Levitiko 25:1-55
25 Yahova adapitiriza kuyankhula na Mose paphiri ya Sinai kuti:
2 “Uza Aizirayeli kuti: ‘Mukakangena mudziko yomwe ninkukupasani, dziko mwiyo imbakasunge satade ya Yahova.
3 Kwa magole 6 mumbakalime minda yanu, ndipo pa magole 6 mwayo mumbadzathephulire miti yanu ya uva na kukolola mbewu zanu.
4 Koma mu gole yachi 7 dziko mwiyi idzasunge satade yopumula pa vose, satade ya Yahova. Osati mumbadzabzale mbewu m’minda yanu panango kuthephulira miti yanu ya uva.
5 Ayi kumbadzakolola mbewu zomera zokha* kuchokera pa mbewu zomwe mudakolola gole yamala, ndipo ayi kumbadzakolola pomwe uva wa miti yanu yosathephulira. Gole mwiyo dziko imbadzapumule pa vose.
6 Koma mungadye chakudya chomwe chamera m’munda mwanu mu gole ya satade iyo. Imwepo, kapolo wanu mwamuna, kapolo wanu nkazi, waganyu wanu na mulendo yemwe ankukhala m’nyumba mwanu mungadye.
7 Vomwe vamera ivo vimbakhale pomwe chakudya cha vipfuwo vanu na virombo vakuthengo. Mbewu zose zomera zokha zikhale chakudya.
8 Mumbadzawerenge masatade 7 ya magole, magole 7 kuyawerenga kubwerezera ka 7. Nthawe yose ya masatade 7 ya magole yambadzakwane magole 49.
9 Manje m’mwezi wachi 7, pantsiku yachi 10 ya mwezi muyo, mumbadzalize lupenga ya nyanga ya nkhosa mokuwa maninge. Pantsiku Yochita Mwambo Wopsyimphiriza Machimo, mumbadzalize lupenga mwiyo kuti ibveke mu dziko yanu yose.
10 Gole yachi 50 imbadzakhale yopatulika ndipo mumbadzalengeze ufulu kwa wanthu wose okhala mu dziko mwiyo. Imbakhale gole yaufulu kwa imwepo ndipo aliyese ambabwerere kumalo yake na ku banja yake.
11 Gole ya yachi 50 imbakhale Gole ya Ufulu kwa imwepo. Ayi kumbalima minda yanu panango kukolola mbewu zomera zokha, panango pomwe kuthyola uva wa m’miti yosathephulira.
12 Mwiyi ni gole yaufulu ndipo imbakhale yopatulika kwa imwepo. Vomwe mungadye ni vinthu vomwe vamera vokha m’maminda mwanu.
13 Mu Gole ya Ufulu mwiyi, aliyese wa imwepo angambabwerere kumalo yake.
14 Mukambagulisa chinthu kwa munzanu panango kugula chinthu kwa munzanu, ayi kumbachitirana vinthu viribe chilungamo.
15 Ukambagula malo kwa munzako, umbawerenge magole yomwe yapita kuchokera mu Gole ya Ufulu. Ambakugulisire malo mwayo mobverana na magole yomwe yakhala kuti ubzalepo mbewu.
16 Peno pakhala magole yazinji, angakwize ntengo wogulisira malo mwayo, koma peno pakhala magole yang’onong’ono, angachepeseko ntengo wa malo mwayo, ndawa ankukugulisira kuwanda kwa mbewu zomwe udzakolole.
17 Ayi kuti pagumanike aliyese pakati panu wochitira munzake vinthu viribe chilungamo, ndipo mumbagope Mulungu wanu, ndawa inepano ndine Yahova Mulungu wanu.
