Levitiko 26:1-46
26 “‘Ayi kukonza milungu yalibe na basa, chifaniziro panango chipilala chopatulika kuti mumbachitumikire. Ayi kuikha mwala wogoba mudziko yanu kuti mumbaugwadire, ndawa inepano ndine Yahova Mulungu wanu.
2 Mumbasunge masatade yangu ndipo mumbalemekeze* malo yangu yopatulika. Inepano ndine Yahova.
3 Mukapitiriza kutewedza malangizo yangu na kusunga malamulo yangu,
4 nidzakugwesereni nvula panthawe yake. Dothi idzakupaseni chakudya, ndipo miti ya m’munda yadzakupaseni vipaso vake.
5 Mudzakhale mukupula vomwe mwakolola mpakana kufika nthawe yothyola uva, ndipo mudzakhale mukuthyola uva mpakana kufika nthawe yobzala mbewu. Mudzadye nkate wanu nkukhuta, ndipo mudzakhale wotetezeka mudziko yanu.
6 Nidzakupaseni ntendere mudziko mwiyo, mwakuti mudzagone pasi palibe chokugopsyani. Nidzachose virombo vogopsya vam’thengo mudziko yanu, ndipo palibe yemwe adzachite namwe nkhondo.
7 Mudzathamangise azondi wanu nkuwawina na chibemba.
8 Wanthu wanu 5 adzathamangise azondi 100, ndipo wanthu 100 adzathamangise azondi 10 000, mwakuti mudzawine azondi wanu na chibemba.
9 Nidzakudaliseni,* nkukuchitisani kuti mubereke wana azinji na kukuwandisani. Ndipo nidzasunge pangano yangu na imwepo.
10 Pomwe munkudya chakudya cha gole yamala, mudzafunike kuchibulisa kuti mugumane pomwe malo yoikhamo chinyowani.
11 Inepano nidzaikhe chihema changu pakati panu, ndipo nidzakulambenilini.
12 Inepano nidzafambe pakati panu ndipo nidzakhale Mulungu wanu, imwepo mudzakhale wanthu wangu.
13 Inepano ndine Yahova Mulungu wanu, yemwe nidakubulisani mudziko ya Iguputo kuti osati mukhale akapolo wa Aiguputo. Nidathyola djoko yanu na kukuchitisani kufamba momasuka.
14 Koma peno mudzanibverelini panango ne kubvera malamulo yose mwaya,
15 ndipo mukadzalamba malangizo yangu, nkunyantsiwa na vigamulo vangu mpakana kulamba kutewedza malamulo yangu yose, nkufika pakuphwanya pangano yangu,
16 inepano nidzakuchitireni vinthu ivi: Nidzakulangeni pakukuchitisani kukhala na mantha, nkudwala chifuwa chikulu na kutentha thupi kopasa mantha, vomwe vidzachitise maso yanu kuleka kuwona na kukufokesani. Mudzaphindulerini na mbewu zomwe mwabzala, ndawa azondi wanu adzadye vokolola vanu.
17 Inepano nidzakulambeni, ndipo azondi wanu adzakuwineni na kukujererani, mwakuti mumbadzathawe palibe munthu wokuthamangisani.
18 Koma peno mudzanibverelini patsogolo pakuti mwaona vinthu mwivi, nidzakulangeni kubwerezera ka 7 kuposha pakuyamba ndawa ya machimo yanu.
19 Nidzakuchitiseni kuti muleke kumeka ndipo nidzachitise kudzulu kukhala ninge chisimbi na dothi yanu kukhala ninge kobre.*
20 Mphanvu zanu zidzamalire papezi, ndawa dothi yanu idzakupasenilini chakudya, ndipo miti ya m’munda mwanu yadzakupasenilini vipaso.
21 Koma mukapitiriza basi kuchita vinthu vosabverana na vomwe ninkufuna, osafuna kunibvera, nidzakulangeni kubwerezera maulendo 7 mobverana na machimo yanu.
22 Nidzatumize virombo vam’thengo pakati panu, ndipo vidzakuphereni wana wanu na vipfuwo vanu nkuchepesa chiwerengero chanu, mwakuti m’misewu yanu mudzakhale mulibe wanthu.
23 Mukadzaleka kuchinja patsogolo pa vose mwivi nkupitiriza kufamba motsutsana nane,
24 inembo nidzatsutsane namwe, ndipo nidzakulangeni maulendo 7 ndawa ya machimo yanu.
25 Nidzabwerese chibemba kuti chikubwezereni ndawa yophwanya pangano yangu. Mukadzathawira m’mathaundi yanu, nidzabwerese matenda pakati panu ndipo mudzaperekewe m’manja mwa mzondi.
26 Nikadzadzonga njira* zanu zogumanira chakudya, akazi 10 adzaphikire nkate mu uvuni ubodzi wokha basi, ndipo pakukupasani nkate muyo, adzachite kukupimirani nkukupasani ung’ono. Ndipomwapa mudzadye koma mudzakhutelini.
27 Koma peno patsogolo pa vose mwivi mudzanibverelini, nkupitiriza kufamba motsutsana na inepano,
28 inembo nidzatsutsane namwe mopasa mantha, ndipo inepano nidzakukwapuleni maulendo 7 ndawa ya machimo yanu.
