Skip to content

Skip to table of contents

 KAPÍTULU 20

“Haʼu fiar ona”

“Haʼu fiar ona”

1. Marta sente oinsá? Tanbasá nia sente hanesan neʼe?

MARTA hanoin hela ninia alin-mane neʼebé foin mate, ninia mate-isin hatama tiha iha fatuk-kuak no taka ho fatuk boot ida. Marta laran-triste tebetebes no sente laran-todan hanesan fatuk boot iha ninia laran. Tanba neon-susar, nia la bele simu realidade katak ninia alin-mane, Lázaro, neʼebé nia hadomi mate. Husi tempu neʼebé ninia alin mate iha loron haat liubá, nia simu bainaka barak, sira tanis hamutuk, hanoin barak, no nia sente kole loos.

2, 3. (a) Marta sente oinsá bainhira nia haree Jesus? (b) Liafuan neʼebé Marta temi hatudu saida kona-ba nia?

2 Agora, mane neʼebé hamriik iha nia oin mak Jesus, ida neʼebé Lázaro hadomi tebes. Bainhira Marta haree Jesus, nia tanis fali tanba nia hatene katak se Jesus mai antes ninia alin Lázaro mate, Jesus iha kbiit atu fó isin-diʼak ba nia alin. Maski nuneʼe, agora Marta sente kmaan uitoan tanba nia hasoru malu fali ho Jesus iha fatin neʼe, neʼebé besik sidade naran Betánia. Maski sira hamutuk fali ba tempu uitoan deʼit, Marta sente laran-kmaan tanba nia bele haree Jesus nia laran-diʼak, no hatene katak Jesus hanoin no komprende ninia sentimentu. Jesus husu pergunta balu neʼebé ajuda Marta atu hametin ninia fiar ba Maromak no ninia fiar kona-ba moris-hiʼas. Ida-neʼe book Marta atu temi liafuan tuirmai neʼe: “Haʼu fiar ona katak Ita mak Kristu, Maromak nia Oan-Mane, Ida neʼebé fó-hatene nanis ona atu mai iha mundu.”—João 11:27.

3 Liafuan sira-neʼe hatudu katak Marta mak feto ida neʼebé iha fiar-metin. Maski Bíblia la fó-hatene buat barak kona-ba Marta, maibé hodi haree ninia ezemplu, ida-neʼe bele ajuda ita atu hametin ita-nia fiar. Atu hatene  oinsá mak ita bele halo ida-neʼe, mai ita haree saida mak Bíblia hatete kona-ba Marta.

“Hanoin resin kona-ba buat barak”

4. Esplika toʼok kona-ba Marta nia família no kona-ba sira-nia relasaun ho Jesus.

4 Fulan balu antes neʼe, kuandu Lázaro sei moris hela no iha saúde diʼak, Lázaro nia família simu bainaka espesiál ida iha sira-nia uma iha Betánia, bainaka neʼe mak Jesus Kristu. Iha tempu neʼe, Lázaro, Marta no Maria hela hamutuk iha uma ida nuʼudar família. Matenek-naʼin balu hanoin katak Marta mak biin, tanba baibain Bíblia temi nia naran uluk, no mós nia mak ida neʼebé simu bainaka sira. (João 11:5) Bíblia la fó-hatene se sira naʼin-tolu neʼe, ida kaben ona ka lae, maibé sira hotu sai belun diʼak ho Jesus. Kuandu ema barak iha Judeia kontra Jesus nia serbisu haklaken, Jesus sente agradese atu simu apoiu no ransu ho ninia kolega sira-neʼe iha sira-nia uma.

5, 6. (a) Tanbasá mak Marta okupadu liu kuandu Jesus vizita sira? (b) Saida mak Maria halo kuandu Jesus mai vizita sira?

5 Marta mak ida neʼebé sai fali hanesan inan ba família neʼe. Nia ema badinas loos hodi hatudu laran-luak ba bainaka sira no halo serbisu oioin iha uma laran. Hanoin toʼok kona-ba tempu neʼebé Jesus mai atu vizita sira. Lalais deʼit Marta prepara hahán oioin ba ninia bainaka espesiál neʼe no ba sira seluk neʼebé laʼo hamutuk ho nia. Iha tempu neʼebá, hatudu laran-luak ba bainaka sira mak importante tebes. Bainhira bainaka ida mai, uma-naʼin sei simu hodi reʼi nia, hasai nia sandálias, fase nia ain, no kose nia ulun ho mina-morin. (Lee Lucas 7:44-47.) No mós, uma-naʼin sei tau matan ba buat hotu neʼebé bainaka neʼe presiza, inklui fatin atu hela no ninia han-hemu.

