Skip to content

Skip to table of contents

 KAPÍTULU 7

Nia “kontinua sai boot iha Jeová nia oin”

Nia “kontinua sai boot iha Jeová nia oin”

1, 2. Iha situasaun saida mak Samuel halibur nasaun Izraél? Tanbasá mak nia presiza book sira atu hanoin hikas sira-nia sala?

 SAMUEL serbí Maromak Jeová nuʼudar profeta no tesi-lia naʼin ba tinan barak ona. Nia foin halibur ninia povu, nasaun Izraél, iha sidade Gilgal. Nia halo ida-neʼe iha tempu bailoro no trigu prontu atu koʼa, ida-neʼe maizumenus iha fulan-Maiu ka Juñu tuir ita-nia kalendáriu. Samuel hamriik iha povu nia oin no nia hateke ba sira no ema-lubun sai nonook. Samuel sei hatete saida atu bele book sira-nia laran?

2 Foin antes Samuel halibur povu, sira hatete ba nia katak sira hakarak ema ida atu sai liurai hodi ukun sira-nia nasaun. Povu la komprende katak sira-nia hakarak neʼe la hatudu respeitu ba Maromak Jeová no ba ninia profeta, tanba ida-neʼe hatudu katak sira lakohi simu Jeová nuʼudar sira-nia Liurai! Oinsá mak Samuel bele book sira atu hanoin hikas sira-nia sala boot neʼe?

Samuel nia moris nuʼudar labarik, hanorin ita oinsá atu hametin ita-nia fiar ba Jeová, maski ema seluk la hatudu ezemplu diʼak

3, 4. (a) Tanbasá mak Samuel koʼalia kona-ba tempu neʼebé nia sei joven? (b) Oinsá mak Samuel nia ezemplu bele ajuda ita ohin loron?

3 Samuel hatete: “Haʼu sai katuas no fuuk mutin ona.” No nia hatutan tan: “Haʼu laʼo iha imi-nia oin husi tempu neʼebé haʼu sei joven toʼo ohin loron.” (1 Samuel 11:14, 15; 12:2) Maski Samuel idade ona, maibé nia sei hanoin-hetan kona-ba buat hotu neʼebé nia halo kuandu nia sei labarik no joven. Sin, desizaun sira neʼebé nia foti kuandu nia sei kiʼik ajuda nia atu nafatin serbí ninia Maromak, Jeová, ho fiar-metin.

 4 Samuel presiza hametin ninia fiar maski ema neʼebé haleʼu nia la hatudu fiar no la halo tuir Jeová. Ohin loron mós, tanba ita moris iha mundu neʼebé nakonu ho ema neʼebé la hatudu fiar ba Maromak no hatudu hahalok aat oioin, ida-neʼe halo susar mai ita atu hametin ita-nia fiar. (Lee Lucas 18:8.) Tan neʼe, mai ita haree Samuel nia ezemplu, komesa husi tempu neʼebé nia sei labarik kiʼik.

“Serbí iha Jeová nia oin, nuʼudar labarik ida”

5, 6. Oinsá mak Samuel nia moris nuʼudar labarik la hanesan baibain? Tanbasá mak Samuel nia inan-aman bele fiar katak ema sei tau matan ba nia?

5 Samuel nia moris nuʼudar labarik kiʼik la hanesan baibain. Lakleur depois nia haketak susu, karik nia tinan tolu deʼit ka boot liu uitoan, nia komesa ona serbí iha Jeová nia tabernákulu iha Silo. Sidade Silo dook maizumenus kilómetru 30 husi Samuel nia moris-fatin Ramá. Ninia aman Elcana no inan Ana entrega nia ba Jeová atu serbí iha dalan espesiál nuʼudar ema nazireu iha ninia moris tomak. * Ida-neʼe katak Samuel nia inan-aman la hadomi nia no lakohi hakiak nia ka lae?

6 Lae duni! Samuel nia inan-aman hatene katak ema iha Silo sei tau matan didiʼak ba sira-nia oan. Amlulik Boot Eli mak dirije kona-ba neʼe tanba Samuel sei halo serbisu hamutuk ho nia. No iha mós feto barak neʼebé iha knaar oioin hodi ajuda halo serbisu sira iha tabernákulu.—Êxodo (Keluaran) 38:8; Juíz (Hakim-Hakim) 11:34-40.

