Skip to content

Skip to table of contents

 KAPÍTULU 6

Nia fó sai nia sentimentu ba Maromak iha orasaun

Nia fó sai nia sentimentu ba Maromak iha orasaun

1, 2. (a) Tanbasá mak Ana la kontente kuandu nia prepara viajen atu bá Silo? (b) Saida mak ita bele aprende husi Ana nia istória?

ANA prepara daudaun ba viajen hodi hakaʼas an atu la hanoin demais kona-ba ninia problema. Tuir loloos, tempu neʼe tenkesér tempu neʼebé haksolok. Ninia laʼen, Elcana, iha toman atu lori família tomak ba tabernákulu iha Silo atu adora Maromak Jeová. Maromak hakarak ema atu haksolok iha selebrasaun hanesan neʼe. (Lee Deuteronômio [Ulangan] 16:15. *) Klaru katak bainhira Ana sei kiʼik, nia mós kontente tebes atu tuir selebrasaun sira-neʼe. Maibé, iha tinan hirak-neʼe nia laran, ninia situasaun troka.

2 Ana nia laʼen, Elcana, hadomi tebes nia. Maibé, Elcana mós iha feen seluk. Ninia naran mak Penina, no nia hakarak buka dalan oioin atu fó susar ba Ana. Penina hatene oinsá atu aproveita tempu neʼe hodi halo Ana laran-kanek liután. Saida mak Penina halo? No oinsá mak Ana nia fiar ba Jeová ajuda nia atu tahan hasoru susar neʼe? Se ita mós hasoru daudaun susar ruma neʼebé halakon ita-nia haksolok, Ana nia istória neʼe sei ajuda duni ita.

“Tansá mak ó laran-susar?”

3, 4. Ana iha problema boot rua saida iha ninia moris? Tanbasá mak problema sira-neʼe hamosu susar ba nia?

3 Bíblia hatudu katak Ana iha problema boot rua iha ninia moris neʼebé nia la bele rezolve ho ninia kbiit rasik. Problema ida mak Ana nia laʼen iha feen seluk neʼebé odi Ana. Problema ida seluk mak Ana la iha oan. Ohin loron,  bainhira feto ida hakarak iha oan maibé la hetan, ida-neʼe halo nia laran-susar. Maibé iha Ana nia tempu no ninia kultura, situasaun hanesan neʼe halo susar liután ba feto tanba família ida-idak tenkesér iha oan atu família nia naran la bele lakon. Tan neʼe, bainhira feto ida la bele iha oan, ida-neʼe lori susar no moe boot ba nia.

4 Se Elcana kaben deʼit ho Ana, karik ladún susar ba nia atu tahan ninia situasaun. Husi tempu uluk toʼo ohin loron, kaben ho feen barak lori problema boot ba ema nia moris. Iha situasaun hanesan neʼe, feen sira baibain hirus malu, hatún malu, no uma-laran sai nakonu ho problema oioin. Bainhira Maromak kria ema iha jardín Eden, ninia hakarak mak atu mane iha feen ida deʼit. (Gênesis [Kejadian] 2:24) Situasaun iha Elcana nia umakain mak ezemplu ida neʼebé hatudu katak la diʼak atu kaben ho feen barak. Tuir loloos, Bíblia la hakerek kona-ba kaben ho feen barak nuʼudar arranju neʼebé diʼak.

