Skip to content

Skip to table of contents

 KAPÍTULU 1

“Maski nia mate ona, maibé nia koʼalia hela”

“Maski nia mate ona, maibé nia koʼalia hela”

1. Saida mak hanetik Adão no Eva nia família atu tama iha jardín Eden? Saida mak Abel hakarak duni atu akontese?

ABEL hein hela ninia bibi sira neʼebé han duʼut iha rai-luan neʼebé matak, no karik nia bele haree ahi neʼebé lakan husi fatin dook. Abel hatene katak iha neʼebá mak iha surik ida neʼebé lakan ho ahi no nakdulas hela hodi taka dalan atu tama ba jardín Eden. Uluk, ninia inan-aman hela iha neʼebá, maibé agora sira ho sira-nia oan la bele tama ona. Hanoin toʼok kona-ba anin malirin neʼebé Abel sente nuʼudar nia hateke ba lalehan no hanoin kona-ba ninia Kriadór. Karik nia hanoin: ‘Ema nia relasaun ho Maromak bele sai diʼak fali ka lae?’ Abel hakarak duni atu ida-neʼe akontese.

2-4. Oinsá mak Abel koʼalia mai ita ohin loron?

2 Ita bele dehan katak ohin loron Abel koʼalia ba ita. Se nuneʼe, ita bele rona nia ka lae? Karik ita sente katak neʼe la bele duni tanba Abel, Adão nia oan-mane segundu neʼe, mate kleur ona, besik tinan rihun neen liubá. Ninia ruin mós sai lahuk ona hanesan rai-rahun. Kona-ba ema neʼebé mate, Bíblia hatete: “Sira la hatene buat ida.” (Eclesiastes [Pengkhotbah] 9:5, 10) No mós, Bíblia nunka temi kona-ba Abel nia liafuan sira. Se nuneʼe, oinsá mak ita bele dehan katak nia koʼalia ba ita?

3 Kona-ba Abel, Maromak haleno apóstolu Paulo hodi hatete: “Maski nia mate ona, maibé nia koʼalia hela liuhusi ninia fiar.” (Lee Ebreu 11:4.) Entaun, oinsá mak Abel koʼalia ba ita? Nia halo ida-neʼe “liuhusi ninia fiar”. Abel mak ema primeiru neʼebé haburas hahalok fiar. Nia hatudu fiar neʼebé boot tebes no ninia ezemplu mak diʼak mai ita ohin loron atu halo tuir. Se ita aprende husi ninia fiar no hakaʼas an atu halo tuir, neʼe hanesan Abel mak koʼalia ba ita iha dalan neʼebé bele kona ita-nia moris.

4 Maibé tanba Bíblia mós ladún konta buat barak kona-ba Abel, saida mak ita bele aprende husi nia no ninia fiar? Mai ita haree.

 Sai boot husi tempu neʼebé “mundu hahú”

5. Jesus koʼalia kona-ba Abel no hatete katak Abel moris husi tempu neʼebé “mundu hahú”, ninia liafuan neʼe katak sá? (Haree mós nota-rodapé.)

5 Depois Maromak kria tiha ema primeiru, tempu balu liutiha mak Abel moris mai. Maibé kuandu Jesus iha mundu, nia koʼalia kona-ba Abel no hatete katak Abel moris husi tempu neʼebé “mundu hahú”. (Lee Lucas 11:50, 51.) Liafuan “mundu” neʼebé Jesus temi iha eskritura neʼe mak kona-ba ema iha mundu neʼebé iha esperansa atu hetan perdua ba sira-nia sala. Maski Abel mak ema númeru haat neʼebé moris iha mundu neʼe, maibé tuir Maromak nia haree, karik nia mak ema primeiru neʼebé bele hetan perdua. * Nuʼudar Abel sai boot, la iha ema ida neʼebé hatudu ezemplu diʼak ba nia.

6. Adão no Eva mak inan-aman oinsá?

6 Maski tempu neʼebá seidauk iha ema barak iha mundu, maibé Abel nia família tenke hasoru ona situasaun neʼebé susar. Abel nia inan-aman, Adão no Eva, iha isin neʼebé diʼak no forsa, maibé sira hatene katak sira halo ona sala boot iha sira-nia moris. Uluk, sira ema sala-laek, no sira iha esperansa atu moris ba nafatin. Maibé sira lakohi halo tuir Maromak Jeová no tan neʼe sira lakon sira-nia hela-fatin neʼebé furak, jardín Eden. Tanba sira hanoin deʼit sira-nia hakarak rasik liu fali buat neʼebé sira-nia oan presiza, sira halakon sira-nia moris nuʼudar ema sala-laek, no mós lakon moris ba nafatin.—Gênesis (Kejadian) 2:15–3:24.

