Levitiko 4:1-35
-
Ntsembe ya machimo (1-35)
4 Yahova adayankhula pomwe na Mose kuti:
2 “Uza Aizirayeli kuti: ‘Munthu akachimwa mosadziwa pakuchita vinthu vomwe Yahova adalamula kuti osati muchite, mumbachite ivi:
3 Peno wantsembe wodzodzewa wachita chimo ndipo yachitisa kuti wanthu wose apalamule, ambapereke kwa Yahova ng’ombe ing’ono imuna yosapunduka ninge ntsembe yamachimo ndawa ya chimo yake iyo.
4 Ambabwerese ng’ombe imuna mwiyo pamaso pa Yahova pansuwo pa chihema chogumanako ndipo ambaikhe djanja yake pansolo pa ng’ombe mwiyo, patsogolo pake ambaiphe pamaso pa Yahova.
5 Manje wantsembe wodzodzewa muyo, ambatengeko pang’ono magazi ya ng’ombe mwiyo nkungena nayo muchihema chogumanako.
6 Patsogolo pake wantsembe ambavuwike chala chake m’magazi mwayo nkudonthezako pasi magazi yanango maulendo 7 pamaso pa Yahova, patsogolo pa nguwo yogwatiza* ya malo yochena.
7 Wantsembe muyo ambapalangire pomwe magazi yanango mwayo pa nyanga za guwa yantsembe ya vofukiza vonunkhira, yomwe iri pamaso pa Yahova mu chihema chogumanako. Magazi yanango yose ya ng’ombe mwayo ambayathire pasi pa guwa yantsembe zoshoka, yomwe iri pansuwo pa chihema chogumanako.
8 Patsogolo pake ambachose mafuta yose ya ng’ombe yantsembe ya machimo, kuphatanidzapo mafuta yokukutidza matumbo na mafuta yose ya pamatumbo.
9 Ambachose pomwe mphewa ziwiri zomwe ziri pafupi na chiuno na mafuta yokukutidza mphewa mwizo. Komasoti ambachose mafuta ya pachiwindi pabodzi na mphewa mwizo.
10 Vinthu vimwivi vimbakhale volingana na vomwe ambachose pa ng’ombe yantsembe ya mbverano. Ndipo wantsembe ambavishoke paguwa yantsembe zoshoka.
11 Koma chikumba cha ng’ombe mwiyo na nyama yake yose pabodzi na nsolo wake, vibodo* vake, matumbo yake na ndowe zake,
12 kutanthauza ng’ombe yose mwiyo, ambaitenge nkuyenda nayo kunja kwa nsasa. Abayende nayo kumalo yochena komwe atairako dotha* ndipo ambaishoke pamoto wa nkhuni. Ng’ombe mwiyo ambaishokere kumalo yotairako dotha.
13 Manje peno gulu yose ya Izirayeli yapalamula pakuchita chimo mosadziwa, koma mpingo* ulibe kuzindikira kuti iwo achita vomwe Yahova adawalamula kuti osati achite,
14 ndipo patsogolo pake chimo mwiyo yadziwika, mpingo muyo umbapereke ng’ombe imuna kuti ikhale ntsembe yamachimo, ndipo ambabwere nayo pansuwo wa chihema chogumanako.
15 Akulu wa gulu ya Izirayeli ambaikhe manja yawo pansolo pa ng’ombe mwiyo pamaso pa Yahova, ndipo imbaphewe pamaso pa Yahova.
16 Patsogolo pake wantsembe wodzodzewa, ambabwereseko magazi yanango ya ng’ombe mwiyo mu chihema chogumanako.
17 Wantsembe ambavuwike chala chake m’magazi mwayo nkudonthezako pasi magazi yanango maulendo 7 pamaso pa Yahova, patsogolo pa nguwo yogwatiza.
18 Patsogolo pake ambatengeko magazi yanango nkupalangira pa nyanga za guwa yantsembe yomwe iri pamaso pa Yahova, mu chihema chogumanako. Magazi yanango yose ambayathire pasi pa guwa yantsembe zoshoka, yomwe iri pa nsuwo wa chihema chogumanako.
