1 Juan 2:1-29

  • Dioswan allinyanachiwananchikpaq Jesuspa wañusqanmanta (1, 2)

  • Diospa kamachikuyninkunata kasukunamanta (3-11)

    • Musuq kamachikuymanta hinaspa ñawpaq kamachikuymanta (7, 8)

  • Imanasqa qillqasqanmanta (12-14)

  • Diosta mana yupaychaq runakunapa imayna kawsasqankuta mana qatipakunamanta (15-17)

  • Anticristokunamanta cuidakunapaq (18-29)

2  Kuyasqay churillaykuna, kaykunatam qillqamuchkaykichik mana huchallikunaykichikpaq. Chaywanpas, pipas huchallikuruptinqa Dios taytanchikpa qayllanpim kachkan yanapawaqninchik*, payqa allin ruwaq+ Jesucristom.+  Payqa Dioswan allinyanachiwananchikpaqmi huchanchikrayku wañurqa,+ wañurqaqa manam huchanchikraykullachu+ aswanqa lliw runakunapa huchanraykum.+  Kamachikuyninkunata hinalla kasukuspam yachanchik payta riqsisqanchikta.  Pipas “ñuqaqa riqsinim” nichkaspan kamachikuyninkunata mana kasukuspanqa llullakuchkanmi, chay runaqa manam chiqap rimaqchu.  Pipas kamachikuyninkunata kasukuptinqa Dios kuyasqanpas sutillam kanqa.+ Chaymi kamachikuyninkunata kasukuptinchikqa paywan huklla kasqanchikqa sutilla kanqa.+  Pipas “paywanmi hukllaña kachkani” niqqa Jesuspa kawsasqanman hinam tukuy tiempo kawsakunan.+  Kuyasqallaykuna, manam musuq kamachikuytachu qillqamuchkaykichikqa, aswanqa qallariyninmantapacha yachasqaykichik ñawpaq kaq kamachikuyllatam.+ Chay ñawpaq kamachikuyqa uyarisqaykichik kamachikuymi.  Chaywanpas, qillqamusqay kamachikuyqa musuqmi, kay kamachikuytaqa paypas chaynataq qamkunapas kasukuchkankichikmi. Tutayayqa tukuchkanñam chiqap achkiñataqmi kanchamuchkanña.+  Pipas “achkipim kachkani” nichkaspan iñiqmasinta chiqniqqa+ tutayaypiraqmi kachkan.+ 10  Pipas iñiqmasinta kuyaqqa tukuy tiempom achkipi kachkan,+ payqa manam imawanpas urmanqachu. 11  Pipas iñiqmasinta chiqniqmi ichaqa tutayaypi kachkan,+ payqa manam yachanchu mayman risqantapas+ tutayaypi mana rikukusqanrayku. 12  Kuyasqay churillaykuna, qamkunamanmi qillqamuchkaykichik Jesuspa sutinpi huchaykichikkunata Dios pampachasusqaykichikrayku.+ 13  Taytakuna, qamkunamanmi qillqamuykichik qallariymanta kaqta riqsisqaykichikrayku. Musukuna, qamkunamanmi qillqamuykichik satanasta* vencerusqaykichikrayku.+ Churillaykuna, qamkunamanmi qillqamuykichik Dios taytanchikta riqsisqaykichikrayku.+ 14  Taytakuna, qamkunamanmi qillqamuykichik qallariymantapuni kaqta riqsisqaykichikrayku. Musukuna, qamkunamanmi qillqamuykichik qaqa hina sayasqaykichikrayku,+ satanasta vencerusqaykichikrayku+ hinaspa Diospa rimapayasusqaykichik sunquykichikpi kasqanrayku.+ 15  Amayá qatipakuychikchu* Diosta mana yupaychaq runakunapa imayna kawsakusqankutaqa nitaq tukuy ima ruwasqankutaqa,+ chaykunata qatipakuqqa manam Dios taytanchiktaqa kuyanchu.