Levitiko 13:1-59
13 Yahova adapitiriza kuyankhula na Mose na Aroni kuti:
2 “Munthu akachoka chotupa, chilonda,* panango chinthu chokhala ninge chikang’a,* mwakuti yangakhale matenda ya khate* pathupi yake, ambabwere naye kwa Aroni wantsembe, panango kwa m’bodzi wa wana wake omwe ni antsembembo.
3 Wantsembe muyo ambawone matenda yomwe yabula pathupi mwapo. Peno ukuse wa pamalo mwapo wakhala uchena ndipo pankuwoneka kuti matenda mwayo yangena mpakana nkati mwa thupi, ndiye kuti mwiyo ni khate. Wantsembe ambawone matenda mwayo nkugemula kuti munthu muyo ni wopsyipiziwa.
4 Koma peno chinthu chowoneka ninge chikang’a* mwicho chikuwoneka chichena ndipo chiribe kungena nkati mwa thupi, komasoti ukuse ulibe kukhala uchena, wantsembe ambamuikhe munthu muyo kwayekha kwa ntsiku 7.
5 Manje wantsembe ambamuwone pomwe munthu muyo pantsiku yachi 7, ndipo peno matenda mwayo yankuwoneka kuti yamala, mwakuti yalibe kukulilakulira pathupi, wantsembe ambamuikhe munthu muyo kwayekha kwa ntsiku zinango pomwe 7.
6 Wantsembe ambamuwone pomwe kachiwiri munthu muyo pantsiku yachi 7. Peno matenda mwayo yamaliratu ndipo yalibe kukulirakulira pathupi, wantsembe ambagemule kuti munthu muyo ni wochena. Chenzembo chironda basi. Patsogolo pake munthu muyo ambawatche vovala vake nkukhala wochena.
7 Koma peno chironda chakulirakulira pathupi ya munthu muyo patsogolo pakuti waonekera kwa wantsembe ndipo wenze wagemula kale kuti ni wochena, munthu muyo ambakaonekere pomwe kachiwiri kwa wantsembe.
8 Wantsembe ambawone pomwe munthu muyo ndipo peno chironda chake chakulirakulira pathupi, wantsembe muyo ambagemule kuti munthu muyo ni wopsyipiziwa. Mwiyo ni khate.
9 Munthu akaphatiwa na matenda ya khate, ambamubwerese kwa wantsembe.
10 Wantsembe ambamuwone ndipo peno pathupi mwapo pali chotupa mwakuti khanda na ukuse vachena, ndipo pa chotupa mwapo panachironda,
11 imwiyo ni khate yokhalisa pathupi yake, ndipo wantsembe ambagemule kuti munthu muyo ni wopsyipiziwa. Sikuti pakutofunikira kuti amuikhe kwayekha,* ndawa ni wopsyipiziwa.
12 Koma peno khate yayamba pathupi yake, mwakuti wantsembe akuchita kuwoneratu kuti thupi yose ya munthu muyo inakhate, kuyambira kunsolo mpakana kumapazi,
13 ndipo wantsembe wamuwona, nkutsimikizira kuti khate mwiyo yafalikiradi thupi yose, pamwapo ambagemule kuti munthu muyo ni wochena.* Khanda yake yose yakhala mbuu, ndipomwapa ni wochena.
14 Koma akadzachoka vironda, ndiye kuti adzakhale wopsyipiziwa.
15 Wantsembe akawona vironda mwivo, ambagemule kuti munthu muyo ni wopsyipiziwa ndawa ya vironda mwivo. Mwiyo ni khate.
16 Koma peno vironda mwivo vakhala vichena, munthu muyo ambabwere kwa wantsembe.
17 Manje wantsembe ambamuwone ndipo peno khanda yake yakhala mbuu, wantsembe ambagemule kuti munthu muyo ni wochena.
18 Peno munthu wenze na chithuza pa thupi yake, ndipo patsogolo pake chapola,
19 koma pomwe penze chithuza mwicho pabula chotupa chichena panango chowoneka ninge chikang’a chambuu chofuwirira, munthu muyo ambakawonekere kwa wantsembe.
20 Wantsembe ambawone chotupa mwicho. Peno chinkuwoneka kuti chayambira nkati mwa thupi ndipo ukuse wake wakhala uchena, wantsembe ambagemule kuti munthu muyo ni wopsyipiziwa. Mwaya ni matenda ya khate ndipo yabula pachithuza mwicho.
21 Koma wantsembe akachiwona nkuwona kuti palibe ukuse uchena ndipo chiribe kuyambira nkati mwa thupi ndipo chinkuwoneka kuti chinkumala, wantsembe ambamuikhe kwayekha kwa ntsiku 7.
22 Peno chinthu chokhala ninge chikang’a mwicho chakulirakulira pathupi, wantsembe ambagemule kuti munthu muyo ni wopsyipiziwa. Mwayo ni matenda.
23 Koma peno chinthu chokhala ninge chikang’a mwicho chiri pabodzi ndipo chiribe kukulirakulira, kumuko ni kutukusha kwa chithuza. Wantsembe ambagemule kuti munthu muyo ni wochena.
