Skip to content

Skip to table of contents

 KAPÍTULU 5

“Feto neʼebé diʼak tebes”

“Feto neʼebé diʼak tebes”

1, 2. (a) Serbisu saida mak Rute halo iha Belein? (b) Saida mak Rute aprende kona-ba Maromak nia Ukun-Fuan no Ninia povu?

RUTE hakruʼuk hodi tau hamutuk sevada fulin sira neʼebé nia foin halibur iha loron neʼe. Rai-nakaras ona iha Belein no serbisu-naʼin barak fila ba uma ona, sira laʼo saʼe atu tama ba sidade kiʼik neʼe liuhusi sidade nia portaun. Rute serbisu loron tomak no ninia ain ho liman sente kole, maibé nia kontinua baku sevada fulin ho ai. Nuʼudar nia hanoin fali kona-ba buat neʼebé akontese iha loron neʼe, nia sente kontente tebes.

2 Rute sai faluk ona maski nia seidauk idade. Ninia moris sei sai diʼak fali ka lae? Hanesan ita lee ona iha kapítulu uluk, Rute hadomi ninia banin-feto Noemi, no promete ba Noemi atu nafatin hamutuk ho nia no serbí ninia Maromak Jeová. Depois, husi rai-Moab feto-faluk naʼin-rua neʼe muda ba Belein, no iha Belein Rute aprende katak Jeová nia Ukun-Fuan sira proteje no tau matan ba ema kiak sira iha rai-Izraél, inklui mós ema husi rai seluk. Ikusmai, Rute hatene katak Jeová nia povu neʼebé hamtaʼuk Maromak no hadomi Ninia Ukun-Fuan hatudu hahalok laran-diʼak, no ida-neʼe fó kmaan ba Rute neʼebé sei laran-triste.

3, 4. (a) Oinsá mak Boas halo Rute kontente? (b) Oinsá mak Rute nia ezemplu bele ajuda ita ohin loron?

3 Ema ida neʼebé hamtaʼuk Maromak mak Boas. Nia mak katuas ona no riku, no Rute serbisu iha ninia toʼos. Iha loron neʼe, Boas hatudu laran-diʼak ba Rute hanesan aman ida hatudu laran-diʼak ba ninia oan. Boas gaba Rute tanba nia tau matan ba Noemi no buka mahon husi Maromak Jeová. Nuʼudar Rute hanoin filafali Boas nia liafuan neʼe, ida-neʼe halo nia kontente.—Lee Rute 2:11-14. *

 4 Maski nuneʼe, karik Rute nafatin hanoin barak kona-ba ninia moris iha Belein sei sai oinsá. Nuʼudar ema estranjeiru kiak ida neʼebé la iha laʼen no oan atu tau matan ba nia, oinsá mak nia bele tau matan ba ninia an rasik no ba Noemi? Hodi hili sevada restu deʼit, ida-neʼe toʼo ka lae? No kuandu Rute sai ferik, sé mak sei tau matan ba nia? Ita bele komprende Rute nia situasaun susar, tanba dala ruma ita mós sai laran-susar kona-ba buka moris. Entaun, mai ita aprende oinsá mak Rute nia fiar ajuda nia atu tahan hasoru ninia susar sira-neʼe, no oinsá mak ita bele banati-tuir ninia ezemplu.

Hatudu laran-metin iha família laran

5, 6. (a) Iha loron primeiru neʼebé Rute halo serbisu atu hili sevada restu iha Boas nia toʼos, nia hetan rezultadu saida? (b) Bainhira Rute fila ba uma, Noemi haree saida, no saida mak nia hatete?

5 Bainhira Rute hasai hotu musan husi sevada-kain neʼebé nia hili no depois halibur hotu, nia hetan sevada musan maizumenus sasukat efa ida, ka maizumenus litru 22. Ida-neʼe katak nia halibur sevada musan besik kilograma 14! Rute tau sevada musan neʼe iha hena no kesi, depois tutur. Ikusmai, nia komesa laʼo hodi fila fali ba Belein iha oras besik atu kalan.—Rute 2:17.

