Jesuspa aychanta mikunamanta hinaspa yawarninta tomanamanta Jesus nisqanwanqa rimachkarqa ñuqanchikrayku wañukusqanmanta manapuni iskayrayanamantam (Efes. 1:7). Jesuspa nisqan ‘sapaq ovejakunaqa’ manam tantataqa mikunankuchu nitaq vinotapas tomanankuchu wañukusqanta yuyarinapaq huñunakuypiqa (Juan 10:16). Chaywanpas manapunim iskayrayankuchu aychantawan yawarninta Jesus qusqanrayku wiñaypaq kawsakuyta haypanankumantaqa, chayna kasqantam sutillata qawachinku imayna kawsakusqankuwan (Juan 6:53). Hanaq pachapaq akllasqa kaqkunallam Jesuspa wañukusqanta yuyarispanku tantataqa mikunanku hinaspa vinotaqa tomananku, chayta ruwasqankuwanmi qawachinku Jesuswan kuska hanaq pachamanta kamachimunankupaq Diospa contrato ruwasqanpa parten kasqankuta. Arí, pipas wiñaypaq kawsakuyta munaspaqa Jesuspi iñispanmi paypa nisqankunata kasukunan. w24.12 13 parrs. 14, 16

Santa cenapiqa Jesusqa mana levadurayuq tantatam apostolninkunamanqa qurqa, hinaspanmi nirqa chayqa cuerponwan tupasqanta. Chaymantam vinota haywarqa, hinaspanmi nirqa ‘yawarninrayku Diospa contrato ruwasqanwan’ tupasqanta (Mar. 14:​22-25; Luc. 22:20; 1 Cor. 11:24). ¿Pikunawantaq Diosqa chay musuq contratota ruwarqa? ‘Israelpa mirayninkunallawanmi’ utaq “Diospa gobiernonpi” Jesuswan kuska kamachimuqkunallawanmi (Heb. 8:​6, 10; 9:15). Santa cenapiqa Jesusqa astawanqa rimarqa ‘aslla ovejakunamantam’. Qallariypiqa Jesuspa apostolninkunallaraqmi aslla kaq ovejakunamanta wakinqa karqaku. Paykunam Jesuswan kuska kamachinankupaq suyachkanku. w24.12 11 parrs. 9-10

Jesustaqariki amigollanmi traicionarurqa, mana allin runata hina hapiruspankum insultarqaku, yanqamantam tumparqaku, hinaspapas wañunanpaq sentenciaruspankum llumpayta maqarqaku. Chaymantañataqmi qiruman warkuruspa soldadokuna wañurachirqaku. Jesusqa taytanta kasukusqanraykum tukuyta aguantarqa. Chaywanpas taytanpa sunqunmi astawan nanarqa llumpayta ñakarichisqankuta qawamuptin. Anchata kuyaspanpas hinaspa ancha atiyniyuq kaspanpas manam churin ñakarinantaqa harkakurqachu. ¿Imanasqa? Anchata kuyawasqanchikraykum. Jesuspa wañukusqanwanmi yachanchik huchayuq runa kachkaptinchikpas Diosqa Adanpa mirayninkunata ancha-anchata kuyawasqanchikta. Qamtapas Diosqa anchatam kuyasunki. Payqariki huchamantawan wañuymanta librasunaykipaqmi churin Jesus wañunanta saqirqa sunqun anchata nanachkaptinpas (1 Juan 4:​9, 10). Huchayuq kachkaptinchikpas Diosqa llapallanchiktam yanapayta munawanchik payta servinapaq. Munantaqmi hamuq tiempopiqa manaña huchayuq kananchiktapas. w24.08 6 parrs. 13-14

Dios anchata kuyawasqanchiktaqa astawanraqmi entiendechwan llumpayta llakikunan kaptinpas librawananchikpaq churin Jesusta kachamusqanpi piensaspanchik. Satanasmi nin Diospa mayqin serviqninpas sasachakuypi kaspanqa mana Diosman sunqu kananta. Chayna nisqan llulla kasqanta qawachinanpaqmi Diosqa saqirqa churinta manaraq wañuchichkaspanku ñakarichinankuta (Job 2:​1-5). Jesusta burlakuptinkuqa hinaspa soldadokuna maqaspanku qiruman takaptinkuqa Diosqa lliwtam qawamuchkarqa. Qawamurqataqmi ñakarispa wañukusqantapas (Mat. 27:​28-31, 39). Payqa tukuy chaykuna pasanantaqa atinmanmi karqa harkaruyta (Mat. 27:​42, 43). Chaynata ruwaptinqa manachá Jesusqa librawananchikpaqqa mana pantaq vidantaqa qunmanchu karqa, nitaq wiñaypaq kawsakuytapas haypachwanchu karqa. Ichaqa anchata kuyawasqanchikraykum saqirqa Jesus ñakarispa wañukunanta. w25.01 22 parr. 7

