Levitiko 8:1-36
-
Kuikhiwa untsembe kwa wanthu wa m’banja ya Aroni (1-36)
8 Yahova adapitiriza kuyankhula na Mose kuti:
2 “Tenga Aroni na wana wake, vovala vawo, mafuta yodzodzera, ng’ombe imuna ya ntsembe yamachimo, nkhosa ziwiri zimuna na dengu ya mikate yalibe vofufumisa.
3 Ukateno usonkhanise gulu yose pansuwo wa chihema chogumanako.”
4 Mose adachita mobverana na vomwe Yahova adamulamula. Ndipo gulu yose idagumana pansuwo wa chihema chogumanako.
5 Patsogolo pake Mose adauza gulu mwiyo kuti: “Yahova walamula kuti tichite vinthu ivi.”
6 Pamwapo Mose adachemera Aroni na wana wake nkuwasambika na madzi.
7 Padateno adavazika Aroni mkhanjo nkumumanga bande ya pamimba.* Adamuvazika pomwe malaya yogwata manja na efodi ndipo adamumanga bande yochita kuluka ya efodi muyo.
8 Patsogolo pake adamuvazika chovala cha pachifuwa nkuikha Urimu na Tumimu mu chovala cha pachifuwa mwicho.
9 Adamuvazika pomwe duku kunsolo kwake, nkuikha kasimbi koyetimira kagolide, kutsogolo kwa duku mwiyo, chizindikiro chopatulika cha kudzipereka, mobverana na vomwe Yahova adalamula Mose.
10 Manje Mose adatenga mafuta yodzodzera nkudzodza chihema na vose vomwe venze nkati mwake, kuti vikhale vopatulika.
11 Adawazirapo yanango mwa mafuta yodzodzera maulendo 7 paguwa yantsembe nkudzodza guwa yantsembe mwiyo, vombo vake vose, basiya na choikhapo chake, kuti vikhale vopatulika.
12 Pakumalizira Mose adathira mafuta yanango yodzodzera pansolo pa Aroni nkumudzodza kuti akhale wopatulika.
13 Patsogolo pake Mose adachemera wana wa Aroni ndipo adawavazika mikhanjo, adawamanga mabande ya pamimba na kuwamanga maduku kunsolo, mobverana na vomwe Yahova adalamula Mose.
14 Padateno adabweresa ng’ombe imuna ya ntsembe yamachimo ndipo Aroni na wana wake adaikha manja yawo pansolo pa ng’ombe ya ntsembe yamachimo mwiyo.
15 Manje Mose adapha ng’ombe mwiyo nkutenga magazi na chala chake ndipo adayapakasira panyanga zose za guwa yantsembe kuchenesa guwa mwiyo ku uchimo. Koma magazi yomwe yadakhalira adayathira pasi pa guwa yantsembe kuti ayipatule, kupsyimphiriza machimo paguwa mwiyo.
16 Padateno Mose adatenga mafuta yose yokukutidza matumbo, mafuta ya pachiwindi, mphewa ziwiri na mafuta yake, nkuviwotcha paguwa yantsembe.
17 Koma ng’ombe yose mwiyo, chikumba chake, nyama yake na ndowe zake adavishoka pamoto kunja kwa nsasa, mobverana na vomwe Yahova adalamula Mose.
18 Patsogolo pake adatenga nkhosa imuna ya ntsembe yoshoka ndipo Aroni na wana wake adaikha manja yawo pansolo pa nkhosa mwiyo.
19 Manje Mose adapha nkhosa mwiyo nkuwaza magazi yake mbali zose za guwa yantsembe.
20 Adagwatagwata nkhosa mwiyo ndipo Mose adatenga nsolo wake, nyama yogwatagwata mwiyo na mafuta yake,* nkuviwotcha.
21 Adatsuka matumbo na vibodo* ndipo Mose adawotcha paguwa yantsembe nkhosa yose mwiyo. Yenze ntsembe yoshoka ya kapfungo kabwino.* Komasoti yenze ntsembe yowotcha pamoto yoperekewa kwa Yahova, mobverana na vomwe Yahova adalamula Mose.
