Levitiko 12:1-8
-
Kudzichenesa patsogolo pobereka mwana (1-8)
12 Yahova adapitiriza kuyankhula na Mose kuti:
2 “Uza Aizirayeli kuti: ‘Nkazi akakhala na mimba nkubereka mwana mwamuna, ambakhale wopsyipiziwa kwa ntsiku 7. Ambakhale wopsyipiziwa ninge momwe akhalira panthawe yomwe ali kumwezi.
3 Pantsiku yachi 8, mwana muyo ambachitiwe m’dulidwe.
4 Nkazi muyo ambapitirize kudzichenesa ku magazi yake kwa ntsiku zinango pomwe 33. Osati ambagumirire chirichose chopatulika komasoti osati ambangene m’malo yochena mpakana amalize ntsiku za kuchenesewa kwake.
5 Akabereka mwana nkazi, ambakhale wopsyipiziwa kwa ntsiku 14 ninge momwe akhalira panthawe yomwe ali kumwezi. Nkazi muyo ambapitirize kudzichenesa ku magazi yake kwa ntsiku zinango pomwe 66.
6 Ntsiku za kuchenesewa kwake ndawa ya kubereka mwana mwamuna panango nkazi zikakwana, ambabwerese kwa wantsembe, pansuwo pa chihema chogumanako, nkhosa ing’ono imuna yosapitirira gole ibodzi kuti ikhale ntsembe yoshoka. Ambabwerese pomwe mwana wa nkhangaiwa panango njiwa kuti ikhale ntsembe yamachimo.
7 Wantsembe muyo ambaipereke kwa Yahova na kumupsyimphirizira machimo ndipo nkazi muyo ambakhale wochena pa kuchoka magazi kwake. Mwiyi ni lamulo yonena va nkazi yemwe wabereka mwana mwamuna panango nkazi.
8 Koma peno angakwaniselini kugumana nkhosa, ambapereke njiwa ziwiri panango wana awiri wa nkhangaiwa. Mbalani ibodzi imbakhale ya ntsembe yoshoka, ndipo inango imbakhale ntsembe yamachimo. Akachita teno wantsembe adzamupsyimphirizire machimo ndipo nkazi muyo adzakhale wochena.’”
