Levitiko 1:1-17
-
Ntsembe yoshoka (1-17)
1 Yahova adachemera Mose kuchokera muchihema chogumanako nkumuuza kuti:
2 “Uza Aizirayeli* kuti: ‘Peno munthu aliyese ankufuna kupereka chipfuwo kwa Yahova kuti chikhale ntsembe, ambapereke ng’ombe, nkhosa panango mbuzi.
3 Peno ankupereka ng’ombe kuti ikhale ntsembe yake yoshoka, ambapereke imuna, yosapunduka. Ambaipereke kwa Yahova mwakufuna kwake, pansuwo wa chihema chogumanako.
4 Iye ambaikhe djanja yake pansolo pa ntsembe yoshoka mwiyo ndipo idzatambiriwe kuti ibise machimo yake.
5 Patsogolo pake ambaphe ng’ombe ing’ono pamaso pa Yahova. Manje wana wa Aroni antsembe, ambabwerese magazi yake nkuyawaza mbali zose za guwa yantsembe, yomwe iri pansuwo pa chihema chogumanako.
6 Nyama yantsembe yoshoka mwiyo ambaipfende nkuigwatagwata.
7 Wana wa Aroni, antsembe, ambaikhe moto paguwa yantsembe mwiyo nkuikhapo nkhuni.
8 Manje wana wa Aroni antsembe, ambaikhe nyama yogwatagwata mwiyo pankhuni zomwe ziri pamoto wa paguwa yantsembe mwapo. Ambaikhe nyama mwiyo pabodzi na nsolo na mafuta.*
9 Matumbo yake na vibodo* vake ambavitsuke na madzi. Akachita teno antsembe ambawotche nyama yose kuti paguwa yantsembe pakhale utsi, ndipo ikhale ntsembe yoshoka. Mwiyi ni ntsembe yowotcha pamoto, yakapfungo kabwino* yoperekewa kwa Yahova.
10 Peno ankupereka nkhosa panango mbuzi kuti ikhale ntsembe yake yoshoka, ambapereke mwana wake mwamuna wosapunduka.
11 Ndipo ambaiphe pamaso pa Yahova kumbali ya ku norte* ya guwa yantsembe. Akachita teno wana wa Aroni antsembe, ambawaze magazi yake mbali zose za guwa yantsembe.
12 Patsogolo pake nyama mwiyo ambaigwategwate ndipo ambachose mafuta yake* na nsolo wake. Akachita teno wantsembe ambaikhe nyama mwiyo pa nkhuni zomwe ziri pa moto wa guwa yantsembe.
13 Ndipo ambatsuke matumbo komasoti vibodo* na madzi. Patsogolo pake wantsembe ambawotche nyama yose kuti paguwa yantsembe pakhale utsi, ndipo ikhale ntsembe yoshoka. Mwiyi ni ntsembe yowotcha pamoto yakapfungo kabwino* yoperekewa kwa Yahova.
14 Koma peno ankupereka mbalani kuti ikhale ntsembe yake yoshoka yoperekewa kwa Yahova, ambapereke njiwa panango wana wa nkhangaiwa.
15 Wantsembe ambabwerese mbalani mwiyo paguwa yantsembe nkugwata* nsolo wake. Akachita teno ambaiwotche paguwa yantsembe kuti pakhale utsi, koma magazi yake ambayakhesere pasi pambali paguwa yantsembe mwiyo.
16 Ambachose chidokomiro na matengera yake nkuviponya potaira dotha,* chakumachibese, pafupi na guwa yantsembe.
17 Ndipo ambaing’ambe pakati cham’maphaphiro mwake, koma osati ambaigwatiretu. Patsogolo pake wantsembe ambaiwotche paguwa yantsembe padzulu pa nkhuni zomwe ziri pamoto kuti pakhale utsi. Mwiyi ni ntsembe yoshoka, ntsembe yowotcha pamoto yakapfungo kabwino* yoperekewa kwa Yahova.’”
Mawu ya m’nyantsi
^ Muchiyankhulo choyambirira adati: “wana wa Izirayeli.”
^ Panango kuti: “mafuta yokukutidza mphewa.”
^ Panango kuti: “viboda.”
^ Muchiyankhulo choyambirira adati: “yakapfungo kokhazika ntima pasi.”
^ Panango kuti: “kumpoto.”
^ Panango kuti: “mafuta yake yokukutidza mphewa.”
^ Panango kuti: “viboda.”
^ Muchiyankhulo choyambirira adati: “yakapfungo kokhazika ntima pasi.”
^ “Kugwata” kumuku ni kukhesa komwe ambakuchita na ntchala ndipo ambachoseratulini nsolo.
^ Panango kuti: “dotha ya mafuta,” kutanthauza dotha yosanganisana na mafuta ya ntsembe.
^ Muchiyankhulo choyambirira adati: “yakapfungo kokhazika ntima pasi.”
