Ebreu 11:1-40

  • Fiar nia signifikadu (1, 2)

  • Ezemplu kona-ba ema neʼebé hatudu fiar (3-40)

    • Se la iha fiar, labele halo Maromak kontente (6)

11  Fiar mak laran-metin katak ita-nia esperansa sei sai loos;+ fiar mak evidénsia neʼebé hatudu ho klaru* katak buat sira-neʼe iha duni maski matan labele haree.  Tanba liuhusi fiar mak ema iha tempu uluk* hetan sasin katak Maromak simu sira.  Liuhusi fiar mak ita hatene katak Maromak kria buat hotu iha lalehan no rai* liuhusi ninia liafuan, nuneʼe Maromak uza buat sira neʼebé matan labele haree hodi halo buat sira neʼebé matan bele haree.  Liuhusi fiar mak Abel hasaʼe sakrifísiu ida ba Maromak, sakrifísiu neʼebé folin-boot liu fali Caim nian,+ no liuhusi fiar neʼe mak nia simu sasin katak nia ema laran-loos, tanba Maromak simu* ninia prezente sira,+ no maski nia mate ona, nia koʼalia hela+ liuhusi ninia fiar.  Liuhusi fiar mak Enoc+ la haree mate tanba Maromak foti tiha nia, no ema la hetan tan nia iha fatin hotu tanba Maromak foti ona nia;+ maibé antes Maromak foti nia, Maromak fó sasin katak Enoc halo ninia laran kontente.  Tuir loloos, se ita la iha fiar, ita labele halo Maromak kontente. Tanba ema neʼebé hakbesik ba Maromak tenke fiar katak Maromak iha duni, no mós fiar katak Maromak sei fó kolen ba sira neʼebé buka nia ho laran.+  Liuhusi fiar mak Noé+ hamtaʼuk Maromak no halo ró*+ hodi salva ninia umakain bainhira simu tiha avizu kona-ba buat neʼebé seidauk haree ho matan;+ no liuhusi fiar neʼe, nia hatudu katak mundu neʼe merese hetan kastigu,+ no Maromak haree nia nuʼudar ema laran-loos tanba ninia fiar.  Liuhusi fiar mak Abraão+ halo tuir Maromak bainhira Maromak bolu nia, no nia bá fatin neʼebé Maromak promete atu fó ba nia nuʼudar liman-rohan. Nia sai husi ninia rai rasik, maski nia la hatene atu bá loos neʼebé.+  Liuhusi fiar mak nia hela nuʼudar ema estranjeiru iha rai seluk,+ rai neʼebé Maromak promete ona, no nia hela iha tenda+ hamutuk ho Isaac no Jacob, neʼebé mós simu promesa neʼebé hanesan husi Maromak.+ 10  Tanba nia hein hela sidade neʼebé iha hun metin, neʼebé Maromak mak halo ninia planu* no harii sidade neʼe.+ 11  Liuhusi fiar mak Sara mós simu kbiit hodi sai isin-rua, maski nia ferik ona,+ tanba nia hatene katak Ida neʼebé halo promesa neʼe mak laran-metin.* 12  Tanba razaun neʼe, liuhusi mane ida neʼebé ninia isin hanesan mate ona,*+ mak oan sira moris mai,+ no oan sira-neʼe sai barak hanesan fitun iha lalehan no hanesan rai-henek iha tasi-ibun, neʼebé labele sura.+ 13  Maski ema sira-neʼe hotu la haree promesa sira-neʼe sai loos,+ maibé sira hotu fiar metin toʼo mate. Sira haree promesa sira-neʼe husi dook+ no simu promesa neʼe ho haksolok, no sira fó sai ba ema hotu katak sira mak ema estranjeiru neʼebé hela temporáriu iha rai neʼe. 14  Tanba ema sira neʼebé koʼalia hanesan neʼe hatudu ho klaru katak sira buka namanas fatin neʼebé sei sai sira-nian. 15  Maski nuneʼe, se sira hanoin beibeik kona-ba fatin neʼebé sira husik ona,+ sira bele buka oportunidade atu fila fali. 16  Maibé, sira hakaʼas an atu hetan fatin neʼebé diʼak liu, neʼebé iha ligasaun ho lalehan. Tan neʼe, Maromak la moe kona-ba sira bainhira sira bolu nia nuʼudar sira-nia Maromak,+ tanba nia prepara ona sidade ida ba sira.+ 17  Liuhusi fiar mak Abraão prontu atu hasaʼe Isaac kuandu Maromak koko nia.+ Abraão, neʼebé simu ona promesa sira ho haksolok, komesa atu hasaʼe ninia oan-mane mesak ba Maromak nuʼudar sakrifísiu+ 18  maski Maromak fó-hatene ona ba nia, hodi dehan: “Bei-oan neʼebé promete ona ba ó sei mai liuhusi Isaac.”