7, 8. (a) Oinsá mak Samuel nia inan-aman hatudu domin no fó laran-manas ba nia? (b) Ohin loron, saida mak inan-aman sira bele aprende husi Samuel nia inan-aman nia ezemplu?

7 Liután neʼe, Ana no Elcana nunka haluha sira-nia oan primeiru, neʼebé sira hetan husi Jeová. Uluk, Ana husu Maromak atu iha oan ida, no promete katak nia sei fó oan neʼe atu serbí Jeová iha ninia moris tomak. Tinan-tinan bainhira Ana bá Silo, nia lori roupa foun neʼebé nia rasik mak suku hodi Samuel bele hatais atu serbí iha tabernákulu. Ita bele fiar katak Samuel kontente tebes kuandu ninia inan-aman mai hodi haree nia. Sira fó laran-manas ba nia atu hafolin ninia serbisu ba Jeová iha fatin espesiál neʼe.

8 Ohin loron, inan-aman sira bele aprende buat barak husi  Ana no Elcana nia ezemplu. Inan-aman barak hakaʼas an tebes atu fó ai-han no sasán ba sira-nia oan duké ajuda sira atu hakbesik ba Maromak Jeová. Maibé Samuel nia inan-aman hanoin uluk kona-ba família nia relasaun ho Jeová, no ida-neʼe ajuda duni Samuel atu sai ema neʼebé hamtaʼuk Maromak iha ninia moris tomak.—Lee Provérbios (Amsal) 22:6. *

9, 10. (a) Esplika toʼok kona-ba tabernákulu no oinsá mak joven Samuel sente kona-ba fatin santu neʼe. (Haree mós nota-rodapé.) (b) Samuel halo serbisu saida deʼit? Oinsá mak joven sira ohin loron bele banati-tuir Samuel nia ezemplu?

9 Hanoin toʼok, joven Samuel laʼo halimar iha foho besik Silo. Husi foho, nia hateke tun ba sidade no haree Jeová nia tabernákulu. Ida-neʼe halo nia laran-kontente tebes. Sin, tabernákulu mak fatin santu, * neʼebé Moisés mak dirije atu harii besik tinan 400 liubá. Ida-neʼe mak fatin ida deʼit iha mundu tomak, neʼebé halaʼo adorasaun loos ba Maromak Jeová.

10 Joven Samuel hadomi tebes tabernákulu. Bíblia hatete: “Samuel serbí iha Jeová nia oin, nuʼudar labarik ida, hodi hatais efod neʼebé halo husi hena liñu.” (1 Samuel 2:18) Efod mak hanesan unuk neʼebé la iha liman, no ida-neʼe hatudu katak Samuel halo serbisu atu ajuda amlulik sira iha tabernákulu. Maski Samuel la moris iha umakain amlulik nian, maibé nia halo serbisu iha tabernákulu. Porezemplu, dadeer-dadeer nia loke odamatan ba pátiu iha tabernákulu, no mós ajuda Eli neʼebé sai katuas ona. Maski Samuel hafolin tebes ninia knaar espesiál sira-neʼe, maibé nia mós sai laran-susar kona-ba buat aat tebes neʼebé akontese daudaun iha Jeová nia uma.

Hatudu hahalok moos maski hahalok aat haleʼu nia

11, 12. (a) Hofni ho Finéas mak ema hanesan saida? (b) Hahalok aat saida deʼit mak Hofni ho Finéas halo iha tabernákulu? (Haree mós nota-rodapé.)

11 Bainhira Samuel sei joven, nia haree ema seluk nia hahalok aat. Eli iha oan-mane naʼin-rua, naran Hofni no Finéas. Livru Samuel hatete: “Eli nia oan-mane sira mak ema aat; sira la hamtaʼuk Jeová.” (1 Samuel 2:12) Sin, Hofni ho Finéas mak  “ema aat”. Liafuan neʼe mós iha arti katak “Ema neʼebé la iha folin”, tanba sira la hatudu respeitu ba Jeová. Sira la hafolin Jeová nia matadalan no ukun-fuan sira. No tanba ida-neʼe, sira mós halo sala barak tan.