6 Bainhira Noemi haree ninia feto-foun mai fali, nia sai kontente. Karik Noemi hakfodak tanba Rute lori naha todan ho sevada musan barak. Rute mós lori hahán restu husi han-meiudia neʼebé Boas fó ba serbisu-naʼin sira, no sira naʼin-rua Noemi han hamutuk ai-han uitoan neʼe. Noemi husu: “Iha neʼebé mak ó hili restu, no ó halo serbisu iha neʼebé? Maromak sei haraik bensaun ba ema neʼebé fó atensaun ba ó.” (Rute 2:19) Sin, bainhira Noemi haree sasán todan neʼebé Rute foin lori mai, nia hatene kedas katak ema ruma hatudu laran-diʼak ba ninia feto-foun neʼe.

7, 8. (a) Tuir Noemi nia haree, Boas nia hahalok laran-diʼak mai husi sé? Tanbasá? (b) Hodi halo saida mak Rute hatudu ninia domin ho laran-metin ba Noemi?

7 Rute komesa konta kona-ba buat neʼebé akontese iha loron neʼe no oinsá mak Boas hatudu laran-diʼak ba nia. Ida-neʼe halo Noemi haksolok, no nia hatete: “Biar nia simu bensaun husi Naʼi Jeová, neʼebé la tahan nia laran-diʼak neʼebé nakonu ho domin ba ema neʼebé moris no ema neʼebé mate.” (Rute 2:20) Noemi haree katak Boas nia hahalok laran-diʼak neʼe mai husi Jeová, tanba Jeová mak book ninia atan sira atu hatudu laran-luak no nia mós promete atu fó kolen ba ema  neʼebé hatudu hahalok diʼak sira-neʼe. *Lee Provérbios (Amsal) 19:17. *

8 Noemi fó laran-manas ba Rute atu simu Boas nia laran-diʼak no kontinua hili sevada restu iha ninia toʼos no nafatin besik ho feto sira husi ninia umakain atu mane sira labele book nia. Rute halo tuir. Nia mós “nafatin hela hamutuk ho nia banin-feto”. (Rute 2:22, 23) Dala ida tan, eskritura neʼe fó sai Rute nia hahalok furak, neʼe mak domin ho laran-metin. Rute nia ezemplu neʼe book ita atu apoia ita-nia família ho laran-metin no sai prontu atu ajuda sira kuandu sira presiza. Jeová sei nunka haluha domin neʼebé ita hatudu ba ita-nia família.

Rute no Noemi nia ezemplu fó-hanoin mai ita atu hafolin ita-nia família

9. Saida deʼit mak ita bele aprende husi Rute no Noemi kona-ba família?

9 Ema balu hanoin katak Rute ho Noemi laʼós família ida neʼebé kompletu tanba sira hanoin katak família tenkesér iha feen, laʼen, oan sira, no avó sira. Maibé, ezemplu husi Rute ho Noemi fó-hanoin mai ita katak maski família ida mak kiʼik deʼit, sira mós família neʼebé kompletu no bele hatudu domin no laran-diʼak ba malu. Oinsá ho ita? Ita hafolin ita-nia família ka lae? Jesus mós fó-hanoin ninia dixípulu sira katak kongregasaun kristaun bele sai hanesan família rasik.—Marcos 10:29, 30.

Rute no Noemi ajuda no fó laran-manas ba malu

Nia “iha direitu atu hola fali ita”

