1. ¿Imataj wakin hermanosta llakichinman? (Patapi kaj dibujota qhawariy).

LLOYDMANTA ALEXANDRAMANTAWAN parlarina. Paykunaqa 25 watas kurajta Betelpi sirvisqanku. Manaña Betelpi trabajanankuta nejtinkutaj llakikusqanku. Hermanonchej Lloyd nin: “Betelpi ashkha cambios kasqanrayku manaña Betelpi trabajanayta niwajtinku mana anchata llakikorqanichu. Chaywanpis semanasninman Betelpi trabajayta faltachasqayrayku manchayta llakikorqani, ni imapaj valesqaytataj yuyarqani. Wakin ratostaj allillan kashajtiy ujllata llakiy chayawaj”, nispa.

2. Salmo 131 nisqanman jina, ¿imatataj ruwasunman sonqo tiyasqa kanapaj?

² Kausayninchejpi ima cambio kajtinpis chayri imatapis waj jinamanta ruwananchejta yachaspaqa, phutikusunman chayri umphuyapusunman (Pro. 12:25). Chay jinata phutikuspapis sonqonchejta tiyaykuchiyta atisunman (Salmo 131:1-3 leey). Chayrayku qhepan parrafospi Diospa kamachisninmanta yachakusunchej. Qhawarisunchej kausayninkupi cambios kajtinpis imastachus ruwasqankuta sonqo tiyasqa kanankupaj.

3. ¿Imataj Josewan kasqa?

³ Josemanta parlarina. Joseqa tatanpaj may munasqa karqa. Chayrayku hermanosnenqa Joseta mayta chejnikoj kanku. José 17 watasniyoj jina kashajtintaj hermanosnin esclavota jina venderparqanku (Gén. 37:2-4, 23-28). Jinamanta tatanmanta karupi kasharqa. Josetaqa Egiptopi 13 watasta esclavota jina ñakʼaricherqanku, carcelmantaj wisqʼaykucherqanku. Ajinapi rikukuspapis Joseqa mana yuyarqachu ni imapaj valesqanta, nitaj llakiywan atipachikorqachu.

4. 1) José carcelpi wisqʼasqa kashaspa, ¿imaspitaj tʼukurinman kasqa? 2) ¿Jehová Dios Joseta uyarisqachu?

⁴ Joseqa carcelpi kashaspa tʼukurerqachá imaynatachus Jehová Dios yanapashasqanpi (Gén. 39:21; Sal. 105:17-19). Chantapis yuyarikorqachá imastachus joven kashaspa mosqokusqanta. Jehová Diosqa chay mosqoynejta Joseman rikucherqa imaschus pasananta. Joseqa chayta yuyarikuspa repararqachá Jehová Dios mana saqerparisqanta (Gén. 37:5-11). Chantapis sonqomantapachachá Jehová Diosman llakiyninta willakoj (Sal. 145:18). Jehová Diostajrí Josewanpuni kasharqa (Hech. 7:9, 10). *

5. ¿Jehová Dios sonqo tiyaykuyta qowasunmanchu?

⁵ Mayta sufrejtinchejpis ‘Jehová Diosqa sonqo tiyaykuyta qowasunchej’, yuyayninchejtataj waqaychanqa (Filipenses 4:6, 7 leey). Chayrayku ima llakiypi rikukuspapis, Jehová Diosman llakiyninchejta willakuna. Paytaj yanapawasunchej ñaupajllamanpuni rinapaj, llakiyninchejwantaj mana atipachikunapaj. Chaymanta parlaspa wakin hermanospa experienciasninkuta qhawarinachej.

6, 7. ¿Jehová Diosman llakiyninchejta willakuy yanapawasunmanchu?

