Levitiko 23:1-44
-
Ntsiku zopatulika komasoti vikondwerero (1-44)
23 Yahova adapitiriza kuyankhula na Mose kuti:
2 “Uza Aizirayeli kuti: ‘Mumbalengeze vikondwerero va Yahova vomwe ni misonkhano yopatulika. Ivi ni vikondwerero vangu:
3 Mumbaphate basa kwa ntsiku 6, koma ntsiku yachi 7 ikhale satade yopumula pa basa zanu zose. Mwiyi ni ntsiku ya nsonkhano wopatulika. Ayi kumbaphata basa iriyose ndawa mwiyi ni satade ya Yahova kulikose kwamungakhale.
4 Vikondwerero va Yahova, panango kuti misonkhano yopatulika yomwe mufunika kulengeza panthawe yake yoikhiwiratu ni aya:
5 M’mwezi woyamba pantsiku ya 14 ya mwezi muyo, maulo kuli bibibi, imbakhale ntsiku ya Pasika wa Yahova.
6 Pantsiku ya 15 ya mwezi muyu, mumbachitire Yahova Chikondwerero cha Mikate Yalibe Vofufumisa. Mumbadye mikate yalibe vofufumisa kwa ntsiku 7.
7 Pantsiku yoyamba ya chikondwerero mwicho mumbachite nsonkhano wopatulika ndipo ayi kuphata basa iriyose yonetesa.
8 Kwa ntsiku 7, mumbapereke kwa Yahova ntsembe zowotcha pamoto. Pantsiku yachi 7 mumbachite nsonkhano wopatulika ndipo ayi kumbaphata basa iriyose yonetesa.’”
9 Yahova adapitiriza kuyankhula na Mose kuti:
10 “Uza Aizirayeli kuti: ‘Mukadzangena mudziko yomwe ninkukupasani, nkukolola mbewu za mudziko mumo, mumbadzabwerese kwa wantsembe ntolo ubodzi wa vipaso vanu voyambirira.
11 Ndipo wantsembe ambadzayendese ntolo muyo uku na uku pamaso pa Yahova kuti Mulungu akondwe namwe. Satade ikamala, wantsembe ambadzayendese pomwe ntolo muyo uku na uku mangwana yake.
12 Pantsiku yoyendesa ntolo wanu uku na uku, mumbapereke mwana wa nkhosa wosapunduka, wosapitirira gole ibodzi, kuti akhale ntsembe yoshoka yoperekewa kwa Yahova.
13 Pakupereka ntsembe mwiyi mumbapereke pomwe ntsembe yambewu. Ntsembe mwiyo imbakhale ufa wonyodoka wothira mafuta, mpimo wake magawo yawiri pa magawo 10 ya mpimo wa efa,* kuti ikhale ntsembe yoshoka pamoto yoperekewa kwa Yahova, yakapfungo kabwino.* Mumbapereke pomwe vinyu wa ntsembe yachakumwa, mpimo wake gawo ibodzi pa magawo yanayi ya mpimo wa hini.*
14 Ayi kumbadya nkate, mbewu zokazinga panango mbewu zinyowani mpakana ntsiku mwiyi kufika komasoti mpakana mubwerese ntsembe ya Mulungu wanu. Mwiyi ni lamulo mpakana kalekale ku mibadwo yanu yose, kulikose kwamungakhale.
15 Kuchokera pantsiku yolondolana na Satade, pomwe mudabweresa ntolo kuti ukhale ntsembe yoyendesa uku na uku, mumbawerenge masondo 7, ndipo sondo iriyose imbakhale na ntsiku zokwana.
16 Mumbawerenge ntsiku 50 kukafika pantsiku yolondolana na ntsiku yomwe sondo yachi 7 yamalira, patsogolo pake mumbapereke ntsembe yambewu zinyowani kwa Yahova.
