Skip to content

Skip to table of contents

 KAPÍTULU 18

Nia “rai metin liafuan sira-neʼe iha ninia laran”

Nia “rai metin liafuan sira-neʼe iha ninia laran”

1, 2. Esplika toʼok kona-ba José no Maria nia viajen. Tanbasá mak viajen neʼe susar ba Maria?

MARIA sente isin moras loos tanba tuur iha kuda-burru nia leten ba oras barak ona. José laʼo iha oin hodi dada kuda-burru, sira laʼo rai dook atu bá Belein. Dala ruma, Maria sente bebé book an iha ninia knotak.

2 Iha tempu neʼe Maria besik atu tuur ahi ona, Bíblia dehan katak “Maria isin-rua todan”. (Lucas 2:5) Maria no José laʼo dook hodi liu husi toos ida ba toos seluk. Karik toos-naʼin balu neʼebé serbisu hela haree ba sira no hakfodak uitoan. Karik sira hanoin: ‘Feto isin-rua todan hanesan neʼe atu bá neʼebé?’ Tanbasá mak Maria laʼo dook loos husi ninia uma iha Nazaré?

3. Knaar espesiál saida mak Maria simu? Ita sei aprende saida kona-ba nia?

3 Buat hotu neʼe komesa iha fulan balu liubá bainhira Maria simu knaar ida neʼebé espesiál liu iha ema nia istória hotu. Nia atu tuur ahi oan-mane neʼebé sei sai Mesias, Maromak nia Oan-Mane. (Lucas 1:35) Maibé agora Maria tenke laʼo rai dook maski nia besik atu tuur ahi ona. Durante tempu hotu neʼe nia laran, Maria sei hasoru susar sira neʼebé koko ninia fiar. Mai ita haree saida mak ajuda nia atu fiar-metin nafatin.

Laʼo-rai toʼo Belein

4, 5. (a) Tanbasá mak José no Maria bá Belein? (b) Liurai Agusto nia lei kumpre profesia saida?

4 Laʼós José no Maria deʼit mak laʼo-rai dook hanesan neʼe. Tanbasá? Tanba Liurai Agusto foin fó lei ba ema hotu atu fila fali ba sira-nia distritu ida-idak atu tau naran no  halo sensus ba populasaun. José halo tuir lei neʼe ka lae? Bíblia hatete: “Tanba José husi umakain David nian, entaun nia laʼo husi sidade Nazaré iha Galileia, no fila fali ba David nia sidade iha Judeia, neʼebé bolu Belein.”—Lucas 2:1-4.

5 Tinan 700 antes neʼe, Bíblia fó-hatene nanis katak Mesias sei moris iha Belein. Liurai Agusto la hatene katak ninia lei neʼe sei halo Maromak nia liafuan sai loos. Tuir loloos, iha sidade rua ho naran Belein, ida mak besik deʼit, kilómetru 11 husi Nazaré. Maibé Bíblia fó-hatene nanis katak Mesias sei moris iha “Belein Efrata”. (Lee Miquéias [Mikha] 5:2. *) Belein Efrata mak suku ida neʼebé kiʼik. Atu bá toʼo fatin neʼe, ema presiza laʼo dook maizumenus kilómetru 130 liuhusi Samaria. Maski dook, José tenke bá duni iha suku kiʼik neʼe atu tau naran tanba iha neʼebá mak José, ninia feen, no ninia beiʼala, Liurai David nia rai.

Maria haree José nuʼudar ulun ba família no simu ninia knaar husi Maromak

6, 7. (a) Tanbasá mak viajen atu bá Belein susar loos ba Maria? (b) Tanba Maria sai ona José nia feen, oinsá mak ida-neʼe kona ninia desizaun sira? (Haree mós nota-rodapé.)

6 Maria sei halo tuir ninia laʼen nia desizaun atu bá ka lae? Atu laʼo rai dook hanesan neʼe mak susar loos ba nia. No mós, karik tanba tempu bailoro besik ramata, dala ruma mós udan. Liután neʼe, Belein mak suku ida neʼebé iha foho leten, aas maizumenus metru 760. Atu laʼo saʼe ba suku neʼe susar loos no sira presiza loron balu. No tanba Maria isin-rua todan, karik sira laʼo neineik liu tanba nia presiza deskansa beibeik. Baibain, feto neʼebé isin-rua todan hanesan neʼe, hakarak iha uma deʼit hamutuk ho ninia família no maluk sira neʼebé bele ajuda nia bainhira atu tuur ahi. Klaru katak Maria presiza hatudu aten-brani atu laʼo dook hanesan neʼe.

