1, 2. (a) Sose šaj te phena soj tani i molitva jekh but šužo daro? (b) Sose valjani te džana so phenela i Biblija andi molitva?

I PHUV tani but tikni ked dikha kobor čerenja isi ko nebo. A o manuša ki Phuv tane pana potikne. I Biblija phenela so e Jehovase tane sa o manuša sar tikni kapka pani (Psalam 115:15; Isaija 40:15). Iako hijam but tikne, o Psalam 145:18, 19 phenela: „O Jehova tano paše uzo sa okola so rodenalje, uzo sa okola so viljestar rodenalje. Okola so darana oljestar delaljen odova so mangena, šunela ked rodenalje hem spasiniljen.“ Kobor tano šukar so šaj te vačera e Devljeja! O Jehova, o Svemoćno Devel kova čerdža sa, mangela te ova paše oljeja hem mangela te šunel amare molitve. Čače, i molitva tani jekh but šužo daro ando Jehova kova dija svakonese.

² Ama, o Jehova ka šunel amen samo ako vačera oljeja adžahar sar so ov mangela. Sar šaj te čera odova? Te dikha so phenela i Biblija andi molitva.

3. Sose valjani te moljinamen e Jehovase?

³ O Jehova mangela te vačera oljeja. Sar džana odova? Čitin Filipskonendže 4:6, 7. Razmislin ando akala šuže lafija. O Devel kova čerdža sa, but akhari gajlja amendar hem mangela te vačera oljese sa so isimen ko vilo hem save problemija isimen.

4. Sar odova ked redovno moljinamen e Jehovase zorjačeri amaro amaljipe oljeja?

 ⁴ I molitva pomožini amendže te ova paše amala e Jehova. Ked duj amala redovno vačerena jekh jekheja kotar odova so isiljen ki godi, ko vilo hem kotar pe gajlje, tegani oljengo amaljipe ovela sa pozoralo. Adžahar tano hem ked amen moljinamen e Jehovase. Prekalji Biblija, o Jehova vačerdža amendže savo tano ov hem so ka čerel ko vakti so avela. Amen šaj te vačera oljese sa so isimen hor ko vilo adžahar so ka vačera oljeja redovno. Tegani amaro amaljipe e Jehova ka ovel sa pozoralo (Jakoveso 4:8).

5. Sar džana so o Jehova na šunela sa o molitve?

⁵ Da lji o Jehova šunela sa o molitve? Na, na šunela. Ko purano vakti, o Jehova vačerdža e Izraelcendže: „But molitve vačerena, ama me na šunavaljen, sose tumare vasta tane pherde rateja“ (Isaija 1:15). Ako na pazina, šaj  te čera diso so o Jehova mrzini. Sebepi odova ov na ka šunel amare molitve.

6. (a) Sose valjani te ovelmen vera? (b) Sar šaj te mothova so isimen vera?

⁶ Ako manga o Jehova te šunel amare molitve, valjani te ovelmen vera koro oljeste (Marko 11:24). O apostol Pavle vačerdža: „A bizo vera našti te čera odova so o Devel mangela, sose okova so mangela te avel uzo oljeste valjani te verujini so isi Devel hem so dela berečetija okoljendže so viljestar rodenalje“ (Jevrejendže 11:6). Ama, amen našti samo te phena so isimen vera. Valjani te mothova amari vera adžahar so ka šuna e Jehova ko sa (Čitinen Jakoveso 2:26).

7. (a) Sose valjani te ova ponizna hem te mothova so poštujina e Jehova dži vačera oljeja? (b) Sar šaj te mothova so hijam iskrena ked moljinamen?

⁷ Ked moljinamen e Jehovase amen valjani te ova ponizna hem te mothova so poštujinalje. Sose valjani odova? Ked bi vačera jekhe kraljeja ja predsednikoja, amen bi mothova so poštujinaljen. Kobor pana pobuter valjani te mothova so poštujina e Jehova, kova tano Svemoćno Devel, dži vačera oljeja. (1. Mojsieso 17:1; Psalam 138:6). Isto adžahar, amen valjani te ova iskrena hem te moljinamen e Jehovase ando vilo. Na valjani uvek te vačera ista lafija dži moljinamen (Matej 6:7, 8).

8. Ked moljinamen disose, so valjani tegani te čera?

⁸ Ked moljinamen disose, tegani valjani te da sa amendar te čera odova so moljisaljam. Na primer, ako moljinamen e Jehovase e bučendže kola valjanena amendže svako dive, tegani na valjani te ova mrzalje ja te adžičera kotar Jehova te delmen sa odova so roda. Amen valjani te ova bučarne hem te na birina savi buti  ka čera (Matej 6:11; 2. Solunskonendže 3:10). Ako moljinamen e Jehovase te pomožinimen te čhinava te čera diso soj tano lošno, tegani valjani te cidamen kotar sa so šaj te ljegarimen ko lošno drumo (Koloskonendže 3:5). Te dikha disave pučiba andi molitva.

