Skip to content

Skip to table of contents

 KAPÍTULU 11

Nia matan-moris, no hein nafatin

Nia matan-moris, no hein nafatin

1, 2. Elias presiza halo knaar saida? Saida mak la hanesan entre Elias no Acab?

ELIAS hakarak tebes atu halo orasaun mesak ba ninia Aman iha lalehan. Maibé ema barak neʼebé haleʼu nia foin haree profeta neʼe husu ninia Maromak atu halo ahi tun husi lalehan. Karik sira barak buka oin deʼit atu halo nia kontente hodi nia simu sira. Antes Elias saʼe ba Foho Carmelo nia tutun hodi halo orasaun ba Maromak Jeová, nia presiza halo knaar ida neʼebé susar loos, neʼe mak nia tenke bá koʼalia ho Liurai Acab.

2 Acab no Elias mak la hanesan duni. Maski Acab mak liurai no hatais roupa neʼebé furak, maibé loloos nia mak ema neʼebé fraku tanba taʼuk ema, kaan osan no adora maromak falsu. Maibé Elias hatais roupa neʼebé simples deʼit neʼebé baibain Maromak nia profeta sira hatais. Roupa neʼe halo husi animál nia kulit ka husi bibi ka kuda-kamelu nia fulun. Elias mak mane ida neʼebé iha fiar boot, nia hatudu hahalok laran-metin no aten-brani. Maibé, nuʼudar loron ida-neʼe besik atu ramata, buat barak akontese neʼebé hatudu sai mane naʼin-rua neʼe nia hahalok oinsá loos.

3, 4. (a) Tanbasá mak loron neʼe susar loos ba Acab no ba ema neʼebé adora Baal? (b) Ita sei koʼalia kona-ba pergunta saida deʼit?

3 Loron ida-neʼe mak susar loos ba Acab no ba ema neʼebé adora maromak Baal. Relijiaun falsu neʼebé Acab no ninia feen, Liurai-feto Jezabel, haburas iha nasaun Izraél nia suku sanulu, foin hetan moe boot. Iha tempu neʼe duni ema haree katak sira-nia maromak Baal mak falsu. Nia la konsege halo lakan ahi maski ninia profeta falsu sira dansa, hamulak no hakanek an toʼo raan suli. Baal mós la iha kbiit atu proteje ninia profeta falsu naʼin-450 husi kastigu-mate neʼebé sira merese atu simu. Maibé iha buat seluk tan neʼebé sira-nia  maromak falsu neʼe la bele halo no ida-neʼe sei hatudu katak nia kbiit-laek duni. Durante tinan tolu liu, Baal nia profeta falsu sira harohan ba nia atu halo udan tun, maibé Baal la iha kbiit atu kumpre povu nia hakarak. Lakleur tan, Jeová rasik sei hatudu katak nia mak Maromak neʼebé loos hodi halo udan tun.—1 Reis (Raja-Raja) 16:30–17:1; 18:1-40.

4 Maibé bainhira mak Jeová sei halo udan tun? Saida mak Elias sei halo nuʼudar nia hein namanas ba tempu neʼe? No ita bele aprende saida husi Elias nia fiar? Mai ita haree kona-ba neʼe nuʼudar ita lee ninia istória.—Lee 1 Reis (Raja-Raja) 18:41-46. *

 Elias nia toman atu halo orasaun

5. Saida mak Elias hatete ba Acab atu halo? Acab aprende buat ruma husi buat neʼebé akontese iha loron neʼe ka lae?

5 Elias koʼalia ba Acab hodi dehan: “Saʼe bá, han no hemu bá; tanba udan boot nia lian mai ona.” Liurai Acab aprende buat ruma husi buat neʼebé akontese tiha ona iha loron neʼe ka lae? Istória neʼe la konta, maibé Acab la temi liafuan ida neʼebé hatudu katak nia arrepende an, ka husu Elias atu halo orasaun ba Jeová hodi haraik perdua ba nia. Acab la halo ida-neʼe, Bíblia dehan deʼit katak Acab “bá han no hemu”. (1 Reis [Raja-Raja] 18:41, 42) Maibé saida mak Elias halo?

