Levitiko 2:1-16
-
Ntsembe ya mbewu (1-16)
2 “‘Peno munthu ankupereka ntsembe yambewu kwa Yahova, ambapereke ufa wonyodoka. Ambauthire mafuta na lubani* ufa muyo.
2 Akateno ambabwerese ntsembe yake mwiyo kwa wana wa Aroni, antsembe. Ndipo wantsembe ambatape ufa wothira mafuta uyo pabodzi na lubani wose nkudzadza djanja ibodzi, nkuushoka paguwa yantsembe kuyimira ntsembe yose mwiyo. Mwiyi ni ntsembe yoshoka pamoto yakapfungo kabwino* yoperekewa kwa Yahova.
3 Ndipo vokhalira pa ntsembe yambewu vimbakhale va Aroni na wana wake, ndawa ni vopatulika maninge, vochokera pantsembe zoshoka pamoto zoperekewa kwa Yahova.
4 Peno munkupereka ntsembe yambewu yophikiriwa mu uvuni, imbakhale ya ufa wabwino maninge. Mumbapereke nkate wabololindo woboola pakati, ulibe vofufumisa, wothira mafuta. Panango mumbapereke tumitanda twa nkate tothasalala tulibe vofufumisa, topakasira mafuta.
5 Peno munkupereka ntsembe yambewu yophikira mu chiwaya,* imbakhale ya ufa wabwino maninge wothira mafuta, ulibe vofufumisa.
6 Mumbabenthule mapitsimapitsi nkuikha mafuta. Mwiyi ni ntsembe yambewu.
7 Peno munkupereka ntsembe yambewu yophikira mu chiwaya, imbakhale yokonzewa na ufa wonyodoka komasoti mafuta.
8 Ntsembe yambewu yomwe yakonzewa na vinthu vimwevi mumbabwere nayo kwa Yahova. Mumbaipereke kwa wantsembe ndipo iye ambayende nayo paguwa yantsembe.
9 Patsogolo pake wantsembe ambatengeko pang’ono ntsembe yambewu kuimira ntsembe yose mwiyo, ndipo ambashoke vawatenga ivo paguwa yantsembe. Mweyi ni ntsembe yoshoka pamoto yakapfungo kabwino* yoperekewa kwa Yahova.
10 Ndipo vomwe vakhalira pantsembe yambewu vimbakhale va Aroni na wana wake, ndawa ni vopatulika maninge vochokera pantsembe zoshoka pamoto zoperekewa kwa Yahova.
11 Ntsembe yambewu yomwe mukupereka kwa Yahova osati ikhale na vofufumisa, ndawa mufunikalini kushoka ufa wokanya wokhala na vofufumisa panango uchi,* ninge ntsembe yoshoka pamoto yoperekewa kwa Yahova.
12 Vimwevi mungavipereke kwa Yahova ninge ntsembe ya vipaso voyambirira, koma mufunikalini kuvibweresa paguwa yantsembe kuti vikhale ntsembe yakapfungo kabwino.*
13 Ntsembe yanu iriyose yambewu mumbaiikhe munyu. Pakupereka ntsembe yambewu ayi kumbayebwa kupereka munyu wokukumbusani pangano ya Mulungu. Mukambapereka ntsembe iriyose, mumbapereke pomwe munyu.
14 Mukambapereka kwa Yahova ntsembe yambewu ya vinthu voyambirira kukhuma, mumbapereke tirigu unyowani* wokazinga pamoto, wodera kuti ukhale ntsembe yambewu ya vinthu vanu voyambirira kukhuma.
15 Mumbathire mafuta na kuikha lubani pantsembe mwiyo. Mwiyi ni ntsembe yambewu.
16 Wantsembe ambashoke vinthu vimwivi kuimira ntsembe yose mwiyo, vomwe ni unango mwa tirigu wake wodera ule na mafuta, pabodzi na lubani wake wose, kuti vikhale ntsembe yoshoka pamoto yoperekewa kwa Yahova.’”
Mawu ya m’nyantsi
^ Onani matanthauzo ya mawu yanango.
^ Muchiyankhulo choyambirira adati: “yakapfungo kokhazika ntima pasi.”
^ Panango kuti: “chiweye” anango anena kuti tabulero.
^ Muchiyankhulo choyambirira adati: “yakapfungo kokhazika ntima pasi.”
^ Vinkuwoneka kuti uchi muyu wenzelini uchi wa nyuchi koma yenze madzi ya vipaso, ndawa unkutomolewa kuti vipaso voyambirira. (Le 2:12; 2Mb 31:5)
^ Muchiyankhulo choyambirira adati: “yakapfungo kokhazika ntima pasi.”
^ Panango kuti: “mumbapereke tirigu uwisi.”