17 Mumbabwerese mitanda yawiri ya nkate wa m’nyumba mwanu kuti yakhale ntsembe yoyendesa uku na uku. Mitanda mwayo yambakhale yokonzewa na ufa wonyodoka wokwana magawo yawiri pa magawo 10 ya mpimo wa efa.* Poyaphika yambakhale na vofufumisa, ndipo mumbayapereke kwa Yahova ninge vipaso voyambirira kukhuma.
18 Pakupereka mitanda ya nkate mwaya, mumbapereke pomwe wana wa nkhosa amuna osapunduka okwana 7, aliyese akhale wa gole ibodzi, na ng’ombe ibodzi imuna ing’ono na nkhosa ziwiri zimuna. Mwivi vimbaperekewe ninge ntsembe yoshoka, ntsembe yowotcha pamoto yoperekewa kwa Yahova. Vimbaperekewe pabodzi na ntsembe yambewu na ntsembe za chakumwa kuti vikhale kapfungo kabwino* kwa Yahova.
19 Mumbapereke pomwe mwana wa mbuzi m’bodzi ninge ntsembe yamachimo, na wana wa nkhosa amuna awiri, aliyese wagole ibodzi, ninge ntsembe yachibverano.
20 Wantsembe ambayendese uku na uku wana wa nkhosa awiri mwawo pabodzi na mitanda ya nkate ya vipaso voyambirira kukhuma, ninge ntsembe yoyendesa uku na uku yoperekewa kwa Yahova. Mwivi vimbakhale vinthu vopatulika kwa Yahova ndipo vimbakhale va wantsembe.
21 Pantsiku mwiyi mumbalengeze kuti kuli nsonkhano wopatulika ndipo ayi kumbaphata basa iriyose yonetesa. Mwiyi ni lamulo mpakana kalekale kulikose kwamungakhale m’mibadwo yanu yose.
22 Mukambakolola vinthu va m’munda mwanu, ayi kumbachoseratu vose m’mphepete mwa munda muyo, ndipo ayi kumbachita mashanga m’munda mwanu mumo. Vinthu vosalira mwivo mumbasiyire wosauka* na mulendo wokhala pakati panu. Inepano ndine Yahova Mulungu wanu.’”
23 Yahova adapitiriza kuyankhula na Mose kuti:
24 “Yankhula na Aizirayeli ndipo uwauze kuti: ‘M’mwezi wachi 7, pantsiku yoyamba ya mwezi muyo, mumbapumule pa basa zanu zose. Mwiyi ni ntsiku yachikumbuso, ndipo lupenga ikalira mumbasonkhane kuti mutumikire Mulungu.
25 Ayi kumbaphata basa iriyose pantsiku mwiyi, ndipo mumbapereke ntsembe yowotcha kwa Yahova.’”
26 Yahova adapitiriza kuyankhula na Mose kuti:
27 “Ntsiku yachi 10 m’mwezi wachi 7 muyu, ni Ntsiku ya Mwambo Wopsyimphiriza Machimo. Mumbachite nsonkhano wopatulika ndipo mumbawonese kuti mukudzibvera ntsisi* ndawa ya machimo yanu ndipo mumbapereke ntsembe yowotcha pamoto kwa Yahova.
28 Pantsiku mwiyi ayi kumbaphata basa iriyose, ndawa ni ntsiku yochita mwambo wopsyimphiriza machimo yanu pamaso pa Yahova Mulungu wanu.
29 Munthu aliyese yemwe adzawoneselini kuti akudzibvera ntsisi* ndawa ya machimo yake pantsiku mwiyi, adzaphewe kuti osati akhale pomwe pakati pa wanthu wa ntundu wake.
30 Munthu aliyese wophata basa pantsiku mwiyi, nidzamudzonge nkumuchosa pakati pa wanthu wa ntundu wake.
31 Ayi kumbaphata basa iriyose. Mwiyi ni lamulo mpakana kalekale ku mibadwo yanu yose, kulikose kwamungakhale.
32 Mwiyi ni satade yopumula pa basa zanu zose, ndipo mumbawonese kuti munkudzibvera ntsisi ndawa ya machimo yanu maulo pantsiku yachi 9 ya mwezi muyo. Mumbasunge satade kuyambira maulo mpakana maulo ya ntsiku inango.”