Yuyarisun 33 watapi nisan killapa 16 punchawninpi imakuna pasakusqanta. Jesus wañukusqanraykum qatiqninkuna llumpay hukmanyasqallaña hinaspa manchakuyllawanña kachkarqaku. Paykunamanta iskaymi Jerusalen llaqtamanta Emaus llaqtaman richkarqaku, hinaptinmi mana riqsisqanku runa haypaykuspan paykunawan kuska rirqa. Paykunañataqmi willakurqaku Jesusta tukuy ima pasasqanmanta llakisqa hinaspa hukmanyasqa kasqankuta. Chaymantam chay runaqa “Moisespa qillqasqanmanta hinaspa Diosmanta lliw willakuqkunapa qillqasqanmanta qallaykuspan” sumaqta entiendechirqa Diospa akllasqan runa imanasqa ñakarinanmanta hinaspa imanasqa wañunanmanta. Chay rimapayasqantaqa manachá haykapipas qunqarqakuchu. Emaus llaqtaman chayaruptinkuñam cuentata qukururqaku chay mana riqsisqanku runaqa kawsariramuq Jesus kasqanta (Luc. 24:​13-35). Kawsariramuspan 40 punchawllaña kay pachapi kaspanqa achka kutitam Jesusqa qatiqninkunaman rikurirqa. Paykunata Jesus kallpanchaptinmi manaña llakisqañachu hinaspa manchakuywanñachu karqaku, aswanqa kusisqañam. Chaynapim kallpata hapirqaku hinalla Diospa gobiernonmanta willakunankupaq. w24.10 12 parrs. 1-3

Warmachakunaqa watapa pasasqanman hinallam mana musyayllata wiñarunku, Diosta serviyninchikpi yuyayniyuq kanapaqmi ichaqa tukuyta ruwananchik. Rimarisun Corinto llaqtayuq iñiqkunamanta. Paykunaqa sumaq willakuyta uyarispankum bautizakurqaku, chuya espiritutam chaskirqaku, hinaspapas apostol Pablomantam tukuyta yacharqaku (Hech. 18:​8-11). Ichaqa achka wata pasaytapas hinallaraqmi Diosta serviyninkupiqa wawakuna hina karqaku (1 Cor. 3:2). Dios serviyninchikpi yuyayniyuq kanapaqqa chayna kaytam sunqumanta munananchik. Mana yuyayniyuq warmakuna hina kayta munaqkunaqa manam haykapipas Diosta serviyninkupiqa yuyayniyuqchu kanqaku (Prov. 1:22). Wakin runakunaqa hatunña kaspankupas manam imam ruwanankutaqa ruwayta munankuchu, hinaspapas tayta-mamanku imapaqpas tantiapunankutaraqmi suyanku. Manamá paykuna hina kaytaqa munanchikchu, chaymi kallpanchakunanchik Dios serviyninchikpi ñawparinapaq. Sichu Diosta serviynikipi manaraq yuyayniyuq kaspaykiqa Jehova Diostayá mañakuy ‘paypa munasqan ruwayta munanaykipaq hinaspa ruwanaykipaqpas atiyta qusunaykipaq’ (Filip. 2:13). w24.04 4 parrs. 9-10

Diosmi niwanchik mana allin ruwaq runa wañuptin mana kusikusqanta (Ezeq. 33:11). Diosqa manamá munanchu pitapas wiñaypaq chinkachiytaqa, chaytaqa ruwanman pipas mana allin ruwasqanta cambiayta mana munaptillanmi. Arí, Diosqa piwanpas llakipayakuqllañam. Bibliapa nisqanman hinaqa, ¿pikuna mana kawsarimunantam yachanchik? Jesusmi nirqa Judas Iscariote qalaypaq chinkachisqa kananmanta (Mar. 14:21; qawaytaq Juan 17:12 nisqantapas). Chaywanqa nichkarqa wañukuspan manaña kawsarichisqa kananmantam. Judasqa yachachkaspanmi Jehova Diospa hinaspa churin Jesuspa contranpi churakurqa (qaway Marcos 3:29 nisqanta). Jesusqa nirqataqmi chay tiempopi religionkunapi wakin punta apaqkunapas paypa contranpi hatarisqankurayku manaña kawsarimunankumanta (Mat. 23:33). Apostol Pablopas nirqam Diosta qipancharuspa llaqtanpa contranpi kaqkunapas mana wanakuspankuqa manaña kawsarimunankumanta (Heb. 6:​4-8; 10:29). w24.05 4 parrs. 10-11