7, 8. Eva hatete saida kuandu Caim moris mai, no karik nia hanoin saida?

7 Nuʼudar Adão no Eva moris iha jardín Eden nia liʼur, sira hetan susar iha sira-nia moris. Maski nuneʼe, kuandu sira-nia oan primeiru moris, sira hanaran nia Caim, neʼebé iha arti katak “buat ruma neʼebé mosu mai”. Eva hatete: “Haʼu hetan oan ida ho Jeová nia ajuda.” Eva nia liafuan neʼe hatudu katak karik nia hanoin kona-ba promete neʼebé Maromak Jeová fó sai iha jardín Eden. Maromak fó-hatene nanis katak feto ida sei hetan oan, ka “bei-oan” ida. No loron ida bei-oan neʼe sei halakon aat-naʼin neʼebé uluk book Adão no Eva atu halo sala.  (Gênesis [Kejadian] 3:15; 4:1) Karik Eva hanoin katak nia mak feto neʼebé Maromak fó-hatene nanis no Caim mak oan neʼebé Maromak promete ona.

8 Se Eva hanoin hanesan neʼe, ninia hanoin mak sala duni. Liután neʼe, se Adão no Eva fó-hatene ideia neʼe ba Caim nuʼudar nia sai boot, klaru katak ida-neʼe sei halo Caim sai foti-an. Lakleur, Eva hahoris oan-mane ida tan, maibé Bíblia la hatudu katak sira koʼalia liafuan hahiʼi nian kona-ba nia. Sira hanaran nia Abel, neʼebé karik iha arti katak “buat neʼebé la iha folin”. (Gênesis [Kejadian] 4:2) Maski ita ladún hatene, maibé karik sira hili naran neʼe tanba sira la haree Abel nuʼudar ema importante hanesan Caim.

9. Saida mak inan-aman sira ohin loron bele aprende husi ita-nia inan-aman primeiru?

9 Klaru katak inan-aman sira ohin loron mós bele aprende husi Adão no Eva nia ezemplu. Inan-aman sira tenke kuidadu atu sira-nia liafuan no hahalok labele halo sira-nia oan sai foti-an no hanoin an deʼit. Inan-aman sira presiza hanorin sira-nia oan atu hadomi Jeová no atu habelun ho nia. Triste katak inan-aman primeiru la halaʼo didiʼak sira-nia responsabilidade. Maski nuneʼe, iha duni esperansa ba sira-nia oan no bei-oan sira.

Saida mak ajuda Abel atu haburas fiar ba Maromak?

10, 11. Caim no Abel halo serbisu saida? Abel haburas hahalok saida?

10 Nuʼudar Caim no Abel sai boot, klaru katak sira-nia aman hanorin sira atu halo serbisu hodi tau matan ba sira-nia família nia presiza. Caim hili serbisu nuʼudar toʼos-naʼin, no Abel hili serbisu nuʼudar bibi-atan.

 11 Maibé Abel mós halo buat ida neʼebé importante liu. Ba tinan barak nia laran, nia haburas fiar, hahalok diʼak neʼebé apóstolu Paulo temi. Hanoin toʼok kona-ba neʼe: Iha tempu neʼebá, la iha ema ida neʼebé bele fó ezemplu diʼak ba Abel. Entaun, oinsá mak Abel haburas fiar ba Maromak Jeová? Mai ita haree buat tolu neʼebé karik ajuda Abel atu iha fiar neʼebé metin.

12, 13. Oinsá mak hanoin kleʼan kona-ba Jeová nia kriasaun ajuda Abel atu haburas liután ninia fiar?

12 Jeová nia kriasaun. Maski Maromak Jeová fó malisan ba rai, hodi halo rai hamosu ai-tarak no susar tebes atu halo toʼos, maibé rai nafatin fó hahán barak atu nuneʼe Abel nia família bele kontinua moris. No mós, Maromak la fó malisan ba animál sira, inklui mós manu sira no ikan, no foho sira, bee-lihun, mota, tasi, no lalehan, kalohan, loro-matan, no fitun sira. Abel bele haree duni Maromak Jeová nia domin, matenek, no laran-diʼak iha buat hotu neʼebé nia kria. (Lee Roma 1:20.) Hodi hanoin kleʼan kona-ba Maromak nia kriasaun no hahalok sira, neʼe ajuda Abel atu hametin liután ninia fiar.

