Skip to content

Skip to table of contents

Liafuan atu ramata

Liafuan atu ramata

“Banati-tuir sira neʼebé simu promesa nuʼudar liman-rohan liuhusi fiar no pasiénsia.”—EBREU 6:12.

1, 2. Tanbasá mak importante atu hametin ita-nia fiar agora kedas? Fó toʼok ezemplu.

 FIAR. Liafuan neʼe furak loos no reprezenta hahalok neʼebé kapás tebes. Maibé, kuandu ita rona liafuan “fiar”, neʼe halo ita mós hanoin kona-ba liafuan ida seluk. Liafuan neʼe mak “urjente”. Tanba se ita seidauk iha fiar, urjente tebes atu ita hetan ida-neʼe. No se ita iha ona fiar, urjente mós, ka importante duni atu proteje ida-neʼe no la husik atu lakon. Tanbasá?

2 Hanoin toʼok katak ita laʼo daudaun iha rai-maran no ita presiza duni bee. Kuandu ita hetan bee, ita presiza proteje ida-neʼe husi loro-manas. Tuirmai, karik ita sei hakaʼas an atu hetan tan bee hodi nuneʼe ita bele iha bee neʼebé ajuda ita toʼo iha fatin neʼebé ita atu bá. Ita bele kompara bee ho ita-nia fiar. Ohin loron, ita moris iha mundu neʼebé hanesan rai-maran, katak ema barak la iha interese atu adora Maromak. Entaun, atu ita-nia fiar labele lakon, ita presiza proteje ida-neʼe no hakaʼas an atu hametin liután. Hanesan ita la bele kontinua moris se ita la hemu bee, nuneʼe mós ita la bele iha relasaun diʼak ho Maromak se ita la iha fiar.—Roma 1:17.

3. Jeová fó saida atu ajuda ita hametin ita-nia fiar? Ita presiza halo buat rua saida?

3 Maromak Jeová hatene katak ita presiza duni iha fiar, no nia hatene katak ohin loron susar tebes atu hametin ita-nia fiar. Tan neʼe mak nia fó mai ita fiar-naʼin sira-nia ezemplu hodi ita bele banati-tuir. Jeová leno apóstolu Paulo atu hakerek liafuan neʼe: “Banati-tuir sira neʼebé simu promesa nuʼudar liman-rohan liuhusi fiar no pasiénsia.” (Ebreu 6:12) No tanba ida-neʼe mak Maromak nia organizasaun, fó laran-manas mai ita atu hakaʼas an banati-tuir ezemplu husi mane no feto sira neʼebé laran-metin ba Maromak, hanesan sira neʼebé temi iha livru neʼe. Maibé agora, ita presiza halo saida tan? Ita presiza halo buat rua tuirmai neʼe: (1) Ita presiza atu hametin nafatin ita-nia fiar. (2) Ita presiza atu hanoin nafatin kona-ba ita-nia esperansa.

4. Oinsá mak Satanás sai inimigu boot ba ita-nia fiar? Tanbasá mak ita lalika taʼuk?

4 Hametin nafatin ita-nia fiar. Iha ida neʼebé hakarak halakon ita-nia fiar, neʼe mak Satanás. Nuʼudar ukun-naʼin mundu neʼe nian, Satanás halo mundu neʼe sai hanesan rai-maran no halo susar mai ita atu hametin ita-nia fiar. No nia iha forsa boot liu fali ita. Maibé, ida-neʼe dehan katak ita sei la bele ona hametin ita-nia fiar ka lae? Lae duni! Jeová mak Belun boot ba sira neʼebé iha fiar neʼebé loos. Nia promete katak ho Ninia ajuda, ita bele halo funu hasoru Diabu no ita mós bele halo nia halai husi ita! (Tiago 4:7) Ita bele kontra hasoru Diabu hodi uza tempu loroloron atu hametin ita-nia fiar. Maibé, oinsá mak ita bele halo ida-neʼe?

