Levitiko 9:1-24
-
Aroni adapereka ntsembe (1-24)
9 Pantsiku yachi 8, Mose adachemera Aroni, wana wake na akulu wa Izirayeli.
2 Iye adauza Aroni kuti: “Tenga ng’ombe ing’ono kuti ikhale ntsembe yamachimo na nkhosa imuna kuti ikhale ntsembe yoshoka. Nyama zose mwizi zikhale zosapunduka ndipo uzipereke kwa Yahova.
3 Koma Aizirayeli uwauze kuti: ‘Tengani mbuzi imuna kuti ikhale ntsembe yamachimo. Mutenge pomwe mwana wa ng’ombe na nkhosa ing’ono imuna, vose vimwevi vikhale va gole ibodzi, vosapunduka kuti vikhale ntsembe yoshoka.
4 Mutenge pomwe ng’ombe imuna na nkhosa imuna kuti muvipereke kwa Yahova ninge ntsembe zachibverano. Mubwere pomwe na ntsembe yambewu yothira mafuta ndawa lero Yahova awonekere kwa imwepo.’”
5 Pamwapo wanthu mwawo adatenga vomwe Mose adalamula nkuyenda navo kuchihema chogumanako. Patsogolo pake gulu yose idafendera nkuima pamaso pa Yahova.
6 Manje Mose adati: “Ivi ni vomwe Yahova wakulamulani kuti muchite, kuti ulemerero wa Yahova uwonekere kwa imwepo.”
7 Patsogolo pake Mose adauza Aroni kuti: “Yenda ku guwa yantsembe kuti ukapereke ntsembe yako yamachimo na ntsembe yako yoshoka kuti upsyimphirize machimo yako na ya wanthu wa m’banja yako.* Ukachita teno, uwaperekere ntsembe wanthu mwawa nkuwapsyimphirizira machimo yawo, mobverana na vomwe Yahova walamula.”
8 Nthawe mwiyoletu Aroni adayenda ku guwa yantsembe nkupha ng’ombe ing’ono kuti ikhale ntsembe yake yamachimo.
9 Manje wana wake adamubweresera magazi ya ng’ombe mwiyo ndipo iye adavuwika chala chake m’magazi mwayo nkuyapakasira panyanga za guwa yantsembe. Magazi yomwe yadasalira adayathira pasi pa guwa yantsembe mwiyo.
10 Ndipo mafuta, mphewa na mafuta ya pachiwindi vomwe adavitenga pa nyama ya machimo adaviwotcha paguwa yantsembe, mobverana na vomwe Yahova adalamula Mose.
11 Koma nyama na chikumba chake adavishoka kunja kwa nsasa.
12 Manje Aroni adapha nyama ya ntsembe yoshoka ndipo wana wake adamupasa magazi ya nyama mwiyo. Padateno iye adawaza magazi mwayo m’mbali zose za guwa yantsembe.
13 Patsogolo pake adamupasa nyama yogwatagwata ya ntsembe yoshoka pabodzi na nsolo ndipo adaviwotcha paguwa yantsembe.
14 Padateno adatsuka matumbo na vibodo,* nkuviwotcha paguwa yantsembe padzulu pa ntsembe yoshoka.
15 Patsogolo pake adaperekera wanthu ntsembe. Adatenga mbuzi yoperekera wanthu ntsembe yamachimo ndipo adaipha, nkuipereka ninge ntsembe yamachimo, ninge momwe adachitira na nyama yoyamba ire.
16 Padateno adapereka ntsembe yoshoka motewedza malamulo yake.
17 Patsogolo pake adapereka ntsembe yambewu. Adatapako ntsembe mwiyo nkudzadza kumanja kwake nkushoka paguwa yantsembe, kuingizira pa ntsembe yoshoka ya machibese.
18 Manje Aroni adapha ng’ombe imuna na nkhosa imuna yantsembe yachibverano yoperekera wanthu mwawo. Patsogolo pake wana wake adamupasa magazi ya nyama mwizo ndipo iye adawaza magazi mwayo m’mbali zose za guwa yantsembe.
19 Koma mafuta ya ng’ombe mwiyo, nchira wa mafuta wa nkhosa, mafuta yokukutidza va m’mimba, mphewa na mafuta ya pachiwindi,
20 wana wa Aroni adaikha mafuta mwayo padzulu pa nganga za nyama mwizo. Patsogolo pake adashoka mafuta mwayo paguwa yantsembe.
21 Koma Aroni adayendesa uku na uku nganga mwizo na mwendo wakumbuyo wa kumakulu pamaso pa Yahova, mobverana na vomwe Mose adalamula.
22 Patsogolo pake Aroni adakwiza manja yake nkulata wanthu mwawo ndipo adawadalisa. Padamaliza kupereka ntsembe yamachimo, ntsembe yoshoka na ntsembe zachibverano, adabuluka kuguwa yantsembe.
23 Pomalizira pake Mose na Aroni adangena muchihema chogumanako, patsogolo pake adabulamo nkudalisa wanthu mwawo.
Padateno ulemerero wa Yahova udaonekera kwa wanthu wose,
24 ndipo moto udabuluka kuchokera kwa Yahova nkunyekesa ntsembe yoshoka na mafuta, vomwe venze paguwa yantsembe. Wanthu wose padawona vimwevi adayamba kukuwa mokondwa ndipo adagwada nkujolima mpakana nkhope zawo pasi.