Kunan tiempopi satanas imawanña sasachawaptinchikpas Jehova Diosmi hamuq tiempopi chaykunamanta librawasun paymanta mana karunchakuptinchikqa (1 Juan 3:8). Kay pacha sumaq huerta kaptinqa Diosqa hinallam payman sunqu serviqninkunataqa iñiyninchikpi yanapawasun, hinaspapas wañuymantam librawasun (Apoc. 21:4). ¡Ancha kusikunapaqmi wiñaypaq amistadnin kanapaq carpanman Jehova Diospa qayaykuwasqanchikqa! (Ezeq. 37:27). Ichaqa ¿imaynam kananchik hinalla carpanpi samapakunapaq? Pipas wasinman invitaykuwaptinchikqa munachwanmi wasinpi imayna kananchikta niykuwananchikta. Chaynam Diospa carpanpi samapakuyta munaspapas imayna kananchikpaq paypa nisqanta yachayta munanchik. Diosta anchata kuyasqanchikraykum tukuyta ruwanchik paypa munasqanman hina kawsakunapaq (Col. 1:10). Diostaqa respetanataqmi, payqariki unanchawaqninchikmi chaymi mana haykapipas mana munasqantaqa ruwasunchu. Chaymi munanchik “mana hatuntukuspa” Diospa munasqanman hina kawsakuyta (Miq. 6:8). w24.06 4 parrs. 8-9

Abrahantam Dios kamachirqa kuyasqan churin Isaacta wañuchispan ofrendata hina kañapunanpaq. Ichaqa yacharqam chayta kasukuyninqa Abrahanpaq llumpay sasa kasqanta. Chaynata niykuptinqa Abrahanqa llumpaytachá churinmanta llakikurqa. Chaywanpas Diospa nisqanta kasukunanpaqmi tantiarurqa. Churinta wañuchinanpaq kachkaptinmi ichaqa Dios harkakururqa. ¿Imatam yachachwan Abrahanmanta? Diosqa ancha-anchata  kuyawaspanchikmi kuyasqan churin wañunanta mana harkakunanchu karqa (Gen. 22:​1-18). Pachaknintin watakuna pasaytam Israel runakunata Dios nirqa huchankuta pampachananpaqqa animalkunata nakaspa ofrecenankupaq (Lev. 4:​27-29; 17:11). Chaywanmi qawachirqa animalkunamantapas aswan valorniyuq kaqwan runakunapa huchanta wiñaypaq pampachananta. Profetankunawanmi runakunaman willachirqa prometesqa mirayqa ñakarispa wañunanmanta, payqa Diospa ancha kuyasqan churinmi kanan karqa chaynapi wañukusqanwan qampas salvasqa kanaykipaq (Is. 53:​1-12). w24.08 4 parrs. 7-8

Imay hora utaq hayka tiempo bibliaykita leespapas sapa kutim piensanayki chay leesqaykita imayna kasukunaykipi. Iskay-kimsa versiculota leeruspayki nikuy: “¿Imaynatam kay leesqay yanapawanman kunan utaq hamuq punchawkunapi?”, nispa. Ichapas leechkawaq 1 Tesalonicenses 5:​17, 18 nisqanta. Chayta leeruspaykim kaykunapi yuyaymanawaq: ¿Tukuy sunquywanchu Diosta mañakuni? ¿Hayka kutitataq mañakuni? ¿Imakunamantataq Diosta agradecekuni? Ichapas yuyariwaq imakunamanta Diosta agradecekunaykimanta kimsata. Chaykunapi yuyaymananaykipaq huk ratollapas tiempochakuspaykiqa manam leeyllachu-leechkanki, aswanqa yachasqaykikunata kasukunaykipaqmi kallpanchakuchkanki. Sapa punchaw bibliata leesqaykiwan chaynata ruwaspaqa Jehova Diostam aswan allintaraq servinki. w24.09 4-5 parrs. 9-10

Diosqa imatapas chaskinamantaqa imatapas quspa aswan kusisqa kaqtam unanchawarqanchik. Arí, iñiqmasinchikkunata yanapaspanchikmá hawka tarikunchik, hinaspapas agradecekuwaptinchikmi kusisqa tarikunchik. Ichaqa agradecekuwaptinchikpas utaq mana agradecekuwaptinchikpas allinta ruwasqanchikraykum kusisqa kanchik. Imataña quspanchikpas 2 Cronicas 25:9 nisqantam yuyarinanchik. Chaypim nin: “Jehova Diosqa chaymantapas astawanraqmi kutichipusunki”, nispa. ¡Manam pipas kanchu Dios hina qukuykuqqa! Qukuykuq kasqanchikmanta bendeciwasqanchikqa anchatam kusichiwanchik. Chayraykum Diosninchikpa qukuykuq kasqanta qatipakuyninchikqa allinninchikpaq. w24.09 31 parrs. 20-21