Marta badinas loos hodi hatudu laran-luak ba bainaka sira no halo serbisu oioin iha uma laran

6 Marta no Maria halo serbisu barak atu tau matan ba  sira-nia bainaka espesiál neʼe. Maski ema barak hanoin katak Maria mak ema neʼebé gosta aprende kona-ba buat oioin, maibé klaru katak nia mós ajuda ninia biin kona-ba serbisu iha uma laran. Maibé depois Jesus toʼo mai, buat hotu troka. Jesus hanoin katak tempu neʼe diʼak atu hanorin, no nia hanorin duni! La hanesan ho ulun-naʼin relijiaun sira iha tempu neʼebá, Jesus hatudu respeitu ba feto sira no sempre prontu atu hanorin sira kona-ba Maromak nia Ukun. Maria haksolok tebes ho oportunidade neʼe, no tuur besik iha Jesus nia ain hodi rona ba Jesus nia liafuan ida-idak.

7, 8. Tanbasá mak Marta komesa sai hirus? Oinsá mak nia hatete sai ninia sentimentu?

7 Hanoin toʼok Marta sente oinsá? Nia tenke serbisu mesak deʼit atu prepara hahán hotu no halo serbisu seluk tan atu tau matan ba bainaka sira. Karik nia komesa hanoin resin kona-ba buat barak. Nuʼudar nia laʼo bá-mai hodi halo serbisu barak, nia haree katak ninia alin-feto tuur deʼit no la halo buat ida atu ajuda. Karik nia komesa dada iis no hatudu oin-buis ba ninia alin. Ita la hakfodak se nia halo nuneʼe tanba nia la bele mesak deʼit atu halo serbisu sira-neʼe hotu!

8 Ikusmai, Marta la bele subar tan ninia sentimentu. Maski Jesus sei koʼalia hela, derrepente deʼit Marta hatete: “Naʼi, Ita la haree katak haʼu-nia alin husik haʼu mesak atu halo serbisu oioin ka? Tan neʼe, favór ida haruka nia atu ajuda haʼu.” (Lucas 10:40) Marta nia liafuan sira-neʼe makaʼas duni. Bíblia balu tradús ninia liafuan hanesan neʼe: “Naʼi, Ita la hanoin haʼu ka?” Depois neʼe, Marta husu Jesus atu haruka Maria atu ajuda nia halo serbisu.

9, 10. (a) Jesus hatete saida atu hatán ba Marta? (b) Oinsá mak ita hatene katak laʼós tanba Marta halo serbisu barak mak Jesus fó konsellu ba nia?

9 Karik Jesus nia resposta halo Marta hakfodak. Ho lian mamar, Jesus hatete: “Marta, Marta, ó hanoin resin kona-ba buat barak. Ita la presiza buat barak, karik ida deʼit toʼo ona mai ita. Tuir loloos, Maria hili buat neʼebé diʼak, no ema ida sei la foti ida-neʼe husi nia.” (Lucas 10:41, 42) Jesus nia liafuan neʼe katak sá? Marta hanoin demais kona-ba sasán mundu neʼe nian ka lae? Jesus la hafolin  Marta nia hakaʼas-an atu prepara hahán neʼebé diʼak ba sira ka lae?

10 Lae. Jesus bele haree katak Marta hakarak duni atu hatudu laran-diʼak no domin. Liután neʼe, Jesus la sente katak sala atu hatudu laran-luak ba bainaka sira. Uluk, nia mós tuir “festa boot” neʼebé Mateus halo ba nia. (Lucas 5:29) Problema mak laʼós kona-ba hahán, maibé kona-ba saida mak importante liu ba Marta. Nia hanoin barak liu kona-ba prepara hahán oioin toʼo nia haluha buat neʼebé importante liu. Saida mak neʼe?

11, 12. Oinsá mak Jesus korrije Marta nia hanoin neʼebé sala?

11 Hanoin toʼok oinsá mak tempu neʼe espesiál tebes.  Jesus, Maromak Jeová nia Oan-Mane mesak, tuur iha Marta nia uma atu hanorin lia-loos. La iha buat seluk neʼebé importante liu fali ida-neʼe, inklui mós hahán furak neʼebé Marta prepara hela. Klaru katak Jesus sente laran-triste tanba Marta la aproveita oportunidade diʼak neʼe atu hametin ninia fiar, maski nuneʼe Jesus la obriga Marta atu rona ba nia. * Maibé agora, Marta husu fali Jesus atu haruka Maria bá ajuda nia hodi Maria mós lakon oportunidade diʼak neʼe.