Maski Ana hasoru susar iha uma, maibé nia hetan kmaan husi Jeová

5. Tanbasá mak Penina hakarak fó susar ba Ana? Oinsá mak nia halo ida-neʼe?

5 Loloos, Elcana hadomi liu Ana duké Penina. Tuir ema judeu sira-nia istória, Elcana kaben uluk ho Ana, no liutiha tinan balu mak nia kaben ho Penina. Maibé tanba Penina laran-moras ba Ana, nia buka dalan oioin atu fó susar ba Ana. Razaun ida ba Penina atu hatún Ana mak kona-ba oan. Penina iha oan barak, no karik bainhira nia iha bebé ida tan, nia sai foti-an liután. Duké hanoin Ana nia situasaun neʼebé triste no fó kmaan ba nia, Penina aproveita ida-neʼe atu halo Ana laran-kiʼik. Bíblia hatete katak nia ‘hakanek Ana nia laran makaʼas no halo nia laran-susar’. (1 Samuel 1:6) Sin, ho neon Penina trata aat Ana. Hodi halo nuneʼe, Penina konsege halo Ana nia laran kanek.

Ana laran-susar tebes tanba nia la iha oan, no Penina buka dalan oioin atu fó susar ba Ana

6, 7. (a) Maski Elcana koko atu fó kmaan ba Ana, tanbasá mak Ana dada an atu fó sai ninia problema kona-ba Penina? (b) Ana la bele iha oan, ida-neʼe hatudu katak Jeová la kontente ho nia ka lae? Esplika toʼok. (Haree nota-rodapé.)

6 Karik oportunidade diʼak ba Penina atu fó susar ba  Ana mak tempu atu bá selebrasaun iha Silo, neʼebé akontese tinan ida dala ida. Husi sakrifísiu neʼebé Elcana fó ba Jeová, Elcana fó parte ba Penina nia “oan-mane sira no oan-feto sira hotu”. Maibé Ana simu parte espesiál. Ida-neʼe halo Penina laran-moras no sai foti-an liután hodi fó-hanoin ba Ana kona-ba ninia situasaun susar neʼe, toʼo halo Ana tanis no lakohi han. Elcana haree katak ninia feen doben Ana hasoru susar boot, tan neʼe, nia koko atu fó kmaan ba nia, hodi dehan: “Ana, tansá mak ó tanis, no tansá mak ó la han, no tansá mak ó laran-susar? Haʼu diʼak liu fali oan-mane naʼin-sanulu ba ó, loos ka lae?”—1 Samuel 1:4-8.

7 Elcana nia liafuan neʼe hatudu katak nia hatene ona Ana sente laran-susar tanba nia la bele iha oan. No ita bele fiar katak Ana hafolin Elcana nia liafuan neʼebé hatudu domin. * Maibé, Elcana la koʼalia buat ida kona-ba Penina nia hahalok ladiʼak, no Bíblia mós la dehan katak Ana fó-hatene ba Elcana ninia problema kona-ba Penina. Karik Ana hanoin katak fó sai problema neʼe halo ninia situasaun sai aat liután. Karik Ana hanoin: ‘Se haʼu koʼalia kona-ba neʼe, Elcana sei hadiʼa haʼu-nia situasaun ka lae? Karik haʼu sei hasoru susar liután husi Penina, ninia oan sira no atan sira, no haʼu sei sente mesamesak liután iha uma-laran.’

8. Kuandu ema hatudu hahalok ladiʼak ka la justisa ba ita, tanbasá mak hanoin-hetan katak Jeová mak Maromak justisa nian halo ita sente kmaan?

8 Maski ita la hatene se Elcana hatene ho didiʼak kona-ba Penina nia hahalok, maibé Maromak Jeová haree duni buat hotu. Bíblia fó sai buat neʼebé loloos akontese, no ida-neʼe sai nuʼudar avizu ba ema neʼebé hatudu hahalok ladiʼak ho subasubar tanba laran-moras ka odi ema. Iha tempu hanesan, ida-neʼe mós fó kmaan ba ema hanesan Ana neʼebé laran-maus no buka atu moris ho dame, hodi fó fiar ba sira katak Maromak justisa nian mak sei hadiʼa problema hotu iha tempu no iha dalan neʼebé loos ba nia.  (Lee Deuteronômio [Ulangan] 32:4. *) Karik Ana fiar duni ida-neʼe, tan neʼe mak nia buka Jeová nia ajuda.