18 Mukambasunga malamulo yangu na kutewedza vigamulo vangu mudzakhale wotetezeka mudziko mwiyo.
19 Dziko mwiyo idzakupaseni vipaso vake. Mudzadye na kukhuta, ndipo mumo mudzakhale wotetezeka.
20 Koma peno munganene kuti: “Pakuti tidzalimelini minda yathu nkukolola mbewu zathu, tidzadye chani mu gole yachi 7?”
21 Dziwani kuti nidzakudaliseni mu gole yachi 6, ndipo dziko mwiyo idzakupaseni chakudya chokwana kudya magole yatatu.
22 Patsogolo pake mudzabzale mbewu mu gole yachi 8, ndipo mudzapitirize kudya chakudya chomwe mudakolola chire mpakana mu gole yachi 9. Mudzadye chakudya chantsundi mwicho mpakana kukolola pomwe chinango.
23 Ayi kumbagulisiratu malo yanu mpakana kalekale ndawa dziko mwiyo ni yangu. Kwa inepano, imwepo ndimwe alendo mu dziko yangu.
24 Mu dziko yanu yose mwiyo, munthu ambakhale na ufulu wogula pomwe malo yake.
25 M’bale wanu akasauka nkugulisa malo yake yanango, womuwombola yemwe ni m’bale wake wapafupi ambabwere na kugula pomwe vomwe m’bale wake muyo adagulisa.
26 Peno munthu alibe kumuwombola, koma walemera nkukhala na kobiri zowombolera malo yake,
27 ambawerenge magole yomwe yapita kuchokera pomwe adagulisa malo mwayo, ndipo ambabwezere kobiri zomwe zakhala kwa munthu yemwe adagula malo mwayo. Akachita teno ambabwerere kumalo yake mwayo.
28 Koma peno munthu yemwe adagulisa malo alibe kugumana kobiri zakuti angabwezere kwa yemwe adagula uyo, malo yomwe adagulisa ayo yapitirize kukhala ya munthu yemwe adagula uyo mpakana gole ya ufulu ifike. Mu gole mwiyo malo mwayo yambabwezewe kwa munikachiro ndipo yemwe adagulisa malo mwayo ambabwerere kumalo yake mwayo.
29 Munthu akagulisa nyumba mu thaundi yokhala na mpanda, ambakhale na ufulu woiwombola gole ikalibe kumala kuchokera pomwe adaigulisa. Ambakhale na ufulu muyu kwa gole yantero.
30 Koma peno wakangira kuiwombola gole mwiyo ikalibe kumala, nyumba yomwe iri muthaundi yokhala na mpanda imbakhale ya yemwe adagula uyo mpakana kalekale, ku mibadwo yake yose, ndipo osati imbabwezewe mu Gole ya Ufulu.
31 Koma nyumba zomwe ziri m’mamiyi yomwe yalibe mpanda, zimbawonewe ninge mbali ya munda wakunja kwa thaundi. Ufulu woiwombola umbapitirize kukhalapo, ndipo mu Gole ya Ufulu imbabwezewe kwa munikachiro.
32 Koma nyumba za Alevi zomwe ziri m’mathaundi yawo, Alevi mwawo ambakhale na ufulu woziwombola mpakana kalekale.
33 Ndipo peno Mulevi adagulisa nyumba muthaundi yawo ndipo alibe kuiwombola, imbabwezewe kwa Mulevi muyo mu Gole ya Ufulu. Vimbakhale teno ndawa nyumba za m’mathaundi ya Alevi pakati pa Aizirayeli ni za Alevi mwawo basi.
34 Komasoti, osati ambagulise malo yodyeserako vipfuwo yozungulira mathaundi yawo, ndawa mwayo ni malo yawo mpakana kalekale.
35 M’bale wanu akasauka pakati panu ndipo angakwaniselini kudzisamalira, mumbamuthandize ninge momwe muthandizira mulendo wokhala pakati panu, kuti nayembo akhale na moyo.
36 Ayi kumbatambira kalowa panango kumbagumanirapo phindu pa iye. Mumbagope Mulungu wanu ndipo m’bale wanu ambakhale na moyo pakati panu.