Liuhusi kriasaun Abel haburas fiar ba Kriadór neʼebé domin

13 Ita bele fiar katak Abel uza tempu barak atu hanoin kona-ba Jeová. Hanoin toʼok kona-ba ninia serbisu nuʼudar bibi-atan. Nia tenke laʼo dook loroloron no nia presiza lori ninia bibi sira saʼe foho tun foho, hodi laʼo liu iha foho-leet, hakur mota atu buka duʼut neʼebé matak liu, bee neʼebé moos, no fatin diʼak atu deskansa. Husi Maromak nia kriasaun hotu, bibi-malae mak animál neʼebé la bele duni tau matan ba sira-nia an rasik. Sira presiza duni ema atu dirije no tau matan ba sira. Karik tanba Abel hanoin kona-ba ninia bibi sira, nia mós sente katak nia presiza duni matadalan, protesaun, no ajuda husi Maromak neʼebé matenek no forsa boot liu fali ema. Klaru katak nia hatoʼo beibeik ninia hanoin ba Maromak iha orasaun, no ninia fiar mós kontinua sai metin liután.

14, 15. Hodi haree Jeová nia liafuan sira sai loos, Abel hanoin kleʼan kona-ba saida?

14 Jeová nia promesa sira. Ita bele fiar katak Adão no Eva konta ba sira-nia oan buat neʼebé akontese iha jardín Eden, no rezultadu neʼebé sira hetan husi sira-nia sala. Tan neʼe, Abel bele hanoin kleʼan kona-ba buat barak.

15 Maromak Jeová hatete katak nia sei fó malisan ba rai. Abel bele haree ho matan rasik ai-tarak sira mosu iha rai hodi sai tuir duni Maromak nia liafuan. Jeová mós fó-hatene nanis katak Eva sei hetan susar kuandu nia sai isin-rua no tuur-ahi.  Nuʼudar Abel nia alin sira moris, nia mós bele haree katak liafuan hirak-neʼe sai loos. Jeová fó-hatene nanis ba Eva katak nia sei kaan ninia laʼen nia domin no atensaun, no ikusmai ninia laʼen sei domina nia. Abel mós bele haree ida-neʼe akontese ba ninia inan no aman. Iha situasaun hotu, Abel hatene katak Jeová nia liafuan sempre sai loos. Tan neʼe, Abel iha razaun diʼak atu tau fiar ba Maromak nia promete kona-ba “bei-oan” neʼebé sei hadiʼa buat aat hotu neʼebé hahú iha jardín Eden.—Gênesis [Kejadian] 3:15-19.

16, 17. Saida mak Abel aprende husi Jeová nia anju sira?

16 Jeová nia atan sira. Maski la iha ema ida neʼebé bele sai ezemplu diʼak ba Abel, maibé iha ninia tempu iha anju sira neʼebé hatudu fiar-metin ba Maromak, no Abel bele halo tuir sira-nia ezemplu. Kuandu Jeová hasai Adão no Eva husi jardín Eden, nia la husik ona sira ka sira-nia oan atu tama fali iha jardín neʼe. Atu sira labele tama fali, Jeová tau kerubín sira, katak anju sira neʼebé iha pozisaun aas, no mós tau surik ida neʼebé lakan ho ahi no nakdulas hela.—Lee Gênesis (Kejadian) 3:24. *

17 Hanoin toʼok kona-ba Abel kuandu nia sei kiʼik no haree anju sira-neʼe. Tanba anju sira-neʼe halo sira-nia an nuʼudar ema, Abel bele haree ho momoos katak sira iha forsa neʼebé boot tebes. No surik neʼebé nakdulas hela mós halo Abel hakfodak. Nuʼudar Abel sai boot, nia nunka haree anju sira-neʼe sai baruk. Loron no kalan, tinan ba tinan, anju ho forsa boot sira-neʼe la husik sira-nia serbisu. Tan neʼe, Abel bele aprende katak Jeová iha atan sira neʼebé laran-metin ba nia. Iha Abel nia família rasik, nia la haree ema hatudu laran-metin hanesan anju sira-neʼe. Klaru katak anju sira-neʼe nia ezemplu hametin Abel nia fiar.