9. (a) Kase valjani te moljinamen? (b) Prekalo kaste valjani te moljinamen sar soj tano pisimo ko Jovan 14:6?

⁹ Kase valjani te moljinamen? O Isus sikadža pe učenikon te moljinenpe adžahar: „Amaro Dad kova hijan ko nebo“ (Matej 6:9). Ov pana vačerdža: „Me hijum o drumo, o čačipe hem o dživdipe. Nijekh našti te avel ko Dad samo prekalo mande“ (Jovan 14:6). Akava sikavimen so valjani te moljinamen samo e Jehovase prekalo Isus. So značini te moljinamen prekalo Isus? Te šaj o Jehova te šunel amare molitve, amen valjani te mothova so poštujina i uloga koja o Jehova dija e Isusese. Sar so sikljiljam, o Isus alo ki Phuv te oslobodini amen ando greh hem ando meribe (Jovan 3:16; Rimskonendže 5:12). Uzo odova, o Jehova čhidža e Isuse te ovel Prvosveštenik hem Sudija (Jovan 5:22; Jevrejendže 6:20).

10. Sar valjani te moljinamen e Devljese?

¹⁰ Sar valjani te moljinamen e Devljese? O Jehova na rodela amendar te pera ko kročija, te beša ja te terdžova dži moljinamen. I Biblija sikavi amen so valjani te poštujina e Jehova ked moljinamen (1. Letopisa 17:16; Nehemija 8:6; Danijel 6:10; Marko 11:25). E Jehovase tano najvažno so isimen ko vilo. Amen šaj te moljinamen, ko bilo kova than, vakti, diveste ja račate. O Jehova ka šunel amen, čak ked na moljinamen ko glaso nego ano amende. (Nehemija 2:1-6).

11. Save bučendže šaj te moljinamen e Jehovase?

 ¹¹ Save bučendže šaj te moljinamen? Amen šaj te moljinamen sa e bučendže kola o Jehova mangela. I Biblija phenela: „So god te roda soj tano oljese ki volja, ov šunela amen“ (1. Jovaneso 5:14). Da lji šaj te moljinamen e bučendže kola valjanena amendže? Šaj. O Jehova mangela sa te vačera oljese sar jekhe amaljese. Šaj te vačera e Jehovase sa so isimen ki godi hem ko vilo (Psalam 62:8). Te šaj te čera okova soj tano šukar, amen valjani te roda kotar Jehova te delmen po sveti duh (Luka 11:13). Isto adžahar, amen šaj te roda ando Jehova te delmen godi te ana šukar odluke hem te delmen zoraljipe te nakhava o pharipa (Jakoveso 1:5). Amen valjani te moljinamen e Jehovase te oprostini amare grehija (Efeskonendže 1:3, 7). Amen isto valjani te moljinamen averendže, sar soj tani amari familjija, amare phralja hem phenja kola tane ki skupština (Čeriba e apostolengo 12:5; Koloskonendže 4:12).

12. So valjani te ovel amendže ko jektho than ked moljinamen?

¹² So valjani te ovel ko jektho than ked moljinamen? Amendže valjani te ovel ko jekhto than o Jehova hem oljesi volja. Valjani viljestar te zahvaljinamen oljese ko sa so čerdža amendže (1. Letopisa 29:10-13). O Isus sikadža pe učenikon te moljinenpe akalje bučendže (Čitinen Matej 6:9-13). O Isus vačerdža te moljinamen sar jekhto, te slavinipe e Devljeso sveto nav. Sar dujto, te avel e Devljeso Kraljevstvo hem te ovel e Jehovasi volja ki celo Phuv. Palo odova šaj te moljinamen hem e bučendže kola valjanena amendže. Ked čhiva ko jekhto than e Jehova hem oljesi volja ki amari molitva, tegani amen mothova soj tano amendže najvažno.

13. Kobor valjani te oven bare amare molitve?

 ¹³ Kobor valjani te oven bare amare molitve? I Biblija na vačeri odoljestar. Amare molitve šaj te oven tikne ja bare, sa zavisini andi situacija. Na primer, angljeder o maro i molitva šaj te ovel tikni, ama ked zahvaljinamen e Jehovase ja ked vačera oljese amare gajlje tegani šaj te ovel bari (1. Samueleso 1:12, 15). Amen na manga te ovelmen bare molitve, koljenca ka mothovamen  anglo avera, sar so čerdže disave manuša ko Isuseso vakti (Luka 20:46, 47). Asavke molitve o Jehova na mangela. E Jehovase tano najvažno te moljinamen ando vilo.

