hakbesik no atu fó glória ba ita-nia Aman iha lalehan, Maromak Jeová. Maibé se ita la iha fiar, ita la bele duni halo Maromak nia hakarak neʼe.

9. Tanba Jeová hatene katak ita presiza duni iha fiar, saida mak nia fó mai ita?

9 Maromak Jeová hatene katak ita presiza duni iha fiar, tan neʼe nia fó mai ita ezemplu husi fiar-naʼin sira hodi hanorin ita oinsá mak ita bele hametin no hatudu fiar. Porezemplu, Maromak uza mane kristaun sira neʼebé laran-metin atu dirije kongregasaun. No ninia Liafuan hatete: “Banati-tuir sira-nia fiar.” (Ebreu 13:7) Laʼós neʼe deʼit, Maromak mós fó buat seluk tan. Paulo hakerek kona-ba “sasin barak . . . hanesan kalohan”, katak mane no feto sira husi tempu uluk neʼebé hatudu ezemplu diʼak kona-ba fiar. (Ebreu 12:1) Iha Ebreu kapítulu 11, Paulo temi kona-ba fiar-naʼin sira-neʼe balu, maibé tuir loloos, iha fiar-naʼin barak tan neʼebé nia la temi iha kapítulu neʼe. Bíblia konta istória neʼebé loos kona-ba ema barak, idade boot no idade kiʼik, no hasoru situasaun moris nian neʼebé la hanesan. Ema sira-neʼe hatudu fiar neʼebé metin ba Maromak no ita bele aprende buat barak husi sira-nia fiar.

Oinsá mak ita bele banati-tuir ema seluk nia fiar?

10. Kuandu ita estuda Bíblia mesak, oinsá mak ida-neʼe bele ajuda ita atu banati-tuir fiar-naʼin sira iha tempu uluk?

10 Ita la bele banati-tuir ema ida se ita la gasta tempu barak atu koñese ho didiʼak ema neʼe. Nuʼudar ita lee livru neʼe, ita sei haree katak irmaun sira neʼebé hakerek livru neʼe gasta tempu barak tebes atu buka informasaun kona-ba fiar-naʼin sira neʼebé temi iha livru neʼe. No ida-neʼe ajuda ita atu koñese didiʼak mane no feto fiar-naʼin sira-neʼe. Ami mós fó laran-manas ba Ita atu halo hanesan. Kuandu Ita estuda Bíblia mesak, diʼak atu keʼe kleʼan iha Bíblia laran no uza livru sira seluk neʼebé ita iha atu buka informasaun liután. Nuʼudar Ita hanoin kleʼan buat neʼebé Ita aprende, hanoin toʼok katak Ita mós hola parte iha istória sira-neʼe. Hanoin toʼok katak Ita mós bele haree buat neʼebé sira haree no rona buat neʼebé sira rona. No importante liu, koko toʼok atu komprende ema sira iha istória neʼe nia sentimentu. Se ita halo nuneʼe, ita sei bele  koñese diʼak liután fiar-naʼin sira neʼebé Bíblia konta, no sira sei sai hanesan ita-nia belun neʼebé ita koñese ho didiʼak.

11, 12. (a) Oinsá mak ita bele sente besik liután ho Abraão no Sara? (b) Oinsá mak Ana, Elias, ka Samuel nia ezemplu bele ajuda ita?

11 Bainhira ita hatene buat barak kona-ba fiar-naʼin sira-neʼe, ita-nia hakarak atu banati-tuir sira mós sai makaʼas liután. Porezemplu, Jeová nia organizasaun fó laran-manas ba ita hotu atu aumenta serbisu haklaken. Karik ita hetan konvite atu muda ba fatin neʼebé presiza haklaken-naʼin liután, ka atu koko dalan seluk tan hodi haklaken. Nuʼudar ita tetu didiʼak kona-ba neʼe, karik ita hanoin katak Abraão nia ezemplu bele ajuda ita atu foti desizaun neʼebé loos. Tanba Abraão no Sara prontu atu husik sira-nia moris diʼak iha sidade Ur, Maromak fó bensaun barak ba sira. Nuʼudar ita banati-tuir sira-nia ain-fatin, ita sei sente katak ita koñese sira diʼak liután.

