Levitiko 17:1-16
17 Yahova adapitiriza kuyankhula na Mose kuti:
2 “Uza Aroni na wana wake komasoti Aizirayeli wose kuti: ‘Ivi ni vomwe Yahova walamula:
3 “Munthu aliyese wam’nyumba ya Izirayeli akapha ng’ombe, nkhosa panango mbuzi munsasa, panango kunja kwa nsasa,
4 m’malo mobwera nayo pansuwo wa chihema chogumanako, kuti aipereke ninge ntsembe kwa Yahova patsogolo pa chihema cha Yahova, umuyo adzakhale na mulandu wa magazi. Munthu muyo wakhesa magazi, ndipo afunika kuphewa kuti osati akhale pomwe pakati pa wanthu wa mtundu wake.
5 Lamulo mwiyi yaperekewa kuti ntsembe zomwe Aizirayeli ankuzipereka kunja ambabwere nazo kwa wantsembe pansuwo pa chihema chogumanako kuti ambazipereke kwa Yahova. Zimwezi zimbaperekewe ninge ntsembe zachibverano kwa Yahova.
6 Wantsembe ambawaze magazi ya nyama mwizo paguwa yantsembe ya Yahova yomwe iri pansuwo pa chihema chogumanako, ndipo ambashoke mafuta yake kuti yakhale kapfungo kabwino* kwa Yahova.
7 Ndipo osati ambapereke pomwe ntsembe zawo kwa viwanda vooneka ninge mbuzi vomwe ankuvitumikira.* Mwiyi ikhale lamulo kwa imwepo mpakana kalekale, m’mibadwo yanu yose.”’
8 Uwauze kuti: ‘Munthu aliyese wam’nyumba ya Izirayeli panango mulendo wokhala pakati panu, yemwe wapereka ntsembe yoshoka panango ntsembe iriyose,
9 koma osabwera nayo pansuwo wa chihema chogumanako kuti aipereke kwa Yahova, afunika kuphewa kuti osati akhale pomwe pakati pa wanthu wa ntundu wake.
10 Munthu aliyese wam’nyumba ya Izirayeli panango mulendo wokhala pakati panu akadya magazi yaliyose nidzamuzonde ndipo nidzamuphe kuti osati akhale pomwe pakati pa wanthu wa ntundu wake.
11 Ndawa moyo wa nyama uli m’magazi ndipo inepano nayapereka paguwa yantsembe kuti yambakupsyimphirizireni machimo. Viri teno ndawa yakuti magazi ni yomwe yapsyimphiriza machimo ndawa ya moyo womwe uli m’magazi mwayo.
12 Ndipomwapa nauza Aizirayeli kuti: “Aliyese wa imwepo osati ambadye magazi ndipo mulendo wokhala pakati panu osati ambadye magazi.”
13 Peno munthu wa Chiizirayeli panango munthu yemwe ankukhala pakati panu wayenda kukasodza* ndipo waphata nyama panango mbalani yomwe mudabvumiziwa kuti mumbadye, ambaikhe magazi yake pasi nkuyafuchira na dothi.
14 Moyo wa nyama iriyose ni magazi yake ndawa m’magazi mumo ndimo munamoyo. Ndipomwapa nauza Aizirayeli kuti: “Osati mumbadye magazi ya nyama iriyose ndawa moyo wa nyama iriyose ni magazi yake. Aliyese yemwe angadye magazi mwayo afunika kuphewa.”
15 Peno munthu aliyese wadya nyama yomwe yagumanika yakufa panango yomwe yaphewa na chirombo, peno akhale nzika panango mulendo wokhala pakati panu, munthu muyo ambawatche vovala vake nkusamba thupi yose, ndipo ambakhale wopsyipiziwa mpakana maulo. Patsogolo pake ambakhale wochena.
16 Koma peno alibe kuwatcha vovala vake mwivo komasoti alibe kusamba thupi yake yose, muyo afunika kudawira mulandu ndawa ya kuphonya kwake.’”