Jehova Diosqa anchatam llakipayakuq, kuyapayakuqmi (Sal. 103:13; Is. 49:15). Imawanpas llakisqa kaptinchikqa paypas anchatam llakikun (Zac. 2:8). Payman asuykuspa amistadnin kanapaqmi yanapawanchik (Sal. 25:14; Hech. 17:27). Chaymantapas humilde kasqanraykum ‘kurkuykamun puyukunapa kasqantawan allpa pachata qawamunanpaq, payqa kurkuykamun mana imayuq runata allpamanta sayariykachinanpaqmi’ (Sal. 113:​6, 7). ¿Pitaq chayna Diosta mana hatunchanmanchu? Hukkuna riqsinankuta munasqanchikraykum hatunchanchik. Satanasmi Diosmanta llullakunata chiqirachin, hinaspapas runakunapa yuyaynintam tutayarachin (2 Cor. 4:4). Chaymi achka runakuna ninku imapas ruwasqanchikmanta Jehova Dios castigawasqanchikta hinaspa paypa huchanrayku tukuy mana allinkuna pasasqanta. Ñuqanchikmi ichaqa mana chayna kasqanta yachaspanchik runamasinchikkunata yanapachwan imayna Dios kasqanta yachanankupaq, chayta ruwaspanchikmi Diosta hatunchachkanchik (Is. 43:10). w25.01 3 parr. 6-7

Jesus mana pantaq kachkaptinpas chaynataq admirakuypaq milagrokunata ruwachkaptinpas satanasmi runakunata umacharqa paymanta llullakunata rimanankupaq. Religionkunapi umalliqkunam runakunata niqku Jesusqa ‘demoniokunapa kamachiqnin yanapaptin’ demoniokunata qarqusqanmanta (Mar. 3:22). Jesusta juzgaptinkupas religionkunapi umalliqkunaqa nirqakum Diospa contranpi Jesus rimasqanta, hinaspapas runakunatam umacharqaku Jesus wañuchisqa kananpaq mañakunankupaq (Mat. 27:20). Jesuspa qatiqninkuna willakuyta qallaykuptinkupas enemigonkuqa ‘runakunatam umacharqaku hinaspa hikutarqaku’ contrankupi kaspa chiqninankupaq (Hech. 14:​2, 19). 1998 watapi 1 diciembrepaq La Atalaya revistanchikmi Hechos 14:2 nisqanmanta rimarqa. Chaypi nisqanman hinaqa Jesuspa qatiqninkunata chiqniq judiokunam Diosmanta willakusqankuta mana uyarirqakuchu. Ichaqa manam chayllawanchu contentakurqaku, aswanqa llullakunatam chiqichiyta qallaykurqaku huklaw nacionniyuqkunapas Jesuspa qatiqninkunapa contranpi kanankupaq. Kunanpas satanasqa hinallam llullakunata rikurichichkan, ‘paymá kay pachapi llapallan runakunata pantachichkan’. w24.04 11 parrs. 15-16

Ichapas pi iñiqmasinchiktapas uyarirqanchik Diosta mana serviq familianmanta kayna nisqanta: “Munaymanmi llumpa-llumpay ñakariy punchawkuna manaraq chayamuchkaptin wañukunanta, chaynapi kawsarimunanpaq”, nispa. Ichaqa pimanpas wiñay kawsayta Dios qunanpaqqa manam haykapi wañukusqanmantachu kanqa. Diosqa mana pantaq juezmi, chaymi imapas tantiasqankunaqa allinpuni (Sal. 33:​4, 5). Manam iskayrayanchikchu ‘kay pachapa jueznin’ Diosninchik haykapipas allin kaqta ruwananmantaqa. Pipas wiñaypaq kawsakunanpaqqa manataqmi maypi yachasqanmantachu. Millonnintin runamasinchikkunam Diospa gobiernonmanta mana haykapipas willakusqanchik llaqtakunapi yachachkanku. Manamá paykunataqa Diosninchikqa wiñaypaqqa chinkarachinmanchu (Mat. 25:46). Ñuqanchikpas chay runamasinchikkunamantaqa llakikunchikmi. Aswanraqchiki Diosqa anchata llakikun paymanta manaraq yachaqkunamantaqa. Manamá yachanchikchu llumpa-llumpay ñakariy punchawkunapi paykunapaq Diosninchik imata ruwananmantaqa. Yaqapaschá paykunamanta wakinqa Diosninchikman chayraq asuykunqaku enteron allpa pachapi sutin chuyanchasqa kasqanta qawaspanku (Ezeq. 38:16). w24.05 12 parrs. 14-15

