Levitiko 5:1-19
5 “‘Munthu akaona kuti munango akuchita chimo, panango wabva kuti munango wachita chimo, munthu muyo ni mboni. Akabva chilengezo chakuti akachitire umboni va chimo mwiyo* koma iye ne kuyenda, ndiye kuti wachimwa. Afunika kudawira mulandu wa chophonya chake mwicho.
2 Munthu akagumirira chinthu chopsyipiziwa, peno ikhale nyama yakufa ya m’thengo, nyama yakufa yoweta panango kabodzi pa tulombo tomwe tukhala tuzinji, olo kuti alibe kuzindikira, iye ni wopsyipiziwa ndipo wapalamula mulandu.
3 Panango munthu akagumirira mosadziwa chopsyipiza chirichose chochokera kwa munthu, kutanthauza chinthu chirichose chopsyipiziwa chomwe chingamuchitise kuti akhale wopsyipiziwa ndipo wadziwa vimwevi, ndiye kuti wapalamula mulandu.
4 Panango munthu akafulumiza kulumbira kuti achite chinthu chinango, peno chabwino panango choipa koma alibe kuzindikira, patsogolo pake nkuzindikira kuti wakulumiza kulumbira, ndiye kuti wapalamula mulandu.*
5 Akapalamula mulandu wa chibodzi pa vinthu vimwevi, ambaulule chimo yomwe wachita.
6 Ambabwerese pomwe kwa Yahova ntsembe yake ya kupalamula ndawa ya chimo yomwe wachita. Ambabwerese nkhosa ing’ono ikazi panango mbuzi ing’ono kuti ikhale ntsembe yamachimo. Akachita teno wantsembe ambapsyimphirize chimo ya munthu muyo.
7 Koma peno angakwaniselini kupereka nkhosa, ambabwerese kwa Yahova njiwa ziwiri panango wana awiri wa nkhangaiwa kuti zikhale ntsembe za kupalamula ndawa ya chimo yomwe wachita. Mbalani ibodzi ikhale ntsembe yamachimo ndipo inango ikhale ntsembe yoshoka.
8 Ambabwerese mbalani mwizi kwa wantsembe, ndipo wantsembe uyo ambayambe wapereka ntsembe yamachimo, yocheka pakhosi koma osagwatiratu nsolo wake.
9 Patsogolo pake ambadonthezere magazi yanango ya ntsembe yamachimo m’mbalim’mbali mwa guwa yantsembe, koma magazi yokhalira ayo ambayathire pasi pa guwa yantsembe mwiyo. Mwiyi ni ntsembe yamachimo.
10 Mbalani inango iyo ambaipereke ninge ntsembe yoshoka ninge momwe achitira nthawe zose. Pamwapo wantsembe ambapsyimphirize machimo yomwe munthu muyo wachita, ndipo adzakhululukiriwe.
11 Koma peno angakwaniselini kupereka njiwa ziwiri panango wana awiri wa nkhangaiwa, ambabwerese ufa wonyodoka wokwana gawo ibodzi pa magawo 10 ya mpimo wa efa* kuti ukhale ntsembe yamachimo ndawa ya chimo yake. Osati ambauyikhe mafuta ndipo osati ambauyikhe lubani ndawa mwiyi ni ntsembe yamachimo.
12 Akachita teno ambabwerese ufa muyo kwa wantsembe, ndipo wantsembe uyo autape nkudzadza djanja ibodzi yoimira ntsembe yose mwiyo. Patsogolo pake aushoke paguwa yantsembe padzulu pa ntsembe zoshoka pamoto zoperekewa kwa Yahova. Mwiyi ni ntsembe yamachimo.
13 Wantsembe uyo ambapsyimphirize chimo yomwe munthu muyo wachita. Ambapsyimphirize chimo iriyose pa machimo mwaya ndipo adzakhululukiriwe. Vinthu vomwe vakhalira pantsembe vimbakhale va wantsembe ninge mwaviriri na ntsembe yambewu.’”
14 Yahova adapitiriza kuyankhula na Mose kuti:
15 “Munthu akachita mosakhulupirika pochimwira vinthu vopatulika kwa Yahova mosadziwa, ambabwerese kwa Yahova nkhosa imuna yosapunduka kuti ikhale ntsembe yake ya kupalamula. Pakunena va ntengo wa* nkhosa mwiyo ambaphatise basa masekeli* ya siliva yolingana na sekeli ya kumalo yochena.*
16 Manje ndawa yakuti wachimwira malo yochena, ambalipire ndipo ambaingizirepo ibodzi pa magawo 5 ya malipiro mwayo. Malipiro mwayo ambayapereke kwa wantsembe pabodzi na nkhosa imuna yantsembe yopalamula, patsogolo pake wantsembe muyo ambapsyimphirize machimo ya munthu muyo ndipo adzakhululukiriwe.
17 Munthu akachimwa pochita chibodzi pa vinthu vomwe Yahova adalamula kuti osati achite, olo kuti adachita mosazindikira, wapalamula basi mulandu ndipo ambadawire mulandu wa chophonya chake icho.
18 Ambabwerese kwa wantsembe nkhosa yosapunduka kuti ikhale ntsembe yopalamula. Ntengo wa nkhosa mwiyo umbakhale wolingana na ntengo wake woikhiwiratu. Manje wantsembe ambapsyimphirize machimo ya munthu muyo ndawa ya chophonya chomwe adachita mosadziwa ndipo adzakhululukiriwe.
19 Mwiyi ni ntsembe yopalamula. Munthu muyo wapalamula mulandu ndawa wachimwira Yahova.”
Mawu ya m’nyantsi
^ Muchiyankhulo choyambirira adati: “Akabva mawu yotemberera (lumbiro).” Vingachitike kuti chenze chilengezo chonena va chimo, ndipo muchilengezo mwicho ambanena mawu yotemberera munthu yemwe wachita chimo panango mboni yomwe inkudziwa va nkhani mwiyo peno ingakangire kudzapereka umboni wake.
^ Pamwapa vinkuwonesa kuti munthu muyo alibe kukwanirisa vomwe adalumbira.
^ Gawo ibodzi pa magawo 10 ya mpimo wa efa ni yolingana na malitru 2,2. Onani vakumapeto B14.
^ Panango kuti: “kobiri zolipirira.”
^ Sekeli ibodzi yenze yolingana na magrama 11,4. Onani vakumapeto B14.
^ Panango kuti: “mobverana na sekeli yochena.”
