Hebreos 10:1-39

  • Animalkunata wañuchispa ofrecesqanku yanqapaq kasqanmanta (1-4)

    • Moisespa chaskisqan kamachikuykunaqa llantuy hinalla kasqanmanta (1)

  • Huk kutillata wiñaypaq Cristo wañukusqanmanta (5-18)

  • Kawsakuyman pusaq musuq ñanmanta (19-25)

    • Huñunakuyman riyta mana saqinamanta (24, 25)

  • Yachachkaspa kikinchikmanta huchaman mana urmaykunamanta (26-31)

  • Aguantanapaqqa Diospim hapipakuna hinaspapas paymantam mana iskayrayanachu (32-39)

10  Moisespa chaskisqan kamachikuykunaqa hamuq allin kaqkunapa+ llantuynin hinallam,+ manam allin kaqkunachu. Chaymantapas Moisespa chaskisqan kamachikuykunaqa* manam Diosman asuykuqkunataqa allintaqa chuyanchanchu animalkunata wañuchispa watan-watan qusqankuwanqa.+  Runakunapa huchanta chay wañuchisqanku animalkuna chuyanchaptinqa manañachiki animalkunataqa sapa kutiqa wañuchinañachu kanman Diosman qunapaqqa, Diosta serviqkunapas sunqunkupichiki manaña huchayuq kanmanku.  Ichaqa chay animalkuna wañuchisqankuqa huchayuq kasqankuta watan-watan yuyarinankupaqmi.+  Torokunapa hinaspa cabrakunapa yawarninqa manam atinmanchu hucha chinkachiytaqa.  Chaymi Cristo kay pachaman hamuspan Diosta nirqa: “‘Qamqa manam munarqankichu animalkuna wañuchipunaytawan ofrendakuna qunaytaqa, aswanqa cuerpoytam quwarqanki*.  Qamqa manam chaskirqankichu animalkuna kañapunaytaqa nitaq hucharayku ofrendakuna qunaytaqa’, nispa.+  Hinaspam nirqani: ‘Dioslláy, kayqaya hamuruni, wankukuq qillqapi ñuqamanta qillqasqa kasqanman hinam ñuqaqa hamuruni qampa munaynikita ruwanaypaq’”, nispa.+  Puntatam nirqani: “Qamqa manam munarqankichu nitaq chaskirqankichu animalkuna wañuchipunaytaqa, ofrendakuna qunaytaqa, animalkuna kañapunaytaqa nitaq hucharayku ofrendakuna qunaytaqa”, nispa. Chaykunata ruwanapaqmi Moisespa chaskisqan kamachikuykunaqa kamachirqa.  Chaynata niruspaymi nirqani: “Kayqaya hamuruni munaynikita ruwanaypaq”, nispa.+ Paymi ñawpaq kaqta hurqun qipa kaqta churananpaq. 10  Diospa chayna munayninman+ hinam ñuqanchikqa chuyanchasqa karqanchik, chaynaqa karqanchik Jesucristo cuerponta huk kutillata wiñaypaq qusqanwanmi.+ 11  Chaymantapas llapallan sacerdotekunam sapa punchaw ruwayninkuta ruwaspanku Diosta serviqku,+ hinaspapas animalkunata wañuchispam Diospaq sapa kuti quqku.+ Chay ruwasqankuqa manam huchataqa pasaypaqta chinkachiytaqa atirqachu.+ 12  Jesusmi ichaqa hucharayku wiñaypaqña huk kutillata wañukurqa, hinaspam Diospa alliqninpi* tiyaykurqa.+ 13  Chaymantapacham suyachkan chiqniqninkunata chakinpa sarupakunanta hina Dios churaykunankama.+ 14  Chaynatam huk kutillata vidanta qusqanwan Cristoqa wiñaypaq chuyancharun+ sapaqchasqa kaqkunata. 15  Diosqa atiyninwanmi* willawanchik kaynata nispan: 16  “Jehova* Diosmi nin: ‘Chay punchawkunamanta qipata paykunawan contrato* ruwasqayqa kaymi: Kamachikuyniykunatam sunqunkupi churasaq, qillqasaqtaqmi yuyayninkupipas’”, nispa.+ 17  Nintaqmi: “Huchankutapas manañam yuyarisaqchu nitaqmi mana allin ruwasqankutapas”, nispa.+ 18  Huchakuna pampachasqaña kaptinqa manañam hucharayku ofrendakunaqa kananñachu. 19  Wawqi-panillaykuna, Jesuspa yawarninwanmi mana manchakuspa chay Chuyay-chuyay cuartomanqa+ yaykunchik. 20  Payqa cortinata kichaykuspa yaykuchkaq hinam kawsakuyman pusawaqninchik musuq ñanta kichaykapuwarqanchik,+ chay cortinaqa cuerponmi. 