⁶ Ryanmanta Juliettemantawan parlarina. Paykunaqa mayta llakikusqanku manaña precursores especiales kanankuta yachaspa. Chaywanpis Jehová Diosman llakiyninkuta willakusqankupacha. Ryan nin: “Chaypacha rikuchinayku karqa tukuy sonqo Jehová Diospi atienekusqaykuta. Imaraykuchus congregacionniykumanta ashkha hermanosqa chaypachallaraj bautizakorqanku. Chayrayku Jehová Diosman nerqayku sumaj ejemplos kanaykupaj yanapanawaykuta”, nispa.

⁷ Ryan nillanpuni: “Diosman llakiyniykuta willasqaykutawan, sonqoyku tiyaykorqa, niñataj llakiyniykupi yuyarqaykuchu. Jehová Diosqa sonqoykuta, yuyayniykutapis waqaycharqa. Repararqaykutaj llakiywan mana atipachikunaykuchu kasqanta Jehová Diosta sirvinallaykupajpuni”, nispa.

8, 9. ¿Imaynatataj Diosninchej atiyninnejta yanapawasunman llakiyninchejta aguantanapaj?

⁸ Jehová Diosqa atiyninnejta sonqonchejta tiyaykuchinman, yanapawasunmantaj Bibliapi sonqochaj versiculosta tarinapaj. Ajinamanta Diospa munayninta ñaupajman churanapaj (Juan 14:26, 27 leey). Felipemanta Mariamantawan parlarina. Paykunaqa Betelpi casi 25 watastapuni sirvisqanku. Betelmanta ripusqankumanta pisi tiemponmantaj Felipej maman, Mariaj maman, ujnin familiarninkupiwan wañupusqanku. Chantapis chay qhariwarmeqa Mariaj tatanta qhawananku karqa, uma muyuyniyoj kasqanrayku.

⁹ Felipe nin: “Yuyarqani chay llakiykunasniyta sumajta aguantashasqayta. Chaywanpis mana kusiywanchu aguantasharqani. Ujpacha Torremanta Qhawaj revistata leeshaspa, Colosenses 1:11 versiculota leerqani. Chay versiculotaj reparachiwarqa ‘pacienciawan kusiywantaj tukuy imata’ aguantanay kasqanta. Chantapis chay versiculoqa yuyarichiwarqa,  kusisqa kanaypaj Dioswan yanapachikunay kasqanta, manataj allin imaslla kanantachu suyanay kasqanta”, nispa.

10. ¿Imaynasmantataj Jehová Dios llakiypi rikukojtinchej yanapawasunman?

¹⁰ Felipewan Mariawanqa, llakiykunapi rikukuspapis Jehová Diosta yupaychallarqankupuni. Jehová Diostaj paykunata tukuy imaymanasmanta bendicerqa. Por ejemplo, Felipewan Mariawanqa Betelmanta ripusqankumanta pisi tiemponman sumaj estudiosta tarisqanku. Chay estudiosninkoqa sumajta ñauparisqanku, semanapitaj ashkha kutista estudiayta munasqanku. Chaymanta parlaspa María nin: “Mayta kusikorqayku chay jina estudiosta tarispa. Repararqaykutaj Jehová Dios chay estudiosnejta mana anchata llakikunaykupaj yanapashawasqaykuta”, nispa.  

11, 12. 1) ¿Imatataj José ruwasqa Dioswan bendecichikunanpaj? 2) ¿Ima bendicionestataj Jehová Dios Joseman qosqa?

¹¹ Ujllata kausayninchejpi cambios kajtenqa, ichapis problemasnillanchejpi yuyaspa llakiywan atipachikusunman. Josepis ashkha llakiykunapi rikukorqa. Chaywanpis mana llakiykunasnillanpichu yuyarqa. Manaqa ruwanasninta sumajta juntʼananpaj kallpachakorqa Jehová Dioswan bendecichikunanpaj. Chayrayku Joseqa carcelpi kashaspapis, carcelta qhawaj mandasqanta sumajta juntʼarqa, imaynatachus Potifarpaj llankʼashaspa ruwanasninta sumajta juntʼarqa, ajinata (Gén. 39:21-23).