6, 7. Elias halo orasaun kona-ba saida? Tanbasá?

6 Bíblia hatete: “Kona-ba Elias, nia saʼe ba Foho Carmelo nia tutun no komesa tuku tuur iha rai no ninia oin besik iha ninia ain-tuur rua.” Nuʼudar Acab bá atu han, Elias uza oportunidade neʼe hodi halo orasaun ba ninia Aman iha lalehan. Haree oinsá Elias hatudu hahalok haraik-an kuandu nia hakruʼuk ho ninia isin tomak. Elias hakneʼak toʼo nia oin besik kona ninia ain-tuur. Tanbasá? Tiago 5:18 dehan katak Elias halo orasaun hodi husu Maromak atu halo udan mai ona. Karik nia hatoʼo orasaun ida-neʼe iha Foho Carmelo nia tutun.

Elias nia orasaun sira hatudu katak nia hakarak tebes atu haree oinsá mak Jeová halaʼo ninia hakarak

7 Uluk, Jeová hatete: “Haʼu sei halo udan tau duni atu habokon rai.” (1 Reis [Raja-Raja] 18:1) Tan neʼe, Elias halo orasaun atu nuneʼe Jeová nia hakarak bele sai loos. Maizumenus tinan rihun ida depois neʼe, Jesus mós hanorin ninia dixípulu sira atu halo orasaun hodi Maromak nia hakarak bele sai loos.—Mateus 6:9, 10.

8. Elias nia ezemplu hanorin ita saida kona-ba orasaun?

8 Elias nia ezemplu hanorin ita buat barak kona-ba orasaun. Buat neʼebé Elias hanoin ulukliu mak atu Maromak nia hakarak sai loos. Kuandu ita halo orasaun, diʼak atu hanoin-hetan katak “buat naran deʼit neʼebé ita husu hodi tuir [Maromak nia] hakarak, nia rona ita”. (1 João 5:14) Loos duni, atu Maromak bele rona ita-nia orasaun ita presiza hatene  Maromak nia hakarak. Ida-neʼe fó razaun diʼak mai ita atu estuda Maromak nia Liafuan loroloron. Tuir loloos, Elias mós hakarak udan atu mai tanba nia hanoin kona-ba terus neʼebé ninia povu sente ba tempu kleur. Karik iha ninia fuan-laran nakonu ho liafuan agradese tanba milagre neʼebé Jeová halo ona iha loron neʼe. Ita rasik nia orasaun mós bele hatudu katak ita agradese ba Maromak no hanoin ema seluk nia diʼak.—Lee 2 Korinto 1:11; Filipe 4:6.

Fiar-metin no matan-moris

9. Saida mak Elias haruka ninia atan atu halo? Ita sei koʼalia kona-ba hahalok rua saida?

9 Elias fiar katak Jeová sei halo udan mai duni, maibé nia la hatene bainhira loos mak Jeová sei halo ida-neʼe. Entaun, durante tempu neʼe Elias halo saida? Bíblia dehan: “Nia hatete ba ninia atan: ‘Favór ida, bá no haree ba tasi.’ Nuneʼe nia bá haree no nia hatete: ‘Buat ida la iha.’ Tuirmai Elias hatete tan: ‘Bá fali’, toʼo dala hitu.” (1 Reis [Raja-Raja] 18:43) Elias nia ezemplu neʼe hanorin ita buat rua. Primeiru, nia hatudu katak nia fiar-metin katak Maromak sei kumpre ninia liafuan, no segundu nia hein ho matan-moris.

Elias hakaʼas an atu buka sinál neʼebé hatudu katak Jeová sei halo duni udan tun

10, 11. (a) Oinsá mak Elias hatudu ninia fiar ba buat neʼebé Jeová promete ona? (b) Tanbasá mak ita mós bele iha fiar hanesan neʼe?

