Skip to content

Skip to table of contents

 KAPÍTULU 22

Nia laran-metin maski hasoru susar oioin

Nia laran-metin maski hasoru susar oioin

1, 2. Nuʼudar Jesus hanorin iha sinagoga iha sidade Kafarnaum, Pedro hakarak haree saida? Maibé saida mak akontese?

NUʼUDAR Jesus hanorin iha sinagoga iha sidade Kafarnaum, Pedro haree ho laran-susar rona-naʼin sira neʼebé haleʼu Jesus. Sidade Kafarnaum mak besik Tasi Galileia. Uluk, Pedro hela no halo serbisu nuʼudar peskadór iha sidade neʼe. Pedro nia kolega barak no família sei hela iha fatin neʼe. Klaru katak Pedro hakarak tebes atu sira mós simu Jesus hanesan nia, no ho laran-manas aprende kona-ba Maromak nia Ukun husi mestre boot neʼe. Maibé, ida-neʼe la akontese tuir buat neʼebé Pedro hanoin.

2 Ema barak lakohi rona ona ba Jesus. Balu komesa muramura kona-ba Jesus nia liafuan. Maibé, buat neʼebé halo Pedro hanoin barak mak kona-ba Jesus nia dixípulu sira-nia hahalok. Sira barak la kontente ona ho lia-loos foun neʼebé Jesus hanorin ba sira. Agora, sira oin-buis no laran-hirus. Balu hatete katak Jesus nia liafuan neʼe todan tebes, no sira la bele tahan ona. Ikusmai, sira sai husi sinagoga no la tuir tan Jesus.—Lee João 6:60, 66.

3. Pedro nia fiar ajuda nia atu halo saida deʼit?

3 Neʼe mak tempu neʼebé susar ba Pedro no ba ninia maluk apóstolu sira. Pedro rasik mós ladún komprende buat neʼebé Jesus foin hatete iha loron neʼe, no nia hatene katak Jesus nia liafuan neʼe bele halo ema balu hirus. Maibé saida mak Pedro halo? Tuir loloos, Pedro hasoru ona situasaun neʼebé koko ninia laran-metin ba ninia Naʼi. No iha aban-bainrua mós nia sei hasoru situasaun seluk tan neʼebé koko ninia fiar. Mai ita buka-hatene oinsá mak Pedro nia fiar ajuda nia atu nafatin hatudu laran-metin maski hasoru susar oioin.

 Laran-metin nafatin maski ema seluk lae

4, 5. Jesus halo saida deʼit neʼebé la tuir ema barak nia hanoin no hakarak?

4 Dala barak, Jesus halo Pedro hakfodak tanba nia koʼalia no hatudu hahalok neʼebé la tuir ema barak nia hanoin no hakarak. Loron ida antes neʼe, Jesus halo milagre hodi fó-han ema rihun ba rihun. Tan neʼe, sira hakarak foti Jesus nuʼudar sira-nia liurai. Maibé, duké simu atu sai liurai, Jesus hasees an husi sira, no ida-neʼe halo sira hakfodak. Jesus haruka ninia dixípulu sira atu saʼe ró hodi bá Kafarnaum. Bainhira dixípulu sira hakur daudaun Tasi Galileia iha kalan, anin huu makaʼas no tasi sai siʼak. Jesus halo sira hakfodak dala ida tan hodi laʼo iha bee leten, no ida-neʼe hanorin Pedro lisaun importante kona-ba fiar.

5 Iha dadeer-saan, Jesus ho ninia dixípulu sira haree katak ema-lubun buka atu tuir sira. Maibé, sira hakarak deʼit atu Jesus halo milagre hodi fó hahán ba sira, laʼós atu aprende no simu Jesus nia hanorin. Tan neʼe, Jesus koʼalia makaʼas ba sira katak sira buka deʼit isin nia hakarak. (João 6:25-27) Jesus kontinua koʼalia ba sira kona-ba ida-neʼe iha sinagoga iha Kafarnaum, maibé ema la simu ninia hanorin kleʼan neʼebé susar atu komprende.