“Nia la hatudu tan oin triste”

9. Saida mak ita aprende husi Ana nia ezemplu hodi prontu atu halo viajen ba Silo maski nia hatene ona katak Penina sei fó susar ba nia?

9 Dadeer-saan, ema hotu iha uma-laran inklui mós labarik sira prepara atu halo viajen. Atu bá toʼo Silo, família boot neʼe presiza laʼo tun-saʼe foho sira iha área Efraim, dook kilómetru 30 liu. * Karik sira presiza laʼo loron ida ka rua. Ana hatene ona katak nia sei hetan susar liután husi ninia laʼen nia feen seluk durante viajen neʼe. Maski nuneʼe, Ana la hela deʼit iha uma, no ninia hahalok neʼe sai nuʼudar ezemplu diʼak tebes ba Maromak nia atan sira ohin loron. Sin, ita labele husik ema seluk nia hahalok ladiʼak atu hapara ita hodi adora Maromak. Se ita rende an deʼit, ita sei la bele hetan buat neʼebé ita presiza atu tahan hasoru susar, neʼe mak Jeová nia bensaun.

Maski ema seluk la komprende Ana nia sentimentu, maibé ninia Aman iha lalehan bele komprende

10, 11. (a) Kuandu família toʼo tiha iha Silo, tanbasá mak Ana laʼo mesak ba Jeová nia tabernákulu? (b) Oinsá mak Ana fó sai ninia laran-susar ba ninia Aman iha lalehan?

10 Depois laʼo tiha loron tomak iha foho-leet, sira toʼo besik sidade Silo. Karik iha dalan Ana hanoin kleʼan kona-ba saida mak nia sei hatoʼo iha ninia orasaun ba Jeová iha tabernákulu. Kuandu família toʼo tiha Silo, sira tuur no komesa han hamutuk. Maibé Ana hadook an husi sira, no laʼo mesak ba Jeová nia tabernákulu. Maski Amlulik Boot Eli tuur hela iha oin, maibé Ana la haree nia. Ana hanoin deʼit kona-ba orasaun neʼebé nia sei hatoʼo ba Maromak. Toʼo tiha tabernákulu neʼe, Ana fiar duni katak Jeová sei rona ba nia. Maski ema seluk la komprende ninia sentimentu,  maibé ninia Aman iha lalehan bele komprende. Nuʼudar Ana fó sai ninia laran-triste ba Jeová, nia komesa tanis.

11 Tanba tanis, Ana nia isin nakdedar. Ninia ibun book an nuʼudar nia buka liafuan neʼebé loos atu esplika ninia laran-susar ba Jeová. Ana halo orasaun kleur, hodi fó sai ninia laran ba Aman Jeová. Maibé, nia la husu deʼit ba Maromak atu bele iha oan. Maski ida-neʼe mak bensaun neʼebé Ana hakarak tebes atu simu, maibé nia mós prontu atu halo buat ruma ba Maromak. Tan neʼe, Ana halo juramentu ba Jeová, katak se nia hetan oan-mane ida, nia sei fó oan neʼe ba Jeová atu serbí nia toʼo mate.—1 Samuel 1:9-11.

12. Hanesan Ana nia ezemplu hatudu, ita presiza hanoin-hetan saida kona-ba orasaun?

12 Ana hatudu ezemplu diʼak ba Maromak nia atan sira hotu kona-ba oinsá atu halo orasaun. Jeová ho laran-diʼak konvida ita hotu atu koʼalia nakloke ba nia, hodi fó sai ita-nia sentimentu hanesan labarik ida neʼebé koʼalia kona-ba buat hotu ba ninia inan-aman. (Lee Salmo [Mazmur] 62:8; * 1 Tesalónika 5:17.) Kona-ba halo orasaun ba Jeová, apóstolu Pedro mós hatete: “Entrega imi-nia laran-susar hotu ba nia, tanba nia hanoin imi.”—1 Pedro 5:7.