5. Saida mak fiar-naʼin sira iha tempu Bíblia nian halo atu haburas no hametin sira-nia fiar? Esplika toʼok.

 5 Hanesan ita haree ona iha livru neʼe, ema fiar-naʼin sira iha tempu Bíblia nian, sira mós presiza haburas no hametin sira-nia fiar. Ida-neʼe hatudu ho klaru katak fiar mak hahalok ida neʼebé Jeová nia espíritu santu lori mai. (Galásia 5:22, 23) Liuhusi orasaun, fiar-naʼin sira-neʼe husu ajuda, tan neʼe Jeová kontinua hametin sira-nia fiar. Mai ita mós halo hanesan sira, mai ita la haluha katak Jeová fó ninia espíritu santu ho laran-luak ba sira neʼebé husu ida-neʼe, no halo tuir buat neʼebé sira husu iha sira-nia orasaun. (Lucas 11:13) Maibé, iha buat seluk tan neʼebé ita bele halo ka lae?

6. Atu fiar-naʼin sira-nia ezemplu bele ajuda ita, saida mak ita presiza halo?

6 Iha livru neʼe, ita estuda kona-ba ema balu deʼit neʼebé fó ezemplu diʼak kona-ba fiar, maibé tuir loloos, iha ema barak tan! (Lee Ebreu 11:32.) Nuneʼe, kuandu ita estuda Bíblia mesak, diʼak atu lee no aprende kona-ba fiar-naʼin sira-neʼe nia ezemplu. Maibé se ita lee liu deʼit istória kona-ba fiar-naʼin sira-neʼe, sira-nia istória sei la ajuda ita atu hametin ita rasik nia fiar. Entaun, atu fiar-naʼin sira-neʼe nia ezemplu bele ajuda ita, ita presiza gasta tempu atu keʼe kleʼan iha Bíblia laran, no buka atu komprende kona-ba situasaun neʼebé sira rasik hasoru iha tempu neʼebá. No se ita la haluha katak fiar-naʼin sira-neʼe mak ema sala-naʼin hanesan ho ita no iha sentimentu “hanesan ita”, ida-neʼe sei book duni ita atu banati-tuir sira-nia ezemplu. (Tiago 5:17) Sin, ita bele komprende sira-nia sentimentu tanba sira mós hasoru susar no problema neʼebé besik hanesan ho ita-nian.

7-9. (a) Karik fiar-naʼin balu iha tempu Bíblia nian sei sente oinsá kona-ba adora Jeová hanesan ita halo ohin loron? (b) Tanbasá mak ita presiza hametin ita-nia fiar liuhusi hahalok?

7 Ita mós bele hametin ita-nia fiar liuhusi ita-nia hahalok. Bíblia dehan: “Fiar la hamutuk ho hahalok mate.” (Tiago 2:26) Tuir Ita-nia hanoin, se mane no feto sira neʼebé ita estuda iha livru neʼe simu knaar neʼebé Jeová fó mai ita ohin loron, sira sei sente oinsá? Sira sei kontente tebes simu knaar neʼe, loos ka lae?

8 Porezemplu, Abraão sei sente oinsá se Maromak haruka nia atu halaʼo adorasaun neʼebé loos, laʼós iha altár neʼebé harii husi fatuk iha rai-fuik maran, maibé iha Reuniaun-Fatin hamutuk ho ninia maluk fiar-naʼin sira? Nia sei sente oinsá hodi rona diskursu neʼebé esplika ho klaru Maromak nia promesa sira neʼebé uluk nia bele haree deʼit “husi dook”? (Lee Ebreu 11:13.) Elias sei sente oinsá se Maromak dehan ba nia katak ninia serbisu laʼós atu oho maromak Baal nia profeta falsu sira, no hakaʼas an atu serbí Jeová iha liurai aat nia ukun okos, maibé atu bá vizita ema hodi haklaken mensajen neʼebé fó kmaan no esperansa ba sira? Sin, fiar-naʼin sira-neʼe sei kontente tebes atu simu knaar atu adora Maromak Jeová hanesan ita halo ohin loron!