6. Jesus fó ai-knanoik saida deʼit? Ninia rona-naʼin sira sente oinsá kona-ba neʼe?

6 Jesus hakarak ema atu simu nia laʼós nuʼudar ema neʼebé fó hahán deʼit ba sira. Nia hakarak sira atu hatene katak Maromak bele fó moris ba nafatin ba sira se sira hatudu fiar ba Jesus nia sakrifísiu no halo tuir ninia ezemplu. Tan neʼe, Jesus fó ai-knanoik hodi kompara ninia an ho maná, ai-han neʼebé tun husi lalehan iha Moisés nia tempu. Kuandu ema la simu liafuan neʼe, Jesus fó ai-knanoik seluk tan hodi hatete katak ema sei presiza han ninia isin no hemu ninia raan atu bele hetan moris. Ema neʼebé rona ida-neʼe sai hirus makaʼas liután. Balu hatete: “Liafuan sira-neʼe todan tebes; sé mak bele rona ida-neʼe?” Jesus nia dixípulu barak mós fila kotuk no la laʼo tan ona ho nia. *João 6:48-60, 66.

7, 8. (a) Saida mak Pedro seidauk komprende kona-ba Jesus nia knaar? (b) Pedro hatán oinsá ba Jesus nia pergunta ba apóstolu sira?

7 Entaun, Pedro sei halo saida? Karik nia mós sente konfuzaun  kona-ba Jesus nia liafuan. Nia seidauk komprende katak Jesus tenke mate atu kumpre Maromak nia hakarak. Pedro mós sei fila kotuk ka lae, hanesan ho dixípulu sira seluk neʼebé fiar namlele? Lae, tanba Pedro nia laran la hanesan duni ho dixípulu sira-neʼe. Oinsá?

8 Jesus hateke ba ninia apóstolu sira hodi dehan: “Imi mós hakarak atu bá ka?” (João 6:67) Jesus husu pergunta neʼe ba apóstolu naʼin-12, maibé Pedro mak hatán uluk. Husi Jesus nia apóstolu sira, dala barak Pedro mak ida neʼebé koʼalia uluk, karik tanba Pedro mak idade boot liu. Maski ida-neʼe loos ka lae, maibé ita hatene katak Pedro mak ema neʼebé brani no la dada an atu fó sai ninia hanoin. No iha tempu neʼe, Pedro fó sai liafuan furak husi ninia laran, hodi dehan: “Naʼi, ami atu bá ho sé loos? Ita iha liafuan moris rohan-laek nian.”—João 6:68.

9. Oinsá mak Pedro hatudu laran-metin ba Jesus?

9 Liafuan neʼe book duni ita-nia laran, loos ka lae? Tanba Pedro iha fiar neʼebé metin ba Jesus, ida-neʼe ajuda nia atu hatudu hahalok furak ida, neʼe mak laran-metin. Pedro hatene katak Jesus mak ida neʼebé Maromak Jeová haruka mai nuʼudar Salvadór, no katak Jesus salva ema liuhusi ninia hanorin kona-ba Maromak nia Ukun. Sin, maski Pedro ladún komprende Jesus nia hanorin balu, maibé nia hatene katak la iha fatin seluk neʼebé nia bele hetan Maromak nia bensaun, no la iha ida seluk neʼebé bele fó moris rohan-laek ba nia.

10. Ohin loron, oinsá mak ita bele banati-tuir Pedro nia fiar?

10 Ita mós hanoin hanesan ho Pedro ka lae? Ohin loron, ema barak hatete katak sira hadomi Jesus, maibé sira-nia hahalok la hatudu laran-metin. Se ita hakarak laran-metin duni ba Kristu, ita presiza iha hanoin hanesan Pedro kona-ba Jesus nia hanorin. Sin, maski dala ruma iha hanorin ruma neʼebé la tuir ita-nia hanoin ka hakarak, maibé ita presiza nafatin hakaʼas an atu komprende no moris tuir hanorin neʼe. Ida-neʼe importante tebes tanba ema neʼebé hatudu laran-metin deʼit mak bele iha esperansa atu hetan moris ba nafatin.—Lee Salmo (Mazmur) 97:10. *

 Laran-metin nafatin maski hetan konsellu

11. Jesus lori ninia dixípulu sira bá neʼebé? (Haree mós nota-rodapé.)

11 Lakleur depois akontesimentu neʼe, Jesus lori ninia apóstolu sira no dixípulu balu atu bá foho iha parte norte, iha fatin neʼebé sira bele haree rai neʼebé Maromak promete ba ema Izraél. Nuʼudar sira laʼo husi Tasi Galileia, sira bele haree jelu-rahun neʼebé taka Foho Hermon nia tutun. Jesus ho ninia dixípulu sira laʼo liu knua ida ba knua seluk besik Sezareia Filipe, no neineik-neineik sira laʼo besik toʼo ba Foho Hermon. * Nuʼudar sira laʼo saʼe daudaun, sira bele hateke tun ba parte súl no haree rai neʼebé Maromak promete. Iha fatin neʼe, Jesus husu pergunta importante ida ba ninia dixípulu sira.