¹² Uj kutipi Joseqa cargoyoj kasharqa vinota jaywaj presomanta, tʼantata ruwaj presomantawan. Joseqa chay presoswan kʼacha karqa. Chayrayku chay presosqa, llakiyninkuta, mosqoyninkutawan mana manchachikuspa Joseman willakorqanku (Gén. 40:5-8). José chay iskay presoswan parlarisqanrayku iskay watanman carcelmanta kacharichisqa karqa. Tukuynin Egiptota kamachinanpaj cargotataj japʼerqa. Faraonllataj paymanta aswan kuraj karqa (Gén. 41:1, 14-16, 39-41).

13. ¿Imatataj ruwasunman llakiypi rikukojtinchej Jehová Dios bendecinawanchejpaj?

¹³ Ichá noqanchejpis José jina uj jatun problemapi rikukusunman. Chay problemata chinkachinapajtaj ichá ni imata ruwayta atisunmanchu. Chaywanpis pacienciakusunman, kallpachakusunmantaj mana llakiyninchejwan atipachikunapaj. Chayta ruwajtinchejqa Jehová Diosninchej bendeciwasunchej (Sal. 37:5). Chayrayku may chhika llakiyniyoj kaspapis, imatachus ruwananchejta mana yachaspapis, ñaupajllamanpuni rina (2 Cor. 4:8, sutʼinchaynin). Jehová Diosta yupaychallajtinchejpuneqa pay noqanchejwanpuni kanqa.

14-16. ¿Imapi rikukuspapis Felipe sumaj willaykunata willallasqapunichu?

¹⁴ Diospa kamachin Felipemanta parlarina.  Payqa imapi rikukuspapis sumaj willaykunata tukuy sonqo willaj. Jerusalenpi kashaspaqa mikhunata rakʼinanpaj encargasqa karqa (Hech. 6:1-6). Jinallapi Esteban wañuchisqa karqa. * Chaymantataj Jerusalenpi kaj cristianosta sinchʼita qhatiykachakorqa. Chayrayku cristianosqa Jerusalenmanta riraporqanku. Felipetaj Samaria llajtaman riporqa, chaypitaj runasman Cristomanta willallarqapuni. Imajtinchus chay llajtapi runasqa sumaj willaykunata uyariyta necesitarqanku (Mat. 10:5; Hech. 8:1, 5).

¹⁵ Felipeqa wakichisqa kasharqa Diosninchejwan maymanpis pusachikunanpaj. Chayrayku Jehová Diosqa Felipeta kacharqa maykunapichus manaraj sumaj willaykuna willakorqachu, chay lugaresman. Felipeqa tukuy runasman predicaj. Chay tiempomanta judíos, samaritanosta chejnikojtinkupis Felipeqa samaritanosta mana chejnikorqachu. Astawanpis paykunaman sumaj willaykunata willarqa. Samaritanostaj “uj yuyaylla Felipej nisqanta uyarerqanku” (Hech. 8:6-8).

¹⁶ Chantá Jehová Diosqa atiyninwan Felipeta Asdodman, Cesareaman ima pusarqa, chay llajtaspi predicananpaj. Chay llajtaspeqa ashkha mana judío runas tiyakorqanku (Hech. 8:39, 40). Felipeqa chay llajtaspi predicashaspa uj lugarpi qhepakorqa, familiayojtaj karqa. Familiayoj kaspapis Felipeqa tukuy sonqo sumaj willaykunata willallarqapuni. Jehová Diostaj Felipeta familiantawan bendicerqa (Hech. 21:8, 9).

17, 18. Kausayninchejpi wakin cambios kajtin, ¿imajtintaj nisunman predicamuy may sumajpuni kasqanta?

