Levitiko 27:1-34
27 Yahova adapitiriza kuyankhula na Mose kuti:
2 “Uza Aizirayeli kuti: ‘Munthu akachita polomisi yapadera yopereka munthu munzake kwa Yahova pa ntengo womwe udaikhiwa,
3 ndipo peno munthu yemwe ankuperekewa uyo ni mwamuna wamagole ya pakati pa 20 na 60, ntengo wake womwe udaikhiwa ni masekeli* ya siliva 50, pa mpimo wolingana na sekeli ya kumalo yochena.*
4 Koma peno munthu muyo ni nkazi, ntengo wake womwe udaikhiwa ni masekeli 30.
5 Ndipo peno munthu yemwe ankuperekewa uyo ni wamagole ya pakati pa 5 na 20, akakhala mwamuna ntengo wake womwe udaikhiwa ni masekeli 20, koma akakhala nkazi ntengo wake womwe udaikhiwa ni masekeli 10.
6 Peno munthu muyo ni wa mwezi m’bodzi kufika magole 5, akakhala mwamuna ntengo wake womwe udaikhiwa ni masekeli 5, ndipo akakhala nkazi ni masekeli ya siliva yatatu.
7 Manje peno magole ya munthu yemwe ankuperekewa uyo ni yoyambira pa 60 kuyenda kutsogolo, akakhala mwamuna ntengo wake womwe udaikhiwa ni masekeli 15, ndipo akakhala nkazi ni masekeli 10.
8 Koma peno munthu yemwe ankupolomisa uyo ni wosauka mwakuti angakwaniselini ntengo womwe waikhiwa, munthu muyo ambakamuwonese kwa wantsembe, ndipo wantsembe ambanene ntengo wake. Wantsembe adzanene ntengo womwe munthu adapolomisa uyo angakwanise.
9 Koma peno wapolomisa kupereka nyama yomwe ingaperekewe ntsembe kwa Yahova, nyama iriyose yomwe angapereke kwa Yahova imbakhale yopatulika.
10 Osati aichose nkuikhapo inango, ndipo osati achinjanise yabwino na yoipa panango yoipa na yabwino. Koma peno waichinjanisa na nyama inango, zose ziwiri, yoyamba na yachiwiri iyo, zimbakhale zopatulika.
11 Koma peno ankupereka nyama yopsyipiziwa yomwe ifunikalini kuperekewa ntsembe kwa Yahova, ambakawonese nyama mwiyo kwa wantsembe.
12 Wantsembe ambanene ntengo wake mobverana na momwe nyama mwiyo iriri, peno ni yabwino panango yoipa. Ntengo womwe wantsembe wanena umbakhale muyo.
13 Koma peno ankufuna kuiwombola, ambapereke ntengo wa nyama mwiyo womwe udaikhiwa kuingizirapo gawo ibodzi pa magawo 5 ya ntengo muyo.
14 Munthu akapereka nyumba yake kwa Yahova kuti ikhale yopatulika, wantsembe ambaiwone nkunena ntengo wake. Ntengo muyo umbathembe momwe nyumba mwiyo iriri, peno ni yabwino panango neye. Ntengo womwe wantsembe wanena umbakhale muyo.
15 Koma yemwe wapereka nyumba uyo akafuna kuiwombola, ambapereke ntengo wanyumba mwiyo womwe udaikhiwa kuingizirapo gawo ibodzi pa magawo 5 ya ntengo muyo. Akachita teno nyumba mwiyo imbakhale yake.
16 Peno munthu wapereka mbali inango ya munda wake kwa Yahova kuti ikhale yopatulika, ntengo wa malo mwayo umbakhale wobverana na mbewu zomwe angabzalepo. Peno angabzalepo balere wokwana mpimo ubodzi wa homeri,* ndiye kuti ntengo wa malo mwayo ni masekeli ya siliva 50.
17 Peno wapereka munda muyo kuyambira Mugole ya Ufulu kuyenda kutsogolo, ntengo wake womwe udaikhiwa umbakhale muyo.
18 Koma peno ankupereka munda muyo Gole ya Ufulu yapita kale, wantsembe ambamuwerengere ntengo wake mobverana na magole yomwe yakhala kuti afike pomwe Mugole ya Ufulu ya patsogolo pake, ndipo ambabwezeko pa ntengo wake womwe udaikhiwa.