12 Maromak nia Ukun-Fuan hatete kona-ba amlulik nia serbisu no oinsá mak sira tenke hasaʼe sakrifísiu oioin iha tabernákulu. Ukun-Fuan fó sai ho momoos kona-ba neʼe tanba ida-neʼe importante tebes! Sakrifísiu sira-neʼe mak dalan neʼebé Maromak uza atu ema sala-naʼin bele sai moos iha Ninia oin no hetan Ninia bensaun no matadalan. Maibé, Hofni ho Finéas book sira-nia maluk amlulik atu la hatudu respeitu ba sakrifísiu sira-neʼe. *

13, 14. (a) Oinsá mak hahalok aat iha tabernákulu kona povu sira neʼebé hakarak hakbesik ba Jeová? (b) Eli kumpre ninia responsabilidade nuʼudar aman no amlulik boot ka lae? Esplika toʼok.

13 Hanoin toʼok, joven Samuel haree amlulik sira-nia hahalok aat no hakfodak tanba ema ida seidauk korrije sira. Povu sira mai toʼo tabernákulu atu bele hetan kmaan no hakbesik ba Maromak, maibé sira fila ba uma ho laran-kiʼik no laran-tun. Liután neʼe, Hofni ho Finéas mós la halo tuir Jeová nia ukun-fuan hodi halo sala-foʼer ho feto sira neʼebé serbí iha tabernákulu. (1 Samuel 2:22) Karik Samuel hein katak Eli sei halo buat ruma atu hadiʼa problema neʼe.

Eli nia oan sira-nia hahalok aat halo Samuel sai laran-susar tebes

14 Klaru katak Eli mak tenke hadiʼa situasaun aat neʼe. Nuʼudar amlulik boot, nia iha knaar atu tau matan ba buat neʼebé akontese iha tabernákulu. Liután neʼe, nia mós iha responsabilidade nuʼudar aman atu fó dixiplina ba ninia oan sira. Tuir loloos, Eli nia oan sira-nia hahalok neʼe, halo aat ba sira-nia an rasik no mós ba ema seluk. Maski nuneʼe, Eli la kumpre ninia responsabilidade nuʼudar aman no amlulik boot. Nia koʼalia ho  ninia oan sira iha dalan neʼebé mamar deʼit. (Lee 1 Samuel 2:23-25. *) Tuir loloos, nia tenke fó dixiplina makaʼas liu ba ninia oan sira, tanba sira halo sala boot tebes neʼebé merese hetan kastigu-mate!

15. Jeová hatoʼo avizu saida ba Eli? Avizu neʼe book Eli nia família atu halo mudansa ka lae?

15 Situasaun iha tabernákulu sai aat ba beibeik toʼo ikusmai Jeová haruka ninia profeta ida neʼebé Bíblia bolu “Maromak nia ema” atu hatoʼo Maromak nia tesi-lia ba Eli. Jeová hatete: “Ó kontinua hamtaʼuk ó-nia oan-mane sira liu fali haʼu.” Tuirmai, Maromak fó-hatene nanis katak Eli nia oan sira sei mate iha loron neʼebé hanesan, no Eli nia família sei hetan terus boot toʼo lakon sira-nia knaar nuʼudar amlulik. Avizu makaʼas neʼe book Eli nia família atu halo mudansa ka lae? Bíblia hatudu katak sira la troka sira-nia hahalok.—1 Samuel 2:27–3:1.

16. (a) Bíblia hatete saida deʼit kona-ba joven Samuel? (b) Ita gosta saida kona-ba Samuel nia hahalok?

