Levitiko 15:1-33
-
Kupsyipiziwa ndawa ya kuchoka magazi ku vidzo vobalira (1-33)
15 Yahova adapitiriza kuyankhula na Mose na Aroni kuti:
2 “Uza Aizirayeli kuti: ‘Peno mwamuna anamatenda yochucha kuvidzo voberekera, matenda yake mwayo yankumuchitisa kukhala wopsyipiziwa.
3 Iye ni wopsyipiziwa ndawa ya vomwe vinkuchucha ivo, peno vinthu vimwivo vinkupitiriza kuchoka panango vidzo vake vafungika ndawa ya vinthu vomwe vinkuchucha ivo, ambapitirize kukhala wopsyipiziwa.
4 M’bedi uliwose womwe munthu yemwe ankuchucha uyo angagonepo umbakhale wopsyipiziwa, ndipo chirichose chomwe angakhalire chimbakhale chopsyipiziwa.
5 Munthu yemwe wagumirira m’bedi wake ambawatche vovala vake nkusamba thupi yake yose, ndipo ambakhale wopsyipiziwa mpakana maulo.
6 Aliyese wokhala pa chinthu chomwe munthu yemwe ankuchucha uyo wenze wakhalapo, ambawatche vovala vake na kusamba thupi yake yose, ndipo ambakhale wopsyipiziwa mpakana maulo.
7 Aliyese wogumirira thupi ya munthu yemwe ankuchucha uyo ambawatche vovala vake na kusamba thupi yose, ndipo ambakhale wopsyipiziwa mpakana maulo.
8 Peno yemwe ankuchucha uyo walavulira mata munthu wochena, munthu muyo ambawatche vovala vake nkusamba thupi yose, ndipo ambakhale wopsyipiziwa mpakana maulo.
9 Chishalo chirichose chomwe munthu yemwe ankuchucha uyo wenze wakhalapo chimbakhale chopsyipiziwa.
10 Aliyese wogumirira chirichose chomwe munthu muyo wenze wakhalapo ambakhale wopsyipiziwa mpakana maulo. Ndipo munthu wotakula vinthu mwivi ambawatche vovala vake nkusamba thupi yose, ndipo ambakhale wopsyipiziwa mpakana maulo.
11 Peno munthu yemwe ankuchucha uyo waphata munthu munango akalibe wasamba m’manja, munthu muyo ambawatche vovala vake nkusamba thupi yose, ndipo ambakhale wopsyipiziwa mpakana maulo.
12 Chombo chadongo chomwe munthu wamatenda yochucha wagumirira chimbaphwanyiwe, ndipo chikakhala cha muti chimbatsukiwe.
13 Manje munthu muyo akapola matenda yake yakuchucha mwayo, pambapite ntsiku 7 kuti akhale wochena. Patsogolo pake ambawatche vovala vake nkusamba madzi yotungiwa kukamadzi, ndipo iye adzakhale wochena.
14 Pantsiku yachi 8 ambatenge njiwa ziwiri panango wana awiri wa nkhangaiwa ndipo ambabwere nawo pamaso pa Yahova, pansuwo wa chihema chogumanako, nkuwapereka kwa wantsembe.
15 Manje wantsembe ambapereke ntsembe mbalani mwizo, ibodzi ninge ntsembe yamachimo ndipo inango ninge ntsembe yoshoka. Wantsembe ambamupsyimphirizire machimo pamaso pa Yahova ndawa ya matenda yake yakuchucha.
16 Mwamuna akachosa umuna, ambasambe thupi yose, ndipo ambakhale wopsyipiziwa mpakana maulo.
17 Ambawatche chirichose na chikumba chirichose pomwe pagwera umuna muyo, ndipo chimbakhale chopsyipiziwa mpakana maulo.
18 Mwamuna akagona na nkazi nkuchosa umuna, wose awiri ambasambe thupi yose, ndipo ambakhale wopsyipiziwa mpakana maulo.
19 Peno nkazi ankuchoka magazi, ambakhale ntsiku 7 ali wopsyipiziwa ndawa yakuti ali kumwezi. Aliyese yemwe angamugumirire adzakhale wopsyipiziwa mpakana maulo.
20 Chirichose chomwe angagonere ndawa yopsipiziwa pomwe ali kumwezi chimbakhale chopsyipiziwa, komasoti chirichose chomwe wakhalira chimbakhale chopsyipiziwa.
21 Aliyese wogumirira m’bedi wake ambawatche vovala vake nkusamba thupi yose, ndipo ambakhale wopsyipiziwa mpakana maulo.
22 Aliyese wogumirira chirichose chomwe nkazi muyo wakhalira ambawatche vovala vake nkusamba thupi yose, ndipo ambakhale wopsyipiziwa mpakana maulo.
23 Ndipo peno nkazi muyo wenze wakhala pa m’bedi panango pa chinthu chinango, aliyese wogumirira chinthu mwicho ambakhale wopsyipiziwa mpakana maulo.
24 Mwamuna akagona na nkazi muyu, ambakhale wopsyipiziwa ndawa yakuti nkazi muyo ali kumwezi. Vikakhala teno mwamuna muyo ambakhale wopsyipiziwa kwa ntsiku 7, ndipo m’bedi uliwose womwe angagonepo umbakhale wopsyipiziwa.
25 Nkazi akambachoka magazi kwa ntsiku zizinji pomwe ni nthawe yakelini yokhala kumwezi, panango akapitiriza kuchoka magazi nthawe yake yokhala kumwezi yamala, ambakhale wopsyipiziwa kwa ntsiku zose zomwe ankuchoka magazi mwayo ninge momwe akhalira panthawe yomwe ali kumwezi.
26 M’bedi uliwose womwe angagonepo panthawe yomwe ankuchoka magazi mwayo, umbakhale ninge m’bedi womwe agonapo panthawe yomwe ali kumwezi. Ndipo chinthu chirichose chomwe angakhalire, chimbakhale chopsyipiziwa ninge momwe chikhalira chopsyipiziwa panthawe yomwe ali kumwezi.
27 Aliyese yemwe angagumirire vinthu mwivo ambakhale wopsyipiziwa, ndipo ambawatche vovala vake nkusamba thupi yose, ndipo ambakhale wopsyipiziwa mpakana maulo.
28 Akaleka kuchoka magazi mwayo, pambapite ntsiku 7, patsogolo pake ambakhale wochena.
29 Pantsiku yachi 8 ambatenge njiwa ziwiri panango wana awiri wa nkhangaiwa, nkubwera nawo kwa wantsembe pansuwo wa chihema chogumanako.
30 Wantsembe ambapereke mbalani ibodzi ninge ntsembe yamachimo ndipo inango iyo ninge ntsembe yoshoka. Manje wantsembe ambamupsyimphirizire machimo pamaso pa Yahova ndawa ya kuchoka magazi.
31 Mumbawonesese kuti Aizirayeli ankuchitalini chirichose chopsyipiza, kuchitira kuti angafe ndawa yopsyipiza chihema changu chomwe chiri pakati pawo.
32 Mwiyi ni lamulo yonena va mwamuna yemwe anamatenda yochucha ku vidzo voberekera, na mwamuna yemwe ni wopsyipiziwa ndawa yakuti wachosa umuna.
33 Lamulo mwiyi ni yonena pomwe va nkazi wopsyipiziwa ndawa yakuti ali kumwezi, mwamuna panango nkazi aliyese yemwe anamatenda yochucha ku vidzo voberekera, na mwamuna yemwe wagona na nkazi yemwe ni wopsyipiziwa.’”