29 Ndipomwapa mudzadye wana wanu amuna na wana wanu akazi.
30 Nidzadzonge malo yanu yopatulika yotumikirira ndipo nidzagwese maguwa yanu yofukizirapo vonunkhira. Nidzaunjike vitanda vanu padzulu pa mafano yanu yonyantsa* yalibe moyo mwayo, ndipo nidzachoke pakati panu monyantsiwa.
31 Mathaundi yanu nidzayadzonge na chibemba ndipo malo yanu yopatulika yadzakhale yalibe wanthu, komasoti nidzatambirelini ntsembe zanu za kapfungo kabwino.*
32 Dziko yanu nidzaisanduse matongwe, ndipo azondi wanu omwe ambadzakhale mudziko mwiyo adzainyang’anisise modabwa.
33 Inepano nidzakumwazeni pakati pa wanthu wa mitundu yanango, ndipo nidzakusololereni chibemba na kukuthamangisani. Dziko yanu idzakhale matongwe, ndipo mathaundi yanu yadzadzongewe.
34 Pantsiku zose zomwe dziko mwiyo idzakhale matongwe, idzabwezere masatade yake, imwepo muli kudziko ya azondi wanu. Nthawe mwiyo, dziko idzapumule* ndawa inkufunika kubwezera masatade yake.
35 Ntsiku zose zomwe dziko mwiyo idzakhale matongwe idzakhale ikupumula, ndawa iribe kupumula, panthawe yomwe mumbafunika kusunga masatade yangu pomwe mumbakhala mudziko mwiyo.
36 Nidzaikhe mantha m’mitima mwa azondi wanu omwe adzapulumuke omwe akukhala mudziko ya azondi wawo, mwakuti adzathawe zungo ya tsamba yomwe inkuuluka. Iwo adzathawe ninge munthu yemwe akuthawa chibemba, mwakuti adzagwe palibe wowathamangisa.
37 Iwo adzagwesane okhaokha ninge wanthu omwe akuthawa chibemba, koma palibe munthu wowathamangisa. Mudzakwaniselini olo pang’ono kulimbana na azondi wanu.
38 Azinji wa imwepo mudzafere mudziko ya wanthu wa makhaindi yanango, ndipo dziko ya azondi wanu idzakumezeni.
39 Wanthu omwe adzakhale pakati panu adzadzudzike m’madziko ya azondi wawo ndawa ya vophonya vanu. Iwo adzadzudzike ndawa ya vophonya va azibereki wawo.
40 Patsogolo pake adzabvume vophonya vawo komasoti kusakhulupirika kwawo na vophonya va azibereki wawo. Ndipo adzabvume kuti adachita vinthu mosakhulupirika pa kufamba motsutsana nane.
41 Padateno, inembo nidayenda motsutsana nawo ndipo nidawayendesa kudziko ya azondi wawo.
Vimwivi vidachitika kuti panango mitima yawo yosachitiwa mdulidwe yangadzichepese nkulipira ndawa ya vophonya vawo.
42 Ndipomwapa nidzakumbukire pangano yomwe nidachita na Yakobo, Isaki na Abulahamu. Nidzakumbukire pomwe dziko mwiyo.
43 Panthawe yomwe iwo adasiya kukhala mudziko mumo, dziko mwiyo imbabwezera masatade yake ndipo idakhala matongwe iwo kulibe. Iwo adapereka malipiro ya vophonya vawo, ndawa adalamba vigamulo vangu ndipo adanyantsiwa na malamulo yangu.
44 Koma olo kuti padzachitike vose mwivi, iwo akambadzakhala mudziko ya azondi wawo, nidzawalambelini mpakana kalekale panango kunyantsiwa nawo mpakana kuwadzongeratu, vomwe vingaphwanye pangano yangu na iwo, ndawa inepano ndine Yahova Mulungu wawo.
45 Ndipo kuti vinthu viwafambire bwino nidzakumbukire pangano yomwe nidachita na azibereki wawo omwe nidawabulisa mudziko ya Iguputo, wanthu wa makhaindi yanango ankuwona. Nidzachite vimwevi kuti niwawonese kuti ndine Mulungu wawo. Inepano ndine Yahova.’”
46 Yamwaya ni malangizo, vigamulo na malamulo yomwe Yahova adakhazikisa pakati pa iye na Aizirayeli m’phiri ya Sinai, pakuphatisira basa Mose.
Mawu ya m’nyantsi
^ Muchiyankhulo choyambirira adati: “mumbagope.”
^ Muchiyankhulo choyambirira adati: “Nidzakucheukireni.”
^ Kutanthauza kuti nvula idzagwelini ndipo pantsi padzakhale pouma.
^ Muchiyankhulo choyambirira adati: “mpsimbo.” Vingachitike kuti ambatanthauza mpsimbo zomwe ambaziphatisa basa pakumanika mikate yoboola pakati.
^ Mawu ya Chiheberi yangatanthauze pomwe “ndowe” ndipo yaphatisiriwa basa pakunena va chinthu chomwe munthu achita nacho nyantsi.
^ Muchiyankhulo choyambirira adati: “kapfungo kokhazika ntima pasi.”
^ Panango kuti: “idzasunge masatade.”