Halo viajen atu bá Belein, neʼe la fasil

 7 Maski buat hotu neʼe susar loos ba Maria, maibé livru Lucas esplika katak José “bá atu tau naran hamutuk ho Maria”. Lucas mós esplika katak Maria “sai ona [José nia] kaben”. (Lucas 2:4, 5) Tanba Maria sai ona José nia feen, ida-neʼe sei kona ninia desizaun hotu. Maria haree José nuʼudar ulun ba família no simu ninia knaar husi Maromak atu ajuda no apoia ninia laʼen nia desizaun sira. * Sin, Maria prontu atu halo tuir ninia laʼen, no hodi halo ida-neʼe nia hatudu ninia fiar.

8. (a) Saida tan mak karik book Maria atu bá Belein hamutuk ho José? (b) Oinsá mak Maria nia ezemplu fó laran-manas ba Maromak nia povu neʼebé laran-metin?

8 Saida tan mak book Maria atu halo tuir ninia laʼen? Nia hatene ona ka lae, katak Bíblia fó-hatene nanis Mesias sei moris iha Belein? Bíblia la konta kona-ba neʼe. Maibé ita bele fiar katak Maria hatene ona kona-ba neʼe tanba  ulun-naʼin relijiaun sira no besik ema hotu iha tempu neʼebá hatene ona. (Mateus 2:1-7; João 7:40-42) Maria hatene didiʼak kona-ba eskritura sira. (Lucas 1:46-55) Karik Maria foti desizaun atu laʼo rai dook hanesan neʼe atu halo tuir ninia laʼen, ka tanba governu mak haruka, ka tanba Bíblia fó-hatene nanis ona kona-ba neʼe, ita la hatene loos. Maibé buat neʼebé ita hatene mak Maria fó ezemplu diʼak ba ema hotu. Jeová hafolin duni mane no feto neʼebé hatudu hahalok haraik-an no halo tuir. Maria nia ezemplu furak neʼe fó laran-manas duni mai ita, liuliu tanba ema barak ohin loron la hatudu hahalok haraik-an no halo tuir.

Kristu moris mai

9, 10. (a) Karik José no Maria hanoin saida nuʼudar sira hakbesik Belein? (b) José no Maria hela iha neʼebé? Tanbasá?

9 Maria sente kmaan loos kuandu nia bele haree husi dook suku Belein besik ona. Nuʼudar sira laʼo tuir foho-lolon, sira liu toʼos oliveira nian no sira haree ai-oliveira barak neʼebé ema seidauk kuʼu. Karik sira hanoin fila fali kona-ba rai neʼe nia istória. Hanesan profeta Miquéias fó-hatene nanis, suku Belein mak suku neʼebé kiʼik liu no la  iha naran-boot hanesan sidade sira seluk iha rai-Judá. Maski suku neʼe mak kiʼik deʼit, maibé maizumenus tinan rihun ida antes neʼe, Boas, Noemi no mós Liurai David moris iha fatin neʼe.

10 Kuandu Maria no José toʼo Belein, sidade neʼe nakonu ona ho ema no sena-malu tebes. Ema seluk tama uluk atu tau naran, tan neʼe la iha ona fatin ba sira atu hela no sira toba deʼit iha animál nia luhan. * Karik José hanoin barak bainhira ninia feen komesa sente moras loos. Maria nunka sente moras hanesan neʼe no agora iha fatin hanesan neʼe mak nia komesa atu tuur ahi.

11. (a) Tanbasá mak feto barak bele komprende kona-ba moras neʼebé Maria sente? (b) Jesus mak “oan primeiru” iha dalan saida deʼit?

11 Feto barak iha mundu tomak bele komprende kona-ba moras neʼebé Maria sente. Maizumenus tinan 4.000 antes neʼe, Jeová fó-hatene nanis katak feto hotu sei sente moras kuandu sira tuur ahi, neʼe tanba ita hotu sala-naʼin. (Gênesis [Kejadian] 3:16) Maria tuur ahi hanesan deʼit ho feto seluk. Livru Lucas la konta buat barak kona-ba tempu neʼe, maibé dehan deʼit katak Maria “tuur ahi oan-mane ida, ninia oan primeiru”. (Lucas 2:7) Sin, Maria nia “oan primeiru” moris ona, maibé Maria mós iha oan seluk tan, karik hamutuk naʼin-hitu. (Marcos 6:3) Maria nia oan neʼe mak espesiál tebes tanba nia laʼós deʼit Maria nia oan, maibé nia mak Maromak Jeová nia “oan primeiru husi kriasaun sira hotu”. Sin, Maromak nia Oan-Mane mesak!—Koloso 1:15.