16 Oinsá mak ida-neʼe kona joven Samuel? Bíblia fó sai buat neʼebé diʼak kona-ba Samuel maski nia iha situasaun aat. Porezemplu, iha 1 Samuel 2:18, ita lee katak “Samuel serbí iha Jeová nia oin, nuʼudar labarik ida”. Maski Samuel sei labarik, nia tau uluk serbisu ba Maromak iha ninia moris. No iha versíkulu 21 mós hatete: “Labarik Samuel kontinua sai boot iha Jeová nia oin.” Nuʼudar Samuel sai boot ba beibeik, ninia relasaun ho ninia Aman iha lalehan sai metin liután. No ita bele fiar katak relasaun besik ho Jeová mak proteje Samuel husi hahalok aat sira.

17, 18. (a) Oinsá mak joven kristaun sira bele halo tuir Samuel nia ezemplu bainhira ema seluk la hatudu ezemplu diʼak? (b) Samuel nia hahalok lori rezultadu saida?

17 Karik ema neʼebé hasoru situasaun hanesan Samuel nian bele hanoin: ‘Se amlulik boot no ninia oan sira mak halo sala hanesan neʼe, haʼu mós bele halo buat naran deʼit neʼebé haʼu hakarak.’ Maibé, se ema seluk no ema neʼebé iha knaar boot mak halo sala, ida-neʼe bele sai razaun atu ita mós bele halo sala ka lae? Lae duni. Joven kristaun barak ohin loron halo tuir  Samuel nia ezemplu no “kontinua sai boot iha Jeová nia oin” maski ema seluk la hatudu ezemplu diʼak.

18 Samuel nia hahalok diʼak neʼe lori rezultadu saida? Bíblia hatete: “Durante tempu neʼe, labarik Samuel sai boot ba beibeik no sai kmanek liu iha Jeová nia oin no ema nia oin.” (1 Samuel 2:26) Sin, Samuel nia hahalok diʼak halo ema seluk gosta nia. Jeová rasik mós hadomi Samuel tanba nia hatudu fiar-metin. Ita bele fiar katak Samuel la duvida katak Maromak sei hadiʼa buat aat hotu neʼebé akontese iha Silo. Maibé karik Samuel hanoin: ‘Bainhira mak Jeová sei hadiʼa situasaun neʼe?’ Iha kalan ida Jeová fó resposta ba Samuel.

“Koʼalia bá, tanba Ita-nia atan rona hela”

19, 20. (a) Esplika toʼok saida mak akontese ba Samuel iha dadeer-saan ida. (b) Oinsá mak Samuel hatene lian neʼe husi sé? Samuel hatudu hahalok saida ba Eli?

19 Iha dadeer-saan ida, rai sei nakukun no ahi-oan sei lakan hela, Samuel rona lian ida neʼebé bolu ninia naran. Nia hanoin katak Eli mak bolu. Eli sai katuas tebes ona no ninia matan sai malahuk ona. Samuel hadeer kedas no halai ba Eli. Hanoin toʼok, labarik Samuel halai ho ain-tanan deʼit atu ajuda Eli! Bainhira ita hanoin labarik Samuel neʼebé nafatin hatudu respeitu no laran-diʼak ba Eli, ida-neʼe book duni ita-nia laran, loos ka lae? Maski Eli halo sala oioin, maibé nia nafatin Jeová nia amlulik boot.—1 Samuel 3:2-5.

20 Samuel fanu Eli, hodi hatete: “Haʼu  iha neʼe, tanba Ita bolu haʼu.” Maibé Eli hatete katak nia la bolu, no haruka Samuel atu bá toba fali. Maibé, ida-neʼe akontese ba dala balu tan! Ikusmai, Eli hatene tansá mak Samuel rona lian neʼebé bolu ninia naran. Ba tempu kleur, Jeová la haruka ninia mensajen ka vizaun ba ninia povu, tanba povu nia hahalok ladiʼak. Maibé, Eli hatene katak agora Jeová hakarak koʼalia fali, no nia atu koʼalia ba labarik Samuel! Tan neʼe, Eli haruka Samuel atu fila ba ninia toba-fatin, no fó-hatene ba nia oinsá atu hatán ho loloos kuandu nia rona fali lian neʼe. Samuel halo tuir. Lakleur, nia rona lian neʼebé bolu nia dehan: “Samuel, Samuel!” Labarik neʼe hatán: “Koʼalia bá, tanba Ita-nia atan rona hela.”—1 Samuel 3:1, 5-10.