12, 13. (a) Tanbasá mak Jesus hakarak hatene rona-naʼin nia hanoin kona-ba nia mak sé? (b) Oinsá mak Pedro hatudu fiar-metin ba Jesus?

12 Jesus husu ba ninia rona-naʼin sira hodi hatete: “Ema-lubun dehan haʼu neʼe sé?” Hanoin toʼok, Pedro hateke loos ba ninia Naʼi Jesus nia matan no bele haree Jesus nia kbiit, laran-diʼak no matenek. Jesus hakarak hatene oinsá ema sira-nia hanoin kona-ba ninia hanorin no hahalok. Jesus nia dixípulu sira fó sai ema nia hanoin sala oioin kona-ba Jesus. Maibé, Jesus hakarak hatene buat ida tan. Ninia dixípulu rasik mós hanoin sala kona-ba nia ka lae? Tan neʼe, nia husu: “Maibé, tuir imi-nia hanoin haʼu neʼe sé?”—Lucas 9:18-22.

13 Dala ida tan, Pedro mak hatán uluk. Ho aten-brani no fiar-metin, nia reprezenta ninia maluk sira hodi hatete: “Ita mak Kristu, Maromak moris nia Oan-Mane.” Hanoin toʼok, Jesus kontente no oin-midar nuʼudar nia gaba Pedro ho laran. Jesus mós fó-hanoin ba Pedro katak laʼós ema mak fó sai lia-loos neʼe, maibé Maromak Jeová mak fó sai ida-neʼe ba fiar-naʼin sira. Sin, Maromak ajuda Pedro atu hatene lia-loos ida neʼebé importante tebes, kona-ba sé mak Mesias, ka Kristu, neʼebé promete nanis ona!—Lee Mateus 16:16, 17.

14. Jesus fó knaar espesiál saida ba Pedro?

14 Profesia ida kona-ba Kristu fó-hatene katak Kristu mak nuʼudar fatuk neʼebé badain sira la simu. (Salmo [Mazmur] 118:22; Lucas 20:17) Tuir loloos, Jesus koʼalia kona-ba profesia  neʼe kuandu nia hatete katak Jeová sei harii kongregasaun iha fatuk neʼe, katak iha Mesias, ka Kristu. Tuirmai, Jesus fó ba Pedro knaar espesiál kona-ba kongregasaun neʼe. Maibé neʼe la dehan katak Pedro mak iha pozisaun boot liu fali apóstolu sira seluk, hanesan ema balu hanoin. Neʼe katak Jesus fó responsabilidade boot ba Pedro hodi fó “xave sira ba Ukun lalehan nian”. (Mateus 16:19) Sin, Pedro hetan knaar atu loke oportunidade ba ema grupu tolu atu tama iha Maromak nia Ukun, ulukliu ba ema judeu sira, tuirmai ba samaritanu sira, no ikusliu ba jentiu sira, ka ema neʼebé laʼós ema judeu.

15. Pedro hatete saida hodi siʼak Jesus? Tanbasá?

15 Maibé iha tempu seluk, Jesus hatete katak ema neʼebé simu buat barak, ninia responsabilidade mós barak liu, no ida-neʼe mak akontese duni ba Pedro. (Lucas 12:48) Bainhira Jesus fó xave sira ba Pedro, Jesus kontinua fó sai lia-loos kona-ba Mesias, neʼe inklui kona-ba Mesias sei hetan terus toʼo mate iha Jeruzalein. Ida-neʼe halo Pedro hakfodak no laran-susar. Tan neʼe, Pedro lori Jesus ba sorin no hahú siʼak nia, hodi hatete: “Naʼi, keta fó-malisan ba Ita-nia an. Susar sira-neʼe sei la kona Ita.”—Mateus 16:21, 22.

