Levitiko 18:1-30
18 Yahova adapitiriza kuyankhula na Mose kuti:
2 “Uza Aizirayeli kuti: ‘Inepano ndine Yahova Mulungu wanu.
3 Ayi kumbachita vinthu vomwe wanthu wa ku Iguputo komwe mumbakhala achita, komasoti ayi kumbachita vinthu vomwe wanthu wa mu dziko ya Kanani yomwe nikukuyendesani achita. Ndipo ayi kumbakatewedza malamulo yawo.
4 Mumbasunge vigemulo vangu na kutewedza malamulo yangu. Inepano ndine Yahova Mulungu wanu.
5 Mumbasunge malamulo yangu na vigemulo vangu. Aliyese yemwe akuchita vimwevi adzakhale na moyo ndawa ya malamulo na vigemulo mwivi. Inepano ndine Yahova.
6 Mwamuna aliyese pakati panu osati ambafenderere m’bale wake aliyese kuti agone naye.* Inepano ndine Yahova.
7 Ayi kugona na ababa wako komasoti ayi kugona na amayi wako. Mwawo ni amayi wako ndipo ayi kugona nawo.
8 Ayi kugona na nkazi wa ababa wako, ndawa kuchita teno nkuchitisa manyazi ababa wako.*
9 Ayi kugona na mulongosi wako, peno ni mwana wachikazi wa ababa wako panango mwana wachikazi wa amayi wako. Peno mudabadwira banja ibodzi panango banja inango.
10 Ayi kugona na mwana nkazi wa mwana wako mwamuna panango mwana nkazi wa mwana wako nkazi, ndawa kumuko ni kudzichitisa manyazi.
11 Ayi kugona na mwana nkazi wa nkazi wa ababa wako, mwana wa ababa wako ndawa muyo ni mulongosi wako.
12 Ayi kugona na mulongosi wa ababa wako. Muyo ni m’bale wa ababa wako.
13 Ayi kugona na m’bale wa amayi wako, ndawa ni m’bale wa amayi wako.
14 Ayi kuchitisa manyazi m’bale wa ababa wako* mwa kugona na nkazi wake, ndawa mwawo ni amayi wako.
15 Ayi kugona na mulowola wako. Iye ni nkazi wa mwana wako, ndipomwapa ayi kugona naye.
16 Ayi kugona na nkazi wa m’bale wako, ndawa kumuku ni kuchitisa manyazi* m’bale wako.
17 Ayi kugona na nkazi pabodzi na mwana wake nkazi. Ayi kutenga mwana nkazi wa mwana mwamuna wa nkazi wako muyo na mwana nkazi wa mwana wake nkazi kuti ugone naye. Mwiyi ni khalidwe yonyantsa* ndawa mwawa ni abale wa nkazi wako.
18 Ukalowola nkazi, ayi kulowola pomwe m’bale wake kuti akhale nkazi wako wachiwiri, nkumbagona naye m’bale wake uyo akali moyo.
19 Ayi kufenderera nkazi kuti ugone naye pomwe ali kumwezi ndawa ni wopsyipiziwa.
20 Ayi kugona na nkazi wa munzako* nkukhala wopsyipiziwa.
21 Ayi kubvuma kuti aliyese mwa wana wako aperekewe* kwa Moleki. Ayi kunyoza dzina ya Mulungu wako mwa kuchita vimwevi. Inepano ndine Yahova.
22 Ayi kugona na mwamuna ninge momwe ugonera na nkazi. Vimwevi ni vonyantsa.
23 Mwamuna ayi kuti ambagone na chinyama* nkukhala wopsyipiziwa, ndipo nkazi osati ambadzipereke kwa chinyama kuti agone nacho. Kuchita vimwevi ni kosiyana na chibadwa.
24 Ayi kudzipsyipiza na chirichose cha vinthu vimwevi, ndawa makhaindi yomwe ninkuyathamangisa pamaso panu yadzipsyipiza na makhalidwe yonyantsa mwaya.
25 Ndipomwapa dziko mwiyi ni yopsyipiziwa, ndipo nidzailange ndawa ya vophonya vake mwakuti dziko mwiyo idzalavule wanthu wake kunja.
26 Koma imwepo mumbasunge malamulo yangu na vigemulo vangu. Ndipo aliyese wa imwepo peno ni nzika panango mulendo wokhala pakati panu, ayi kuchita chonyantsa chirichose cha vinthu mwivi.
27 Ndawa wanthu omwe ambakhala mudziko mwiyo imwepo mukalibe mwafika ambachita vinthu vonyantsa vimwevi, ndipo pano dziko mwiyo ni yopsyipiziwa.
28 Mukapewa kuchita vimwevi, dziko idzakulavulenilini ndawa ya kuipsyipiza ninge momwe idzalavulire makhaindi yomwe yankukhalamo imwepo mukalibe kufika.
29 Aliyese wa imwepo akadzachita chirichose pa vinthu vonyantsa mwivi, adzaphewe kuti osati adzakhale pomwe pakati pa wanthu wake.
30 Ndipomwapa mumbasunge malamulo yangu pakupewa kuchita miyambo yaliyose yonyantsa yomwe wanthu akhala ankuchita imwepo mukalibe kufika, kuti osati mudzipsyipize na miyambo mwayo. Inepano ndine Yahova Mulungu wanu.”
Mawu ya m’nyantsi
^ Muchiyankhulo choyambirira adati: “kuti amuvule.”
^ Muchiyankhulo choyambirira adati: “nkuvula ababa wako.”
^ Muchiyankhulo choyambirira adati: “ayi kuvula m’bale wa ababa wako.”
^ Muchiyankhulo choyambirira adati: “nkuvula.”
^ Panango kuti: “khalidwe yopasa manyazi.”
^ vomwe vingakuchitise
^ Panango kuti: “aperekewe ntsembe.”
^ ndawa angakhale