Diosta serviqkunaqa kusisqam yanapanakunchik (2 Cor. 8:4). Chaypaqqa wakinpim mana manchakuq kananchik. May nacionpipas guerra kaptinqa punta apaqkunaqa yachankum iñiqmasinchikkunata kallpanchanankuta. Ichapas qunanku kanqa bibliata, qillqanchikkunata hinaspa mikuyta utaq pachata. Paykunaqa kuyakuq kasqankuraykum peligroso kaptinpas tukuyta ruwanku yanapanankupaq. Ichaqa betel wasimanta nisqantam kasukunanku, kasukuptinkuqa lliw iñiqmasinchikkunam huk sunqulla kanqaku (Heb. 13:17). Punta apaqkunaqa sapa kutim leenanku terremotopas utaq imapas manaraq pasachkaptin chaynataq pasaruptin imata ruwanamanta (1 Cor. 14:​33, 40). 2). Mana manchakuq kaspankupas allin tantiuwanmi imatapas ruwananku (Prov. 22:3). Punta apaqkuna, amayá yanqapas-yanqaqa vidaykichiktaqa peligropiqa churaychikchu, Jehova Diospiyá hapipakuychik. Payqariki munachkan allinlla kanaykichiktam, chaynapi vidaykichikta cuidaspa iñiqmasinchikkunata yanapanaykichikpaq. w24.07 4 parr. 8; 5 parr. 11

Kamachiq Davidqa Diostam allinta riqsirqa, hinaspapas paypim confiakurqa. Chaymi kamachiq Saul hinaspa huk runakuna wañuchinankupaq qatikachaptinku  Diosta mañakurqa yanapaykunanpaq. Mañakusqanta uyariykuptinmi hinaspa harkaykuptinmi Davidqa nirqa: ‘¡Jehova Diosqa kawsanmi!’, nispa (Sal. 18:46). Chaywanqa nichkarqa manam Dios kasqallanmantachu. Huk libropa nisqanman hinam nichkarqa sapa kuti serviqninkunata yanapaq Dios kasqanmanta mana iskayrayasqanta. Davidqa cuentatam qukurqa Dios yanapasqanta, chaywanmi manapuni iskayrayarqachu Diosqa kawsaq Dios kasqanmanta. Chaytaqmi yanaparqa hinalla servinanpaqpas chaynataq hatunchananpaqpas (Sal. 18:​28, 29, 49). Jehova Dios kawsaq Dios kasqanmanta mana iskayrayasqanchikmi yanapawasun kusisqa servinapaq, ima sasachakuy kaptinpas aguantanapaq, paypaq tukuy imata hinalla ruwanapaq hinaspa paymanta manapuni karunchakunapaq. w24.06 20-21 parrs. 3-4

¿Imatam yachachwan Tesalonicapi iñiqkunaman apostol Pablopa cartasqanmanta? Bibliapi yachasqanchikwan mana tupaq admirakuypaq willakuyta uyariruspanchikqa manam chayllaqa creerunanchikchu. Rimarisun ñawpaq Union Sovietica nacionpi ima pasasqanmanta. Autoridadkunam “Estados Unidos betel wasimanta apachimusqanmi” nispanku achka iñiqkunaman cartata qawachirqaku, chay cartapim wakin iñiqmasinchikkunata kallpancharqa Diospa llaqtanmanta rakikuspanku sapaq grupota rikurichinankupaq. Chay cartapa nisqan ciertopaq rikchakuptinpas Diosman sunqu iñiqkunaqa cuentatam qukururqaku bibliamanta yachasqankuwan mana tupasqanta, chaymi mana engañachikurqakuchu. Kunanpas chiqniwaqninchikkunaqa internetpim imatapas churanmanku creesqanchikmanta iskayrayaspa rakinarachiwananchikpaq. Chayraykum mana ‘pantachisqa’ kananchikpaq segurakunanchik imapas uyarisqanchik utaq leesqanchik yachasqanchikwan tupasqanta utaq mana tupasqanta (2 Tes. 2:2; 1 Juan 4:1). w24.07 12 parrs. 14-15

Diosqa anchata kuyawasqanchikraykum munan payllapaqña kawsakunapaq hinaspa serviqninkunawan kuska payta yupaychanapaq tantiakunanchikta. Chay tantiakuyqa imamantapas aswan allinmi. ¿Imanasqa? Chaypaq tantiakuspaqa Diospa amistadninmi kasun hinaspapas wiñaypaqmi kawsakusun (Deut. 30:​19, 20; Gal. 6:​7, 8). Chaywanpas Jehova Diosqa manam pitapas obliganchu payta servinanpaqqa, aswanqa sapakama tantiakunantam saqin. ¿Imataq pasanman bautizasqa iñiqmasinchik hatun huchaman wichiykuptin? Mana wanakuspanqa congregacionmantam qarqusqa kanan (1 Cor. 5:13). Chayna qarqusqa kaptinpas Diosqa anchatam munan huchanmanta wanakuspan payman kutirikunanta. Chayraykum churin Jesusta kay pachaman kachamurqa, chaynapi hatun huchata ruwaqkunapas Jesuspa wañukusqanwan  pampachasqa kanankupaq. Ancha kuyakuq kasqanraykum Diosninchikqa hatun hucha ruwaqkunata kuyakuywan rimapayan wanakunankupaq (Zac. 1:3; Rom. 2:4; Sant. 4:8). w24.08 14 parrs. 1-2