Ita presiza hatudu laran-metin ba Jesus nia hanorin, maski hanorin ruma la tuir ita-nia hanoin ka hakarak

16. Oinsá mak Jesus haloos Pedro nia hanoin sala? Tanbasá mak Jesus nia liafuan neʼe sei ajuda ita ohin loron?

16 Pedro hatete hanesan neʼe tanba nia hanoin loos Jesus. Tan neʼe, Jesus nia resposta halo nia hakfodak liután. Jesus fila kotuk husi Pedro no hateke ba dixípulu sira seluk, neʼebé karik iha hanoin hanesan ho Pedro, hodi hatete: “Dook tiha husi haʼu, Satanás! Ó hanesan fatuk sidi nian ba haʼu tanba ó-nia hanoin la tuir Maromak nian, maibé tuir ema nian.” (Mateus 16:23; Marcos 8:32, 33) Jesus nia liafuan neʼe hanorin mai ita lisaun importante ida. Katak fasil ba ita atu hanoin tuir ema nia hanoin duké tuir Maromak nia hanoin. Se ita husik ida-neʼe akontese, maski ho hakarak atu ajuda ema seluk, karik la ho neon ita bele apoia Satanás nia hakarak duké  Maromak nia hakarak. Entaun, oinsá mak Pedro hatán ba Jesus nia liafuan neʼe?

17. Jesus nia liafuan ba Pedro katak sá?

17 Pedro hatene katak Jesus la haree nia hanesan ho Diabu Satanás. Jesus nia hakarak mak laʼós atu hadook an husi Pedro neʼebé iha hahalok diʼak barak, maibé atu korrije ninia hanoin neʼebé laloos. Pedro komprende katak nia labele sai hanesan fatuk sidi nian ba ninia Naʼi Jesus, maibé nia tenke laʼo tuir Jesus hodi apoia nia.

Kuandu ita simu konsellu ho haraik-an no aprende husi ida-neʼe, ita bele kontinua hakbesik liután ba Jesus Kristu no ba ninia Aman, Maromak Jeová

18. Oinsá mak Pedro hatudu laran-metin? Oinsá mak ita bele banati-tuir nia?

18 Bainhira Jesus korrije Pedro, Pedro haksesuk malu fali ho Jesus ka lae? Ka nia sai laran-kanek ka nonook deʼit tanba moe ka lae? Lae, nia ho haraik-an simu Jesus nia konsellu. Hodi halo nuneʼe, Pedro hatudu fali ninia laran-metin. Ema hotu neʼebé halo tuir Kristu dala ruma presiza hetan konsellu. No kuandu ita simu konsellu ho haraik-an no aprende husi ida-neʼe, ita bele kontinua hakbesik liután ba Jesus Kristu no ba ninia Aman, Maromak Jeová.—Lee Provérbios (Amsal) 4:13. *

Laran-metin lori bensaun

19. Jesus temi fali liafuan saida neʼebé halo dixípulu sira hakfodak? Karik Pedro hanoin saida?

19 Depois, Jesus temi fali liafuan seluk neʼebé halo dixípulu sira hakfodak, nia hatete: “Haʼu hatete loloos ba imi katak ema balu neʼebé hamriik iha neʼe sei la mate toʼo sira haree uluk Oan-Mane husi ema mai iha ninia Ukun.” (Mateus 16:28) Klaru katak liafuan neʼe dada Pedro nia atensaun. Jesus nia liafuan neʼe katak sá? Karik Pedro hanoin: ‘Tanba haʼu foin hetan konsellu makaʼas, karik haʼu sei la bele hetan bensaun espesiál atu haree Jesus toʼo mai iha ninia ukun.’

20, 21. (a) Esplika toʼok kona-ba vizaun neʼebé Pedro haree. (b) Oinsá mak buat neʼebé sira koʼalia ajuda Pedro atu rekoñese katak ninia hanoin mak sala?

20 Maibé, maizumenus semana ida liutiha, Jesus lori Tiago,  João, no Pedro ba “foho aas ida”, karik iha Foho Hermon, neʼebé la dook husi fatin neʼebé sira hela ba tempu balu. Karik sira bá toʼo fatin neʼe iha kalan, tanba sira naʼin-tolu neʼe sai matan-dukur. Maibé, nuʼudar Jesus halo orasaun, buat ida akontese no fanu sira.—Mateus 17:1; Lucas 9:28, 29, 32.