13, 14. (a) Eli hanoin kedas saida kona-ba Ana? Tanbasá? (b) Oinsá mak Ana nia resposta ba Eli hatudu ezemplu diʼak mai ita kona-ba fiar-metin?

13 Maibé ema la hanesan ho Jeová. Susar ba ema atu komprende ema seluk nia sentimentu no hatudu laran-sadiʼa ba sira. Bainhira Ana halo orasaun hela ho tanis, nia rona lian ida neʼebé halo nia hakfodak. Neʼe mak lian husi amlulik boot Eli neʼebé haree hela nia. Eli dehan: “Toʼo tempu hira tan mak ó sai hanesan ema lanu? Para tiha atu hemu ó-nia tua.” Eli haree Ana tanis, ibun nakdedar, no laran la hakmatek. Maibé, duké husu uluk kona-ba Ana nia problema, Eli hanoin kedas katak Ana mak lanu.—1 Samuel 1:12-14.

14 Liafuan neʼe halo Ana laran-kanek duni! Iha tempu neʼebé nia sente laran-susar tebes, ema hanoin sala kona-ba nia. Liután neʼe, ema neʼebé halo ida-neʼe mak Maromak  nia amlulik boot! Maski nuneʼe, Ana hatudu ezemplu diʼak dala ida tan kona-ba fiar-metin. Nia la husik ema seluk nia sala atu hapara nia adora Jeová. Ho respeitu, Ana esplika kona-ba ninia situasaun ba Eli. Hodi rekoñese katak nia hanoin sala, Eli hatán ho lian mamar hodi hatete: “Bá ho dame, haʼu hein katak Maromak Izraél nian fó ba ó buat neʼebé ó husu ona ba nia.”—1 Samuel 1:15-17.

15, 16. (a) Ana halo orasaun ba Jeová hodi fó sai ninia sentimentu hotu no adora nia iha tabernákulu, oinsá mak ida-neʼe kona Ana nia laran? (b) Oinsá mak ita bele halo tuir Ana nia ezemplu kuandu ita sente katak ita la bele tahan ona?

15 Bainhira Ana halo orasaun ba Jeová hodi fó sai ninia sentimentu hotu no adora nia iha tabernákulu, oinsá mak ida-neʼe kona Ana nia laran? Bíblia hatete: “Nia sai husi neʼebá no komesa atu han, no nia la hatudu tan oin triste.” (1 Samuel 1:18) Ana sente laran-kmaan fali. Neʼe hanesan uluk Ana iha naha todan neʼebé nia la bele lori ho ninia forsa rasik, maibé nia entrega ida-neʼe ba ninia Aman iha lalehan. (Lee Salmo [Mazmur] 55:22. *) Hanoin toʼok, iha problema ruma neʼebé todan demais ba Jeová atu hadiʼa ka lae? La iha duni!

Ana la husik ema seluk nia sala atu hapara nia adora Jeová

16 Se ita sente katak ita lori naha todan neʼebé boot demais, ka triste tebes toʼo la bele tahan ona, ita mós presiza halo tuir Ana nia ezemplu hodi koʼalia nakloke ba Jeová, “Ida neʼebé rona orasaun”. (Salmo [Mazmur] 65:2) Se ita halo hanesan neʼe ho fiar-metin, Maromak bele halakon ita-nia laran-triste no fó ba ita “dame neʼebé aas liu ema nia matenek hotu”.—Filipe 4:6, 7.

“La iha fatuk-boot hanesan ami-nia Maromak”

17, 18. (a) Oinsá mak Elcana hatudu katak nia apoia buat neʼebé Ana promete ba Maromak? (b) Penina la bele tan halo saida ba Ana?

