Levitiko 3:1-17
3 “‘Peno akupereka ntsembe yachibverano* kwa Yahova ndipo akufuna kupereka ng’ombe imuna panango ikazi, ambapereke yosapunduka.
2 Manje ambaikhe djanja yake pansolo pa ng’ombe mwiyo ndipo imbaphewe pansuwo wa chihema chogumanako. Akachita teno wana wa Aroni antsembe, ambawaze magazi yake mbali zose za guwa yantsembe.
3 Ambapereke mbali inango yantsembe yachibverano ninge ntsembe yoshoka pamoto yoperekewa kwa Yahova. Ambapereke mafuta yokukutidza matumbo na mafuta yose yomwe yali kumatumbo.
4 Ambapereke pomwe mphewa ziwiri na mafuta yokukutidza mphewa mwizo yomwe yali pafupi na chiuno. Koma mafuta ya pachiwindi ambayachose pabodzi na mphewa mwizo.
5 Patsogolo pake wana wa Aroni ambashoke vinthu vimwevi paguwa yantsembe, padzulu pa ntsembe yoshoka yomwe iri pankhuni zomwe ziri pamoto. Mwiyi ni ntsembe yoshoka pamoto yakapfungo kabwino* yoperekewa kwa Yahova.
6 Peno akupereka nkhosa panango mbuzi ninge ntsembe yachibverano kwa Yahova, ambapereke imuna panango ikazi, yosapunduka.
7 Peno akupereka nkhosa ing’ono imuna ninge ntsembe yake, ambaibwerese kwa Yahova.
8 Patsogolo pake ambaikhe djanja yake pansolo pa nkhosa mwiyo ndipo imbaphewe patsogolo pa chihema chogumanako. Akachita teno, wana wa Aroni ambawaze magazi yake mbali zose za guwa yantsembe.
9 Ndipo pa ntsembe yachibverano ambatengepo mafuta yake na kuyapereka kwa Yahova ninge ntsembe yoshoka pamoto. Ambachose nchira wose wa mafuta pafupi na bonzo ya nsana komasoti mafuta yokukutidza matumbo na mafuta yose yomwe yali ku matumbo.
10 Ambachose pomwe mphewa ziwiri zomwe ziri pafupi na chiuno na mafuta yokukutidza mphewa mwizo. Komasoti ambachose mafuta ya pachiwindi pabodzi na mphewa mwizo.
11 Ndipo wantsembe ambawotche vinthu vose vimwevi paguwa yantsembe ninge chakudya,* kuti vikhale ntsembe yoshoka pamoto yoperekewa kwa Yahova.
12 Peno akupereka mbuzi ninge ntsembe yake, ambaibwerese pamaso pa Yahova.
13 Patsogolo pake ambaikhe djanja yake pansolo pa mbuzi mwiyo ndipo imbaphewe patsogolo pa chihema chogumanako. Akachita teno wana wa Aroni ambawaze magazi yake mbali zose za guwa yantsembe.
14 Ndipo pa mbuzi mwiyo ambatengepo mafuta yokukutidza matumbo na mafuta yose yomwe yali ku matumbo, nkuyapereka kwa Yahova ninge ntsembe yoshoka pamoto.
15 Ambapereke pomwe mphewa ziwiri zomwe ziri pafupi na chiuno na mafuta yokukutidza mphewa mwizo. Komasoti ambachose mafuta ya pachiwindi pabodzi na mphewa mwizo.
16 Wantsembe ambawotche vinthu vose vimwevi paguwa yantsembe ninge chakudya.* Mwiyi ni ntsembe yoshoka pamoto yakapfungo kabwino.* Mafuta yose ni ya Yahova.
17 Ayi kumbadya mafuta panango magazi yaliyose. Mwiyi ni lamulo ku mibadwo yanu yose mpakana kalekale, kulikose komwe mungakhale.’”
Mawu ya m’nyantsi
^ Panango kuti: “ntsembe yantendere.”
^ Muchiyankhulo choyambirira adati: “yakapfungo kokhazika ntima pasi.”
^ Muchiyankhulo choyambirira adati: “nkate,” kutanthauza chakudya cha Mulungu chochokera pa ntsembe yachibverano.
^ Muchiyankhulo choyambirira adati: “nkate,” kutanthauza chakudya cha Mulungu chochokera pa ntsembe yachibverano.
^ Muchiyankhulo choyambirira adati: “yakapfungo kokhazika ntima pasi.”