Maski Marta “hanoin resin kona-ba buat barak”, maibé nia haraik an hodi simu konsellu

12 Entaun, ho laran-diʼak Jesus korrije Marta nia hanoin neʼebé sala. Nia temi Marta nia naran dala rua ho lian neineik atu halo Marta sente kalma fali. Jesus fó-hatene ba nia katak nia lalika “hanoin resin kona-ba buat barak”. Hahán neʼebé simples deʼit toʼo ona, liuliu tanba Jesus fahe daudaun hahán espirituál neʼebé diʼak liu, katak buat neʼebé Jesus hanorin. Tan neʼe, Jesus lakohi hadau “buat neʼebé diʼak” neʼebé Maria hili ona, neʼe mak atu aprende husi Jesus!

Jesus hafolin Marta nia laran-luak no bele haree katak Marta hakarak duni halo ida-neʼe ho domin

13. Saida deʼit mak ita bele aprende husi buat neʼebé Jesus hatete ba Marta?

13 Ohin loron ema neʼebé halo tuir Kristu bele aprende buat barak husi istória neʼe. Ita labele husik buat naran deʼit sai importante liu fali duké aprende kona-ba “Maromak nia matadalan”. (Mateus 5:3) Sin, ita hotu hakarak halo tuir Marta nia ezemplu kona-ba hatudu laran-luak no badinas. Maibé, ita lakohi “hanoin resin kona-ba buat barak” toʼo haluha buat neʼebé importante liu. Kuandu ita ransu hamutuk ho ita-nia maluk kristaun sira, ita la hanoin demais kona-ba prepara hahán, maibé ita hakarak uza tempu neʼe atu ransu  malu hodi fó laran-manas no hametin malu. (Lee Roma 1:11, 12.) Iha tempu diʼak hanesan neʼe, hahán neʼebé simples deʼit toʼo ona.

Hetan fali família neʼebé lakon

14. Oinsá mak Marta fó ezemplu diʼak mai ita kona-ba simu konsellu?

14 Marta simu Jesus nia konsellu no aprende buat ruma kona-ba ida-neʼe ka lae? Ita la iha dúvida kona-ba neʼe, tanba apóstolu João hatete: “Jesus hadomi Marta no nia alin no mós Lázaro.” (João 11:5) Fulan balu mak liu tiha husi tempu neʼebé Jesus vizita Marta nia família iha Betánia. Klaru katak Marta la rai hirus ba Jesus, nia simu no halo tuir konsellu neʼebé Jesus fó ba nia ho domin. Ho ida-neʼe, Marta fó ezemplu diʼak mai ita kona-ba simu konsellu, tanba dala ruma ita mós presiza simu konsellu, loos ka lae?

15, 16. (a) Kuandu Lázaro sai moras, Marta halo saida deʼit? (b) Tanbasá mak Marta no Maria nia esperansa lakon mohu?

15 Kuandu Marta nia alin Lázaro sai moras, Marta la baruk atu tau matan ba nia. Nia halo buat hotu neʼebé nia bele hodi Lázaro sente kmaan no sai isin-diʼak fali. Maibé, Lázaro nia moras sai todan liu. Loron ba loron Marta no Maria sempre besik iha Lázaro nia sorin atu hein nia. Karik Marta hateke beibeik ba Lázaro neʼebé sente moras no isin tun, no hanoin fali kona-ba tinan barak neʼebé sira naʼin-tolu kontente hamutuk no triste hamutuk.

Kuandu ita ransu hamutuk ho ita-nia maluk kristaun sira, toʼo ona atu iha hahán neʼebé simples deʼit

16 Kuandu Marta no Maria haree katak Lázaro nia situasaun sai aat liu, sira haruka mensajen ba Jesus. Jesus haklaken daudaun iha fatin neʼebé dook maizumenus laʼo-ain ba loron rua. Sira-nia mensajen badak deʼit, dehan: “Naʼi, ida neʼebé Ita hadomi tebes, sai moras.” (João 11:1, 3) Sira hatene katak Jesus hadomi Lázaro, no sira fiar katak nia sei halo buat naran deʼit atu ajuda ninia belun.  Karik sira tau fiar tomak ba Jesus katak nia sei toʼo iha sira-nia uma atu halo Lázaro sai isin-diʼak fali. Maibé, sira-nia esperansa neʼe lakon mohu tanba lakleur Lázaro mate.

