Levitiko 22:1-33
22 Yahova adapitiriza kuyankhula na Mose kuti:
2 “Uza Aroni na wana wake kuti ambalemekeze* vinthu vopatulika vomwe Aizirayeli abweresa kwa inepano, kuti osati apsyipize dzina yangu yochena. Inepano ndine Yahova.
3 Uwauze kuti: ‘M’mibadwo yanu yose, munthu aliyese wopsyipiziwa pa wana wanu, yemwe wagumirira vinthu vopatulika vomwe Aizirayeli avipatula kuti avipereke ntsembe kwa Yahova, munthu muyo ambaphewe kuti osati akhale pomwe pamaso pangu. Inepano ndine Yahova.
4 Mwamuna aliyese pa wana wa Aroni yemwe anakhate panango matenda yochucha, osati adye vinthu vopatulika mpakana akhale wochena. Vikhale pomwe chibodzibodzi na aliyese yemwe wagumirira munthu yemwe wapsyipiziwa ndawa ya munthu wakufa, panango mwamuna yemwe wabulisa umuna,
5 panango mwamuna yemwe wagumirira chirichose pa vamoyo vomwe vigumanika vizinji, panango yemwe wagumirira munthu wopsyipiziwa pa chifukwa chirichose yemwe angachitise kuti akhale wopsyipiziwa.
6 Munthu wogumirira chirichose pa vinthu mwivi ambakhale wopsyipiziwa mpakana maulo ndipo osati ambadye chinthu chopatulika chirichose, koma ambasambe thupi yose.
7 Dzuwa ikachoma adzakhale pomwe wochena, ndipo patsogolo pake angadye vinthu vinango vopatulika, ndawa ni chakudya chake.
8 Afunikalini pomwe kudya nyama iriyose yomwe waigumana yakufa panango yomwe yaphewa na virombo ndawa angakhale wopsyipiziwa. Inepano ndine Yahova.
9 Iwo ambasunge malamulo yangu kuti osati achimwe nkufa ndawa yopsyipiza vinthu vopatulika ndawa yokangira kusunga malamulo mwayo. Inepano ndine Yahova yemwe ninkuwachenesa.
10 Munthu wamba* osati adye chinthu chopatulika chirichose. Mulendo yemwe akhala m’nyumba ya wantsembe panango munthu waganyu, osati adye chinthu chopatulika chirichose.
11 Koma peno wantsembe wagula munthu na kobiri zake, munthu muyo angadyembo vinthu vopatulika mwivo. Akapolo obadwira m’nyumba ya wantsembe, ambadyembo chakudya chake.
12 Mwana nkazi wa wantsembe akalowolewa na munthu yemwe ni wantsembelini,* osati ambadyeko vopereka vopatulika.
13 Koma mwana wa wantsembe akakhala nkazi wamasiye panango peno banja yake idamala alibe mwana aliyese, ndipo wabwerera kumuyi kwa ababa wake komwe ambakhala akali mwana, angadyembo chakudya cha ababa wake. Koma munthu wamba* osati ambadye.
14 Munthu akadya mosadziwa chinthu chopatulika, ambabwezere chinthu mwicho kuingizirapo gawo ibodzi pa magawo yashanu ya chinthu mwicho. Ambapereke chinthu chopatulika mwicho kwa wantsembe.
15 Viriteno kuti antsembe osati ambapsyipize vinthu vopatulika va Aizirayeli, vomwe apereka kwa Yahova,
16 nkuchitisa wanthu mwawo kutambira chilango ndawa yakuti adya vinthu vopatulika. Inepano ndine Yahova yemwe ninkuwachenesa.’”
17 Yahova adapitiriza kuyankhula na Mose kuti:
18 “Uza Aroni na wana wake komasoti Aizirayeli wose kuti: ‘Mwamuna aliyese yemwe ni Muizirayeli panango mulendo yemwe ankukhala pabodzi na Aizirayeli yemwe ankupereka kwa Yahova ntsembe yoshoka pakufuna kukwanirisa mapolomisi yake panango kuti ikhale ntsembe yake yaufulu,
19 ambapereke nyama yosapunduka, ng’ombe zimuna, nkhosa zimuna panango mbuzi kuti Mulungu akondwe naye.
20 Ayi kumbapereka ntsembe nyama iriyose yopunduka, ndawa Mulungu angakondwelini namwe.
21 Peno munthu ankupereka ntsembe yachibverano kwa Yahova kuti akwanirise polomisi yake panango kuti ikhale ntsembe yaufulu, ambapereke ng’ombe panango nkhosa yosapunduka, kuti Mulungu aitambire. Imbakhale yosapunduka palipose.
22 Osati imbakhale yosawona, yothyoka bonzo, yotemeka, yokhala na mphopo, vironda* panango vipere. Ayi kumbapereka kwa Yahova nyama zatene panango kuwotcha nyama zatene izi paguwa yantsembe ya Yahova.
23 Mungapereke ng’ombe panango nkhosa yomwe inamwendo utali maninge panango ufupi maninge kuti ikhale ntsembe ya ufulu. Koma Mulungu adzaitambirelini peno mukuipereka ninge ntsembe pakukwanirisa polomisi yanu.
24 Ayi kumbapereka kwa Yahova nyama yomwe mavalo yake ni yodzongeka, yophwanyika panango yothenewa. Ayi kumbapereka nyama zatene mudziko yanu.
25 Ndipo nyama iriyose pa nyama mwizi yomwe mulendo wakupasani ayi kuipereka ntsembe kuti ikhale chakudya cha Mulungu wanu, ndawa ni yopunduka ndipo Mulungu adzaitambirelini.’”
26 Yahova adapitiriza kuyankhula na Mose kuti:
27 “Ng’ombe, nkhosa panango mbuzi ikabadwa, imbakhale na mayi wake kwa ntsiku 7, koma kuyambira ntsiku yachi 8 kuyenda m’tsogolo mungaipereke ninge ntsembe yowotcha pamoto, ndipo Yahova adzaitambire.
28 Ayi kumbapha ng’ombe panango nkhosa na mwana wake pantsiku ibodzi.
29 Mukafuna kupereka ntsembe yotembeja kwa Yahova mumbaipereke munjira yakuti Mulungu akondwe namwe.
30 Mumbaidye ntsiku mwiyo. Ayi kumbasiiza nyama iriyose mpakana machibesebese. Inepano ndine Yahova.
31 Mumbasunge malamulo yangu na kuyatewedza. Inepano ndine Yahova.
32 Ayi kumbapsyipiza dzina yangu yopatulika, koma mumbaniwone kuti ndine wopatulika pakati pa Aizirayeli. Inepano ndine Yahova yemwe ninkukuchenesani.
33 Ndine yemwe nidakubulisani mudziko ya Iguputo kuti nikuwoneseni kuti ndine Mulungu wanu. Inepano ndine Yahova.”
Mawu ya m’nyantsi
^ Muchiyankhulo choyambirira adati: “adzipatule pa.”
^ Muchiyankhulo choyambirira adati: “Mulendo,” kutanthauza munthu yemwe ni wa m’banjalini ya Aroni.
^ Panango kuti: “akalowodwa na mulendo.”
^ Muchiyankhulo choyambirira adati: “Mulendo,” kutanthauza munthu yemwe ni wa m’banjalini ya Aroni.
^ Yamwaya ni matenda yomwe yachitisa kuti khanda iume nkumbakwangwanuka ninge momwe vikhalira chironda chikambapola.