21. Ohin loron, oinsá mak ita bele rona ba Jeová? Tanbasá mak importante atu halo nuneʼe?

21 Afinál, Jeová iha atan ida iha Silo neʼebé prontu atu rona Ninia lian. No hahú husi tempu neʼe, Samuel sempre rona ba Jeová nia liafuan. Ita mós iha toman atu rona ba Jeová ka lae? Klaru katak ohin loron ita la rona Jeová nia lian liuhusi milagre ruma. Maibé ita iha Maromak nia Liafuan, Bíblia, neʼebé kompletu. No bainhira ita rona ba Maromak no halo tuir, ita-nia fiar sei sai metin liután, hanesan ho Samuel.

Maski Samuel sai taʼuk, maibé nia ho fiar-metin hatoʼo Jeová nia tesi-lia ba Eli

22, 23. (a) Oinsá mak lia-menon neʼebé Jeová hatoʼo liuhusi Samuel sai loos? (b) Ema koʼalia saida kona-ba Samuel?

22 Akontesimentu neʼe lori mudansa boot iha Samuel nia moris, tanba nia komesa iha relasaun besik ho Jeová, no nia sai profeta no lia-naʼin ba Maromak. Foufoun, labarik neʼe sai taʼuk atu hatoʼo Jeová nia lia-menon ba Eli, katak lakleur tan buat neʼebé Maromak fó-hatene nanis kona-ba Eli nia família sei sai loos. Maibé Samuel hatoʼo liafuan neʼe ho aten-brani, no Eli simu Maromak nia tesi-lia ho haraik-an. Lakleur, buat hotu neʼebé Jeová hatete nanis sai loos. Povu Izraél halo funu hasoru ema Filístia, no iha loron ida deʼit nia laran, Hofni ho Finéas mate iha funu neʼe, no Eli rasik mós mate bainhira nia rona katak ema hadau ona Jeová nia Arka neʼebé santu.—1 Samuel 3:10-18; 4:1-18.

23 Maibé, ema nafatin koʼalia diʼak kona-ba Samuel nuʼudar Maromak nia profeta neʼebé fiar-metin. Bíblia hatete: “Jeová rasik mak hamutuk ho nia”, no Jeová kumpre buat hotu neʼebé Samuel fó-hatene nanis.—Lee 1 Samuel 3:19. *

 “Samuel bolu Jeová”

24. Lakleur, povu Izraél hakarak saida? Tanbasá ida-neʼe mak sala boot?

24 Povu Izraél halo tuir Samuel nia ezemplu ka lae, hodi sai ema neʼebé fiar-metin ba Jeová? Lae. Liutiha tinan barak, sira deside katak sira lakohi ona atu profeta ida mak halaʼo tesi-lia ba sira, sira hakarak ema ida atu sai liurai ba sira hanesan ho nasaun sira seluk. Bainhira povu husu ida-neʼe, Jeová haruka Samuel atu halo tuir sira-nia hakarak. Maibé ulukliu, Samuel presiza fó-hatene ba povu katak buat neʼebé sira hakarak mak aat tebes tanba laʼós Samuel deʼit mak sira la simu, maibé Jeová rasik! Tan neʼe, Samuel halibur povu iha Gilgal.

Samuel halo orasaun ho fiar-metin, no Jeová hatán hodi halo rai-tarutu no udan tun

25, 26. Iha Gilgal, oinsá mak Samuel ajuda povu atu komprende katak sira halo sala boot hasoru Jeová?

25 Hanoin filafali kona-ba buat neʼebé temi ona iha parágrafu primeiru. Samuel neʼebé sai katuas ona fó-hanoin ba povu neʼebé halibur iha Gilgal kona-ba ninia moris ho fiar-metin husi kiʼik. Tuirmai, Bíblia dehan katak “Samuel bolu Jeová”. Nia husu Jeová atu halo rai-tarutu no hatún udan boot.—1 Samuel 12:17, 18.