Juan kimsa kaq cartanta qillqasqan tiempopaqqa wakinkum pantay yachachikuykunata chiqichispanku iñiqkunata rakinachkarqaku. Chaywanpas wakinkuqa Jehova Diosta kasukuspankum chiqap yachachikuykunaman hina tukuy tiempo kawsakurqaku (2 Juan 4, 6). Chayna Diosman sunqu kasqankuqa manam Juanllatachu kusichirqa, aswanqa Jehova Diostawanmi (Prov. 27:11). ¿Imatam yachachwan Juanpa nisqanmanta? Diosman sunqu kayqa kusikuytam apamun (1 Juan 5:3). Anchatam kusikunchik Jehova Diosta kusichisqanchikmanta. Paypas anchatam kusikun tentacionkunaman mana wichispanchik kamachikuyninkunata kasukuptinchikqa. Hanaq pachapi Diosta serviqkunapas kusikunkum (Luc. 15:10). Ñuqanchikpas anchatam kusikunchik wakin iñiqmasinchikkuna hinalla Diosman sunqu kaptinkuqa (2 Tes. 1:4). Chaynaqa, satanaspa munaychakusqan tukuy mana allinkuna chinkaruptinmi anchata kusikusun Diosman sunqu hinalla kasqanchikmanta. w24.11 12 parrs. 17-18

Chaynaqa, ¿hayka tiempotaq qawayllaraq qawanayki gustasusqayki qarita utaq warmita? Manaraq unay qawachkaspa riqsinakunaykichikpaq kamas niykuptikiqa ichapas piensanman mana allin tantiariq kasqaykita (Prov. 29:20). Ichaqa unayña qawasqaykita cuentata qukuruptinqa, chaywanpas riqsinakunaykichikpaq mana niptikiqa ichapas piensanman imata tantianaykipaqpas iskayrayaq kasqaykita (Ecl. 11:4). Riqsinakunaykipaq pitapas rimapayanaykipaqqa manam seguroraqchu kanayki paywan casarakunaykimantaqa. Ichaqa segurom kanayki casarakunaykipaq listoña kasqaykimanta hinaspa qampaq hina pay kananmanta. Sichu musyakurunki pipas sapa kuti qawasusqaykita hinaspaqa, ¿imatam ruwawaq? Mana gustasuptikiqa manam imatapas ruwanaykichu sunqunpi kuyasunaykipaq hinaqa. Manam allinchu kanman paywan mana casarakuyta piensachkaspayki pay astawan kuyasunaykipaq imatapas ruwayqa (Efes. 4:25). w24.05 22, 23 parrs. 9-10

Jesusqa hanaq pachapaq chiqaptapuni akllasqa kaqkunallatam hinaspa tukupaykama Diosman sunqu kaqkunallatam ‘apanqa’ paywan kuska kamachimunankupaqqa. Hanaq pachapaq kaqkunamanta mayqinpas Dios serviyninpi  mana qawan-qawanlla kaspanqa manam ‘akllasqakunawan’ huñusqachu kanqa (Mat. 24:31). Kay pachapi wiñaypaq kawsakuyta suyaqkunapas Jesuspa nisqanta kasukuspam Diosman sunqu kananchik, hinaspapas qawan-qawanllam kananchik. Ñuqanchikqa manam iskayrayananchikchu Jehova Diospa tantiasqankuna allin kasqanmantaqa. Chayraykum kay watakunapi serviqninkunamanta wakinta hanaq pachaman rinankupaq Dios akllaptinqa mana preocupakunanchikchu. Uvas chakrayuqmanta Jesuspa willakusqantam yuyarinanchik, chaypim nirqa pichqa hora tardetapas peonkunata hinallaraq chaskisqanmanta (Mat. 20:​1-16). Tardellaña llamkayta qallariqkunapas tempranomanta llamkaqkuna hinam pagonkutaqa igualta chaskikurqaku. Chaynataqmi hanaq pachapaq Diosman sunqu kaqkunapas hanaq pachaman rinqaku haykapi akllasqa kaspankupas. w24.09 24 parrs. 15-17

Hukkuna mana allinta ruwaruwaptinchikqa Jesustam qatipakuchwan. Paytam wakin familiankuna Diospa akllasqan kasqanta mana creespanku “locoyarunmi” nirqaku. Religionkunapi punta apaqkunañataqmi nirqaku demoniokunapa yanapakuyninwan imapas ruwasqanta. Roma soldadokunañataqmi burlakurqaku, maqaparqaku hinaspa wañurachirqaku (Mar. 3:​21, 22; 14:55; 15:​16-20, 35-37). Chaywanpas Jesusqa mana vengakuspanmi tukuy chaykunata aguantarqa. ¿Imatam paymanta yachachwan? (1 Ped. 2:​21-23). Jesuspa imayna kasqantam qatipakuchwan pipas mana allinta ruwaruwaptinchikqa. Payqa yacharqam haykapi rimayta hinaspa haykapi upallakuyta (Mat. 26:​62-64). Paymanta llullakunata niptinkuqa mana imatapas ninanpaqmi wakinpiqa tantiakuq (Mat. 11:19). Rimananpaq tantiaspanpas manam chiqniqninkunataqa insultaqchu nitaq amenazaqchu. w24.11 4-5 parrs. 9-10

