Levitiko 14:1-57
14 Yahova adapitiriza kuyankhula na Mose kuti:
2 “Iyi ikhale lamulo yonena va wakhate pantsiku yomwe adzamubwerese kwa wantsembe panthawe yakuti achenesewe.
3 Wantsembe ambayende kunja kwa nsasa kukamuona. Peno munthu muyo wapola matenda yake yakhate,
4 wantsembe ambamulamule kuti abwerese mbalani zamoyo ziwiri zosapsyipiziwa, nthawi ya muti wa mkungudza, usalu ufuwira maninge na kamuti ka hisope* kuti adzaviphatise basa pakumuchenesa.
5 Ndipo wantsembe ambalamule kuti mbalani ibodzi aiphere padzulu pa madzi yotungiwa mu kamadzi, yomwe yali mu chombo chadongo.
6 Koma ambatenge mbalani yamoyo ire pabodzi na nthawi ya muti wa mkungudza, usalu ufuwira maninge na kamuti ka hisope, nkuvivuwika vose vimwevi m’magazi ya mbalani yomwe aiphera padzulu pa madzi yale yotungiwa ku kamadzi.
7 Patsogolo pake wantsembe ambadonthezere magazi mwayo maulendo 7 pa munthu yemwe ankudzichenesa ku khate mwiyo, ndipo ambagemule kuti munthu muyo ni wochena. Akachita teno ambambululuse mbalani yamoyo ire panja.
8 Munthu yemwe ankudzichenesa uyo ambawatche vovala vake nkugera tsitsi yake yose, patsogolo pake ambasambe ndipo ambakhale wochena. Akachita teno angangene munsasa, koma ambakhale kunja kwa tenti yake kwa ntsiku 7.
9 Pantsiku yachi 7 ambagere tsitsi yake yose ya kunsolo, ndebvu zake zose na ntsiye zake zose. Akamaliza kugera tsitsi yake yose ambawatche vovala vake nkusamba m’madzi ndipo adzakhale wochena.
10 Pantsiku yachi 8, iye adzatenge nkhosa zing’onozing’ono zimuna ziwiri zosapunduka na nkhosa ing’ono ikazi ibodzi yosapunduka, yosapitirira gole ibodzi. Adzatenge pomwe ufa wonyodoka wokwana magawo yatatu pa magawo 10 ya mpimo wa efa,* ninge ntsembe yake yambewu yoikha mafuta na mpimo ubodzi* wa mafuta.
11 Ndipo wantsembe yemwe wagemula kuti munthu muyo ni wochena, ambawonese yemwe ankudzichenesa uyo, pabodzi na vinthu vake kwa Yahova, pansuwo wa chihema chogumanako.
12 Wantsembe muyo ambadzatenge nkhosa ibodzi ing’ono imuna nkuipereka ninge ntsembe ya kupalamula pabodzi na mpimo ubodzi wa mafuta ule. Vimwevi ambaviyendese uku na uku ninge ntsembe yoperekewa kwa Yahova.
13 Patsogolo pake ambaphe nkhosa ing’ono imuna iyo pamalo yomwe nthawe zose apherapo nyama ya ntsembe yamachimo na ntsembe yoshoka, pamalo yochena. Ambachite vimwevi ndawa ntsembe ya kupalamula ni ya wantsembe molingana na ntsembe yamachimo. Ntsembe ya kupalamula ni yopatulika maninge.
14 Manje wantsembe ambadzatenge magazi yanango ya ntsembe ya kupalamula, nkuyapakasira m’nyantsi mwa dzitu ya kumakulu ya munthu yemwe ankudzichenesa uyo, pachala chake chikulu cha kudjanja yamakulu, na pachala chake chikulu cha kumwendo wamakulu.
15 Akachita teno, wantsembe muyo ambatengeko mafuta yanango pa mpimo ubodzi ule nkuyathira ku djanja yake yamadzere.
16 Patsogolo pake wantsembe ambavuwike chala chake cha kumakulu m’mafuta yomwe yali ku djanja yake yamadzere, ndipo ambadonthezereko pasi mafuta yanango na chala chake mwicho maulendo 7, pamaso pa Yahova.
17 Koma mafuta yomwe yakhala kudjanja ya wantsembe ambayapakasire m’nyantsi mwa dzitu ya kumakulu ya munthu yemwe ankudzichenesa uyo, pa chala chake chikulu cha ku djanja ya makulu, na pachala chake chikulu cha kumwendo wa kumakulu pomwe adamupakasira magazi ya ntsembe ya kupalamula.
18 Mafuta yomwe yasala ku djanja kwa wantsembe ambayapakasire kumsolo kwa munthu yemwe akudzichenesa uyo, ndipo wantsembe ambamupsyimphirizire machimo yake pamaso pa Yahova.