12. Maria hatoba nia bebé iha neʼebé? Tanbasá mak ita bele dehan katak dezeñu, prezépiu, no drama neʼebé ema halo kona-ba Jesus laʼós realidade?

12 Agora, Maria koʼus nia oan no “haneras hodi hatoba nia iha animál nia han-fatin”. (Lucas 2:7) Ema barak iha mundu tomak gosta atu hanoin fali kona-ba tempu neʼe hodi halo dezeñu, prezépiu, no drama sira neʼebé book ema nia sentimentu, maibé buat sira-neʼe laʼós realidade. Hanoin toʼok, animál nia han-fatin hanesan saida loos? Neʼe laʼós fatin furak maibé fatin neʼebé bibi-atan tau duʼut ba animál sira atu han. Família neʼe hela iha animál nia luhan, fatin neʼebé foʼer no dois tebes. Tuir loloos, la iha inan-aman  neʼebé sei tau sira-nia oan iha fatin hanesan neʼe. Baibain inan-aman hotu hakarak buat neʼebé diʼak liu ba sira-nia oan, oinsá liután ho Maria no José. Klaru katak sira mós hakarak tebes atu fó buat neʼebé diʼak liu ba Maromak nia Oan-Mane, loos ka lae?

13. (a) Iha dalan saida deʼit mak José no Maria halo buat neʼebé sira bele halo no uza buat neʼebé sira iha hodi tau matan ba Jesus? (b) Oinsá mak inan-aman sira ohin loron bele halo tuir José no Maria hodi tau uluk buat neʼebé importante liu?

13 Maibé, Maria no José la hanoin demais kona-ba sira-nia situasaun aat neʼe, sira hakaʼas an atu halo buat neʼebé sira bele halo no uza buat neʼebé sira iha. Porezemplu, Maria tau matan didiʼak ba ninia bebé neʼe hodi haneras nia, atu nuneʼe nia la sente malirin no hatoba nia iha fatin neʼebé seguru. Sin, maski susar, maibé Maria halo buat hotu neʼebé nia bele halo atu tau matan ba ninia oan. No mós, José no Maria hatene katak hanorin oan neʼe atu hadomi Jeová mak buat neʼebé importante liu. (Lee Deuteronômio [Ulangan] 6:6-8. *) Ohin loron, inan-aman sira mós hakarak sira-nia oan atu hafolin sira-nia relasaun ho Maromak nuʼudar buat neʼebé importante liu.

Bainaka sira fó laran-manas ba José no Maria

14, 15. (a) Tanbasá mak bibi-atan sira hein namanas atu haree bebé neʼe? (b) Saida mak bibi-atan sira halo depois haree tiha Jesus hatoba iha animál nia han-fatin?

14 Derrepente deʼit situasaun neʼebé hakmatek sai rame. Tanba bibi-atan sira ansi tebes atu tama iha animál nia luhan atu haree família neʼe, liuliu bebé neʼebé foin moris. Bibi-atan sira-nia oin hatudu katak sira sente kontente no hein namanas atu haree bebé neʼe. Sira foin mai husi rai-luan iha foho, fatin neʼebé sira hein sira-nia bibi. * Bibi-atan sira konta ba Maria no José kona-ba esperiénsia kapás  neʼebé sira foin hetan. Nuʼudar sira hein hela bibi iha kalan, anju ida mosu ba sira no Jeová nia glória nabilan haleʼu sira. Anju neʼe hatete katak Kristu, ka Mesias, foin moris iha Belein no sira sei haree bebé neʼe haneras no hatoba iha animál nia han-fatin. Ikusmai sira konta kona-ba buat neʼebé furak liután neʼebé akontese bainhira anju barak mosu no kanta knananuk atu fó glória ba Maromak.—Lucas 2:8-14.

15 Tan buat hotu neʼe, bibi-atan sira-neʼe neʼebé haraik-an ho ansi bá kedas iha Belein. Loloos sira kontente tebes bainhira sira haree bebé hatoba iha bibi nia han-fatin hanesan deʼit ho buat neʼebé anju fó-hatene. Sira mós labele nonook kona-ba liafuan diʼak neʼe. Bíblia hatete: “Sira konta fali liafuan neʼebé fó sai ona . . . No ema hotu neʼebé rona sai hakfodak ho buat neʼebé bibi-atan sira fó sai.” (Lucas 2:17, 18) Ulun-naʼin relijiaun sira iha tempu neʼebá la hafolin bibi-atan sira. Maibé Jeová hafolin tebes bibi-atan sira-neʼe, neʼebé hatudu hahalok haraik-an no laran-metin. Maibé oinsá mak sira-nia liafuan neʼe book Maria nia laran?

