Santiago 4:1-17
4 ¿Maymantataq hamun qamkuna ukupi peleaykuna hinaspa liryanakuykuna? ¿Manachu chaykunaqa hamun aychaykichikpa munasqanmanta? Aychaykichikpa munasqanqa ukuykichikpim peleachkan allin munasqaykichikwan.+
2 Imata munaspapas manam haypankichikchu, qamkunaqa runamasikichikta wañuchichkaq hinam kachkankichik*, hinaspam hukpa kaqninta munapayachkankichik, ichaqa manam chay munasqaykichiktaqa tarinkichikchu, qamkunaqa hinallam liryanakuchkankichik hinaspa peleachkankichik.+ Diosta mana mañakusqaykichikraykum imapas munasqaykichiktaqa mana tarinkichikchu.
3 Mañakuspapas manam chaskinkichikchu mana allinta ruwanaykichikpaq mañakusqaykichikrayku, mañakuchkankichikqa aychaykichikpa munasqallanta ruwanaykichikpaqmi.
4 Yaw Diosta qipanchaqkuna*, ¿manachu yachankichik Diosta mana yupaychaq runakunapa amistadnin kaspaykichikqa Diospa enemigonña rikurirusqaykichikta? Pipas Diosta mana yupaychaq runakunapa amistadnin kayta munaspaqa Diospa enemigonmi rikurirun.+
5 Icha, ¿yanqachu Diospa qillqan nin: “Sunqunchikpi imayna kasqanchikraykum envidiakuspa hinalla imatapas munapayachkanchik”, nispa?+
6 Envidiakuq kaymantaqa Diosninchikpa ancha kuyawasqanchikmi aswan allinqa, chaymi Diospa qillqan nin: “Diosqa hatuntukuqkunapa contranpim kachkan,+ llampu sunquyuqkunamanmi ichaqa ancha kuyakuyninta* qawachin”, nispa.+
7 Chaynaqa Diostayá tukuy imapi kasukuychik,+ hinaspayá diablopa contranpi churakuychik,+ hinaptinqa qamkunamantam diabloqa ayqikunqa.+
8 Diosman asuykuptikichikqa paypas asuykusunkichikmi.+ Yaw huchasapakuna, makikichikta mayllakuchkaq+ hinayá mana allin ruwasqaykichikta saqiychik, iskayrayaqkunapas sunquykichiktayá chuyanchaychik.+
9 Chaynallataqyá llakikuychik, pesakuychik hinaspa waqaychik.+ Asikunaykichikmantaqa pesakuychikyá, kusikunaykichikmantaqa muspaypi hinayá kaychik.
10 Jehova* Diosninchikpa qayllanpiyá mana kaqpaqpas hina hapikuychik,+ hinaptinqa hatunchasunkichikmi.+
11 Wawqi-panillaykuna, iñiqmasikichikmantaqa amayá mana allintaqa rimaychikchu.+ Pipas iñiqmasinmanta rimaqqa utaq iñiqmasinta juzgaqqa Diospa kamachikuyninkunapa contranpim rimachkan, hinaspam Diospa kamachikuyninta juzgachkan. Diospa kamachikuyninkunata juzgaspaqa manam kamachisqantachu ruwachkan, aswanqa juezñam rikurirun.
12 Chullallam kamachikuykunata rikurichiq Diosqa, payllataqmi juezpas,+ paymi salvawachwanpas chaynataq chinkarachiwachwanpas,+ hinaptinqa, ¿pitaq qamqa kanki runamasikita juzganaykipaqqa?+
13 Uyariychikyá, “kunanmi utaq paqarinmi risunchik kay llaqtata utaq wak llaqtata, hinaspam watantin negociota ruwamuspa qullqita ganakamusunchik” nispa rimaqkuna.+
14 Qamkunaqa manam yachankichikchu paqarin punchaw imam pasarusunaykichiktaqa.+ Qamkunaqa kankichik rikuriramuspa chaylla chinkaruq puyu hinallam.+
15 Chayna ninaykichikmantaqa kaynatam ninaykichik: “Jehova* Dios munaptinqa+ kawsaspachiki kayta utaq wakta ruwasunchik”, nispa.
16 Qamkunam ichaqa kikillaykichik alabakusqaykichikmanta hatuntukuchkankichik, chayna alabakuyqa manam allinchu.
17 Chaynaqa, pipas allin kaqta ruwananta yachachkaspa mana ruwaspanqa huchallikuchkanmi.+
Willakuykuna
^ Utaq: “Runamasikichiktam chiqnichkankichik”.
^ Griego rimaypiqa nichkan: “Hukwan pierdekuq warmikuna”, nispam.
^ Kaypiqa rimachkan mana kuyana kachkaspa kuyasqa kaymantam. Qaway “mana kuyana kachkaspa kuyasqa kay” niqpa ima ninan kasqanta.
^ Qaway A5 kaq yachachikuyta.
^ Qaway A5 kaq yachachikuyta.