26 Oinsá mak rai bele tarutu no udan tun iha tempu bailoro? Karik ema balu la fiar no komesa muramura ba malu, maibé derrepente deʼit, lalehan sai nakukun ho kalohan metan. Anin komesa huu iha toʼos trigu nian. Povu rona rai-tarutu makaʼas, no ikusmai udan tun. Povu sira sente oinsá? Bíblia hatete: “Povu sira sai taʼuk tebes ba Jeová no ba Samuel.” Ikusmai, sira komprende katak sira halo sala boot hasoru Jeová.—1 Samuel 12:18, 19.

27. Jeová sente oinsá kona-ba ninia atan sira neʼebé banati-tuir Samuel nia fiar?

27 Samuel konsege book povu nia laran laʼós ho ninia kbiit rasik, maibé ho Jeová nia ajuda. Husi kiʼik toʼo katuas, Samuel tau fiar ba Maromak Jeová, no Jeová fó bensaun ba nia. Toʼo ohin loron, Jeová nia hahalok hanesan deʼit, nia la troka. Sin, nia sei nafatin apoia ninia atan sira neʼebé banati-tuir Samuel nia fiar.

^ par. 5 Juramentu atu sai ema nazireu inklui juramentu atu la hemu tua no la tesi fuuk. Baibain, ema Izraél bele halo juramentu neʼe ba tempu balu deʼit, maibé iha mós ema neʼebé moris nuʼudar ema nazireu toʼo mate, hanesan Sansão, Samuel, no João Batista.

^ par. 8 Provérbios 22:6: “Hanorin labarik tuir dalan neʼebé diʼak ba nia; maski nia sai katuas ona nia sei la husik dalan neʼe.”

^ par. 9 Tabernákulu mak uma retángulu, ka uma ho naruk metru 13,4 no luan metru 4,5, neʼebé hanesan tenda neʼebé harii ho ai. Maibé, tenda neʼe uza materiál ho kualidade diʼak tebes, hanesan asu-tasi nia kulit, hena ho borda kapás, no ai neʼebé pinta ho osan-mutin no osan-mean. Tabernákulu neʼe harii iha rai neʼebé naruk metru 44,5 ho luan metru 22,2, neʼebé mós iha altár boot atu hasaʼe sakrifísiu. Iha tabernákulu neʼe nia sorin mós iha kuartu oioin ba amlulik sira, no karik Samuel hela iha kuartu sira-neʼe ida.

^ par. 12 Livru Samuel fó sai amlulik sira-nia hahalok aat rua. Ida, Ukun-Fuan fó-hatene kona-ba animál nia parte ida-neʼebé mak amlulik sira bele han. (Deuteronômio [Ulangan] 18:3) Maibé amlulik aat sira iha toman seluk. Sira haruka ajudante sira atu tau garfu iha sanan neʼebé daʼan hela naʼan, no parte naran deʼit neʼebé belit iha garfu neʼe mak sei sai amlulik nian! Liután neʼe, bainhira ema lori sakrifísiu atu sunu iha altár, amlulik aat haruka sira-nia ajudante obriga ema neʼe hodi haruka nia atu fó naʼan matak maski parte bokur seidauk hasaʼe nuʼudar sakrifísiu ba Jeová.—Levítico (Imamat) 3:3-5; 1 Samuel 2:13-17.

^ par. 14 1 Samuel 2:23-25: “23 No nia hatete beibeik ba sira: ‘Tansá imi kontinua halo hanesan neʼe? Tanba buat neʼebé haʼu rona husi ema hotu kona-ba imi mak ladiʼak. 24 Labele hanesan neʼe, haʼu-nia oan sira, tanba liafuan neʼebé haʼu rona mak ladiʼak, liafuan neʼebé Jeová nia povu konta ba malu. 25 Se ema ida halo sala hasoru ema seluk, Maromak sei tesi lia ba nia; maibé se hasoru Jeová mak ema ida halo sala, sé mak sei halo orasaun ba nia?’ Maibé sira lakohi rona ba sira-nia aman nia liafuan, tanba agora Jeová hakarak fó kastigu-mate ba sira.”

^ par. 23 1 Samuel 3:19: “No Samuel kontinua sai boot, no Jeová rasik hamutuk ho nia no Maromak la husik ninia liafuan atu monu ba rai.”