¹⁷ Diospaj astawan llankʼajkunaqa ninku, kausayninkupi cambios kajtin kusisqallapuni kanankupaj predicay yanapasqanta. Kunantaj uj qhariwarmimanta parlarina. Paykunaqa Osborne, Polite ima sutikunku, Sudáfrica Betelpitaj sirvisqanku. Betelmanta ripunankuta yachaspaqa, yuyasqanku wakin diasllata trabajanankupaj trabajota, wasitapis tarinallankuta. Hermanonchej Osborne nin: “Trabajotaqa mana yuyasqaykuman jinachu chay rato tarerqayku”, nispa. Señorantaj nin: “Kinsa killatapuni trabajota maskʼarqayku, manataj waqaychasniykupis karqachu. Ñakʼaytapuni chay killasta aguantarqayku”, nispa.

¹⁸ Ajina llakiypi rikukusqankumanta Osborne nin: “Llakiywan mana atipachikunaykupajqa hermanoswan predicamuy yanapawarqayku. Manataj wasillaykupichu qhepakorqayku llakiyniykupi yuyaspa, manaqa tukuy atisqaykuta  predicamorqayku. Chaytaj mayta kusichiwarqayku. Trabajotapis mayta maskʼaspa tarerqayku”, nispa.

19-21. 1) ¿Imatataj ruwananchej kasqa sonqo tiyasqa kanapaj? 2) ¿Imaynasmantataj cambiosta, llakiykunatapis aguantay yanapawasunman?

¹⁹ Yachakunchej jina, kausayninchejpi ima cambiopis kajtenqa sonqo tiyaykusqa kayta atisunman. Chaypajqa predicanallanchejpuni tiyan, Jehová Diospitaj atienekunanchej tiyan (Miqueas 7:7 leey). Kusiywan ima cambiotapis chayri ima llakiytapis aguantaspaqa, astawan Jehová Diosman qayllaykusunchej. Hermananchej Polite nin: “Betelmanta llojsispa astawan Jehová Diosmanta japʼikorqani, astawanraj llakiykunapi rikukuspa. Ni jaykʼaj jinataj astawan Diosman qayllaykorqani”, nispa.

²⁰ Hermananchej Mariataj nin: “Tatayta qhawashallanipuni, precursora jinataj sirvishallanipuni. Reparakunitaj ima llakiytapis atipanaypaj orakunay kasqanta, llakiyniypipis manaña yuyanaychu kasqanta, sonqoytapis tiyaykuchinay kasqanta. Reparallanitaj ima llakiytapis Diospa makinman saqepunay kasqanta. Tumpamantawanqa astawanraj Jehová Diospi confianay kanqa”, nispa.

²¹ Lloydwan Alexandrawanqa kausayninkupi cambios kajtin, manchayta llakikorqanku. Llakiyninkuta atipanankupajtaj Diospi sinchʼita confiarqanku. Paykuna ninku: “Llakiykunapi rikukuspaqa, Diospi astawan confiarqayku. Kunanqa sonqochanakuyta, kallpachanakuytapis atiyku. Kunanmá creeypi sumaj sayasqa kashayku”, nispa.

22. Ruwanasninchejta juntʼanapaj kallpachakojtinchej, ¿imatataj Jehová Dios qowasunchej?

²² Kay sajra mundopi tiyakusqanchejrayku kaymanta jinalla ima llakiypis chayamuwasunman chayri kausayninchejpi ima cambiopis kanman. Por ejemplo, ichá waj ladopi Jehová Diosta sirvinanchejta niwasunman chayri waj ruwanasta japʼisunman manachayri onqorpasunman chayri familiaresninchejta cuidananchej kanqa. Imapi rikukuspapis Jehová Dios maychus tiemponpi yanapanawanchejpi atienekuna. Imajtinchus payqa noqanchejmanta llakikun (Heb. 4:16; 1 Ped. 5:6, 7). Ima llakiypi rikukuspapis ruwanasninchejta juntʼanapaj kallpachakunallapuni. Jehová Diosmantaj llakiyninchejta willakuna, yanapanawanchejpitaj atienekuna. Chaykunata ruwajtinchejqa imapi rikukojtinchejpis Jehová Dios sonqonchejta tiyaykuchenqa.