Levitiko 6:1-30
6 Yahova adapitiriza kuuza Mose kuti:
2 “Munthu akachimwa ndipo wachita vosakhulupirika kwa Yahova pakunamiza munzake va chinthu chomwe adamusungisa, panango chomwe adamukumbiza, panango wamubera munzake, panango wamuchitira vinthu viribe chilungamo,
3 peno walokota chinthu koma ankulamba kuti alibe kulokota, ndipo peno walumbira monama pa chimo iriyose yomwe angachite, ambachite ivi:
4 Peno wachimwa ndipo wapalamula mulandu, ambabwezere vinthu vomwe adaba ivo, panango vinthu vomwe adatenga mosowa chilungamo panango chomwe adamusungisa, panango chinthu chomwe adalokota,
5 panango chirichose chomwe adalumbira monama. Ambabwezere chinthu mwicho nkuingizira gawo ibodzi pa magawo yake 5. Ambabwezere vimwevi kwa munikachiro pantsiku yomwe wagumaniwa kuti ni wophonya.
6 Ndipo ambabwerese kwa wantsembe nkhosa imuna yosapunduka kuti ikhale ntsembe yake yopalamula, yoperekewa kwa Yahova, mobverana na ntengo womwe amutchadja kuti ikhale ntsembe yopalamula.
7 Wantsembe ambapsyimphirize machimo ya munthu muyo pamaso pa Yahova, ndipo adzakhululukiriwe chirichose chomwe wachita chomwe chachitisa kuti apalamule mulandu.”
8 Yahova adapitiriza kuyankhula na Mose kuti:
9 “Lamula Aroni na wana wake kuti: ‘Iyi ni lamulo ya ntsembe yoshoka. Ntsembe yoshoka imbakhale pamoto, paguwa yantsembe, usiku wose mpakana machibese ndipo moto wa paguwa mwapo umbakhale unkugaka nthawe zose.
10 Wantsembe ambavale vovala vake vophatira basa na kuvala kabudula wanguwo wobisa* thupi yake. Patsogolo pake ambachose dotha* ya ntsembe yoshoka yomwe yashokewa pamoto wa paguwa mwapo ndipo ambaikhe dotha mwiyo pambali pa guwa yantsembe.
11 Patsogolo pake ambavule vovala mwivo nkuvala vinango. Akateno ambatenge dotha mwiyo nkuyenda nayo kumalo yochena, kunja kwa nsasa.
12 Moto wa paguwa yantsembe umbagake nthawe zose. Osati umbadzimwe. Wantsembe ambaikhepo nkhuni machibese yaliyose nkuikhapo ntsembe yoshoka. Akateno ambawotche mafuta ya ntsembe yachibverano pamoto mwapo.
13 Moto muyo umbagake nthawe zose paguwa yantsembe. Osati umbadzimwe.
14 Manje lamulo yantsembe ya mbewu ni iyi: “Wana wa Aroni ambabwerese ntsembe mwiyi pamaso pa Yahova patsogolo pa guwa yantsembe.
15 M’bodzi wa iwo ambatapeko ufa wonyodoka wa ntsembe yambewu nkudzadza djanja ibodzi komasoti ambatengeko mafuta yake na lubani wose womwe uli pantsembe yambewu mwiyo. Akachita teno, ambaviwotche paguwa yantsembe kuimira ntsembe yose mwiyo kuti ikhale kapfungo kabwino* kwa Yahova.
16 Aroni na wana wake ambadye vokhalira va ntsembe mwiyi. Ambakonze nkate ulibe vofufumisa na kudya nkate muyo m’malo yochena. Ambaudyere m’malo ya chihema* chogumanako.
17 Pakuphika, ayi kumbaikhamo vofufumisa virivose. Naupereka ninge mbali yawo kuchokera pa ntsembe zangu zowotcha pamoto. Mwizi ni zopatulika maninge ninge mwiviriri na ntsembe yamachimo na ntsembe yopalamula.
18 Mwamuna aliyese pa wana wa Aroni ambadye nkate muyo. Mwiyi ni mbali yawo yochokera pantsembe zowotcha pamoto zoperekewa kwa Yahova, m’mibadwo yanu yose mpakana kalekale. Chirichose chomwe chingagumirire ntsembe mwizi chidzakhale chochena.’”
19 Yahova adauza pomwe Mose kuti:
20 “Iyi ni ntsembe yomwe Aroni na wana wake afunika kupereka kwa Yahova pantsiku yomwe ankudzodzewa. Ufa wonyodoka wokwana gawo ibodzi pa magawo 10 ya mpimo wa efa* umbakhale ntsembe yambewu yoperekewa nthawe zose. Hafu ya ufa muyo imbaperekewe machibesebese ndipo hafu inango kumaulo.
21 Ntsembe mwiyo imbakhale yophika na mafuta muchiwaya.* Imbakhale yosanganisa bwino na mafuta. Umbapereke mitanda yophika ya ntsembe yambewu ninge kapfungo kabwino* kwa Yahova.
22 Wantsembe wodzodzewa yemwe adzangene m’malo mwake, kuchokera kwa wana wake, ambapereke ntsembe mwiyo. Ambashoke ntsembe yose mwiyo kuti ikhale ntsembe yoperekewa kwa Yahova. Mwiyi ni lamulo mpakana kalekale.
23 Ntsembe iriyose yambewu ya wantsembe imbashokewe yose. Ifunikalini kudyewa.”
24 Yahova adapitiriza kuyankhula na Mose kuti:
25 “Uza Aroni na wana wake kuti: ‘Iyi ni lamulo ya ntsembe yamachimo. Pamalo yomwe munkuphera nyama ya ntsembe yoshoka mumbapherepo pomwe nyama ya ntsembe yamachimo pamaso pa Yahova. Ntsembe mwiyi ni yopatulika maninge.
26 Wantsembe yemwe waipereka ninge ntsembe yamachimo ambaidye. Ambaidyere kumalo yochena, pamalo ya chihema chogumanako.
27 Chirichose chomwe chingagumirire nyompfu yake chidzakhale chochena, ndipo peno munthu wadonthezerako magazi yanango ya nyama mwiyo pachovala, chovala chomwe wadonthezera magazi mumbachiwatchire kumalo yochena.
28 Ndipo chombo cha dongo chomwe mungabwabwasiremo nyama mwiyo mumbachiphwanye. Koma mukabwabwasira mu chombo cha kobre,* mumbachikweshe na kuchitsuka na madzi.
29 Mwamuna aliyese yemwe ni wantsembe ambadye nyama mwiyo. Ni yopatulika maninge.
30 Koma nyama ya ntsembe yamachimo ifunikalini kudyewa peno atengako magazi yanango nkungena nayo mu chihema chogumanako kuti apysimphirizire machimo m’malo yochena. Mwiyo mumbaishoke pamoto.’”
Mawu ya m’nyantsi
^ Panango kuti: “vovala vankati vobisa.”
^ Panango kuti: “dotha ya mafuta,” kutanthauza dotha yosanganisana na mafuta ya ntsembe.
^ Muchiyankhulo choyambirira adati: “kapfungo kokhazika ntima pasi.”
^ Panango kuti: “mu mpanda wa chihema.”
^ Gawo ibodzi pa magawo 10 ya mpimo wa efa ni yolingana na malitru 2, 2. Onani vakumapeto B14.
^ Panango kuti: “muchiweye.”
^ Muchiyankhulo choyambirira adati: “kapfungo kokhazika ntima pasi.”
^ Panango kuti: “nkuwa.”
