Ebreu 12:1-29

  • Jesus, Ida neʼebé Halo Perfeitu ita-nia fiar (1-3)

    • Testemuña barak hanesan kalohan neʼebé haleʼu ita (1)

  • Simu Jeová nia dixiplina bá (4-11)

  • Halo loos dalan ba imi-nia ain (12-17)

  • Hakbesik ba Jeruzalein lalehan nian (18-29)

12  Entaun, tanba ita iha testemuña barak hanesan kalohan neʼebé haleʼu ita, mai ita soe tiha buat hotu neʼebé hatodan ita no mós sala neʼebé bele kaer metin ita,+ no mai ita tahan hodi halai toʼo rohan iha halai-taru neʼebé iha ita-nia oin,+  hodi hateke didiʼak ba Jesus, neʼebé mak ita-nia Naʼi-Ulun no Ida neʼebé Halo Perfeitu ita-nia fiar.+ Tanba ksolok neʼebé tau ona iha ninia oin, nia tahan iha ai-riin terus nian* hodi la sente moe, no tuur ona iha Maromak nia kadunan sorin loos.+  Neʼe duni, hanoin didiʼak kona-ba ida neʼebé tahan ona ema sala-naʼin sira-nia liafuan aat+ neʼebé lori buat aat ba sira-nia an rasik, atu nuneʼe imi labele sai kole no rende an.+  Durante imi luta hasoru sala neʼe, imi seidauk luta toʼo fakar imi-nia raan.  No imi haluha hotu ona konsellu neʼebé Maromak fó ona ba imi nuʼudar oan sira, hodi dehan: “Haʼu-nia oan, keta hanoin katak dixiplina husi Jeová* mak la iha folin, no keta rende an kuandu nia korrije ó;  tanba Jeová* fó dixiplina ba sira neʼebé nia hadomi; tuir loloos, nia kastigu* ema hotu neʼebé nia simu nuʼudar ninia oan.”+  Imi presiza tahan tanba neʼe mak parte husi imi-nia dixiplina.* Maromak haree imi nuʼudar oan sira.+ Tanba oan ida-neʼebé mak ninia aman la fó dixiplina?+  Maibé se imi hotu la simu dixiplina neʼe, imi laʼós ninia oan rasik, maibé ema seluk nia oan.  Liután neʼe, ita-nia aman iha rai* fó dixiplina ba ita, no ita respeitu sira. Tan neʼe, atu bele moris, ita tenke hakruʼuk liután ba Aman neʼebé hili ona ita ho ninia espíritu, loos ka lae?+ 10  Tanba ita-nia aman sira fó dixiplina ita ba tempu uitoan hodi tuir buat neʼebé sira hanoin mak diʼak, maibé Maromak fó dixiplina ba ita-nia diʼak atu ita bele sai santu hanesan nia.+ 11  Loos duni, ita la kontente bainhira hetan dixiplina, maibé sente moras* deʼit. Maski nuneʼe sira neʼebé simu treinu liuhusi dixiplina neʼe, ikusmai sei simu kolen* dame nian, neʼe katak moris ho hahalok loos. 12  Tan neʼe, hametin liman sira neʼebé fraku no mós ain-tuur neʼebé fraku,+ 13  no kontinua halo loos dalan ba imi-nia ain,+ atu nuneʼe parte isin neʼebé aleijadu labele sai aat liután, maibé bele sai diʼak fali. 14  Buka dame ho ema hotu,+ no hakaʼas an atu moris santu,*+ tanba se ema ida la moris santu nia sei la haree Naʼi. 15  Kuidadu didiʼak bá atu ema hotu bele simu Maromak nia laran-diʼak neʼebé boot, atu nuneʼe ai-abut neʼebé iha venenu labele mosu iha imi-nia leet hodi halo problema no halo ema barak sai foʼer.+ 16  Kuidadu didiʼak bá atu ema iha imi-nia leet labele halo sala seksuál* ka la hafolin buat neʼebé sagradu, hanesan Esaú, neʼebé faʼan tiha ninia direitu nuʼudar oan primeiru hodi troka fali ho ai-han bikan ida deʼit.+ 17  Tanba imi hatene katak ikusmai kuandu nia hakarak atu simu fali bensaun neʼe, nia la merese tan atu simu ida-neʼe, no maski nia koko makaʼas atu troka desizaun* neʼe ho matan-been,+ maibé neʼe saugati deʼit. 18  Tanba imi la hakbesik ba buat neʼebé imi bele kaer+ no neʼebé lakan ho ahi,+ iha kalohan metan no nakukun tebes no anin-fuik,+ 19  no trombeta lian,+ no lian husi lalehan neʼebé koʼalia ba povu.+ Kuandu povu rona lian neʼe, sira husu atu lian neʼe la koʼalia tan ba sira.+ 20  Tanba sira sai taʼuk ho mandamentu neʼebé dehan: “Maski animál ida mak kona foho neʼe, tenke tuda mate ho fatuk.”+ 21  No mós buat neʼebé akontese halo ema taʼuk tebes toʼo Moisés dehan: “Haʼu taʼuk loos no nakdedar.”+ 22  Maibé imi hakbesik ona Foho Siaun+ no Maromak moris nia sidade, neʼe katak Jeruzalein lalehan nian,+ hamutuk ho anju rihun ba rihun 23  neʼebé halibur hamutuk,+ no hakbesik ona ba kongregasaun husi sira neʼebé nuʼudar oan primeiru neʼebé naran hakerek ona iha lalehan, no hakbesik ba Maromak neʼebé Juís ba buat hotu,+ no hakbesik ba ema laran-loos nia moris nuʼudar ema neʼebé Maromak hili ona ho ninia espíritu+ no sai perfeitu ona,+ 24  no hakbesik ba Jesus neʼebé sai mediadór+ ba aliansa foun,+ no ba raan neʼebé nia hisik ona, neʼebé diʼak liu fali Abel nia raan.+ 25  Kuidadu bá, imi tenke rona didiʼak* ba nia neʼebé koʼalia daudaun. Tanba se sira neʼebé uluk lakohi rona ba ida neʼebé fó sai avizu sagradu iha mundu, sira labele halai sees husi kastigu, entaun, oinsá tan ho ita? Ita sei labele halai sees husi kastigu se ita fila kotuk ba nia neʼebé koʼalia husi lalehan.+ 26  Iha tempu neʼebá, ninia lian halo rai nakdoko,+ maibé agora nia promete ona, hodi dehan: “Dala ida tan haʼu sei la doko deʼit rai maibé mós doko lalehan.”+ 27  Liafuan “dala ida tan” hatudu katak Maromak sei hasai tiha buat neʼebé nakdoko, katak buat sira neʼebé halo tiha ona, atu nuneʼe buat neʼebé la nakdoko bele hela nafatin. 28  Nuneʼe, tanba ita atu simu Ukun* neʼebé la nakdoko, mai ita kontinua simu Maromak nia laran-diʼak neʼebé boot, tanba liuhusi neʼe mak ita bele halo serbisu sagradu ba Maromak ho hamtaʼuk no respeitu. 29  Tuir loloos, ita-nia Maromak mak hanesan ahi neʼebé han mohu buat hotu.+

Nota-rodapé

Haree Ap. A5.
Haree Ap. A5.
Ka “nia uza rota dixiplina nian ba”.
Ka “treinu”.
Orj., “aman sira tuir isin”.
Ka “triste”.
Orj., “sei fó fuan”.
Neʼe katak troka ninia aman nia hanoin.
Ka “imi keta buka razaun atu la rona”.
Ka “Reinu; Governu”.