+ 19  Maibé nia hatene katak Maromak bele halo Isaac moris fali husi mate, no nia simu fali duni Isaac husi mate, no neʼe sai nuʼudar símbolu kona-ba buat neʼebé sei akontese iha futuru.+ 20  Liuhusi fiar mak Isaac mós fó bensaun ba Jacob+ no Esaú+ kona-ba buat sira neʼebé atu mai. 21  Liuhusi fiar mak Jacob, bainhira nia besik ona atu mate,+ nia fó bensaun ba José nia oan-mane+ ida-idak no nia presiza sadere ba ninia ai-tonka bainhira adora Maromak.+ 22  Liuhusi fiar mak José, bainhira nia besik ona atu mate, nia koʼalia kona-ba tempu neʼebé ema Izraél sira sai husi rai-Ejitu, no nia fó matadalan* kona-ba ninia ruin sira.*+ 23  Liuhusi fiar mak Moisés nia inan-aman subar nia ba fulan tolu depois nia moris mai,+ tanba sira haree katak labarik neʼe bonitu+ no sira la taʼuk liurai nia orden.+ 24  Liuhusi fiar mak Moisés lakohi ema bolu nia nuʼudar Faraó* nia oan-feto nia oan+ bainhira nia sai boot ona.+ 25  Nia hili atu hetan terus hamutuk ho Maromak nia povu duké haksolok ba tempu uitoan hodi halo sala, 26  tanba nia haree katak kuandu ema hamoe nia nuʼudar ema neʼebé Maromak hili ona,* neʼe iha folin boot liu fali rikusoin husi rai-Ejitu, tanba nia hateke deʼit ba kolen neʼebé nia atu simu. 27  Liuhusi fiar mak nia husik hela rai-Ejitu,+ laʼós tanba taʼuk liurai nia hirus,+ maibé tanba nia kontinua tahan hanesan haree Ida neʼebé matan la haree.+ 28  Liuhusi fiar mak nia selebra Páskua* no hisik animál nia raan, atu nuneʼe Maromak nia anju sei la oho* sira-nia oan primeiru.+ 29  Liuhusi fiar mak sira hakur Tasi Mean hanesan laʼo iha rai maran,+ maibé kuandu ema Ejitu sira koko atu halo hanesan, sira mout hotu.+ 30  Liuhusi fiar mak moru Jerikó monu bainhira ema Izraél marxa haleʼu tiha moru sira-neʼe ba loron hitu.+ 31  Liuhusi fiar mak feto-aat* Raab la mate hamutuk ho ema sira neʼebé la halo tuir, tanba nia simu espiaun sira ho dame.+ 32  Haʼu sei koʼalia tan kona-ba sé? Tanba tempu la toʼo atu haʼu konta kona-ba Gideão,+ Barac,+ Sansão,+ Jefte,+ David,+ Samuel,+ no mós profeta sira seluk. 33  Liuhusi fiar mak sira manán funu hasoru liurai sira,+ halaʼo justisa, simu promesa,+ taka leaun nia ibun,+ 34  ahi la han sira,+ halai sees husi surik,+ hetan fali kbiit boot kuandu fraku,+ sai kbiit boot iha funu,+ no manán tropa sira husi rai seluk.+ 35  Feto sira simu fali sira-nia família neʼebé mate ona liuhusi moris-hiʼas,+ maibé mane seluk hetan terus toʼo mate tanba sira lakohi sai livre,* atu nuneʼe sira bele hetan moris-hiʼas neʼebé diʼak liu. 36  Sin, ema seluk hetan terus tanba ema hamoe sira no baku sira ho xikote, laʼós neʼe deʼit, ema kesi sira ho korrente+ no hatama ba komarka.+ 37  Ema tuda sira,+ koko sira, ema kadoo sira ba rua, ema oho sira ho surik,+ sira laʼo bá-mai no hatais roupa husi bibi-malae no bibi-timur nia kulit,+ sira falta buat neʼebé sira presiza, sira iha terus laran,+ ema halo aat ba sira;+ 38  no mundu la merese atu sira hela bá. Sira laʼo bá-mai iha rai-fuik maran, iha foho sira, iha fatuk-kuak+ no rai-kuak sira. 39  Kona-ba ema sira-neʼe hotu, Maromak fó sasin katak sira halo ninia laran kontente tanba sira-nia fiar, maibé sira la haree promesa neʼe sai loos, 40  tanba Maromak hanoin nanis ona atu fó buat neʼebé diʼak liu ba ita,+ atu nuneʼe sira labele sai perfeitu se la hamutuk ho ita.

Nota-rodapé

Ka “evidénsia forte”.
Ka “mak ita-nia beiʼala sira”.
Ka “halo sistema sira-neʼe”. Haree “Sistema” iha Glosáriu.
Ka “Maromak fó sasin hodi rekoñese”.
Haree nota iha Mt 24:38.
Ka “mak arkitetu”.
Ka “bele tau fiar”.
Neʼe katak labele iha oan tanba idade ona.
Ka “mandamentu”.
Ka “atu hakoi nia”.
Neʼe mak títulu ba liurai sira iha rai-Ejitu.
Orj., “nuʼudar Kristu”.
Orj., “la kona”.
Ka “prostituta”.
Ka “sai livre hodi selu folin”.