19 Akachita teno ambachose mafuta yake yose nkuyashoka paguwa yantsembe.
20 Ng’ombe mwiyo ambaichite ninge momwe adachitira na ng’ombe inango ya ntsembe ya machimo ire. Ambachite vimwivo, ndipo wantsembe ambapsyimphirize machimo yawo ndipo adzakhululukiriwe.
21 Ambatenge ng’ombe mwiyo nkuyenda nayo kunja kwa nsasa ndipo ambaishoke ninge momwe adashokera ng’ombe yoyamba ire. Mwiyi ni ntsembe ya machimo ya mpingo wose.
22 Peno mtsogoleri wachimwa mosadziwa pakuchita chinthu chibodzi pa vinthu vose vomwe Yahova Mulungu wake adamulamula kuti osati achite ndipo wapalamula,
23 panango peno wadziwa kuti wachimwa pakuchita vinthu vosabverana na malamulo, ambabwerese mbuzi ing’ono imuna yosapunduka, kuti ikhale ntsembe yake.
24 Akachita teno, ambaikhe djanja yake pansolo wa mbuzi ing’ono mwiyo ndipo ambaiphe pamaso pa Yahova, pamalo yophera nyama yantsembe yoshoka. Mwiyi ni ntsembe yamachimo.
25 Manje wantsembe ambatengeko magazi yanango ya ntsembe ya machimo mwiyo na chala chake nkuyapalangira pa nyanga za guwa yantsembe zoshoka. Magazi yanango yose ya mbuzi mwiyo ambayathire pasi pa guwa yantsembe zoshoka.
26 Mafuta yose ya mbuzi mwiyo ambayashoke paguwa yantsembe molingana na mafuta yose ya ntsembe yachibverano. Pamwapo wantsembe ambapsyimphirize chimo ya mtsogoleri muyo, ndipo adzakhululukiriwe.
27 Peno munthu aliyese pakati panu wachimwa mosazindikira pakuchita chinthu chibodzi pa vinthu vomwe Yahova adalamula kuti osati achite ndipo wapalamula,
28 panango peno wadziwa kuti wachimwa, ambabwerese mbuzi ing’ono ikazi, yosapunduka kuti ikhale ntsembe ndawa ya chimo yake mwiyo.
29 Akachita teno, ambaikhe djanja yake pansolo pa nyama ya ntsembe ya machimo mwiyo ndipo ambaphe nyama mwiyo pamalo yophera nyama ya ntsembe yoshoka yale.
30 Manje wantsembe ambatengeko magazi yanango ya nyama mwiyo na chala chake nkuyapalangira pa nyanga za guwa yantsembe zoshoka. Magazi yanango yose ya mbuzi mwiyo ambayathire pasi pa guwa yantsembe zoshoka.
31 Patsogolo pake ambachose mafuta yose ya mbuzi mwiyo, ninge momwe achosera mafuta yantsembe yachibverano. Akachita teno wantsembe ambashoke mafuta mwayo paguwa yantsembe kuti yakhale kapfungo kabwino* kwa Yahova. Patsogolo pake wantsembe ambapsyimphirize chimo ya munthu muyo ndipo adzakhululukiriwe.
32 Koma peno ankupereka nkhosa ninge ntsembe yake yamachimo, ambabwerese nkhosa ing’ono ikazi yosapunduka.
33 Akachita teno ambaikhe djanja yake pansolo pa nyama yantsembe yamachimo mwiyo ndipo ambaiphe kuti ikhale ntsembe yamachimo, pamalo yophera nyama yantsembe yoshoka.
34 Wantsembe ambatengeko magazi yanango ya nyama mwiyo na chala chake nkuyapalangira pa nyanga za guwa yantsembe zoshoka. Magazi yanango yose ya nkhosa mwiyo ambayathire pasi pa guwa yantsembe zoshoka.
35 Patsogolo pake ambachose mafuta yose ya nkhosa mwiyo, ninge momwe achosera mafuta ya nkhosa ing’ono imuna ya ntsembe yachibverano. Akachita teno wantsembe ambawotche vinthu mwivo paguwa yantsembe padzulu pa ntsembe zowotcha pamoto zoperekewa kwa Yahova. Wantsembe ambapsyimphirize chimo yomwe munthu muyo wachita, ndipo adzakhululukiriwe.’”