+ 16  Diosta mana yupaychaq runakunapa ruwasqanqa aychapa munapayasqankunam,+ ñawipa munapayasqankunam+ hinaspa imapas kapuqniyuq kaspa hatuntukuykunam. Tukuy chaykunaqa manam Dios taytanchikmantachu hamun, aswanqa Diosta mana yupaychaq runakunamantam hamun. 17  Diosta mana yupaychaq runakunaqa wañunqam, tukuy ima munapayasqankunapas+ chinkanqam. Diospa munayninta ruwaqmi ichaqa wiñaypaq kawsanqa.+ 18  Kuyasqay churillaykuna, ñam tukupay tiempoña. Anticristokuna* hamunanmantaqa uyarirqankichikñam,+ kunanpunipas anticristokunaqa achkallañam rikuriramunku,+ chaywanmi yachanchik tukupay tiempoña kasqanta. 19  Paykunaqa ñuqanchik ukumantam lluqsirunku ñuqanchik hina mana kasqankurayku,+ sichum ñuqanchik hina kaspankuqa ñuqanchikwanchá kachkanmanku karqa. Manam llapallankuchu ñuqanchik hina kanku, chayta yachananchikpaqmi paykunaqa lluqsirunku.+ 20  Qamkunaqa Diospa atiynintam chaskirqankichik,+ llapallaykichikmi chiqap kaqmantapas yachankichik. 21  Qillqamuchkaykichikqa manam chiqap kaqmanta mana yachasqaykichikraykuchu+ aswanqa yachasqaykichikraykum hinaspa chiqap kaqmanta ima llullapas mana hamusqanraykum.+ 22  ¿Pitaq llullaqa? Pipas “Jesusqa manam Cristochu”+ niqmi llullaqa. Payqa anticristom,+ payqa qipanchanmi hanaq pacha taytatapas chaynataq churintapas. 23  Churita lliw qipanchaqkunaqa manam taytanchikpa chaskisqanchu.+ Pipas, “churipim+ iñini” niqmi taytanchikpa chaskisqanqa.+ 24  Qamkunapa qallariymantapacha uyarisqaykichikqa sunquykichikpiyá tukuy tiempo kachun.+ Chay uyarisqaykichik sunquykichikpi kaptinqa qamkunapas Dios taytanchikwan hinaspa churinwanmi tukuy tiempo huklla kankichik. 25  Chaymantapas Diosmi niwarqanchik wiñaypaq kawsananchikpaq.+ 26  Tukuy chaykunataqa qillqamuchkaykichik qamkunata pantachiy munaqkunamantam. 27  Diosmi qamkunataqa chuya espiritunwan akllasurqankichik,+ chay espiritunñataqmi qamkunapi kachkan, chaynapi pipas mana hukta yachachisunaykichikpaq, qamkunataqa Diosmi akllasqa kasqaykichikrayku tukuy imamanta yachachisuchkankichik,+ akllasqa kasqaykichikqa chiqapmi, manam llullachu. Chaynaqa yachachisusqaykichikman hinayá tukuy tiempo paywan huklla kaychik.+ 28  Chaynaqa, paywanyá huklla kaychik kuyasqay churillaykuna, chaynapim rikuriramuptin mana recelaspa+ rimasunchik, hinaspapas chayaramuspan kaypi kasqan* tiempopiqa manam karunchakusunchu pinqakusqanchikraykuqa. 29  Cristo allin ruwaq kasqanta yachaspaykichikqa yachankichiktaqmi pipas allin ruwaqqa Diospa churin kasqanta.+

Willakuykuna

Utaq: “Abogadonchik”.
Griego rimaypiqa nichkan: “Mana allinta”, nispam.
Griego rimaypiqa nichkan: “Kuyaychikchu”, nispam.
Qaway kay palabrapa ima ninan kasqanta.
Kaytam griego rimaypi “parousia” ninku. Qaway “chayaramuspa kaypi kasqan” niqpa ima ninan kasqanta.