19 Wantsembe adzapereke ntsembe yamachimo nkupsyimphiriza machimo ya munthu yemwe akudzichenesa uyo. Patsogolo pake wantsembe adzaphe nyama ya ntsembe yoshoka.
20 Manje wantsembe adzapereke ntsembe yoshoka na ntsembe yambewu paguwa yantsembe. Akachita teno, wantsembe adzamupsyimphirizire machimo ndipo munthu muyo adzakhale wochena.
21 Koma peno munthu muyo ni wosauka ndipo angakwaniselini kubweresa vinthu vimwivi, ambabwerese nkhosa imuna ibodzi ninge ntsembe ya kupalamula. Ntsembe mwiyo ambaiyendese uku na uku kuti amupsyimphirizire machimo. Ambabwerese pomwe mpimo ubodzi wa mafuta na ufa wonyodoka wothira mafuta wokwana gawo ibodzi pa magawo 10 ya mpimo wa efa,* ninge ntsembe yake yambewu.
22 Komasoti ambabwerese njiwa ziwiri panango wana awiri wa nkhangaiwa, mobverana na vomwe iye angakwanise. Mbalani ibodzi ikhale ntsembe ya machimo ndipo inango ikhale ntsembe yoshoka.
23 Pantsiku yachi 8 ambabwerese vinthu mwivi kwa wantsembe pa nsuwo wa chihema chogumanako pamaso pa Yahova, kuti wantsembe muyo agemule kuti munthu muyo ni wochena.
24 Patsogolo pake wantsembe ambatenge nkhosa ing’ono imuna ya ntsembe ya kupalamula na mpimo ubodzi wa mafuta ule, ndipo wantsembe muyo ambayendese vinthu mwivo uku na uku, ninge ntsembe yoperekewa kwa Yahova.
25 Manje wantsembe ambaphe nkhosa ing’ono imuna ya ntsembe ya kupalamula. Akachita teno ambatengeko magazi yanango ya ntsembe ya kupalamula mwiyo nkuyapakasira m’nyantsi mwa dzitu yakumakulu ya munthu yemwe ankudzichenesa uyo, pachala chake chikulu cha kudjanja yamakulu, na pachala chake chikulu cha kumwendo wamakulu.
26 Wantsembe muyo adzatengeko mafuta yanango nkuthira ku djanja yake yamadzere.
27 Akachita teno adzadonthezere na chala cha djanja yake yamakulu mafuta yanango yomwe yali kudjanja yake yamadzere maulendo 7 pamaso pa Yahova.
28 Patsogolo pake wantsembe adzapakasireko mafuta yanango yomwe yali ku djanja yake, m’nyantsi mwa dzitu ya munthu yemwe ankudzichenesa uyo, pachala chake chikulu cha djanja yake yamakulu, na pachala chake chikulu cha kumwendo wamakulu pomwe adapakasira magazi ya ntsembe ya kupalamula ire.
29 Manje mafuta yomwe yasala kudjanja kwa wantsembe ambayapakasire pansolo pa munthu yemwe ankudzichenesa uyo, kuti amupsyimphirizire machimo yake pamaso pa Yahova.
30 Patsogolo pake wantsembe ambapereke mwana m’bodzi wa njiwa panango mwana m’bodzi wa nkhangaiwa, mobverana na vomwe munthu muyo angakwanise.
31 Mbalani ibodzi ikhale ntsembe yamachimo ndipo inango ikhale ntsembe yoshoka, ambapereke yomwe angakwanise pabodzi na ntsembe yambewu. Ndipo wantsembe ambapsyimphirize machimo ya munthu yemwe ankudzichenesa uyo pamaso pa Yahova.
32 Mwiyi ni lamulo yonena va munthu yemwe anamatenda yakhate, yemwe angakwaniselini kugumana vinthu vomwe ni vofunika pantsiku ya kuchenesewa kwake.”
33 Manje Yahova adauza Mose na Aroni kuti:
34 “Mukakafika mudziko ya Kanani, yomwe inepano nikukupasani kuti ikhale yanu, ndipo nikadzabvuma kuti matenda yakhate yakhale m’nyumba inango mu dziko mwiyo,
35 munikachiro wa nyumba mwiyo ambabwere kwa wantsembe nkumuuza kuti: ‘Naona chinthu chinango chowoneka ninge matenda yakhate m’nyumba mwangu.’
36 Wantsembe ambalamule kuti achose vombo m’nyumba mumo iye akalibe kubwera kudzaona matenda mwayo. Adzachite vimwivi kuti wantsembe osati adzanene kuti chirichose cha m’nyumba mumo ni chopsyipiziwa. Patsogolo pake wantsembe adzabwere kudzaona nyumba mwiyo.