Kaypi piensarisun: Kuyasqanchik amistadninchikman imapas necesitasqanta regalaykuchwan. ¡Llakikuchwanchá mana servichikuspan guardarayachiptinqa! Ichaqa anchatam kusikuchwan agradecekuspan servichikuptinqa. Yaqa chaynam Jehova Diospas necesitasqanchikta qawamuspan churin Jesusta kachamurqa ñuqanchikrayku wañunanpaq, kachamurqaqa anchata kuyawasqanchikraykum, chaymi anchata kusikun agradecekuptinchikqa (Juan 3:16; Rom. 5:​7, 8). Tiempopa pasasqanman hinam ñuqanchikrayku Jesuspa wañukusqanmantaqa manaña anchatachu agradecekuchwan. Chayqa kanman regalawasqanchikwan kusisqa kaspapas guardarayachiy hinam. Chay mana  pasaruwananchikpaqmi sapa kuti yuyaymanananchik Jehova Dioswan Jesus ñuqanchikrayku ima ruwasqankupi. w25.01 26 parrs. 1-2

Punta apaqqa ‘manataqmi chayllaraq iñikuqchu kanan’. Chaywanqa manam nichkanchik unay wata bautizasqa kananmantachu, ichaqa tiempom pasanan Dioswan kuyachikunanpaqqa hinaspa imatapas paypa nisqanman hina tantiay yachaq kananpaqqa. Manaraq punta apaq kachkaspanmi Jesus hina humilde kanan. Humilde kaspanqa manam piñakunqachu imapipas yanapakunanpaq mana niptinkuqa, aswanqa hinallam suyanqa haykapi utaq imapi yanapakunanpaq ninankuta (Mat. 20:23; Filip. 2:​5-8). Chaymantapas “Diosman sunqu” kaspanmi Diospi hapipakunan hinaspa kamachikuyninkuna allin kasqanmanta seguro kanan, chaynapi Diospa llaqtanpi quwasqanchik kamachikuykunata kasukunanpaq. Bibliapiqa sutillatamá niwanchik iñiqkunamanta nanachikuqqa “hukkunatapas allin yachachiq kananmanta”. Chaywanqa manam nichkanchik huñunakuykunallapi alli-allin yachachiq kananmantachu. Achka punta apaqkunam mana riqsisqachu kanku huñunakuykunapi suma-sumaqta yachachisqankuwanqa, aswanqa Diosmanta willakuq rispan runakunapa sunqunman chayasqankuwanmi hinaspa iñiqmasinkuta watukuspa allinta kallpanchasqankuwanmi. w24.11 23-24 parrs. 14-15

Bibliapi mayqin textotapas mana entiendespanchikqa qillqanchikkunapim maskananchik. Hinaspam punchaw yuyaymanachwan Diosmanta, Jesusmanta hinaspa paykunapa kuyawasqanchikmanta ima yachasqanchikpi (Sal. 119:97). Bibliata leespa utaq estudiaspa mana yachasqanchik kaqkunata mana tarispaqa amayá hukmanyasunchu. Biblia estudiaytaqa qurita maskaywanmi tupachichwan. Quri maskaqkunaqa achka horam utaq achka punchawmi maskanku uchuychallata tarinanku kaptinpas. Bibliapi sumaq yachachikuykunaqa qurimantapas aswan valorniyuqmi (Prov. 8:10). Chaymi pacienciakuspa bibliataqa hinalla leenanchik hinaspa estudiananchik (Sal. 1:2). w25.01 25 parrs. 14-15

Payqa munanmi pipas sientirachiwaptinchik utaq llakirachiwaptinchik sunqumanta pampachaykunanchikta (Sal. 86:5; Luc. 17:4; Efes. 4:32). Yaqapaschá pipas rimasqanwan utaq ruwasqanwan sunqunchikta nanarachiwachwan. Astawanraqmi nanawachwan amistadninchik utaq familianchik kaptinqa (Sal. 55:​12-14). Chay nanawasqanchikqa sunqunchikta espada tuksiruchkanmanpas hinach kanman (Prov. 12:18). Qallariypiqa tukuytam ruwachwan imayna tarikusqanchikta pakanapaq. Ichaqa manam chayqa yanapawasunchu, chayqa kanman pipas cuchillowan tuksiruwaspanchik mana hurquspan chayllapi saqiruynin hinam. Imayna tarikusqanchikta pakaspaqa manamá hawka kaytaqa atisunchu. Pipas llakirachiwaptinchikqa utaq sientirachiwaptinchikqa wakinpiqa chayllam piñakurunchik. Bibliam ichaqa niwanchik piñakuruspapas hinalla mana chayna kanapaq (Sal. 4:4; Efes. 4:26). Hinalla piñasqa kaspaqa manam imapaqpas allintachu tantiachwan (Sant. 1:20). Llapallanchikmi imawanpas piñakuruchwan, hinalla piñasqa kaymi ichaqa kikinchikmanta. w25.02 15 parrs. 4-6