10. Iha dalan saida mak Noemi hakarak ajuda Rute?

10 Husi tempu koʼa sevada nian iha fulan-Abríl toʼo tempu koʼa trigu nian iha fulan-Juñu, Rute nafatin serbisu hodi hili restu sira iha Boas nia toʼos. Nuʼudar tempu liu daudaun, Noemi hanoin liután kona-ba saida mak nia bele halo atu ajuda ninia feto-foun doben neʼe. Iha rai-Moab, Noemi hatete ona katak nia sei la bele halo buat ida atu ajuda Rute hetan fali laʼen ida. (Rute 1:11-13)  Maibé Noemi komesa troka ninia hanoin. Nia hatete ba Rute: “Haʼu-nia oan-feto, haʼu mak ida neʼebé presiza buka fatin hakmatek ba ó, loos ka lae?” (Rute 3:1) Tuir sira-nia toman iha tempu uluk, inan-aman mak buka kaben ba sira-nia oan, no Rute sai ona Noemi nia oan-feto. Liafuan hanesan neʼe hatudu katak Noemi hakarak ajuda Rute hetan laʼen neʼebé sei lori moris hakmatek no seguru ba nia. Maibé, Noemi bele halo saida?

11, 12. (a) Bainhira Noemi hatete katak Boas mak “ida husi sira neʼebé iha direitu atu hola fali ita”, nia koʼalia kona-ba saida? (b) Oinsá mak Rute hatán ba Noemi nia liafuan?

11 Uluk, Noemi hatete kona-ba Boas: “Mane neʼe mak ita-nia família. Nia mós ida husi sira neʼebé iha direitu atu hola fali ita.” (Rute 2:20) Liafuan neʼe katak sá? Maromak nia Ukun-Fuan ba ema Izraél inklui lei neʼebé ajuda família neʼebé hasoru susar. Porezemplu, se feto ida sai faluk no la iha oan, nia hasoru susar boot tanba nia sei la bele iha bei-oan neʼebé lori ninia laʼen nia naran. Maibé tuir Maromak nia Ukun-Fuan, feto-faluk neʼe bele kaben fali ho ninia laʼen nia família ida hodi bele iha oan neʼebé lori ninia laʼen nia naran no proteje família neʼe nia rikusoin. *Deuteronômio (Ulangan) 25:5-7.

12 Noemi komesa esplika kona-ba oinsá mak Rute bele  kaben fali. Karik buat neʼebé Noemi koʼalia halo Rute hakfodak. Rute seidauk hatene ho didiʼak ema Izraél sira-nia kostume no Ukun-Fuan hotu neʼebé Maromak fó ba sira. Maski nuneʼe, Rute rona didiʼak tanba nia respeitu tebes Noemi. Karik, buat neʼebé Noemi husu Rute atu halo, halo Rute sente an no moe uitoan. Maibé Rute simu ho haraik-an, hodi hatete: “Buat hotu neʼebé Ita hatete, haʼu sei halo duni.”—Rute 3:5.

13. Rute nia ezemplu hanorin saida mai ita kona-ba simu konsellu husi ema neʼebé idade ona? (Haree mós Jó [Ayub] 12:12.)

13 Dala ruma susar ba joven sira atu simu konsellu husi ema neʼebé idade liu ka iha esperiénsia barak ona. Karik fasil atu hanoin katak ema neʼebé idade la komprende kona-ba joven sira-nia situasaun. Maibé Rute nia ezemplu neʼe fó-hanoin mai ita katak kuandu ita simu konsellu husi ema idade neʼebé hadomi ita no neʼebé hanoin ita-nia diʼak, ida-neʼe sei lori rezultadu diʼak. (Lee Salmo [Mazmur] 71:17, 18. *) Maibé, saida mak Noemi haruka Rute atu halo? Rute hetan duni rezultadu diʼak tanba halo tuir Noemi nia konsellu ka lae?

Rute iha fatin atu liri sevada

14. Esplika toʼok kona-ba fatin atu liri sevada.

14 Iha kalan neʼe, Rute bá fatin atu liri sevada. Neʼe mak fatin  neʼebé toʼos-naʼin sira lori sevada hodi hasai sevada musan. Fatin neʼe baibain iha foho lolon neʼebé kona anin makaʼas iha dadeer-saan no rai-nakaras. Iha neʼe, serbisu-naʼin sira uza garfu ka kanuru boot hodi suru sevada no hisik ba anin atu hasai ninia kain no boen sira. Hodi halo nuneʼe, sira bele haketak sevada musan.