12 Oinsá se ema ida neʼebé besik ho ita haree ita ladiʼak no ida-neʼe halo ita sente laran-tun? Ita sei husik ema neʼe nia hahalok halo ita laran-tun demais toʼo ita mós lakohi ona tuir reuniaun ka lae? Se nuneʼe, karik ita bele hanoin kleʼan kona-ba Ana nia istória. Ana la husik Penina nia hahalok ladiʼak hapara nia atu adora Maromak Jeová. Hodi halo tuir Ana nia ezemplu, neʼe sei ajuda ita atu foti desizaun ho matenek, no nia sei sai hanesan ita-nia belun neʼebé besik liu. Nuneʼe mós, se ita sente laran-tun no la iha folin, Elias nia ezemplu sei ajuda ita. Ita sei sente besik liután ho Elias nuʼudar ita estuda oinsá Maromak Jeová fó kmaan ba nia kuandu nia halai tanba taʼuk. No joven sira neʼebé hasoru susar husi sira-nia kolega eskola neʼebé obriga sira atu halo hahalok la morál, sira bele hetan ajuda hodi estuda Samuel nia istória. Maski Eli nia oan-mane sira halo hahalok la morál iha Maromak nia tabernákulu, maibé Samuel la husik sira-nia hahalok aat neʼe kona nia.

13. Kuandu ita banati-tuir fiar husi ema sira iha tempu Bíblia nian, ida-neʼe dehan katak ita rasik nia fiar la importante ba Jeová ka lae? Esplika toʼok.

13 Maibé kuandu ita banati-tuir fiar husi ema sira iha tempu Bíblia nian, ida-neʼe dehan katak ita rasik nia fiar la importante ba Jeová ka lae? Importante duni! Tuir loloos, Jeová nia Liafuan fó laran-manas mai ita atu banati-tuir fiar husi ema sira neʼebé laran-metin. (1 Korinto 4:16; 11:1; 2 Tesalónika 3:7, 9) Liután neʼe, ema balu neʼebé ita sei estuda iha livru neʼe mós banati-tuir Maromak nia atan sira neʼebé moris antes sira. Porezemplu, ita sei haree iha Kapítulu 17 iha  livru neʼe katak Maria temi fali Ana nia liafuan sira. Maibé, ida-neʼe la dehan katak Maria nia fiar rasik ladún metin. Tuir loloos, Ana nia ezemplu ajuda Maria atu hametin ninia fiar no haburas ninia relasaun ho Maromak Jeová.

14, 15. Saida deʼit mak ita bele hetan iha livru neʼe? Oinsá mak ita bele uza livru neʼe ho didiʼak?

14 Ita-nia organizasaun halo livru neʼe hodi ajuda ita atu hametin ita-nia fiar. Kapítulu sira tuirmai mak istória sira neʼebé tau hamutuk husi série ho títulu “Banati-tuir Sira-nia Fiar” iha Livru Haklaken edisaun ba públiku husi tinan 2008 toʼo 2013. * Maibé, istória sira-neʼe hadiʼa tiha no mós aumenta informasaun balu neʼebé foun. Kapítulu ida-idak iha mós pergunta sira neʼebé bele uza atu koʼalia hamutuk no ajuda ita atu halo tuir matadalan sira iha istória sira-neʼe. Livru neʼe mós iha dezeñu sira neʼebé kapás, no dezeñu balu neʼebé uluk uza ona iha Livru Haklaken halo boot no halo kapás liután. Livru neʼe mós iha mapa no diagrama kona-ba tinan neʼebé ema sira iha livru neʼe moris. Ita-nia organizasaun halo livru Banati-tuir Sira-nia Fiar hodi uza atu estuda mesak, estuda nuʼudar família, no estuda nuʼudar kongregasaun. Ka, karik família barak sei kontente atu lee hamutuk deʼit istória ida-idak iha livru neʼe.

15 Ami hein katak livru neʼe sei ajuda Jeová nia atan sira ohin loron atu banati-tuir fiar-naʼin sira iha tempu uluk neʼebé laran-metin. No mós, ajuda ita hotu atu hametin liután ita-nia fiar nuʼudar ita habesik ba ita-nia Aman iha lalehan, Maromak Jeová!

^ par. 2 Provérbios 13:20: “Ema neʼebé laʼo hamutuk ho ema matenek sei sai matenek, maibé ema neʼebé hamutuk ho ema beik sira sei hetan buat aat.”

^ par. 14 Tanba Livru Haklaken edisaun ba públiku iha lia-tetun komesa fó sai iha 1 Abríl 2010, istória balu deʼit mak tradús tiha ona iha lia-tetun.