10 Elias hakarak tebes atu hatene oinsá mak Jeová sei halaʼo ninia hakarak, tan neʼe nia haruka ninia atan atu saʼe ba fatin neʼebé aas hodi bele haree momoos sinál sira iha lalehan neʼebé hatudu katak udan atu mai ona. Maibé ninia atan fila fali no dehan: “Buat ida la iha.” Lalehan haree moos no la iha kalohan. Entaun, tanbasá mak Elias foin hatete ba Liurai Acab katak “udan boot nia lian mai ona”? Oinsá mak profeta neʼe bele hatete hanesan neʼe se nia seidauk haree kalohan nakukun?

11 Elias hatene Maromak Jeová nia promesa sira. No nuʼudar profeta neʼebé reprezenta Jeová, Elias fiar katak Jeová sei kumpre duni ninia liafuan. Elias nia fiar-metin mak halo nia hanesan rona ona udan nia lian, maski udan seidauk tun. Karik ida-neʼe fó-hanoin mai ita kona-ba Moisés nia ezemplu. Bíblia hatete: “Nia kontinua hamriik metin hanesan haree Ida neʼebé matan la haree.” Ita-nia fiar ba Maromak hanesan neʼe ka lae? Maromak fó ona razaun barak mai ita atu tau fiar ba nia no ba ninia promesa sira.—Ebreu 11:1, 27.

12. Oinsá mak Elias hatudu katak nia matan-moris nafatin? Nia halo saida kuandu nia rona katak iha kalohan kiʼik neʼebé sai husi tasi?

 12 Tuirmai, hanoin kona-ba oinsá mak Elias hatudu katak nia matan-moris nafatin. Nia haruka ninia atan atu fila fali hodi bá haree laʼós dala ida ka rua deʼit maibé dala hitu! Hanoin toʼok, karik Elias nia atan bele sai baruk atu bá-mai dala barak hanesan neʼe. Maibé, Elias hakarak tebes atu haree sinál neʼebé hatudu katak udan besik atu tun. Bainhira ninia atan fila fali ba dala ikus, nia dehan: “Haree! Iha kalohan neʼebé kiʼik hanesan ema nia liman-tanen neʼebé sai husi tasi.” Hanoin toʼok nuʼudar atan neʼe lolo ninia liman hodi sukat ho ninia liman-tanen kalohan kiʼik neʼebé sai husi Tasi Boot (Tasi-Mediterráneu). Karik tanba kalohan neʼe kiʼik deʼit, Elias nia atan ladún iha interese kona-ba neʼe. Maibé ba Elias kalohan kiʼik neʼe mak importante tebes. Tan neʼe, nia haruka kedas ninia atan hodi hatete: “Saʼe bá no hatete ba Acab: ‘Prepara ó-nia kuda-karreta! No bá ona, nuneʼe udan boot labele hanetik ó!ʼ”—1 Reis (Raja-Raja) 18:44.

13, 14. (a) Oinsá mak ita bele banati-tuir Elias nia ezemplu kona-ba matan-moris nafatin? (b) Ita iha razaun saida deʼit atu sai badinas liután iha ita-nia serbisu ba Maromak?

13 Dala ida tan, Elias fó ezemplu neʼebé diʼak mai ita. Agora ita moris iha tempu neʼebé Maromak besik ona atu kumpre ninia hakarak neʼebé nia fó-hatene nanis. Elias hein Jeová atu halo udan tun hodi halakon tempu susar neʼebé ninia povu hasoru. Nuneʼe mós ho ohin loron, Maromak Jeová nia povu hein tempu neʼebé nia sei halakon mundu aat neʼe. (1 João 2:17) Nuʼudar ita hein ba tempu neʼe, ita presiza matan-moris nafatin hanesan Elias. Maromak nia Oan-Mane, Jesus, fó avizu ba ninia dixípulu sira hodi hatete: “Tan neʼe, matan-moris nafatin bá, tanba imi la hatene loron neʼebé imi-nia Naʼi sei mai.” (Mateus 24:42) Entaun, ida-neʼe katak ema neʼebé tuir Jesus sei la hatene duni bainhira mak mundu aat neʼe atu hotu ka lae? Lae, tanba Jesus  fó-hatene nanis kona-ba akontesimentu sira neʼebé sei hatudu katak “mundu neʼe atu hotu”, no ita haree ho matan rasik buat sira-neʼe sai loos daudaun.—Lee Mateus 24:3-7.