15, 16. (a) Esplika toʼok serbisu neʼebé ema halo iha fatin atu liri sevada. Iha kalan kuandu serbisu hotu tiha, Boas halo saida? (b) Oinsá mak Boas hatene katak ema toba iha ninia ain?

15 Rute haree ba ema sira neʼebé ramata daudaun sira-nia serbisu iha kalan neʼe. Boas neʼebé tau matan ba serbisu neʼe haree sevada musan neʼebé bou aas. Nia han ho laran-kontente, depois nia toba iha sevada butuk neʼe nia sorin. Iha tempu neʼebá, ema iha toman atu halo hanesan neʼe, karik atu ema seluk labele mai naʼok ka hadau buat neʼebé sira foin koʼa. Rute haree Boas toba. Agora mak tempu ba Rute atu halo tuir liafuan neʼebé Noemi hatete ba nia.

16 Rute nia laran nakdedar nuʼudar nia hakbesik subasubar ba Boas. Nia haree katak mane neʼe toba-dukur. Hodi halo tuir Noemi nia liafuan, Rute bá loke manta neʼebé taka Boas nia ain no toba besik ninia ain. Depois, Rute hein. Maski Rute hein oras balu deʼit, maibé nia sente hanesan nia hein kleur tebes. Ikusmai iha kalan-boot, Boas hadeer tanba sente malirin. Nia nakdedar, no karik buka manta atu taka fali ninia ain. Maibé Boas sente katak iha ema ruma besik nia. Ema neʼe sé? Bíblia hatete: “Feto ida toba iha nia ain!”—Rute 3:8.

17. Ema neʼebé hanoin sala katak Rute buka atu halo sala-foʼer ho Boas, sira haluha kona-ba saida deʼit?

17 Boas husu: “Ita sé?” Karik ho lian nakdedar Rute hatán: “Haʼu mak Rute, Ita-nia atan-feto, no Ita tenke taka Ita-nia atan-feto neʼe ho Ita-nia faru, tanba Ita mak iha direitu atu hola fali.” (Rute 3:9) Matenek-naʼin balu kona-ba Bíblia hanoin katak Rute nia hahalok no liafuan neʼe hatudu katak nia buka atu halo sala-foʼer ho Boas. Maibé, sira haluha katak Rute halo tuir tempu antigu nia toman, neʼebé ita ohin loron ladún komprende. Tan  neʼe, ita labele tesi lia ba ninia hahalok hodi tuir deʼit ita-nia toman iha tempu modernu. Sira mós haluha katak dalan neʼebé Boas hatán hatudu katak nia haree Rute nia hahalok nuʼudar hahalok neʼebé loos no moos.

18. Saida mak Boas hatete ba Rute? Tuir Boas nia liafuan, Rute hatudu domin ho laran-metin iha dalan rua saida?

18 Boas koʼalia ba Rute ho lian mamar: “Haʼu-nia oan, Jeová sei haraik bensaun ba ó. Ohin ó hatudu laran-diʼak neʼebé nakonu ho domin diʼak liu fali uluk, hodi la buka mane-klosan sira, maski kiak ka riku.” (Rute 3:10) Domin ho laran-metin neʼebé Rute hatudu “uluk” mak kona-ba ninia domin ba Noemi hodi tuir nia toʼo rai-Izraél no tau matan ba Noemi. Boas mós temi kona-ba domin neʼebé Rute hatudu “ohin”. Boas hatene katak feto neʼebé seidauk idade hanesan Rute bele buka mane neʼebé sei joven maski riku ka kiak. Duké halo nuneʼe, Rute hanoin atu halo buat neʼebé diʼak ba Noemi no mós ba Noemi nia laʼen neʼebé mate ona, tanba hodi halo ida-neʼe, mane neʼe nia naran sei la lakon. Sin, Rute hanoin uluk ema seluk nia diʼak hodi la buka ninia rasik nia diʼak. Tan neʼe mak Boas gaba nia.