24 Panango peno pathupi pali chilonda cha moto, ndipo m’nyompfu wa pachilonda mwicho wayamba kuwoneka mbuu mofuwirira panango uchena,
25 wantsembe ambawone chilonda mwicho. Peno ukuse wa pamalo mwapo wakhala uchena ndipo chilonda mwicho chikuwoneka chonoka kuposha khanda, mwiyo ni khate. Yachoka pa chilonda, ndipo wantsembe ambagemule kuti munthu muyo ni wopsyipiziwa. Mwayo ni matenda yakhate.
26 Koma peno waona chilonda mwicho, nkuwona kuti palibe ukuse uchena ndipo chilonda mwicho ni chosanoka kuposha khanda komasoti chinkupola, wantsembe ambamuikhe kwayekha kwa ntsiku 7.
27 Wantsembe ambawone munthu muyo pantsiku yachi 7. Peno matenda mwayo yafalikiradi pathupi, wantsembe ambagemule kuti munthu muyo ni wopsyipiziwa. Mwayo ni matenda yakhate.
28 Koma peno chinthu chokhala ninge chikang’a mwicho chiri pamalo yabodzi ndipo chinkukulirakuliralini pathupi komasoti chinkumala, kumuko ni kutupa kwa chilonda. Wantsembe ambagamule kuti munthu muyo ni wochena ndawa kumuko ni kutukusha kwa chilonda.
29 Mwamuna panango nkazi akaphatiwa na matenda yanango pansolo panango kuchigama,
30 wantsembe ambawone matenda mwayo. Peno pamalo mwapo pankuwoneka kuti matenda mwayo yangena nkati mwa thupi, komasoti tsitsi yachita chikasu ndipo iri patalipatali, wantsembe ambagemule kuti munthu muyo ni wopsyipiziwa. Mwayo ni matenda ya pamsolo na ndebvu.* Ni khate ya pamsolo panango ku chigama.
31 Koma peno wantsembe waona kuti matenda mwayo yalibe kungena nkati mwa thupi, ndipo palibe tsitsi ipsyipa, wantsembe ambaikhe munthu muyo kwayekha kwa ntsiku 7.
32 Wantsembe ambawone pomwe matenda mwayo pantsiku yachi 7. Peno matenda mwayo yalibe kufalikira, komasoti pamalo mwapo palibe kumera tsitsi yachikasu ndipo pakuwoneka kuti yalibe kupita nkati mwa thupi,
33 munthu muyo ambagerewe tsitsi yake, koma osati ambagerewe pomwe pali matenda apo. Patsogolo pake wantsembe ambamuikhe munthu muyo kwayekha kwa ntsiku 7.
34 Pantsiku yachi 7 wantsembe ambawone pomwe matenda mwayo. Peno matenda ya pansolo na ya pandebvu yalibe kukulirakulira pakhanda, ndipo vinkuwoneka kuti matenda mwayo yalibe kungena nkati mwa thupi, wantsembe ambagemule kuti munthu muyo ni wochena. Akachita teno munthu muyo ambawatche vovala vake nkukhala wochena.
35 Koma peno matenda mwayo yakulirakulira pakhanda patsogolo pakuti munthu muyo wagemuliwa kuti ni wochena,
36 wantsembe ambamuwone pomwe munthu muyo. Peno matenda mwayo yakulirakulira pakhanda, wantsembe afunikalini pomwe kunyang’ana tsitsi yachikasu. Munthu muyo ni wopsyipiziwa.
37 Koma peno matenda mwayo yankuwoneka kuti yalibe kukulirakulira ndipo pamalo mwapo pamera tsitsi ipsyipa, ndiye kuti matenda mwayo yamala. Munthu muyo ni wochena ndipo wantsembe ambagemule kuti ni wochena.
38 Mwamuna panango nkazi akaphatiwa na vinthu vokhala ninge vikang’a vambuu pakhanda yake,
39 wantsembe ambaviwone. Peno vinthu vokhala ninge vikang’a mwivo vayamba kumala, mwayo ni matenda yosapasa mantha yomwe yabula pathupi yake. Munthu muyo ni wochena.
40 Mwamuna akayamba kumeteka munsolo nkuchita dazi, ni wochena.
41 Peno tsitsi yamala patsogolo pa nsolo wake nkuchita dazi, ni wochena.
42 Koma peno padazi yake panango pankuma pake pachoka chironda chambumbumbu mofuwirira, mwiyo ni khate, yachoka pansolo pake panango pankuma pake.
43 Wantsembe ambawone munthu muyo, ndipo peno kutupa kwa chironda kwa mbuu mofuwirira padazi mwapo panango pankuma pake, ndipo vikuwoneka ninge pakhanda yake mwiyo panakhate,
44 muyo anakhate. Munthu muyo ni wopsyipiziwa ndipo wantsembe ambagemule kuti ni wopsyipiziwa ndawa ya matenda yomwe yali pansolo pake.