21  Kapuwachkanchiktaqmi Diospa wasinpi ancha riqsisqa sacerdotepas.+ 22  Hinaptinqa Diosmanyá asuykusun tukuy sunqunchikwan hinaspa imaniraqllatapas mana iskayrayaspa. Mana allin conciencianchikqa+ yawarwan challasqa kaspanmi chuyanchasqaña kachkan allin concienciayuqña kananchikpaq, cuerponchikpas chuya yakuwanmi mayllasqaña kachkan.+ 23  Chaynaqa ama manchakuspayá imam suyasqanchikmanta hinalla willakusun.+ Prometewaqninchikqa nisqanman hinam ruwanqapuni. 24  Chaymantapas llapallanchikyá sumaqta riqsinakuspa* kallpanchanakusun kuyakuq hinaspa allin ruwaq kananchikpaq,+ 25  amayá wakinkunapa costumbrasqanman hinaqa huñunakuyman riytaqa saqirusunchu,+ aswanqa Diospa punchawnin chaylla chayamunanta+ yachaspayá llapallanchik astawan kallpanchanakusunchik.+ 26  Chiqap kaq yachachikuyta imam kaqta yachachkaspaña+ kikinchikmantapuni huchaman qukuruptinchikqa manañam huchanchikmanta ima ofrendapas kanñachu,+ 27  aswanqa manchakuypaq juicio suyayllañam. Diospa llumpa-llumpay piñakuyninmi chinkachinqa paypa contranpi kaqkunataqa.+ 28  Moisespa chaskisqan kamachikuykunata pipas mana kasukuq runaqa mana llakipayasqam wañun iskay utaq kimsa rikuqninkuna willakuptin.+ 29  Hinaptinqa, ¡mayna castigasqaraqchá kanqa pipas Diospa churinta sarutyaq runaqa hinaspa Dioswan contrato*+ ruwasqanmanta chuyanchaqnin yawarta mana valorniyuqta qawaq runaqa chaynataq ancha kuyawaqninchik* Diospa atiynintapas mana respetaq runaqa!+ 30  Ñuqanchikqa riqsinchikmi “mana allin ruwaqkunataqa ñuqam chinkachisaq, ñuqataqmi mana allin ruwasqanmanta pagapusaq” niq Diostaqa. Qillqasqataqmi kachkan: “Jehova* Diosqa runankunatam juzganqa”, niqpas.+ 31  Hinaptinqa, ¡mayna manchakuypaqmi Diospa makinman wichiykuyqa! 32  Amayá qunqaychikchu chiqap yachachikuyta chaskisqaykichik punchawkunataqa.+ Qamkunaqa llumpay ñakariykunapi tarikuchkaspapas allintam sayarqankichik. 33  Wakin kutipiqa llapallan runakunapa qayllanpim kamisqa hinaspa ñakarichisqa karqankichik, wakinpiñataqmi ñakariqkunapa ñakariqmasin* karqankichik. 34  Qamkunaqa presochasqa kaqkunatam llakipayarqankichik, chaymantapas imaykichikta qichusuptikichikpas kusisqallam karqankichik.+ Chaynaqa karqankichik qamkunapaq aswan allin hinaspa wiñaypaq kaqkuna kapususqaykichikta yachasqaykichikraykum.+ 35  Chaynaqa, hinallayá mana manchakuspa rimaychik, chaynapim achka bendicionkunata chaskinkichik.+ 36  Qamkunaqa hinallam ñakariykunata aguantanaykichik,+ chaynapi Diospa munasqanta ruwaruspaykichik paypa prometesqankunata chaskinaykichikpaq. 37  “Manapas unaymantam”+ “hamuqqa chayaramunqa, payqa manam unamunqachu”.+ 38  “Allin ruwaq runam ichaqa kawsanqa Diospi hapipakusqanrayku*”,+ “qipaman kutiptinmi ichaqa mana kusikusaqchu”.+ 39  Ñuqanchikqa manam chinkachisqa kanankupaq qipaman kutiqkunachu kanchik,+ aswanqa salvasqa kananchikpaq Diospi iñiqkunam.

Willakuykuna

Ichapas kanman: “Chaymantapas runakunaqa”, niqpas.
Griego rimaypiqa nichkan: “Ñuqapaq alistarqanki”, nispam.
Utaq: “Pañanpi”.
Utaq: “Chuya espiritum”. Qaway kaypa ima ninan kasqanta.
Utaq: “Pacto”. Qaway kay palabrapa ima ninan kasqanta.
Utaq: “Mana saqinakuspa”.
Utaq: “Pacto”.
Kaypiqa rimachkan mana kuyana kachkaspa kuyasqa kaymantam.
Utaq: “Ñakariqkunawan kuska”.
Utaq: “Diospi iñisqanrayku”.