Rute bá hasoru Boas ho laran neʼebé moos no nia la hanoin an deʼit

19, 20. (a) Tanbasá mak Boas la kaben kedas ho Rute? (b) Iha dalan saida deʼit mak Boas hatudu laran-diʼak ba Rute no hanoin Rute nia diʼak?

19 Boas hatutan tan: “No agora, haʼu-nia oan, keta taʼuk. Buat hotu neʼebé ó hatete haʼu sei halo, tanba haʼu-nia ema hotu neʼebé iha portaun laran hatene katak ó mak feto neʼebé diʼak tebes.” (Rute 3:11) Boas kontente atu kaben ho Rute. Karik Boas la hakfodak bainhira Rute husu nia atu sai ema neʼebé hola fali nia. Maibé, tanba Boas mak ema neʼebé loos, nia la hanoin atu halo tuir deʼit ninia hakarak. Boas hatete ba Rute katak sei iha ema seluk neʼebé iha direitu atu hola fali nia, no ema neʼe mak Noemi nia laʼen nia família neʼebé besik liu. Tan neʼe, Boas hatete katak nia sei koʼalia uluklai ho mane neʼe hodi fó oportunidade ba nia atu kaben ho Rute.

Tanba Rute sempre hatudu laran-diʼak no respeitu ba ema seluk, nia hetan naran diʼak

20 Boas hatete ba Rute atu toba fali toʼo dadeer-saan, no depois neʼe nia bele fila ba uma subasubar. Boas lakohi ema atu koʼalia aat ba Rute no kona-ba nia, tanba ema seluk bele hanoin sala katak sira naʼin-rua halo buat ruma neʼebé la morál. Rute halo tuir Boas hodi toba fali, maibé agora nia laran-hakmatek tanba Boas hatudu laran-diʼak ba nia. Depois, bainhira rai atu naroman, nia hadeer. Boas haruka Rute atu loke ninia manta no tau sevada musan barak hodi fó nuʼudar prezente.  Tuirmai, Rute laʼo fali ba Belein atu fila ba uma.—Lee Rute 3:13-15. *

21. Tanbasá mak ema hatene Rute nuʼudar “feto neʼebé diʼak tebes”? Oinsá mak ita bele banati-tuir Rute nia ezemplu?

21 Karik Rute sente kontente tebes kuandu nia hanoin fali Boas nia liafuan katak ema hotu hatene Rute nuʼudar “feto neʼebé diʼak tebes”! Ita bele fiar katak ema hatete hanesan neʼe tanba Rute hatudu laran-manas atu hatene liután kona-ba Jeová no atu serbí nia. Rute mós hatudu laran-diʼak ba Noemi no ba ninia povu, hodi prontu atu halo tuir kostume iha Noemi nia rai maski ida-neʼe foun ba nia. Se ita banati-tuir Rute nia fiar, ita mós sei hakaʼas an atu hatudu laran-diʼak ba ema seluk no hatudu respeitu ba sira-nia kostume. Se ita halo nuneʼe, ita mós bele hetan naran diʼak hanesan Rute.

Fatin hakmatek ba Rute

22, 23. (a) Prezente neʼebé Boas fó ba Rute karik reprezenta saida? (Haree nota-rodapé.) (b) Noemi husu Rute atu halo saida?

22 Bainhira Rute toʼo tiha iha uma, Noemi husu: “Ó sé, haʼu-nia oan?” Karik Noemi husu hanesan neʼe tanba rai sei nakukun hela no nia la haree moos. Maibé, karik Noemi mós hakarak hatene kona-ba Rute nia situasaun, se nia nafatin feto-faluk neʼebé la iha ema ida atu ajuda nia, ka nia iha ona esperansa atu kaben fali. Rute konta kedas ba Noemi kona-ba buat hotu neʼebé foin akontese ba nia ho Boas. No Rute mós hatudu sevada musan barak neʼebé Boas haruka Rute atu lori ba Noemi. *Rute 3:16, 17.

23 Noemi husu Rute atu hela deʼit iha uma iha loron neʼe, no lalika bá serbisu atu hili sevada. Nia hatete ba Rute katak Boas sei la “tuur hakmatek toʼo nia rezolve problema neʼe iha loron neʼe kedas”.—Rute 3:18.