17. Saida mak halo Marta sente bilán? Saida mak nia halo kuandu nia rona katak Jesus toʼo daudaun iha Betánia?

17 Marta no Maria triste tebes tanba Lázaro mate ona, no sira prepara atu hakoi nia no simu bainaka barak husi Betánia no área besik neʼebá. Maibé sira la rona buat ida husi Jesus. Karik Marta sente bilán tanba Jesus seidauk toʼo mai. Ikusmai, loron haat depois Lázaro mate, Marta rona katak Jesus toʼo daudaun iha Betánia. Maski tempu neʼe triste loos, maibé Marta bá kedas atu hasoru Jesus no la fó-hatene ba Maria.—Lee João 11:18-20.

18, 19. Marta tau fiar ba esperansa saida? Tanbasá mak nia fiar metin ba ida-neʼe?

18 Kuandu Marta haree tiha ninia Naʼi, nia fó sai kedas liafuan sira neʼebé halo nia no Maria laran-susar ba loron barak ona. Nia hatete: “Naʼi, se Ita-Boot iha neʼe karik, haʼu-nia alin sei la mate.” Maski nuneʼe, Marta nafatin iha esperansa no fiar tanba nia hatutan tan: “Maski nuneʼe, agora mós haʼu sei fiar katak buat naran deʼit neʼebé Ita husu ba Maromak, nia sei fó ba Ita.” Jesus hatán kedas atu hametin Marta nia fiar. Nia hatete: “Ó-nia alin sei moris fali.”—João 11:21-23.

19 Marta hanoin katak Jesus koʼalia kona-ba moris-hiʼas iha futuru, tan neʼe nia hatete: “Haʼu hatene katak nia sei moris fali iha tempu moris-hiʼas nian iha loron ikus.” (João 11:24) Marta nia fiar kona-ba moris-hiʼas makaʼas tebetebes. Tanbasá? Tanba iha Jesus nia tempu, ulun-naʼin relijiaun balu, naran saduseu, la fiar katak sei iha moris-hiʼas, maski eskritura sira hatudu ho klaru kona-ba neʼe. (Daniel 12:13; Marcos 12:18) Marta hatene katak Jesus hanorin esperansa kona-ba moris-hiʼas no mós halo ona ema moris fali. Maibé Jesus seidauk fó moris-hiʼas ba ema neʼebé mate ona ba tempu kleur hanesan Lázaro. Sin, Marta seidauk hatene saida mak atu akontese.

20. Jesus nia liafuan neʼebé temi iha João 11:25-27 katak sá? Marta nia resposta hatudu saida kona-ba nia fiar?

20 Tuirmai, Jesus temi liafuan neʼebé Marta sei nunka  haluha, Jesus hatete: “Haʼu mak moris-hiʼas no moris.” Sin, Maromak Jeová fó kbiit ba ninia Oan-Mane atu halo ema hotu neʼebé mate moris hiʼas iha futuru. Tuirmai, Jesus husu ba Marta: “Ó fiar ida-neʼe ka lae?” No Marta hatán hodi hatete liafuan neʼebé temi iha parágrafu segundu. Marta fiar duni katak Jesus mak Kristu, ka Mesias, nia mak Maromak Jeová nia Oan, no nia mak ida neʼebé profeta sira fó-hatene nanis neʼebé sei mai toʼo mundu.—João 5:28, 29; Lee João 11:25-27.

Tanba fiar ba Jesus, Marta hetan bensaun hodi haree Lázaro moris hiʼas fali

21, 22. (a) Oinsá mak Jesus hatudu nia sentimentu ba sira neʼebé sente laran-susar tanba família mate? (b) Esplika toʼok kona-ba Lázaro nia moris-hiʼas.

21 Maromak Jeová no ninia Oan, Jesus Kristu, hafolin fiar hanesan neʼe ka lae? Buat neʼebé akontese tuirmai iha  Marta nia oin hatudu ida-neʼe ho klaru. Marta bá lalais atu bolu ninia alin Maria. Kuandu fila tiha, Marta bele haree katak Jesus laran-susar kuandu nia koʼalia ba Maria no ema seluk neʼebé mai. Nia mós haree Jesus nia matan-been tun tanba haree ema barak nia laran-susar. Marta rona Jesus haruka ema atu duir sai fatuk neʼebé taka rate, iha fatin neʼebé sira hakoi ninia alin-mane.—João 11:28-39.

