Skip to content

Skip to table of contents

Karta husi Grupu Administradór

Karta husi Grupu Administradór

Irmaun-irmán doben sira:

Iha tinan balu liubá, Livru Haklaken edisaun ba públiku fó sai série foun ho títulu: “Banati-tuir Sira-nia Fiar.” Husi tempu neʼebá toʼo agora, ita mós kontente atu lee istória balu husi série neʼe iha lia-tetun!

Irmaun-irmán sira husi fatin oioin sente oinsá kona-ba série neʼe? Irmán ida lee tiha istória kona-ba Marta, nia hatete: “Haʼu hamnasa kuandu haʼu lee istória neʼe tanba haʼu-nia hahalok hanesan duni ho Marta nian. Haʼu sempre hakaʼas an atu tau matan didiʼak ba haʼu-nia bainaka sira, no sai okupadu tebes atu halo nuneʼe. Maibé ida-neʼe halo haʼu haluha atu deskansa uitoan hodi bele ransu ho sira.” Kuandu joven-feto ida lee istória kona-ba Ester, nia hatete: “Haʼu hatene katak se ita la kuidadu, ita bele hanoin deʼit kona-ba roupa ho modelu foun oioin. Klaru katak ita hakarak hatais diʼak, maibé ita mós presiza kuidadu atu la tuir modelu naran deʼit.” Joven neʼe hatutan tan: “Jeová hanoin tebes kona-ba ita ema oinsá loos iha laran.” Irmán ida lee istória kona-ba apóstolu Pedro no ho laran-manas nia dehan: “Istória neʼe book duni haʼu-nia laran. Kuandu haʼu lee, haʼu sente haʼu mós envolve an iha istória neʼe, haʼu sente katak haʼu mós iha tempu neʼebá no sente buat oioin neʼebé akontese iha istória neʼe.”

Irmán sira-neʼe no mós ema barak neʼebé hakerek karta hodi hatoʼo agradese ba série neʼe, sira apoia liafuan neʼebé apóstolu Paulo hakerek, hodi dehan: “Buat hotu neʼebé hakerek ona horiuluk kedas, hakerek hodi hanorin ita.” (Roma 15:4) Loos duni, Jeová book sira neʼebé hakerek Bíblia atu hakerek istória sira-neʼe hodi hanorin lisaun importante mai ita. Maski ita foun ka kleur ona iha lia-loos, ita hotu bele aprende husi fiar-naʼin sira-neʼe.

Ami fó laran-manas ba imi atu lee kedas livru neʼe kuandu imi simu. Uza livru neʼe kuandu imi halaʼo Adorasaun Família nian. Labarik sira sei gosta tebes istória sira iha livru neʼe! Bainhira kongregasaun komesa atu estuda livru neʼe iha Estudu Bíblia iha Kongregasaun, hakaʼas an atu la falta tuir reuniaun semana-semana! Fó tempu atu lee livru neʼe ho didiʼak hodi la ansi. Envolve an iha istória sira, hanoin toʼok katak imi mós iha tempu neʼebá. Koko toʼok atu sente buat neʼebé ema iha istória sira-neʼe sente, haree buat neʼebé sira haree. Husu ba imi-nia an: ‘Se haʼu hasoru situasaun ruma hanesan ho sira-nian, haʼu sei halo tuir dalan neʼebé sira hasoru situasaun neʼe ka lae?’

Ami kontente tebes atu fó sai livru neʼe ba imi hotu. Ami fiar katak livru neʼe sei lori bensaun ba imi no imi-nia família. Ami haruka ami-nia domin boot ba imi hotu.

Grupu Administradór husi Testemuña ba Jeová