33 Yahova adapitiriza kuyankhula na Mose kuti:
34 “Uza Aizirayeli kuti: ‘Ntsiku ya 15 ya mwezi wa 7 muyo, ni ntsiku yochitira Yahova Chikondwerero cha Misasa kwa ntsiku 7.
35 Pantsiku yoyamba ya chikondwerero mwicho mumbachite nsonkhano wopatulika ndipo ayi kumbaphata basa iriyose yonetesa.
36 Kwa ntsiku 7 mumbapereke ntsembe yowotcha pamoto kwa Yahova. Pantsiku yachi 8 mumbachite nsonkhano wopatulika, ndipo mumbapereke ntsembe yowotcha pamoto kwa Yahova. Muyu ni nsonkhano wapadera. Ayi kumbaphata basa iriyose yonetesa.
37 Vimwivi ni vikondwerero va Yahova vomwe mufunika kulengeza ninge misonkhano yopatulika yoperekera ntsembe zowotcha pamoto kwa Yahova. Mwaya ni misonkhano yoperekera ntsembe zoshoka, ntsembe zambewu na ntsembe zachakumwa motewedza ndandanda ya ntsiku na ntsiku.
38 Mumbachite vimwivi kuingizira pa vomwe mupereka pa masatade ya Yahova, mphaso zanu, ntsembe zanu zomwe mupereka pokwanirisa polomisi na ntsembe zanu zose zaufulu zomwe mufunika kupereka kwa Yahova.
39 Pantsiku yachi 15 ya mwezi wachi 7, mukakolola vinthu m’munda mwanu, mumbachite chikondwerero cha Yahova kwa ntsiku 7. Ntsiku yoyamba ya chikondwerero mwicho ni ntsiku yopumula pa basa zanu zose, ndipo mumbapumule pomwe pa basa zanu zose pantsiku yachi 8.
40 Pantsiku yoyamba mwiyi mumbatenge vipaso vabwino maninge, masamba yakanjedza, nthawi za masamba yazinji na miti ya msondodzi ya muchigwa. Mukachita teno mumbakondwe kwa ntsiku 7 pamaso pa Yahova Mulungu wanu.
41 Mumbachitire Yahova chikondwerero mwichi kwa ntsiku 7 pagole, m’mwezi wachi 7. Mwiyi ni lamulo m’mibadwo yanu yose mpakana kalekale.
42 Mumbakhale m’misasa kwa ntsiku 7. Mbadwa zose za Aizirayeli zimbakhale m’misasa,
43 kuti mibadwo yanu yakutsogolo yadzadziwe kuti inepano nidachitisa Aizirayeli kukhala m’misasa pakuwabulisa mudziko ya Iguputo. Inepano ndine Yahova Mulungu wanu.’”
44 Pamwapo Mose adafotokozera Aizirayeli va vikondwerero va Yahova.
Mawu ya m’nyantsi
^ Magawo yawiri pa magawo 10 ya mpimo wa efa ni yolingana na malitru 4,4. Onani vakumapeto B14.
^ Muchiyankhulo choyambirira adati: “yakapfungo kokhazika ntima pasi.”
^ Mpimo wa hini ni wolingana na malitru 3,67. Onani vakumapeto B14.
^ Magawo yawiri pa magawo 10 ya mpimo wa efa ni yolingana na malitru 4,4. Onani vakumapeto B14.
^ Muchiyankhulo choyambirira adati: “kapfungo kokhazika ntima pasi.”
^ Panango kuti: “wobonera.”
^ Ambawonesa kudzibvera ntsisi muku pakudzimana kudya na kudzimana vinthu vinango.
^ Mabaibolo yanango yanena kuti: “yemwe ankudzimanalini kudya.”