22 Marta dehan katak karik mate-isin neʼe iis ona tanba hakoi tiha ba loron haat. Jesus fó-hanoin ba Marta: “Haʼu hatete ona ba ó katak se ó fiar, ó sei haree Maromak nia glória, loos ka lae?” Marta fiar duni, no ho ninia matan rasik nia haree Maromak Jeová nia glória. Iha tempu neʼebá kedas Maromak fó kbiit ba ninia Oan atu halo Lázaro moris fali! Hanoin toʼok, iha Marta nia moris tomak nia sei nunka haluha akontesimentu neʼe. Jesus koʼalia hodi bolu: “Lázaro, sai mai liʼur!” Depois, Marta bele rona lian husi Lázaro nuʼudar nia hadeer, no ho isin neʼebé falun hela laʼo sai neineik-neineik husi fatuk-kuak. Depois Jesus haruka ema atu “kore hena” neʼebé falun Lázaro hodi “husik nia laʼo bá”. Klaru katak ho laran-kontente tebes Marta no Maria halai hasoru Lázaro no hakoʼak nia. (Lee João 11:40-44.) Sin, Marta la sente laran-todan tan!

23. Maromak Jeová no Jesus hakarak fó saida ba ita? Saida mak ita presiza halo?

23 Istória neʼe hatudu katak esperansa moris-hiʼas laʼós buat neʼebé ema inventa deʼit, maibé ida-neʼe mak realidade furak ida neʼebé Bíblia hanorin. (Jó [Ayub] 14:14, 15) Maromak Jeová no ninia Oan-Mane hakarak duni fó bensaun ba ema neʼebé hatudu fiar, hanesan sira halo ba Marta, Maria, no Lázaro. Sira mós sei fó bensaun hanesan neʼe ba ita se ita haburas fiar-metin hanesan Marta.

Marta kontinua “serbí sira”

24. Kuandu Bíblia temi kona-ba Marta ba dala ikus, Marta halo saida?

24 Depois akontesimentu neʼe, Bíblia temi Marta nia naran dala ida tan, iha semana ikus antes Jesus mate. Tanba  Jesus hatene katak lakleur tan nia sei hasoru terus oioin, nia deside atu bá hela fali iha Betánia, iha Marta nia uma atu hamutuk ho ninia belun sira. Husi Betánia, Jesus sei laʼo kilómetru 3 atu bá toʼo Jeruzalein. Jesus no Lázaro han daudaun iha Simão neʼebé uluk moras-lepra nia uma. No iha tempu neʼe mak Bíblia temi kona-ba Marta ba dala ikus, Bíblia hatete katak “Marta serbí sira”.—João 12:2.

25. Ohin loron, kongregasaun sira hetan bensaun saida?

25 Loos, feto neʼe sempre badinas! Kuandu ita foin lee ba dala primeiru kona-ba Marta, nia serbí daudaun ema; no kuandu Bíblia temi ninia naran ba dala ikus, nia serbí nafatin hodi tau matan ba ema sira-nia presiza. Ohin loron, kongregasaun kristaun sira hetan bensaun duni tanba iha feto sira hanesan Marta, neʼebé badinas no hatudu laran-luak, no hatudu sira-nia fiar hodi serbí sira-nia maluk. Ita bele fiar katak Marta kontinua hatudu hahalok diʼak hanesan neʼe. No ida-neʼe importante tebes tanba lakleur tan nia sei hasoru susar seluk tan.

26. Marta nia fiar ajuda nia iha dalan saida deʼit?

26 Iha loron balu tan, Marta sei haree ninia Naʼi Jesus neʼebé nia hadomi hetan terus no mate. Liután neʼe, ema aat neʼebé buka atu oho Jesus buka mós atu oho Lázaro, tanba ninia moris-hiʼas halo ema barak tau fiar ba Jesus. (Lee João 12:9-11.) Ita mós hatene katak ikusmai mate haketak Marta husi ninia alin sira. Ita la hatene loloos horibainhira no oinsá mak Marta mate, maibé ita bele fiar buat tuirmai neʼe: Marta nia fiar neʼebé metin ajuda nia atu tahan toʼo rohan. Tan neʼe, diʼak ba ema kristaun ohin loron atu banati-tuir Marta nia fiar.

^ par. 11 Iha apóstolu sira-nia tempu, tuir ema judeu sira-nia toman baibain feto sira la iha direitu atu aprende kona-ba buat oioin. Treinu neʼebé feto sira simu mak kona-ba halo serbisu iha uma laran deʼit. Tan neʼe, kuandu Marta haree nia alin Maria tuur besik iha Jesus nia ain hodi rona ninia hanorin, karik Marta sente katak ida-neʼe la hanesan ho ema judeu sira-nia toman.