22 Patsogolo pake adabweresa nkhosa imuna yachiwiri, nkhosa yowayikhira kuti akhale antsembe, ndipo Aroni na wana wake adaikha manja yawo pansolo pa nkhosa mwiyo.
23 Mose adapha nkhosa mwiyo nkutengako magazi yake nkuyapakasira m’nyantsi mwa dzitu ya Aroni, pachala chake chikulu kudjanja yamakulu na chala chake chikulu cha mwendo wa kumakulu.
24 Patsogolo pake Mose adachemera wana wa Aroni nkuwapakasira magazi m’nyantsi mwa matu yawo yakumakulu, pavala vawo vikulu va kumanja yawo yakumakulu na vala vawo vikulu va kuminyendo yawo yakumakulu. Koma magazi yokhalira, Mose adayawaza mbali zose za guwa yantsembe.
25 Padateno, adatenga mafuta ya nkhosa mwiyo, nchira wa mafuta, mafuta yose yokukutidza matumbo, mafuta ya pachiwindi, mphewa ziwiri na mafuta yake na mwendo wakumbuyo wa kumakulu.
26 Mu dengu ya mikate yosafufumisa yomwe yali pamaso pa Yahova, adatengamo ntanda ubodzi wa nkate walaundi woboola pakati, ntanda ubodzi walaundi woboola pakati wothira mafuta na kantanda kabodzi ka nkate kothasalala. Adaviikha padzulu pa mafuta na mwendo wakumbuyo wakumakulu.
27 Padateno, adaikha vose vimwevi m’manja mwa Aroni na m’manja mwa wana wake nkuyamba kuviyendesa uku na uku ninge ntsembe yoyendesa uku na uku yoperekewa kwa Yahova.
28 Patsogolo pake Mose adavitenga m’manja mwawo nkuviwotcha paguwa yantsembe padzulu pa ntsembe yoshoka. Vinthu vimwivi venze ntsembe yowaikhira kuti akhale antsembe, yakapfungo kabwino. Yenze ntsembe yowotcha pamoto yoperekewa kwa Yahova.
29 Pamwapo Mose adatenga nganga nkuiyendesa uku na uku ninge ntsembe yoyendesa uku na uku yoperekewa kwa Yahova. Nganga mwiyi adaitenga pa nkhosa yowaikhira kuti akhale antsembe ndipo idakhala gawo ya Mose, mobverana na vomwe Yahova adalamula Mose.
30 Ndipo Mose adatengako mafuta yanango yodzodzera na magazi yomwe yenze paguwa yantsembe yale nkuwazira Aroni na vovala vake komasoti wana wake na vovala vawo. Pamwapo adapatula Aroni na vovala vake komasoti wana wake na vovala vawo.
31 Manje Mose adauza Aroni na wana wake kuti: “Bwabwasani nyama mwiyo pansuwo wa chihema chogumanako, ndipo muidyere pomwe pamwapo pabodzi na nkate womwe uli m’dengu yophatisiwa basa poikha wanthu kuti akhale antsembe, mobverana na vomwe adanilamula kuti: ‘Aroni na wana wake adye vimwivi.’
32 Ndipo nyama na nkate vomwe visalire muvishoke pamoto.
33 Ayi kuchoka pansuwo wa chihema chogumanako kwa ntsiku 7, mpakana ntsiku zokuikhani kuti mukhale antsembe zimale, ndawa padzapite ntsiku 7 kuti muikhiwe kukhala antsembe.
34 Yahova walamula kuti tichite vomwe tachita lero ivi kuti machimo yanu yapsyimphiriziwe.
35 Mukhale pansuwo wa chihema chogumanako usiku na masikati kwa ntsiku 7. Ndipo mufunika kuchita vose vomwe Yahova walamula, kuti osati mufe. Ndawa ndivo vanalamuliwa.”
36 Pamwapo Aroni na wana wake adachita vose vomwe Yahova adalamula kupitira mwa Mose.