Pedro hatudu ninia laran-metin bainhira Jesus fó konsellu ba nia

21 Jesus komesa nakfila an iha sira-nia oin. Jesus nia oin komesa nabilan toʼo naroman sai hanesan loro-matan. Ninia roupa mós sai nabilan mutin loos. Tuirmai, ema naʼin-rua mosu ho Jesus, ida reprezenta Moisés no ida seluk Elias. Sira naʼin-rua koʼalia ho Jesus kona-ba “oinsá nia sei husik hela mundu hanesan fó-hatene nanis ona atu sai loos iha Jeruzalein”. Sira koʼalia kona-ba Jesus nia mate no moris-hiʼas. Ida-neʼe hatudu ho klaru katak Pedro sala duni bainhira nia hatete katak susar boot sei la kona Jesus!—Lucas 9:30, 31.

22, 23. (a) Oinsá mak Pedro hatudu laran-manas no laran-diʼak? (b) Bensaun saida tan mak Pedro, Tiago, no João hetan iha kalan neʼe?

 22 Pedro sente katak nia mós tenke halo buat ruma hodi bele hola parte iha vizaun espesiál neʼe. Nia sente katak Moisés no Elias besik ona atu husik Jesus. Tan neʼe, Pedro hatete: “Mestre, ami kontente tebes atu mai iha neʼe, entaun husik ami harii tenda tolu, ida ba Ita, ida ba Moisés, no ida ba Elias.” Maibé tuir loloos, Moisés no Elias neʼebé mate kleur ona la presiza tenda. Pedro la hanoin uluk antes koʼalia liafuan neʼe. Maibé, ita gosta tebes Pedro nia hahalok laran-manas no laran-diʼak, loos ka lae?—Lucas 9:33.

Tiago, João, no Pedro hetan bensaun hodi haree vizaun espesiál ida

23 Pedro, Tiago, no João mós hetan bensaun ida tan iha kalan neʼe. Sira haree kalohan mosu hodi taka sira iha foho neʼe no kalohan neʼe fó naroman ba sira. Depois husi lalehan, sira rona lian husi Maromak Jeová, neʼebé dehan: “Neʼe mak haʼu-nia Oan-Mane, ida neʼebé haʼu hili ona. Rona nia bá.” Tuirmai, vizaun neʼe ramata ona, no sira mesak deʼit ho Jesus iha foho.—Lucas 9:34-36.

24. (a) Oinsá mak vizaun neʼebé Pedro haree, sai nuʼudar bensaun boot ba nia? (b) Oinsá mak vizaun neʼe ajuda ita ohin loron?

24 Vizaun espesiál neʼe sai nuʼudar bensaun boot ba Pedro, no mós ba ita! Tinan barak liutiha, Pedro hakerek kona-ba kalan neʼe, oinsá nia hetan oportunidade espesiál atu bele haree Jesus nia glória nuʼudar Liurai iha lalehan no “haree [Jesus nia] kmanek ho matan rasik”. Vizaun neʼe hatudu ho klaru katak profesia sira husi Maromak nia Liafuan sai loos, no ida-neʼe hametin Pedro nia fiar hodi bele prepara an atu tahan hasoru susar oioin iha futuru. (Lee 2 Pedro 1:16-19.) Nuneʼe mós ho ita. Ita presiza halo tuir Pedro nia ezemplu hodi laran-metin ba Naʼi Jesus neʼebé Jeová hili ona, aprende husi nia, simu ninia dixiplina no konsellu sira, no loron-loron ho haraik-an laʼo tuir ninia ain-fatin. Se ita halo nuneʼe, ita mós bele simu bensaun barak.

^ par. 6 Bainhira ita kompara akontesimentu ida-neʼe ho buat neʼebé akontese iha loron ida antes neʼe, klaru katak ema-lubun nia laran la metin ba Jesus. Loron ida antes neʼe, sira ho laran-manas bolu Jesus nuʼudar Maromak nia profeta.—João 6:14.

^ par. 10 Salmo 97:10: “Hei, imi neʼebé hadomi Jeová, odi buat neʼebé aat. Nia tau matan ba ema laran-metin nia moris, no nia salva sira husi ema aat nia liman.”

^ par. 11 Jesus ho ninia dixípulu sira laʼo maizumenus kilómetru 50 husi tasi-ibun iha Tasi Galileia toʼo iha Sezareia Filipe. Sira haree buat furak oioin nuʼudar saʼe foho aas maizumenus metru 350.

^ par. 18 Provérbios 4:13: “Kaer metin ba dixiplina; keta husik bá. Rai didiʼak dixiplina, tanba nia mak ó-nia moris.”