Jeová hafolin tebes bibi-atan sira neʼebé haraik-an

16. Oinsá mak Maria hatudu katak nia hanoin didiʼak kona-ba buat neʼebé importante liu? Oinsá mak nia hametin nafatin ninia fiar?

16 Maski Maria lakon ninia forsa barak tanba foin tuur ahi, maibé nia rona didiʼak ba bibi-atan sira-nia liafuan hotu. Liután neʼe, “Maria hahú rai metin liafuan sira-neʼe iha ninia laran no hanoin kleʼan kona-ba buat sira-neʼe katak sá”. (Lucas 2:19) Sin, Maria hatene no hanoin didiʼak kona-ba buat neʼebé importante liu. Nia hatene katak anju neʼe nia lia-menon mak importante tebes. Jeová, ninia Maromak, hakarak nia atu hatene no komprende didiʼak kona-ba ninia oan nia moris no knaar. Tan neʼe mak nia rai metin liafuan sira-neʼe iha ninia laran, atu nuneʼe nia bele hanoin filafali durante tempu neʼebé nia sei haboot ninia oan. Ida-neʼe mak hanesan xave ida ba Maria atu hametin nafatin ninia fiar iha ninia moris tomak.—Lee Ebreu 11:1.

Maria rona didiʼak ba bibi-atan sira no rai hela sira-nia liafuan iha ninia laran

17. Oinsá mak ita bele halo tuir Maria nia ezemplu kona-ba hafolin lia-loos husi Maromak nia Liafuan?

 17 Ita mós hakarak halo tuir Maria nia ezemplu ka lae? Maromak Jeová halo ninia Liafuan nakonu ho hanorin neʼebé loos no importante. Maibé hanorin sira-neʼe sei sai leet deʼit se ita la simu. Sin, ita simu Maromak nia hanorin bainhira ita lee Bíblia loroloron. Laʼós nuʼudar livru baibain deʼit maibé nuʼudar liafuan neʼebé Maromak mak leno. (2 Timóteo 3:16) Tan neʼe hanesan Maria, ita mós presiza aprende no hanoin-hetan lia-loos kona-ba Jeová no hanoin kleʼan kona-ba neʼe. Se ita hanoin kleʼan kona-ba buat neʼebé ita lee iha Maromak nia Liafuan, no hanoin didiʼak oinsá mak ita bele halo tuir Jeová nia konsellu sira iha ita-nia moris, ita sei halo ita-nia fiar sai metin liután.

Nia rai liafuan barak tan iha ninia laran

18. (a) Oinsá mak Maria no José halo tuir Moisés nia Ukun-Fuan kuandu Jesus sei bebé? (b) Sakrifísiu neʼebé José no Maria fó ba Maromak hatudu saida kona-ba sira?

18 Bainhira bebé neʼe loron ualu ona, nia hetan sirkunsizaun hodi tuir Ukun-Fuan neʼebé Jeová fó ba Moisés, no  Maria no José hanaran nia Jesus, hanesan anju haruka. (Lucas 1:31) Depois neʼe, bainhira Jesus loron haatnulu ona, sira laʼo maizumenus kilómetru 10 husi Belein hodi bá templu iha Jeruzalein, atu hasaʼe sakrifísiu hodi halo tuir Jeová nia Ukun-Fuan kona-ba sai moos. Tuir Ukun-Fuan, ema kiak sira bele fó manu-falur rua ka manu-pombu rua nuʼudar sakrifísiu. Maski José no Maria karik sente moe tanba sira la bele fó bibi-aman nuʼudar sakrifísiu, maibé sira nafatin halo buat hotu neʼebé sira bele halo atu halo tuir Ukun-Fuan. No sira simu laran-manas bainhira sira iha templu.—Lucas 2:21-24.

19. (a) Oinsá mak Simeão hatoʼo liafuan neʼebé Maria bele rai tan iha ninia laran? (b) Ana halo saida kuandu nia haree Jesus?

