Levitiko 16:1-34
-
Ntsiku ya mwambo wopsyimphiriza machimo (1-34)
16 Yahova adayankhula na Mose patsogolo pa impfa ya wana awiri wa Aroni, omwe adafa ndawa yowonekera pamaso pa Yahova mosabvumizika.
2 Yahova adauza Mose kuti: “Uza m’bale wako Aroni kuti osati ambangene m’malo yochena kuseli kwa nguwo yogwatiza, patsogolo pa chobwinikirira cha Likasa, panthawe iriyose yomwe angafune, kuchitira kuti angafe ndawa inepano nidzawonekere muntambo padzulu pa chobwinikirira mwicho.
3 Pakungena m’malo yochena, Aroni ambatenge vinthu ivi: Ng’ombe ing’ono imuna kuti ikhale ntsembe yamachimo na nkhosa imuna kuti ikhale ntsembe yoshoka.
4 Ambavale mkhanjo wopatulika wa nguwo, kabudula wa nguwo wobisa* thupi yake, ambamange bande ya nguwo yapamimba, ndipo kunsolo kwake ambamange duku ya nguwo. Mwivi ni vovala vopatulika. Iye ambavale vimwevi akasamba thupi yose.
5 Gulu ya Aizirayeli imbamupase wana awiri wa mbuzi amuna kuti akhale ntsembe yamachimo na nkhosa imuna ibodzi kuti ikhale ntsembe yoshoka.
6 Akachita teno Aroni ambabwerese ng’ombe imuna ya ntsembe yake yamachimo, ndipo ambapsyimphirize machimo yake na ya banja yake.*
7 Patsogolo pake ambatenge mbuzi ziwiri zire nkuziyimisa pamaso pa Yahova, pansuwo wa chihema chogumanako.
8 Manje Aroni ambachite maere pa mbuzi ziwiri mwizo. Maere yabodzi yakhale ya Yahova, ndipo yanango yakhale ya mbuzi yonyamula machimo ya wanthu.*
9 Aroni ambabwerese mbuzi yomwe maere yawonesa kuti ni ya Yahova, ndipo imbakhale ntsembe yamachimo.
10 Koma mbuzi yomwe maere yawonesa kuti ni yotakula machimo ya wanthu, ambaibwerese yamoyo nkuiyimisa pamaso pa Yahova kuti machimo ya wanthu yapsyimphiriziwe. Akachita teno ambaitumize kuchipululu ninge mbuzi yonyamula machimo ya wanthu.
11 Aroni ambabwerese ng’ombe imuna ya ntsembe ya machimo, ndipo ambapsyimphirize machimo yake na ya banja yake. Patsogolo pake ambaphe ng’ombe ya ntsembe yake ya machimo mwiyo.
12 Pamwapo iye ambatenge chopukizira chodzala na masimbe ya moto yochokera paguwa yantsembe yomwe iri pamaso pa Yahova. Ambatenge pomwe vopukiza vonunkhira vabwino maninge vokwana manja yawiri yodzala nkungena navo kuchipinda, kuseri kwa nguwo yogwatiza.
13 Akachita teno ambaikhe vopukiza mwivo pamoto womwe uli pamaso pa Yahova, ndipo utsi wa vopukiza mwivo umbabise chobwinikirira cha Likasa chomwe chiri padzulu pa Umboni kuti osati afe.
14 Manje ambatenge magazi yanango ya ng’ombe imuna mwiyo nkuyadontheza na chala chake patsogolo pa chobwinikirira, mbali ya kumachibese. Ambadontheze magazi mwayo na chala chake maulendo 7 patsogolo pa chobwinikirira mwicho.
15 Patsogolo pake ambaphe mbuzi ya ntsembe yamachimo yoperekera wanthu mwawo, nkungena na magazi yake kuchipinda, kuseri kwa nguwo yogwatiza. Kumuko magazi mwayo ambachite nayo vomwe adachita na magazi ya ng’ombe imuna ire. Ambadontheze magazi mwayo patsogolo pa chobwinikirira.
16 Ambapsyimphirize machimo ya malo yochena ndawa ya vinthu vopsyipiza vomwe Aizirayeli adachita komasoti ndawa ya vophonya na machimo yawo. Ambachite vimwevi na chihema chogumanako chomwe chiri pakati pa Aizirayeli, omwe achita vinthu vopsyipiza.
17 Muchihema chogumanako osati mumbagumanike munthu aliyese kuyambira panthawe yomwe Aroni wangena m’malo yochena kukapsyimphiriza machimo mpakana panthawe yobulamo. Ndipo ambapsyimphirize machimo yake, ya banja yake na ya mpingo wose wa Izirayeli.