19 Koma peno munthu yemwe adapereka munda muyo ankufuna kuuwombola, ambapereke ntengo wake womwe udaikhiwa kuingizirapo gawo ibodzi pa magawo yake 5, akachita teno munda muyo umbakhale wake.
20 Peno munda muyo alibe kuuwombola ndipo wagulisiwa kwa munthu munango, angakwaniselini pomwe kuuwombola.
21 Munda muyo ukadzabwezerewa mu Gole ya Ufulu, udzakhale wopatulika kwa Yahova ninge munda womwe waperekewa kwa iye. Munda muyo udzakhale wa antsembe.
22 Peno munthu wapereka munda kwa Yahova kuti ukhale wopatulika, koma munda muyo adachita kugula ndipo wenzelini mbali ya chuma chake,
23 wantsembe ambamuwerengere ntengo wake, mobverana na magole yomwe yakhala kuti Gole ya Ufulu ifike, ndipo ntsiku mwiyo ambapereke ntengo womwe wantsembe wauwerenga. Kobiri mwizo ni zopatulika kwa Yahova.
24 Mu Gole ya Ufulu munda muyo udzabwezerewe kwa munikachiro chaiye yemwe adaugulisa.
25 Ntengo uliwose womwe udaikhiwa umbakhale wolingana na sekeli ya kumalo yochena. Sekeli ibodzi imbakwane magera* 20.
26 Koma munthu osati ambapereke nyama iriyose yoyamba kubadwa kuti ikhale yopatulika, ndawa iriyose yoyamba kubadwa ni ya Yahova. Peno ni ng’ombe panango nkhosa, ni va Yahova.
27 Koma peno ni nyama yopsyipiziwa ndipo waiwombola mobverana na ntengo womwe udaikhiwa, ambapereke ntengo wa nyama mwiyo kuingizirapo gawo ibodzi pa magawo 5 ya ntengo muyo. Koma peno alibe kuiwombola imbagulisiwe pa ntengo womwe udaikhiwa.
28 Koma vinthu vomwe munthu wapereka kwa Yahova ninge vinthu vofunika kudzongewa, kuchokera pa katundu wake, vifunikalini kugulisiwa panango kuwombolewa, peno ni munthu, nyama panango munda. Chinthu chirichose chomwe munthu wapereka kwa Yahova ni chopatulika maninge.
29 Kuingizira pamwapa, munthu aliyese yemwe waperekewa kwa Mulungu kuti adzongewe angawombolewelini. Muyo ambaphewe basi.
30 Chakhumi chirichose pa vinthu va mudziko mwiyo, peno ni vokolola va m’munda panango vipaso va m’miti, ni va Yahova. Chakhumi chimwichi ni chopatulika kwa Yahova.
31 Peno munthu akufuna kuwombola chakhumi chake chirichose, ambapereke ntengo wa chakhumi mwicho kuingizirapo gawo ibodzi pa magawo 5 ya ntengo muyo.
32 Ng’ombe panango nkhosa iriyose yachi 10, pa nyama zose zopita na kuntsi kwa mpsyimbo ya nyakabusa, nyama iriyose yachi 10 imbakhale yopatulika kwa Yahova.
33 Osati ambaiwunguzewunguze kuti awone peno ni yabwino panango yoipa, komasoti osati ambaichinjanise na inango. Koma peno waichinjanisa na nyama inango, zose ziwiri, yoyamba iyo na yachiwiri mwiyo, zimbakhale zopatulika. Angakwaniselini kuiwombola.’”
34 Mwaya ni malamulo yomwe Yahova adapasa Mose pa phiri ya Sinai kuti apereke kwa Aizirayeli.
Mawu ya m’nyantsi
^ Sekeli ibodzi yenze yolingana na magrama 11,4. Onani vakumapeto B14.
^ Panango kuti: “mobverana na sekeli yochena.”
^ Homeri ibodzi yenze yolingana na malitru 220. Onani vakumapeto B14.
^ Gera ibodzi yenze yolingana na magrama 0,57. Onani vakumapeto B14.