19 Katuas ida naran Simeão hakbesik sira no hatoʼo liafuan balu neʼebé Maria bele rai tan iha ninia laran. Uluk, liuhusi espíritu santu Maromak hatudu ba Simeão katak nia sei la mate antes nia haree Mesias, no iha tempu neʼe Jeová nia espíritu santu fó-hatene ba nia katak bebé Jesus mak Ida neʼebé sei salva ema hotu, hanesan Bíblia fó-hatene nanis. Simeão mós fó avizu ba Maria katak loron  ida nia sei laran-kanek hanesan surik naruk ida sona borus ninia laran. (Lucas 2:25-35) Maski liafuan neʼe halo Maria triste, maibé klaru katak ida-neʼe ajuda duni Maria atu tahan, liutiha tinan tolunulu liu kuandu liafuan neʼe sai loos. Ikusmai, profeta ida naran Ana haree bebé Jesus neʼe no komesa koʼalia ba ema hotu neʼebé hein namanas ba Jeruzalein nia salvasaun.—Lee Lucas 2:36-38.

Maria no José simu laran-manas iha Jeová nia templu iha Jeruzalein

20. Tanbasá mak ita bele dehan katak José no Maria halo desizaun diʼak hodi lori Jesus ba Jeová nia templu?

20 Bainhira Maria no José lori sira-nia bebé ba Jeová nia templu iha Jeruzalein, ida-neʼe mak desizaun diʼak tebes. Sira-nia toman neʼe sai ezemplu diʼak ba Jesus iha ninia moris tomak atu sempre bá iha Jeová nia templu. Kuandu José no Maria iha fatin neʼe, sira halo buat hotu neʼebé sira bele halo hodi serbí Jeová, no sira simu matadalan no liafuan neʼebé fó laran-manas ba sira. Bainhira Maria sai husi templu, ninia fiar sai metin liután. Ninia laran nakonu ho Maromak nia liafuan sira neʼebé nia bele hanoin filafali no hatoʼo ba ema seluk.

21. Oinsá mak ita bele halo ita-nia fiar sai metin liután hanesan ho Maria?

21 Ohin loron, bainhira inan-aman sira halo tuir José no Maria nia ezemplu, ida-neʼe diʼak tebes. Inan-aman barak neʼebé Testemuña ba Jeová, badinas atu lori sira-nia oan ba reuniaun kristaun sira. Inan-aman sira-neʼe hakaʼas an hodi hatoʼo liafuan neʼebé fó laran-manas ba sira-nia maluk kristaun. Kuandu sira fila ba uma depois reuniaun hotu, sira-nia fiar sai metin liután, sente haksolok, no iha buat diʼak barak atu fó-hatene ba ema seluk. Ita mós haksolok tebes atu ransu hamutuk ho inan-aman sira-neʼe! No nuʼudar ita halo nuneʼe, ita-nia fiar mós sei sai metin liután hanesan ho Maria.

^ par. 5 Miquéias 5:2: “No ó, oh, Belém Efrata, ida neʼebé kiʼikoan liu atu hela iha Judá nia rihun ba rihun nia leet, husi ó sei sai mai haʼu ema ida neʼebé sei sai ukun-naʼin iha Izraél, neʼebé ninia hun husi tempu uluk kedas, husi tempu neʼebé la bele sura.”

^ par. 7 Uluk, kuandu anju foin fó knaar ba Maria, Bíblia hatete katak “Maria prepara an no . . . laʼo” atu bá vizita Isabel. (Lucas 1:39) Maski iha tempu neʼebá nia promete ona atu kaben ho José, maibé sira seidauk moris hamutuk nuʼudar feen-laʼen. Tan neʼe, nia foti desizaun rasik maski nia seidauk husu lisensa husi José. Maibé, bainhira sira kaben ona, Bíblia dehan katak atu laʼo rai dook atu bá Belein mak José nia desizaun.

^ par. 10 Iha tempu neʼebá, ema iha toman atu fó uma ka kuartu kiʼik ba ema laʼo-rai sira atu toba.

^ par. 13 Deuteronômio 6:6-8: “Liafuan sira-neʼe neʼebé haʼu fó ba imi ohin, tenkesér rai iha imi laran; no imi tenkesér hanorin beibeik liafuan sira-neʼe ba imi-nia oan sira no koʼalia ba sira kuandu imi tuur iha imi-nia uma no kuandu imi laʼo iha dalan no kuandu imi atu toba no kuandu imi hadeer. No imi tenke kesi liafuan sira-neʼe iha imi-nia liman nuʼudar sinál, no sira tenke sai hanesan talin neʼebé kesi iha imi-nia reen-toos.”

^ par. 14 Tanba bibi-atan sira iha tempu neʼebá hela iha liʼur, ida-neʼe hatudu katak Bíblia nia istória mak loos. Jesus moris laʼós iha fulan-Dezembru bainhira bibi sira tenke sulan besik iha uma, maibé karik iha semana primeiru iha fulan-Outubru.