18 Akachita teno ambabule nkuyenda ku guwa yantsembe yomwe iri pamaso pa Yahova kuti akaipsyimphirizire machimo. Manje ambatenge magazi yanango ya ng’ombe imuna na ya mbuzi nkuyapakasira panyanga zose za guwa yantsembe.
19 Magazi yanango ambayadonthezere paguwa mwiyo na chala chake maulendo 7, kuti ikhale yopatulika na kuti aichenese ku vinthu vopsyipiza va Aizirayeli.
20 Akamaliza kupsyimphirizira machimo malo yochena, chihema chogumanako na guwa yantsembe, ambabwerese pomwe mbuzi ya moyo ire.
21 Ndipo Aroni ambaikhe manja yake yose pansolo pa mbuzi mwiyo na kudawikiza vophonya vose va Aizirayeli na machimo yawo yose. Mwivi ambaviikhe pansolo pa mbuzi ire nkuipereka kwa munthu yemwe amusankhuliratu kuti akaisiye kuchipululu.
22 Mbuzi mwiyo imbanyamule vophonya vawo vose pansolo pake ndipo ambaitumize kuchipululu.
23 Patsogolo pake Aroni ambangene muchihema chogumanako nkuvula vovala vake vomwe wenze wavala pongena m’malo yochena, ndipo ambavisiye mumo.
24 Akachita teno ambasambe thupi yose m’malo yochena nkuvala vovala vake. Patsogolo pake ambabule nkukapereka ntsembe yake yoshoka na ntsembe yoshoka ya wanthu mwawo ndipo ambapsyimphirize machimo yake na ya wanthu mwawo.
25 Manje ambashoke mafuta yantsembe yamachimo paguwa yantsembe.
26 Munthu yemwe adayendesa mbuzi yotakula machimo ya wanthu ule ambawatche vovala vake nkusamba thupi yose. Akachita teno angangene mu nsasa.
27 Ng’ombe imuna ya ntsembe yamachimo na mbuzi ya ntsembe yamachimo, vomwe magazi yake adangena nayo m’malo yochena pakupsyimphiriza machimo, ambayende navo kunja kwa nsasa ndipo ambashoke pamoto vikumba vake, nyama na ndowe zake.
28 Munthu yemwe washoka mwivi ambawatche vovala vake nkusamba thupi yose, akachita teno angangene mu nsasa.
29 Mwezi wa 7, pantsiku ya 10 ya mwezi muyo, mumbawonese kuti mukudzibvera ntsisi* ndawa ya machimo yanu ndipo aliyese wa imwepo osati ambaphate basa iriyose, peno ni nzika panango mulendo yemwe akhala pakati panu. Mwiyi ikhale lamulo kwa imwepo mpakana kalekale.
30 Pantsiku mwiyi machimo yanu yadzapsyimphiriziwe kuti muwonewe wochena. Mudzakhale wochenesewa kumachimo yanu yose pamaso pa Yahova.
31 Mwiyi ni satade yanu yopumula pa basa zose ndipo mumbawonese kuti mukudzibvera ntsisi ndawa ya machimo yanu. Mwiyi ni lamulo mpakana kalekale.
32 Wantsembe yemwe adzadzodzewe nkuikhiwa* kuti atumikire ninge wantsembe, nkungena m’malo mwa ababa wake, ambapsyimphirize machimo ndipo ambavale vovala va nguwo, vomwe ni vovala vopatulika.
33 Iye ambapsyimphirize machimo ya malo yopatulika maninge, chihema chogumanako na guwa yantsembe. Ambapsyimphirize pomwe machimo ya antsembe na ya mpingo wose wa wanthu.
34 Mwiyi ikhale lamulo kwa imwepo mpakana kalekale, kuti machimo yose ya Aizirayeli yambapsyimphiriziwe kabodzi pa gole.”
Pamwapo iye adachita mobverana na vomwe Yahova adalamula Mose.
Mawu ya m’nyantsi
^ Panango kuti: “vovala vankati vobisa.”
^ Panango kuti: “wa dzinza yake.”
^ Muchiyankhulo choyambirira adati: “mbuzi ya Azazeli.” Onani matanthauzo ya mawu yanango.
^ Ambawonesa kudzibvera ntsisi pakudzimana kudya na kudzimana vinthu vinango.
^ Muchiyankhulo choyambirira adati: “yemwe djanja yake idzadzadziwe.”