Iha Abel nia moris tomak, nia bele haree katak kerubín sira mak Jeová nia atan neʼebé laran-metin

18. Ohin loron, oinsá mak ita bele haburas ita-nia fiar?

 18 Maromak Jeová fó sai kona-ba ninia an liuhusi ninia kriasaun, ninia promesa sira no ninia atan sira-nia ezemplu. Tanba Abel hanoin kleʼan kona-ba buat hotu neʼe, ninia fiar sai metin liután. Ita bele duni aprende buat barak husi Abel nia ezemplu, loos ka lae? Joven sira mós bele sente kmaan hodi hatene katak sira bele duni haburas fiar ba Jeová, maski sira-nia família la serbí Maromak. Ohin loron, ita mós bele haburas ita-nia fiar hodi aprende husi Maromak nia kriasaun, hodi lee Bíblia no hanoin kleʼan, no hodi halo tuir Maromak nia atan sira neʼebé hatudu fiar.

Tanbasá mak Maromak kontente ho Abel nia sakrifísiu?

19. Ikusmai Abel komprende saida?

19 Nuʼudar Abel nia fiar ba Jeová sai metin liután, nia hakarak hatene oinsá mak nia bele hatudu sai ninia fiar husi nia hahalok sira. Maibé, saida mak ema bele fó ba Maromak, Ida neʼebé kria lalehan no rai? Klaru katak Maromak la presiza prezente ka ajuda ruma husi ema. Ikusmai, Abel komprende katak se nia ho laran neʼebé loos, fó ba Jeová buat diʼak liu hotu neʼebé nia iha, ida-neʼe sei halo kontente ninia Aman iha lalehan.

Hodi fiar, Abel hasaʼe sakrifísiu ba Maromak, maibé Caim lae

20, 21. Caim no Abel hasaʼe sakrifísiu saida ba Jeová? Jeová sente oinsá kona-ba neʼe?

20 Tan neʼe, Abel hili ninia bibi balu atu fó nuʼudar sakrifísiu. Nia hili bibi sira neʼebé diʼak liu hotu no neʼebé moris  primeiru, no nia foti bibi sira-neʼe nia naan neʼebé diʼak liu hodi fó nuʼudar sakrifísiu. Caim mós hakarak simu Maromak nia bensaun, tan neʼe nia hili modo oioin husi ninia toʼos atu fó nuʼudar sakrifísiu. Maibé kuandu maun-alin neʼe hasaʼe sira ida-idak nia sakrifísiu, bele haree duni buat neʼebé la hanesan entre sira naʼin-rua.

21 Adão nia oan naʼin-rua neʼe karik tau sira-nia sakrifísiu iha altár hodi sunu ho ahi. Karik sira halo ida-neʼe iha fatin neʼebé anju sira neʼebé hein hela jardín bele haree. Iha tempu neʼebá, anju sira-neʼe deʼit mak Maromak nia atan sira neʼebé reprezenta nia iha rai. Oinsá mak Jeová sente kona-ba Abel no Caim nia sakrifísiu? Bíblia hatete: “Jeová kontente ho Abel no ba ninia sakrifísiu.” (Gênesis [Kejadian] 4:4) Oinsá mak Maromak hatudu katak nia gosta Abel nia sakrifísiu? Tuir loloos, Bíblia la fó sai kona-ba neʼe.

22, 23. Tanbasá mak Jeová kontente ho Abel nia sakrifísiu?

22 Maibé, tansá mak Maromak kontente ho Abel? Karik tanba sakrifísiu neʼebé nia fó. Abel uza buat neʼebé moris, nia uza animál atu fó nuʼudar sakrifísiu hodi fakar nia raan. Karik Abel hatene katak sakrifísiu hanesan neʼe mak iha folin ba Maromak. Tinan atus ba atus depois Abel nia tempu, Maromak uza duni bibi-malae neʼebé la iha buat aat ruma atu reprezenta Ninia Oan-Mane rasik nia sakrifísiu. Bíblia bolu Maromak nia Oan-Mane neʼebé la iha sala ida nuʼudar Maromak nia “bibi-oan”, neʼebé sei fakar nia raan. (João 1:29; Êxodo [Keluaran] 12:5-7) Maibé iha tempu neʼebá, karik Abel la hatene kona-ba ida-neʼe.

23 Buat neʼebé ita hatene mak Abel fó ba Maromak buat diʼak liu hotu neʼebé nia iha. Jeová la haree deʼit ba Abel nia sakrifísiu, maibé haree mós ba ninia laran. Jeová kontente ho Abel tanba ninia domin no ninia fiar mak book nia atu hasaʼe sakrifísiu.

24. (a) Tanbasá mak Maromak la kontente ho Caim nia sakrifísiu? (b) Oinsá mak Caim hanesan ho ema barak ohin loron?