Jesusmi rikchanachispan rimarqa Diospaq imatapas mana ruwaspa qullqita huñukuyqa yanqapaq kasqanta (Luc. 12:​16-21). Manam yachanchikchu paqarin punchaw ima pasaruwananchiktaqa (Prov. 23:​4, 5; Sant. 4:​13-15). Jesusqa nirqataqmi paypa qatiqnin kanapaqqa tukuy imanchikta saqinapaq listo kanamantapas (Luc. 14:33). Chayraykum apostolkunapa tiempopi Judeapi yachaq iñiqkuna Diosta hinalla kusisqa servirqaku tukuy imankuta qichuruptinkupas (Heb. 10:34). Kunan tiempopipas achka iñiqmasinchikkunam politicaman mana sayapakusqankurayku llamkayninkuta utaq tukuy imankuta pierderqaku (Apoc. 13:​16, 17). Paykunaqa Diospa nisqanmantam manapuni iskayrayarqakuchu. Paymi nin: “Manapunim haykapipas saqisqaykichu nitaqmi qunqasqaykichu”, nispa (Heb. 13:5). Tukuy atisqanchiktamá ruwanchik yuyaqyaruspanchik allinlla kanapaq, ichaqa qunqaymanta imapas kaptin Dios yanapawananchikmantaqa manam iskayrayanchikchu. w25.03 29 parrs. 13-14

Jehova Diosqa payta serviyninchikpi yuyayniyuq kanapaqmi yanapawanchik congregacionpi punta apaqkunawan. Paykunam yanapawanchik iñiyninchikpi “allin yuyayniyuq runaña kananchikpaq. Arí, imayna kasqanchikpi Cristo hina  cabal runa kananchikpaq” (Efes. 4:​11-13). Diosqa yanapawanchiktaqmi atiyninwanpas, chaynapi ‘Cristopa piensasqanman hina piensanapaq’ (1 Cor. 2:​14-16). Chaymantapas Diosqa Mateo, Marcos, Lucas hinaspa Juan librokunatam qillqachirqa Jesuspa tukuy ima ruwasqanta yachananchikpaq. Jesus hina piensaspaqa, rimaspaqa hinaspa ruwaspaqa Diosta serviyninchikpim yuyayniyuq kasun. Diosta serviyninchikpi yuyayniyuq kanapaqqa manam ‘Cristomanta punta yachasqanchikkunallawanchu’ contentakunanchik. w24.04 4-5 parrs. 11-12

Sapa punchawmi imapaqpas tantiananchik. Tantiananchikmi imata mikunapaq utaq imay hora puñunapaqpas. Chaykunapaq tantiayqa manamá sasachu. Ichaqa allinta piensarispam tantiananchik kanqa saludninchikmanta, kusisqa kananchikmanta, familianchikmanta hinaspa Diosta serviyninchikmantaqa. Munanchikmi chay tantiasqanchikkuna familianchikta hinaspa ñuqanchikta kusichiwananchikta, astawanraqmi Jehova Diosta kusichinantaqa (Rom. 12:​1, 2). Yachaywan imapaqpas tantianapaqqa chay tantiay munasqanchikmantam allinta yachaykunanchik. ¿Imanasqa? Kaypi piensarisun: Pipas doctorman riptinqa, ¿yaqachu doctorqa mana tapuykuspan utaq imayna kasqanta mana yachaykuspan imatapas recetaykunqa? Manamriki. Chay doctor hinam imapaqpas allinta tantianapaqqa allintaraq yachaykunanchik. w25.01 14 parrs. 1-3

Jehova Diosqa llakipayakuqllañam, chaymi mana munanchu pipas wiñaypaq wañunantaqa (2 Ped. 3:9). Yachaykusun ñawpaq tiempopi llumpay mana allin ruwaqkunata llakipayasqanmanta. Davidtam llakipayaspan pampachaykurqa hukpa warminwan huchapakuruspan chay warmipa qusanta wañurachiptinpas. Pampachaykurqaqa wanakusqanraykum (2 Sam. 12:​1-12). Manasestapas sunqumanta wanakusqanraykum Diosqa llakipayaspan pampachaykurqa. Manasesqariki unay watam llumpay mana allinkunata ruwarqa (2 Cron. 33:​9-16). Paykunamanta yachasqanchikmi yuyarichiwanchik Diosqa allin sunquyuq runakunata llakipayasqanta. Davidtawan Manasestaqa kawsarichinqa llumpay mana allinkunata ruwachkaspankupas sunqumanta wanakusqankuraykum. w24.05 4 parr. 12