Levitiko 24:1-23
24 Yahova adapitiriza kuyankhula na Mose kuti:
2 “Lamula Aizirayeli kuti akubweresere mafuta yonunkhira yosusa bwino maninge ya maolivi, kuti makandyero yambakhale yogaka nthawe zose.
3 Aroni ambakhazike kandyero kunja kwa nguwo yogwatiza ya Malo Yochena Maninge mu chihema chogumanako. Makandyero mwayo yambavunikire pamaso pa Yahova nthawe zose kuyambira maulo mpakana machibese. Mwiyi ni lamulo kwa imwepo mpakana kalekale ku mibadwo yanu yose.
4 Makandyero mwayo ayakhazike pa choikhapo kandyero chagolide wosefa bwino, ndipo yambakhale pamaso pa Yahova nthawe zose.
5 Utenge ufa wonyodoka nkuphika mikate 12 yabololindo yoboola pakati. Nkate uliwose umbakonzewe na ufa wokwana magawo yawiri pa magawo 10 ya mpimo wa efa.*
6 Ndipo usanzikidze mikate mwayo magulu yawiri. Gulu iriyose ikhale na mikate 6. Uikhe mikate mwayo pameza ya golide wosefa bwino pamaso pa Yahova.
7 Pagulu iriyose ya mikate mwayo uikhe lubani chaiye. Lubani muyo umbaperekewe ntsembe yowotcha pamoto kwa Yahova kuimira ntsembe yose mwiyo.
8 Pantsiku iriyose ya Satade ambaikhe nkate muyo pamaso pa Yahova nthawe zose. Mwiyi ni pangano pakati pa inepano na Aizirayeli mpakana kalekale.
9 Nkate muyo umbakhale wa Aroni na wana wake, ndipo ambaudyere m’malo yochena, ndawa waperekewa kwa iye ninge chinthu chochena maninge kuchokera pa ntsembe zowotcha pamoto zoperekewa kwa Yahova. Mwiyi ikhale lamulo mpakana kalekale.”
10 Manje penze mulumbwana munango yemwe amayi wake enze wa Chiizirayeli, koma ababa wake enze wa ku Iguputo. Mulumbwana muyu adayamba kumenyana na munthu munango wa Chiizirayeli munsasa.
11 Mulumbwana muyo adayamba kunyoza* na kutukwana dzina ya Mulungu.* Pamwapo adayenda naye kwa Mose. Dzina ya amayi wake yenze Selomiti, mwana wa Dibiri wa dzinza ya Dani.
12 Manje adamufungira pakudikhira kuti Yahova apereke chigamulo pa nkhani mwiyi.
13 Patsogolo pake Yahova adauza Mose kuti:
14 “Munthu wotemberera dzina ya Mulungu ule, muyende naye kunja kwa nsasa. Wose omwe adamubva akutemberera amuikhe manja pansolo pake ndipo gulu yose imuteme na minyala.
15 Ndipo uuze Aizirayeli kuti: ‘Peno munthu aliyese watemberera Mulungu wake, ambadawire chimo yake mwiyo.
16 Ndipo munthu yemwe wanyoza dzina ya Yahova ambaphewe. Gulu yose imbamuteme na minyala. Peno ni mulendo wokhala pakati panu panango nzika, ambaphewe ndawa yonyoza Dzina mwiyo.
17 Munthu aliyese yemwe wapha munthu, ambaphewembo.
18 Munthu yemwe wamenya chipfuwo cha munzake mpakana kuchipha, ambabweze chipfuwo chinango, chipfuwo kulipira chipfuwo.*
19 Munthu akapweteka munzake, vomwe wachitira munzake mwivo iyembo mumbamuchitire vimwivo.
20 Kuthyola bonzo kulipira kuthyola bonzo, diso kulipira diso, dzinu kulipira dzinu. Momwe wapwetekera munzake nayembo mumbamupwetekembo teno.
21 Munthu yemwe wamenya mpakana kupha chipfuwo cha munzake ambalipire, koma yemwe wamenya munthu mpakana kumupha nayembo ambaphewe.
22 Chigamulo chirichose chimbaphate basa molingana kwa mulendo wokhala pakati panu na kwa nzika, ndawa inepano ndine Yahova Mulungu wanu.’”
23 Patsogolo pake Mose adafotokozera Aizirayeli vimwivi, ndipo iwo adabulisa munthu wotembererewa ule kunja kwa nsasa nkumutema na minyala. Pamwapo Aizirayeli adachita vose mobverana na vomwe Yahova adalamula Mose.
Mawu ya m’nyantsi
^ Magawo yawiri pa magawo 10 ya mpimo wa efa ni yolingana na malitru 4,4. Onani vakumapeto B14.
^ Panango kuti: “kutemberera.”
^ Pamwapa ankutanthauza dzina yakuti Yahova mobverana na vesi 15 na 16.
^ Panango kuti: “moyo kulipira moyo.”