14. Kobor puča valjani te moljinamen hem so sikavimen odova ando Jehova?

¹⁴ Kobor puča valjani te moljinamen? O Jehova vičini amen te vačera oljeja so pobuter šaj. I Biblija vačeri: „Uvek moljinen tumen“ hem „Istrajinen ki molitva“ (Matej 26:41; Rimskonendže 12:12). Isto adžahar phenela: „Ma čhinaven te moljinen tumen“ (1. Solunskonendže 5:17). O Jehova uvek mangela te šunel amen. Amen šaj te zahvaljinamen oljese svako dive sebepi so isilje mangipe hem soj tano phravde vasteso. Isto adžahar, šaj te roda oljestar te delmen godi, zoraljipe hem te  delmen rahati ko vilo. Ako amen viljestar cenina odova so šaj te moljinamen e Jehovase, tegani ka da sa amendar uvek te vačera oljeja.

15. Sose valjani te phena „amin“ ko kraj andi molitva?

¹⁵ Sose valjani te phena „amin“ ko kraj andi molitva? O lafi „amin“ značini „te ovel adžahar“ ja „adžahar tano“. Odoljeja mothova so čače manga te ovel adžahar sar so vačerdžam ki molitva (Psalam 41:13). I Biblija sikavi amen, ked džiko moljinipe anglo avera, šukar tano te phena „amin“ ano amende ja ko glaso. Odoljeja mothova so manga te ovel adžahar sar so hine vačerdo ki molitva (1. Letopisa 16:36; 1. Korintskonendže 14:16).

16. Sose šaj te phena so o Jehova odgovorini ko amare molitve?

¹⁶ Sose šaj te phena so o Jehova odgovorini ko amare molitve? Sose i Biblija phenela soj tano o Jehova „okova so šunela o molitve“ (Psalam 65:2). O Jehova šunela o iskrena molitve ando milionja manuša hem odgovorini ko oljende.

17. Sar o Jehova prekalo pe anđelija hem peklje sluge odgovorini ko amare molitve?

¹⁷ O Jehova pomožini amen prekalo pe anđelija hem peklje sluge kola tane ki Phuv (Jevrejendže 1:13, 14). Isi but primerija ando manuša kola moljisalje te haljoven i Biblija hem hari palo odova koro oljende alo džiko ando Jehovase svedokija. Odova mothovi so o anđelija pomožinena te vačeripe o „šukar haberi“ ki celo Phuv (Čitinen Pučaribe 14:6). Isto adžahar, but amendar moljisaljam e Jehovase sebepi disavo problemi ja diso so valjandža amendže, tegani ov pomožija amendže prekalo disavo phral ja phen (Godžalje lafija 12:15; Jakoveso 2:16).

18. Sar o Jehova prekalo po sveti duh hem i Biblija odgovorini ko amare molitve?

 ¹⁸ O Jehova odgovorini ko amare molitve prekalo po sveti duh. Ked isimen disavo problemi amen moljinamen hem tegani o Devel šaj prekalo po sveti duh te delmen godi hem zoraljipe (2. Korintskonendže 4:7). O Jehova hem prekalji Biblija odgovorini ko amare molitve hem pomožinimen te ana šukar odluke. Ked čitina i Biblija amen šaj te arakha stihija kola ka pomožinen amen. O Jehova isto šaj te čhivel džikas ko sastanko te vačeri diso so valjani amendže, ja jekhe starešina te delmen savet andi Biblija (Galatskonendže 6:1).

19. Sose šaj podijekh puti te dičhol so o Jehova na odgovorini ko amare molitve?

¹⁹ Disavo puti, šaj pučamen: „Sose o Jehova pana na odgovorini ko meklje molitve?“ Ma bistre, o Jehova džanela ked hem sar te odgovorini ko amare molitve. Ov džanela so valjani amendže. Amen hem ponodri valjani te moljinamen, te šaj te mothova so čače manga te ovel odova so vačerdžam hem so čače verujina koro oljeste (Luka 11:5-10). Disavo puti o odgovorija ko amare molitve šaj na te oven asavke sar so adžičerdžam. Na primer, amen šaj te moljinamen e Jehovase ked isimen pharipa ko amaro dživdipe, ama ov šaj na ka cidel amaro problemi, nego ka delmen zoraljipe te nakhalje (Čitinen Filipskonendže 4:13).

20. Sose valjani te moljinamen so pobuter e Jehovase?

²⁰ Isimen bari čast so šaj te vačera e Jehova ki molitva! Amen šaj te verujina so ov ka šunel amen (Psalam 145:18). So pobuter moljinamen e Jehovase ando vilo, tegani amaro amaljipe e Jehova ka ovel sa pozoralo.