Kalohan kiʼik neʼebé Elias haree toʼo ona ba nia atu fiar katak Jeová sei halo duni udan tun. Nuneʼe mós, sinál sira kona-ba loron ikus sira-neʼe book ita atu sai badinas liután iha ita-nia serbisu ba Maromak

14 Akontesimentu sira-neʼe fó fiar mai ita katak mundu neʼe besik ona atu hotu. Buat sira-neʼe sei book ita atu sai badinas liután iha ita-nia serbisu ba Jeová ka lae? Bainhira Elias haree kalohan kiʼik ida neʼebé mosu iha lalehan, neʼe toʼo ona ba nia atu fiar katak Jeová sei halo duni udan tun. Elias nia fiar neʼe sei sai leet deʼit ka lae?

Jeová halo udan mai no haraik bensaun tan

15, 16. Saida mak akontese ho lalais deʼit? Elias hein Acab atu halo saida?

15 Istória neʼe hatutan tan: “Iha tempu neʼe, lalehan sai nakukun ho kalohan no anin huu no udan boot komesa mai. No Acab kontinua saʼe kuda-karreta atu bá Jezreel.” (1 Reis [Raja-Raja] 18:45) Buat hotu neʼe akontese ho lalais deʼit. Nuʼudar Elias nia atan hatoʼo daudaun ninia lia-menon ba Acab, kalohan kiʼik neʼe sai barak hodi taka no halo lalehan sai nakukun. Anin komesa huu makaʼas. No maski ba tinan tolu ho balu ona udan la mai, ikusmai udan komesa tun duni ba rai-Izraél. Udan-been habokon rai neʼebé maran tebes. No nuʼudar udan sai makaʼas liu, bee saʼe iha mota Kison. Karik ida-neʼe hamoos tiha Baal nia profeta falsu sira-nia raan neʼebé fakar bainhira sira mate iha fatin neʼebá. Udan neʼe bele fó-hanoin ba povu Izraél katak sira mós tenke hamoos sira-nia hahalok aat kona-ba adorasaun falsu.

“Udan boot komesa mai”

16 Loos duni, Elias hein katak sira sei halo hanesan neʼe. Karik Elias hanoin: ‘Acab sei sente oinsá ho akontesimentu neʼe? Acab sei arrepende an no sees husi adorasaun falsu ba Baal ka lae?’ Buat hotu neʼebé akontese iha loron neʼe fó razaun ba Acab atu troka kedas ninia hahalok. Tuir loloos, ita la hatene kona-ba saida mak Acab hanoin iha tempu neʼe. Bíblia konta deʼit katak liurai neʼe “kontinua saʼe kuda-karreta atu bá Jezreel”. Acab aprende husi ninia sala ka lae? Nia hakarak troka ninia hahalok ka lae? Buat neʼebé akontese tuirmai hatudu katak nia la halo ida-neʼe. Maibé, loron ida-neʼe seidauk ramata ba Acab no mós ba Elias.

17, 18. (a) Saida mak akontese ba Elias iha dalan atu bá Jezreel? (b) Elias halai husi Carmelo toʼo Jezreel, saida mak halo ita hakfodak kona-ba ida-neʼe? (Haree mós nota-rodapé.)

17 Jeová nia profeta neʼe komesa laʼo tuir iha dalan neʼebé  Acab mós liu. Dalan neʼebé naruk, tahu barak, namdoras, no nakukun tebes. Maibé milagre ida tan mosu.

18 Bíblia hatete: “Jeová nia liman hamutuk ho Elias, tan neʼe Elias kesi ninia knotak no nia halai uluk liu Acab toʼo iha Jezreel.” (1 Reis [Raja-Raja] 18:46) Sidade Jezreel dook maizumenus kilómetru 30, no Elias mós idade ona. * Klaru katak “Jeová nia liman” mak fó kbiit boot ba Elias atu halai lalais hanesan neʼe. Hanoin toʼok, Elias hiʼit saʼe ninia roupa no kesi ba ninia knotak hodi la bele kaʼit nia ain no bele halai ho diʼak, no nia halai tuir dalan neʼebé iha tahu barak tanba udan boot. Elias halai lalais tebes toʼo nia toman no halai uluk liu Liurai Acab nia kuda-karreta!