37 Mukamukweretesa kobiri, ayi kumbafuna pomwe kuti akupaseni na kalowa panango kumupasa chakudya kuti mugumanirepo phindu.
38 Inepano ndine Yahova Mulungu wanu yemwe nidakubulisani mudziko ya Iguputo, kuti nikupaseni dziko ya Kanani. Nidachita vimwivi kuti nikuwoneseni kuti inepano ndine Mulungu wanu.
39 M’bale wanu yemwe munkukhala naye pafupi akasauka nkuzigulisa kwa imwepo, ayi kumbamuphatisa basa ninge kapolo.
40 Mumbamuwone ninge waganyu komasoti ninge mulendo. Ambakuphatireni basa mpakana mu Gole ya Ufulu.
41 Mu gole mwiyo iye na wana wake* ambachoke nkubwerera kwa azibale wake. Ambabwerere kumalo ya azibereki wake.
42 Aizirayeli ni akapolo wangu omwe nidawabulisa mudziko ya Iguputo. Ndipomwapa osati ambadzigulise ninge momwe wanthu agulisira kapolo.
43 Ayi kumbamuchitira nkhanza, ndipo mumbagope Mulungu wanu.
44 Akapolo wanu amuna na akazi ambachokere m’makhaindi yokuzungulirani. Mumbagule kapolo mwamuna panango nkazi kuchokera m’makhaindi mwaya.
45 Komasoti mumbagule akapolo kuchokera kwa wana wa alendo okhala pakati panu. Mungagule akapolo kuchokera kwa iwo na kwa wana omwe alendo mwawo aberekera mudziko yanu. Mumbagule mwawa kuti akhale akapolo wanu.
46 Akapolo mwawa mungambasiyire wana wanu ninge chuma chawo mpakana kalekale. Wanthu mwawa ndiwo wati ambakhale anyabasa wanu, koma Aizirayeli, omwe ni azibale wanu ayi kuti mumbawachitire nkhanza.
47 Koma peno mulendo wokhala pakati panu walemera, ndipo m’bale wanu yemwe ankukhala naye pafupi wasauka nkudzigulisa kwa mulendo muyo, panango kwa munthu munango wa m’banja ya mulendo muyo,
48 m’bale wanu muyo ambakhale na ufulu wowombolewa. M’bodzi pa azibale wake angamuwombole.
49 Komasoti m’bale wa ababa wake, mwana wa abale wa ababa wake mwawo, wachibale wake aliyese wapafupi, panango aliyese wa m’banja yake angamuwombole.
Panango munikachiro muyo akalemera, ambadziwombole.
50 Kuti achite mwivi, iye ambawerengere pabodzi na omwe adamugula nthawe yomwe yapita kuchokera pa gole yomwe adadzigulisa kudzafika Gole ya Ufulu. Kobiri zomwe adamugulira, zimbabverane na kuwanda kwa magole mwayo. Malipiro ya basa yomwe ambaphate panthawe yomwe yakhala iyo yambalingane na ya waganyu.
51 Peno kwakhala magole yazinji, kobiri zake zodziwombolera zimbabverane na magole yomwe yakhala.
52 Koma peno kwakhala magole yang’onong’ono kuti Gole ya Ufulu ifike, ambawerenge yekha magole yomwe yakhala ayo, ndipo ambapereke kobiri zodziwombolera zobverana na magole yomwe yakhala ayo.
53 Ambamuphatire basa molingana na waganyu gole iriyose ndipo mumbawonesese kuti ankumuchitiralini nkhanza.
54 Koma peno angakwaniselini kudziwombola pakutewedza njira mwizi, adzachoke mu Gole ya Ufulu, iye pabodzi na wana wake.*
55 Ndawa Aizirayeli ni akapolo wangu. Iwo ni akapolo wangu omwe nidawabulisa mu dziko ya Iguputo. Inepano ndine Yahova Mulungu wanu.’”