45 Munthu yemwe anakhate muyo, vovala vake vimbang’ambiwe ndipo osati ambasamalire tsitsi yake. Koma ambabise ndebvu zake za pamulomo nkumbakuwa kuti: ‘Wopsyipiziwa, wopsyipiziwa!’
46 Ambakhale wopsyipiziwa panthawe yose yomwe ankudwala matenda mwayo. Ndawa yakuti ni wopsyipiziwa, ambakhale kwayekha. Ambakhale kunja kwa nsasa.
47 Peno matenda yakhate yapsyipiza chovala, peno chovala mwicho ni chaukuse wa nkhosa panango cha nguwo,
48 peno yali mtalimtali panango mfupimfupi* mwa chovala cha nguwo panango cha ukuse wa nkhosa, panango pomwe pachikumba na chirichose chokonzewa na chikumba,
49 ndipo matenda mwayo yakuwoneka yobiriwira nkumbawoneka ninge chikasu panango yofuwirira pa chovala panango pa chikumba, mtalimtali na mfupimfupi mwa nguwo, panango pa chinthu chirichose chokonzewa na chikumba, mwayo ni matenda yakhate ndipo chinthu mwicho mufunika kukachiwonesa kwa wantsembe.
50 Wantsembe ambaone matenda mwayo, ndipo ambasunge chinthu mwicho kwachokha kwa ntsiku 7.
51 Akaona matenda mwayo pantsiku yachi 7 nkuona kuti yafalikira pa chovala, mtalimtali na mfupimfupi, panango pachikumba (peno chikumba mwicho achiphatisa basa yanyi), matenda mwayo ni khate yopasa mantha ndipo chinthu mwicho ni chopsyipiziwa.
52 Ambashoke chovala mwicho, nguwo ya ukuse wa nkhosa na inango iriyose, panango virivose vokonzewa na chikumba, vomwe vaphatiwa na matenda ya khate mwayo, ndawa khate mwiyo ni yopasa mantha. Vimbashokewe pamoto.
53 Koma wantsembe muyo akaona, nkuona kuti matenda mwayo yalibe kufalikira pa chovala mwicho, mtalimtali na mfupimfupi, panango pa chirichose chokonzewa na chikumba,
54 wantsembe ambalamule kuti awatche chinthu chophatiwa na matenda mwicho ndipo ambachisunge kwachokha kwa ntsiku zinango 7.
55 Wantsembe ambaone chinthu chomwe chinamatenda mwicho, chinthu mwicho chikawatchiwa. Olo kuti matenda mwayo yakali kuwoneka chibodzibodzi ndipo yakalibe kufalikira, chinthu mwicho ni chopsyipiziwa. Mumbachishoke pamoto ndawa chadyewa na matenda mwayo kuyambira nkati panango kuyambira kunja kwake.
56 Koma peno wantsembe waona chinthu mwicho, nkuona kuti matenda yale yamala chinthu mwicho pachawatchiwa, ambang’ambe mbali yophatiwa na matenda mwiyo pa chovala mwicho panango pa chikumba mwicho.
57 Koma peno matenda mwayo yankupitiriza mbali inango ya chovala mwicho mtalimtali na mfupimfupi, panango pa chirichose chokonzewa na chikumba, ndiye kuti matenda mwayo yakufalikira. Chirichose chomwe chaphatiwa na matenda mwaya mumbachishoke pamoto.
58 Koma peno matenda mwayo yamala pamwawatcha chovala mwicho panango chinthu chirichose chokonzewa na chikumba, mumbachiwatche pomwe kachiwiri, ndipo chidzakhale chochena.
59 Mwiyi ni lamulo yonena va matenda yakhate yogumanika pa chovala cha ukuse wa nkhosa panango cha nguwo, mtalimtali na mfupimfupi, panango pa chinthu chirichose chokonzewa na chikumba, kuti wantsembe adziwe chinthu chofunika kugemula kuti ni chochena panango ni chopsyipiziwa.”
Mawu ya m’nyantsi
^ Yamwaya ni matenda yomwe yachitisa kuti khanda iume nkumbakwangwanuka ninga momwe vikhalira chilonda chikambapola.
^ Panango kuti: “chinkhang’a.”
^ Mawu ya Chiheberi yomwe adayatsumbudzulira kuti “khate” yatanthauza vinthu vizinji kuphatanidzapo matenda ya pakhanda yosiyanasiyana yopasirana. Yangaphatanidze pomwe matenda yanango yogumanika mu vovala na m’nyumba.
^ Panango kuti: “chinkhang’a.”
^ Pambafunikalini pomwe kuti amuikhe kwayekha kwa ntsiku 7 ninge momwe ambachitira nthawe zose, kuti atsimikizire kuti peno anakhatedi panango neye, ndawa venze vodziwikiratu kuti munthu muyo anakhate.
^ Panango kuti: “ambagemule kuti mantenda mwayo angapaselini anango.”
^ Panango kuti: “ndevu.”
^ Muchiyankhulo choyambirira adati: “yali mu usalu wokonzera nguwo woyenda mtalimtali panango mfupimfupi.”