24 Oinsá kona-ba Caim no ninia sakrifísiu? Bíblia hatete katak Jeová “la kontente ho Caim no ba ninia sakrifísiu”. (Gênesis [Kejadian] 4:5) Tuir loloos, Maromak la gosta Caim laʼós tanba nia fó sakrifísiu neʼebé la diʼak. Ita hatene ida-neʼe tanba iha Izraél antigu nia tempu, Maromak simu buat neʼebé sira koʼa husi sira-nia toʼos nuʼudar sakrifísiu. (Levítico [Imamat] 6:14, 15) Maibé, Bíblia hatete: “Caim rasik nia hahalok mak aat.”  (Lee 1 João 3:12.) Hanesan ema barak ohin loron, karik Caim hanoin katak nia bele halo kontente Maromak hodi hatudu hahalok finje deʼit. Liuhusi Caim nia hahalok sira, nia la hatudu fiar neʼebé loos no domin ba Maromak.

25, 26. Jeová fó avizu saida ba Caim? Maibé saida mak Caim halo?

25 Caim koko atu aprende husi Abel nia ezemplu ka lae, kuandu nia hatene katak Jeová la kontente ho nia? Lae. Duké halo ida-neʼe, nia haburas odi ba ninia alin. Jeová haree saida mak Caim haburas iha ninia laran, tan neʼe ho pasiénsia Maromak koko atu ajuda Caim. Maromak fó avizu ba Caim katak ida-neʼe sei book nia atu halo sala neʼebé boot. No Maromak hatete katak se Caim troka ninia hahalok, nia sei hetan hahiʼi, katak Maromak sei simu nia.—Gênesis (Kejadian) 4:6, 7.

26 Maibé Caim la rona ba Maromak nia avizu. Nia konvida ninia alin atu laʼo ho nia ba toʼos. Depois, Caim ataka nia alin hodi oho nia. (Gênesis [Kejadian] 4:8) Ita bele dehan katak Abel mak ema primeiru neʼebé sai vítima hodi mate tanba kaer metin ba ninia fiar. Maibé, maski nia mate, ninia istória sei moris toʼo agora.

27. (a) Tanbasá mak ita bele fiar katak Abel sei hetan moris-hiʼas? (b) Atu ita bele hasoru malu ho Abel iha mundu foun, saida mak ita presiza halo?

27 Abel nia raan hakilar ba Maromak Jeová hodi husu justisa. No Maromak halaʼo duni justisa hodi fó kastigu ba Caim tanba buat aat neʼebé nia halo. (Gênesis [Kejadian] 4:9-12) Maibé buat neʼebé importante mak Abel sei koʼalia ba ita ohin loron liuhusi ninia fiar. Maski Abel moris ba tempu uitoan deʼit kompara ho ema seluk iha tempu neʼebá, maibé nia halaʼo ninia moris iha dalan neʼebé halo Maromak kontente. Nia mate hodi hatene katak ninia Aman Jeová iha lalehan hadomi no kontente ho nia. (Ebreu 11:4) Tan neʼe, ita bele fiar katak Maromak Jeová sei nunka haluha Abel, no nia sei fó moris-hiʼas ba Abel iha mundu foun neʼebé hanesan jardín Eden. (João 5:28, 29) Ita mós sei bele hasoru malu ho Abel iha mundu foun, se ita hakaʼas an atu banati-tuir ninia fiar neʼebé metin.

^ par. 5 Liafuan orijinál neʼebé tradús nuʼudar “mundu hahú”, fó mós ideia katak kari fini hodi halo buat foun moris. Entaun, ida-neʼe mós hanesan ho oan primeiru iha mundu. Se nuneʼe, tansá mak Jesus koʼalia kona-ba Abel nuʼudar ema neʼebé moris husi tempu neʼebé “mundu hahú”? Tansá mak nia la koʼalia kona-ba Caim, Adão no Eva nia oan-mane primeiru? Tanba Caim nia desizaun no hahalok hatudu katak nia ho neon lakohi halo tuir Maromak Jeová. Nuneʼe, karik Caim sei la hetan perdua ba ninia sala no la hetan moris-hiʼas, hanesan ho ninia inan-aman.

^ par. 16 Gênesis 3:24: “No nia hasai ema husi jardín Eden no tau kerubín sira iha jardín nia parte leste no tau mós surik ida neʼebé lakan ho ahi no nakdulas hela atu hein netik dalan atu bá ai-hun moris nian.”