24, 25. (a) Oinsá mak Boas hatudu katak nia ema neʼebé loos no la hanoin an deʼit? (b) Rute hetan bensaun iha dalan saida deʼit?

 24 Buat neʼebé Noemi hatete kona-ba Boas mak loos duni. Boas bá iha sidade nia portaun, iha fatin neʼebé baibain katuas sira hasoru malu. Iha neʼebá nia hein toʼo família neʼebé besik liu ho Elimélec laʼo liu. Iha sasin sira-nia oin, Boas fó oportunidade ba mane neʼe atu sai ida neʼebé iha direitu atu hola fali Elimélec nia liman-rohan hodi kaben ho Rute. Maibé, mane neʼe lakohi. Nia dehan katak se nia halo nuneʼe karik nia bele lakon ninia liman-rohan rasik. Nuneʼe, iha sasin sira-nia oin Boas hatete katak nia mak sei sai ida neʼebé hola fali. Nia sei kaben ho Rute hodi hola fali Elimélec nia rai. Boas fó sai katak hodi halo nuneʼe, “ema mate neʼe nia liman-rohan lori nafatin ninia naran”. (Rute 4:1-10) Loos duni, Boas mak ema neʼebé loos no la hanoin an deʼit.

25 Boas kaben ho Rute. Tuirmai, Bíblia hatete: “Ho Maromak Jeová nia bensaun, Rute koʼus no hahoris oan-mane ida.” Feto sira iha Belein fó bensaun ba Noemi no gaba Rute tanba buat neʼebé Rute halo ba Noemi diʼak liu fali oan-mane naʼin-hitu. Ikusmai, ita aprende katak Rute nia oan-mane sai Liurai David nia beiʼala. (Rute 4:11-22) No David fali sai Jesus Kristu nia beiʼala.—Mateus 1:1. *

Jeová fó bensaun ba Rute hodi halo nia sai Mesias nia beiʼala

26. Rute no Noemi nia ezemplu fó-hanoin saida mai ita?

26 Sin, Rute hetan bensaun duni. No Noemi mós hetan bensaun tanba nia ajuda atu tau matan Rute nia oan hanesan ninia oan rasik. Feto naʼin-rua neʼe nia moris fó-hanoin mai ita katak Maromak Jeová hafolin sira neʼebé hakaʼas an hodi fó buat neʼebé sira-nia família presiza no neʼebé serbí nia ho laran-metin hamutuk ho ninia povu. Nia nunka haluha atu fó bensaun ba ninia povu neʼebé laran-metin ba nia, hanesan Boas, Noemi, no Rute.

^ par. 3 Rute 2:11-14: “11 No Boas hatán ba nia hodi dehan: ‘Ema fó-hatene ona ba haʼu buat hotu neʼebé ó halo ba ó-nia banin-feto depois ó-nia laʼen mate, no oinsá ó husik ó-nia aman no ó-nia inan no ó-nia família nia rai no bá nasaun ida neʼebé ó seidauk hatene. 12 Haʼu hein katak Jeová sei fó ó kolen ba buat neʼebé ó halo ona, no sei iha kolen neʼebé diʼak tebes ba ó husi Jeová, Izraél nia Maromak, neʼebé iha nia liras okos ó mai atu buka protesaun.’ 13 Nuneʼe nia hatete: ‘Husik atan haʼu hetan laran-sadiʼa iha Ita-nia matan, haʼu naʼi, tanba Ita fó konsola mai haʼu no tanba Ita koʼalia ho laran-diʼak hodi fó kmaan ba Ita-nia atan-feto, maski haʼu rasik laʼós hanesan Ita-nia atan-feto sira-neʼe ida.’ 14 No durante tempu han, Boas hatete ba nia: ‘Mai bá, hodi han paun no hoban paun baluk iha tua-siin.’ Nuneʼe, nia tuur iha serbisu-naʼin sira-nia sorin, no Boas fó musan sira neʼebé tunu tiha ona ba nia no nia han toʼo bosu maibé restu nia tau ketak.”