19. (a) Forsa no kbiit neʼebé Maromak fó ba Elias fó-hanoin mai ita kona-ba profesia saida? (b) Elias sente saida nuʼudar nia halai toʼo Jezreel?

19 Elias hetan bensaun boot duni! Karik forsa no kbiit neʼebé nia sente iha tempu neʼe liu fali forsa neʼebé nia iha durante ninia tempu joven. Esperiénsia neʼe halo nia haksolok tebes. Ida-neʼe fó-hanoin mai ita kona-ba profesia iha Bíblia katak iha mundu foun fiar-naʼin sira sei hetan fali forsa no saúde neʼebé diʼak. (Lee Isaías [Yesaya] 35:6; * Lucas 23:43) Nuʼudar Elias halai, karik nia sente duni katak ninia Aman, Maromak Jeová, kontente ho nia.

20. Oinsá mak ita bele hakaʼas an atu hetan Jeová nia bensaun?

20 Jeová hakarak tebes atu haraik bensaun mai ita. No ita-nia hakaʼas-an atu hetan bensaun neʼe sei la sai leet deʼit. Hanesan ho Elias, ita mós presiza matan-moris nafatin, no hanoin didiʼak kona-ba sinál sira neʼebé hatudu katak Jeová besik ona atu halakon tempu susar neʼe. No mós, hanesan ho Elias, ita iha duni razaun atu tau fiar tomak ba Jeová nia promesa sira, tanba nia mak “Maromak lia-loos nian”.—Salmo (Mazmur) 31:5.

^ par. 4 1 Reis 18:41-46: “41 Agora Elias dehan ba Acab: ‘Saʼe bá, han no hemu bá; tanba udan boot nia lian mai ona.’ 42 Depois Acab bá han no hemu. Kona-ba Elias, nia saʼe ba Foho Carmelo nia tutun no komesa tuku-tuur iha rai no ninia oin besik iha ninia ain-tuur rua. 43 Nia hatete ba ninia atan: ‘Favór ida, bá no haree ba tasi.’ Nuneʼe nia bá haree no nia hatete: ‘Buat ida la iha.’ Tuirmai Elias hatete tan: ‘Bá fali’, toʼo dala hitu. 44 No kuandu nia fila fali ba dala hitu nia hatete: ‘Haree! Iha kalohan neʼebé kiʼik hanesan ema nia liman-tanen neʼebé sai husi tasi.’ Nuneʼe Elias hatete ba nia: ‘Saʼe bá no hatete ba Acab: “Prepara ó-nia kuda-karreta! No bá ona, nuneʼe udan boot labele hanetik ó!”’ 45 Iha tempu neʼe, lalehan sai nakukun ho kalohan no anin huu no udan boot komesa mai. No Acab kontinua saʼe kuda-karreta atu bá Jezreel. 46 No Jeová nia liman hamutuk ho Elias, tan neʼe Elias kesi ninia knotak no nia halai uluk liu Acab toʼo iha Jezreel.”

^ par. 18 Lakleur depois neʼe, Jeová fó knaar ba Elias hodi hanorin Eliseu, neʼebé ikusmai ema koñese nuʼudar “ida neʼebé fakar bee ba Elias nia liman”. (2 Reis [Raja-Raja] 3:11) Eliseu sai Elias nia ajudante, nia fó ajuda ba profeta idade neʼe atu halaʼo ninia serbisu.

^ par. 19 Isaías 35:6: “Iha tempu neʼebá, ema kudeʼik sei laʼo hanesan bibi-rusa, ema monok nia nanál sei haklalak ho ksolok. Tanba bee-matan sei sai iha rai-fuik, no bee sei suli iha rai-fuik maran.”