9 Entaun, mai ita hametin ita-nia fiar liuhusi ita-nia hahalok. Nuʼudar ita halo nuneʼe, ita sei hakaʼas an atu halo tuir fiar-naʼin sira-nia  ezemplu. Hanesan temi ona iha liafuan atu loke husi livru neʼe, ita sei sente besik liután ho sira hanesan belun. Maibé lakleur tan, ita-nia relasaun ho sira sei sai realidade tanba sira sei moris hiʼas fali atu hamutuk ho ita.

10. Saida mak sei halo ita haksolok iha mundu foun?

10 Hanoin nafatin kona-ba ita-nia esperansa. Maromak nia atan sira neʼebé laran-metin hetan forsa atu bele tahan nafatin tanba esperansa neʼebé Maromak fó ba sira. Ita mós hanesan neʼe ka lae? Porezemplu, hanoin toʼok kona-ba tempu neʼebé ita sei hasoru malu ho Maromak nia atan sira bainhira sira moris hiʼas fali. (Lee Apóstolu 24:15.) Karik ita sei iha pergunta barak neʼebé ita hakarak husu ba sira.

11, 12. Iha mundu foun, pergunta saida deʼit mak ita hakarak husu ba (a) Abel? (b) Noé? (c) Abraão? (d) Rute? (e) Abigail? (f) Ester?

11 Kuandu ita hasoru Abel, karik ita hakarak husu nia kona-ba ninia inan-aman. Ka karik ita husu: “Ita koko atu koʼalia ba anju forsa boot sira neʼebé hein jardín Eden ka lae? Sira hatán ba Ita ka lae?” Oinsá ho Noé? Karik ita husu nia: “Ita sente oinsá kona-ba Néfilim sira, Ita taʼuk sira ka lae? Durante tinan ida neʼebé imi iha ró laran, oinsá mak imi tau matan ba animál sira hotu?” Se ita hasoru Abraão, karik ita husu: “Uluk Ita hasoru Sem ka lae? Sé mak hanorin Ita kona-ba Jeová? Susar atu husik sidade Ur ka lae?”

12 Karik ita mós bele hanoin kona-ba pergunta balu neʼebé ita hakarak husu ba feto fiar-naʼin sira neʼebé sei moris hiʼas. Porezemplu, ita bele husu: “Rute, saida mak book Ita atu adora Maromak Jeová?” “Abigail, Ita taʼuk ka lae atu fó-hatene ba Nabal kona-ba oinsá Ita fó ajuda ba David?” “Ester, saida mak akontese ba Ita no ba Mordecai depois Bíblia ramata atu konta kona-ba imi-nia istória?”

13. (a) Pergunta saida deʼit mak karik fiar-naʼin sira neʼebé sei moris hiʼas hakarak husu ba ita? (b) Ita sente oinsá kona-ba hasoru malu ho fiar-naʼin sira husi tempu uluk?

13 Klaru katak fiar-naʼin sira-neʼe mós iha pergunta barak neʼebé sira hakarak husu ba ita. Ita sei kontente loos atu konta ba sira buat neʼebé akontese iha loron ikus sira no oinsá Jeová ajuda ninia povu iha tempu susar! Ita bele fiar katak kuandu sira aprende oinsá Jeová kumpre buat hotu neʼebé nia promete, neʼe sei book duni sira-nia laran. Iha mundu foun, ema fiar-naʼin sira neʼebé Bíblia konta, sei moris iha rai hamutuk ho ita, entaun sei fasil liu ba ita atu aprende husi sira-nia ezemplu. Nuneʼe, mai ita kontinua atu aprende kona-ba ema fiar-naʼin sira-neʼe hodi ita bele sente besik ho sira. Kontinua atu banati-tuir sira-nia fiar. Sin, ita sei kontente atu serbí Maromak Jeová hamutuk ho fiar-naʼin sira-neʼe nuʼudar ita-nia belun ba nafatin!