^ par. 7 Hanesan Noemi hatete, Jeová hatudu ninia laran-diʼak laʼós deʼit ba ema neʼebé moris, maibé mós ba ema neʼebé mate ona. Noemi lakon ninia laʼen ho oan-mane naʼin-rua. Rute mós lakon ninia laʼen. Mane naʼin-tolu neʼe mak ema neʼebé importante tebes ba Noemi no Rute. Tan neʼe, kuandu ema ruma hatudu laran-diʼak ba Noemi no Rute, ida-neʼe hanesan hatudu laran-diʼak ba mane sira-neʼe, tanba se sira sei moris hela karik, sira hakarak duni atu tau matan ba Noemi no Rute neʼebé sira hadomi.

^ par. 7 Provérbios 19:17: “Nia neʼebé hatudu laran-diʼak ba ema kiʼik fó empresta ba Maromak Jeová, no Maromak sei selu fali ninia hahalok diʼak.”

^ par. 11 Ulukliu, mane neʼebé mate neʼe nia maun-alin rasik mak iha direitu atu kaben ho ninia feen neʼebé sai faluk. Tuirmai, mane neʼe nia família neʼebé besik liu mak hetan direitu atu kaben ho feto-faluk neʼe. Neʼe hanesan deʼit ho direitu atu hetan fali liman-rohan.—Números (Bilangan) 27:5-11.

^ par. 13 Salmo 71:17, 18: “17 Oh, Maromak, Ita mak hanorin haʼu husi haʼu-nia tempu joven, no toʼo agora haʼu nafatin fó-hatene kona-ba buat furak oioin neʼebé Ita halo. 18 Toʼo haʼu katuas no fuuk mutin, oh, Maromak, labele husik haʼu, toʼo haʼu fó-hatene buat neʼebé Ita-nia liman halo ba jerasaun neʼe, ba sira hotu neʼebé atu mai, kona-ba Ita-nia kbiit.”

^ par. 20 Rute 3:13-15: “13 ‘Toba deʼit iha kalan neʼe, no iha dadeer se nia mak sei hola fali ó, neʼe diʼak! Husik nia mak halo ida-neʼe. Maibé se nia lakohi atu hola fali ó, entaun haʼu mak sei hola fali ó, hodi Maromak Jeová neʼebé moris, haʼu rasik mak sei halo nuneʼe. Toba deʼit iha neʼe toʼo dadeer.’ 14 No Rute kontinua toba iha Boas nia ain toʼo dadeer-saan no nia hadeer antes ema seluk haree nia. No Boas hatete: ‘Keta halo ema hatene katak feto ida mai iha fatin liri sevada nian.’ 15 Tuirmai nia hatete: ‘Lori ó-nia manta mai, no loke.’ Nuneʼe Rute loke ninia manta, no Boas fakar sevada sasukat neen no fó ba Rute, tuirmai mane neʼe tama ba sidade.”

^ par. 22 Boas fó ba Rute sevada musan sasukat neen, maibé Bíblia la fó-hatene sasukat neen neʼe kilu hira. Baibain, ema Izraél halo serbisu ba loron neen no iha loron hitu sira deskansa, ka hakmatek. Karik buat neʼebé Boas fó ba Rute hatudu katak Rute besik ona atu hetan “hakmatek”, katak lakleur tan nia sei iha uma no laʼen neʼebé sei tau matan ba nia. Maibé iha parte seluk, karik sasukat neen neʼebé Boas fó ba Rute mak sevada musan kanuru boot neen, tanba ida-neʼe deʼit mak Rute bele lori.

^ par. 25 Bíblia fó sai kona-ba feto naʼin-lima neʼebé sai Jesus nia beiʼala, no ida mak Rute. Feto ida seluk mak Rahab. Rahab mak Boas nia inan. (Mateus 1:3, 5, 6, 16) Hanesan ho Rute, Rahab mós laʼós ema Izraél.