17 Dadeer-saan tuirmai, Ana fila fali ba tabernákulu hamutuk ho Elcana. Karik Ana fó-hatene ba Elcana kona-ba  orasaun no promesa neʼebé nia foin halo, tanba Moisés nia Ukun-Fuan hatete katak laʼen iha direitu atu hakotu fali juramentu neʼebé ninia feen halo hodi la husu uluk ba nia laʼen. (Números [Bilangan] 30:10-15) Maibé, Elcana neʼebé hamtaʼuk Maromak la halo ida-neʼe. Nia ho Ana adora Jeová hamutuk iha tabernákulu no depois, sira fila fali ba uma.

18 Bainhira loos mak Penina hatene katak ninia hahalok aat la bele ona halo Ana laran-susar? Bíblia la hatete kona-ba neʼe. Maibé, tanba Bíblia hatete katak Ana “la hatudu tan oin triste”, ita bele fiar katak depois Ana halo orasaun iha tabernákulu, nia la hanoin barak ona kona-ba problema neʼe. Lakleur tan, Penina hatene katak saugati deʼit atu halo buat oioin hodi halo susar ba Ana. Depois neʼe, Bíblia la temi tan Penina nia naran.

19. Bensaun saida mak Ana simu? Oinsá mak nia hatudu katak nia agradese ba Ida neʼebé fó bensaun neʼe?

19 Fulan balu liu tiha, buat ida halo Ana haksolok tebes. Nia sai isin-rua! Ana sente kontente tebes, maibé nia la haluha katak bensaun neʼe mak mai husi Jeová. Bainhira nia tuur-ahi oan-mane, nia hanaran bebé neʼe Samuel, neʼebé iha arti katak “Maromak nia naran”, hodi halo nia hanoin-hetan tempu neʼebé nia bolu Maromak nia naran hodi husu ajuda. Iha tinan neʼe, Ana la bá Silo hamutuk ho Elcana no nia família. Ana haboot ninia oan neʼe ba tinan tolu, toʼo haketak susu. Tuirmai, Ana prepara ninia  laran ba tempu neʼebé nia sei haketak an husi ninia oan-mane neʼebé nia hadomi tebes.

20. Oinsá mak Ana no Elcana kumpre juramentu neʼebé sira halo ona ba Jeová?

20 Haketak malu ho oan mak buat neʼebé susar duni. Ana hatene katak ema sei tau matan didiʼak ba Samuel iha Silo, karik feto sira neʼebé serbí iha tabernákulu mak sei tau matan ba nia. Maibé, inan ida-neʼebé mak hakarak haketak malu ho ninia oan neʼebé sei kiʼik? Maski nuneʼe, Ana ho Elcana lori sira-nia oan ba tabernákulu laʼós ho laran-todan, maibé ho laran prontu no ho agradese ba Jeová. Sira hasaʼe sakrifísiu, no depois lori Samuel ba Eli hodi fó-hanoin  nia kona-ba juramentu neʼebé Ana halo iha tinan balu liubá.

Ana mak inan neʼebé diʼak duni ba Samuel

21. Oinsá mak Ana nia orasaun hatudu ninia fiar-metin ba Jeová? (Haree mós kaixa “ Orasaun rua neʼebé furak”.)

21 Tuirmai, Ana halo orasaun ba Maromak. Ita bele fiar katak orasaun neʼe monu loos ba Jeová nia laran tanba Nia deside atu rai hela iha Ninia Liafuan. Nuʼudar ita lee Ana nia orasaun iha 1 Samuel 2:1-10, ita bele hatene oinsá nia hatudu sai ninia fiar-metin. Ana hahiʼi Jeová tanba Ninia forsa boot. Ho Ana nia liafuan, nia rekoñese katak Jeová bele hatún ema neʼebé foti-an, fó bensaun ba ema neʼebé iha susar laran, hakotu ema nia moris, no mós salva ema husi mate. Ana mós hahiʼi ninia Aman tanba Nia mak santu, iha justisa, no laran-metin. Ana hatete: “La iha fatuk-boot hanesan ami-nia Maromak.” Jeová mak Maromak neʼebé ita bele tau fiar tomak, nia la troka ninia hahalok, no nia salva ema hotu neʼebé laran-kraik no buka ninia ajuda.