37 Akaona matenda mwayo kuti yali mu vipupa va nyumba, ndipo yankuwoneka ninge mawangamawanga yobiwirira ninge chikasu panango yofuwirira, komasoti mawangamawanga mwayo yakuwoneka kuti yangena nkati mwa chipupa,
38 wantsembe ambabule m’nyumba mumo nkuyenda kukaimirira pansuwo, ndipo ambafunge nyumba mwiyo kwa ntsiku 7.
39 Pantsiku yachi 7, wantsembe ambabwere pomwe kudzawona nyumba mwiyo. Peno matenda mwayo yafalikira mvipupa vake,
40 wantsembe ambalamule kuti achose minyala yomwe yanamatenda mwayo, nkuyathusa kunja kwa thaundi, kumalo yopsyipiziwa.
41 Manje wantsembe ambalamule kuti apalepale nkati mwa nyumba yose mwiyo, nkukataya kunja kwa thaundi vomwe apala, kumalo yopsyipiziwa.
42 Akachita teno ambatenge minyala yanango nkumanga pomwe penze minyala yakalekale. Patsogolo pake ambawalamule kuti amate nyumba mwiyo na dothi inango.
43 Koma peno matenda mwayo yabwera pomwe nkufalikira pomwe m’nyumba mumo, patsogolo pakuti achosa minyala yale, kupalapala nyumba mwiyo nkuimata pomwe,
44 wantsembe ambabwere pomwe kudzaiwona. Peno matenda mwayo yafalikira pomwe m’nyumba mumo, mwiyo ni khate yopasa mantha. Nyumba mwiyo ni yopsyipiziwa.
45 Patsogolo pake ambalamule kuti nyumba mwiyo aigwese pabodzi na minyala yake, matabwa yake na dothi yake yose yomangira, ndipo vose mwivi ambaviyendese kunja kwa thaundi, kumalo yopsyipiziwa.
46 Koma aliyese wongena m’nyumba mwiyo pantsiku yomwe wantsembe walamula kuti munthu osati angenemo, ambakhale wopsyipiziwa mpakana m’maulo.
47 Aliyese yemwe wagona m’nyumba mumo na aliyese yemwe wadyeramo chakudya ambawatche vovala vake.
48 Koma peno wantsembe wabwera kudzaona nyumba mwiyo patsogolo pakuti aimata pomwe nkugumana kuti matenda mwayo yalibe kufalikira m’nyumba mwiyo, wantsembe ambagemule kuti nyumba mwiyo ni yochena ndawa matenda mwayo yamala.
49 Manje kuti achenese nyumba mwiyo, ambatenge mbalani ziwiri, nthawi za muti wa nkungudza, usalu ufuwira maninge na kamuti ka hisope.
50 Wantsembe ambaphe mbalani ibodzi padzulu pa madzi ya kukamadzi, yomwe yali muchombo chadongo.
51 Patsogolo pake ambatenge nthawi ya muti wa nkungudza, kamuti ka hisope, usalu ufuwira maninge na mbalani yamoyo ire. Mwivi ambavivuwike m’magazi ya mbalani yomwe yapherewa padzulu pa madzi yotungiwa mukamadzi yale, ndipo ambadontheze magazi mwayo maulendo 7 cha kumbali komwe kuli nyumba mwiyo.
52 Manje ambachenese nyumba mwiyo pakuphatisa basa magazi ya mbalani ire, madzi yotungiwa kukamadzi, mbalani yamoyo ire, nthawi ya muti wa nkungudza, kamuti ka hisope na usalu wofuwira maninge.
53 Patsogolo pake ambambululuse mbalani yamoyo ire panja, kunja kwa thaundi. Akachita teno ambachenese nyumba mwiyo, ndipo idzakhale yochena.
54 Mwiyi ni lamulo yonena va matenda yaliyose yakhate, matenda ya pansolo panango ya pandebvu,
55 khate ya pachovala panango ya panyumba,
56 votupa, chilonda* na vinthu vokhala ninge vikang’a.
57 Mwiyi yenze lamulo yoperekewa kuti yakhale malangizo yothandiza kudziwa chinthu chopsyipiziwa na chochenesewa. Mwiyi ni lamulo yonena va matenda yakhate.”
Mawu ya m’nyantsi
^ Onani matanthauzo ya mawu yanango.
^ “Magawo yatatu pa magawo 10 ya mpimo wa efa” ni yolingana na malitru 6,6. Onani vakumapeto B14.
^ “Mpimo ubodzi”umuyu ni wolingana na malitru 0,31. Onani vakumapeto B14.
^ Gawo ibodzi pa magawo 10 ya mpimo wa efa ni yolingana na malitru 2,2. Onani vakumapeto B14.
^ Yamwaya ni matenda yomwe yachitisa kuti khanda iwume nkumbakwangwanuka ninge momwe vikhalira chilonda chikambapola.