22, 23. (a) Oinsá mak ita hatene Samuel sai boot hodi hatene katak ninia inan-aman hadomi nia? (b) Jeová haraik bensaun saida tan ba Ana?

22 Loos duni, labarik Samuel hetan bensaun tanba nia iha inan neʼebé fiar-metin ba Jeová! Maski Samuel hanoin ninia inan, nia hatene katak ninia inan la haluha nia. Tinan-tinan Ana bá Silo, hodi lori roupa foun atu Samuel bele uza bainhira nia serbí iha tabernákulu. (Lee 1 Samuel 2:19. *) Hanoin toʼok, Ana hasai roupa foun neʼebé nia rasik mak halo ho domin, no nuʼudar nia fó hatais ba Samuel, nia hateke ba ninia oan hodi koʼalia liafuan ruma neʼebé fó laran-manas ba nia. Samuel hetan bensaun boot hodi iha inan diʼak hanesan neʼe, no Samuel rasik mós sai bensaun boot ba ninia inan-aman no ba ema Izraél hotu.

23 Jeová mós la haluha kona-ba Ana. Jeová haraik bensaun barak liután ba Ana, no nia ho Elcana iha oan naʼin-lima tan. (1 Samuel 2:21) Maibé karik buat neʼebé halo Ana haksolok mak ninia relasaun ho ninia Aman, Jeová, neʼebé sai metin ba beibeik. Se ita banati-tuir Ana nia fiar, ita mós bele hetan duni bensaun hanesan neʼe.

^ par. 1 Deuteronômio 16:15: “Durante loron hitu, ó tenke tuir selebrasaun neʼe ba Jeová ó-nia Maromak iha fatin neʼebé Jeová sei hili, tanba Jeová ó-nia Maromak, sei fó bensaun ba ó iha buat hotu neʼebé ó hetan no iha buat hotu neʼebé ó-nia liman mak halo, no ó tenke haksolok tebes.”

^ par. 7 Maski Bíblia hatete katak Jeová mak ‘taka Ana nia oan-fatin’, maibé ida-neʼe la dehan katak Jeová la kontente ho Ana neʼebé hatudu haraik-an no laran-metin. (1 Samuel 1:5) Dala ruma kuandu Bíblia hatete katak ema hasoru susar ruma tanba Maromak, neʼe la dehan katak ida-neʼe mak Maromak nia hakarak. Maibé neʼe katak Maromak husik deʼit susar neʼe atu akontese ba tempu balu.

^ par. 8 Deuteronômio 32:4: “Fatuk neʼe, buat neʼebé nia halo mak perfeitu, tanba ninia dalan hotu mak justisa. Maromak laran-metin, neʼebé sempre iha justisa; nia loos no laran-moos.”

^ par. 9 Sira laʼo husi Elcana nia moris-fatin, sidade Ramá, neʼebé ikusmai ema bolu sidade Arimateia iha Jesus nia tempu.

^ par. 12 Salmo 62:8: “Oh, povu, tau fiar ba nia iha tempu hotu. Iha nia oin fakar sai imi-nia laran. Maromak mak fatin protesaun ba ita.”

^ par. 15 Salmo 55:22: “Soe ó-nia todan ba Jeová, no nia rasik sei apoia ó. Nia sei nunka husik ema loos atu monu.”

^ par. 22 1 Samuel 2:19: “No mós, ninia inan halo ba nia unuk neʼebé la iha liman, no tinan-tinan nia lori ida-neʼe ba nia kuandu Ana ho ninia laʼen bá atu hasaʼe sakrifísiu tinan nian.”