Levitiko 10:1-20
10 Manje Nadabu na Abihu, omwe ni wana wa Aroni, aliyese adatenga chofukizira, nkuikhamo moto na vofukizira padzulu pake. Padateno adayamba kupereka vofukiza pamoto wosabvumiziwa na Yahova, womwe iye alibe kuwalamula.
2 Pamwapo moto udabuluka kuchokera kwa Yahova nkuwashoka, mwakuti adafa pamaso pa Yahova.
3 Patsogolo pake Mose adauza Aroni kuti: “Yahova wanena kuti: ‘Wanthu omwe ali pafupi na inepano ambakumbukire kuti ndine wochena, ndipo wanthu wose adzanipase ulemerero.’” Koma Aroni adandokhala chete.
4 Pavidateno, Mose adachemera Misayeli na Elizafana, wana wa Uziyeli, aban’diki wa Aroni, nkuwauza kuti: “Bwerani muchose azibale wanu patsogolo pa malo yochena, muyende nawo kunja kwa nsasa.”
5 Iwo adabweradi nkuwanyamula osawavula mikhanjo yawo ndipo adayenda nawo kunja kwa nsasa, mobverana na vomwe Mose adanena.
6 Padateno Mose adauza Aroni na wana wake anango, Eleazara na Itamara kuti: “Ayi kuleka kusamalira tsitsi yanu panango kung’amba vovala vanu ndawa mungafe nakuti Mulungu angakalipire gulu yose mwiyi. Abale wanu omwe ni wa m’banja yose ya Izirayeli ndiwo ati alire wanthu omwe Yahova wawapha na moto.
7 Ayi kuchoka pansuwo wa chihema chogumanako kuchitira kuti mungafe, ndawa mwadzodzewa na mafuta yodzodzera ya Yahova.” Pamwapo iwo adachita mobverana na vomwe Mose adanena.
8 Patsogolo pake Yahova adauza Aroni kuti:
9 “Mukambabwera kuchihema chogumanako, iwepo na wana wako osati mumbamwe vinyu panango vakumwa vinango voledzeresa, kuchitira kuti mungafe. Mwiyi ni lamulo ku mibadwo yose mpakana kalekale.
10 Mukambachita vimwevi mudzakwanise kusiyanisa pakati pa chinthu chopatulika na choipisiwa na pakati pa chopsyipiziwa na chochena.
11 Komasoti mudzakwanise kupfunzisa Aizirayeli malamulo yose yomwe Yahova wanena kwa iwo pophatisira basa Mose.”
12 Manje Mose adayankhula na Aroni komasoti Eleazara na Itamala, wana wa Aroni omwe adasala kuti: “Tengani ntsembe yambewu yomwe yakhalira pa ntsembe zoshoka pamoto zoperekewa kwa Yahova, ndipo muidye iribe vofufumisa pafupi na guwa yantsembe, ndawa ntsembe mwiyo ni yopatulika maninge.
13 Ntsembe mwiyo muidyere m’malo yochena, ndawa ni gawo yanu komasoti ni gawo ya wana wanu kuchokera pa ntsembe zoshoka pamoto zoperekewa kwa Yahova. Vimwevi ndivo vomwe nalamuliwa.
14 Mudye pomwe nganga yantsembe yoyendesa uku na uku na mwendo wa gawo yopatulika. Muvidyere pamalo yomwe yachenesewa, imwepo, wana wanu amuna na wana wanu akazi. Mumbachite vimwevi ndawa vinthu mwivi vaperekewa kwa imwepo ninge gawo yanu na gawo ya wana wanu kuchokere pa ntsembe zachibverano za Aizirayeli.
15 Iwo ambabwerese mwendo wa gawo yopatulika na nganga ya ntsembe yoyendesa uku na uku, pabodzi na mafuta ya ntsembe zoshoka pamoto, kuti wopereka uyo aviyendese uku na uku pamaso pa Yahova. Vimwivi vimbakhale gawo yanu na gawo ya wana wanu mpakana kalekale, mobverana na vomwe Yahova walamula.”
16 Manje Mose adafagafaga mbuzi ya ntsembe yamachimo, koma adaona kuti yose yenze idashokewa kale pamoto. Pamwapo iye adakalipira Eleazara na Itamara, wana wa Aroni omwe adasala, ndipo adati:
17 “Ndawa chani mulibe kudya ntsembe yamachimo m’malo yochena? Ntsembe mwiyi ni yopatulika maninge, ndipo Mulungu wakupasani kuti munyamule vophonya va gulu yose, na kupsyimphiriza machimo ya gulu yose mwiyo pamaso pa Yahova.
18 Onani, mulibe kubweresa magazi yake nkati m’malo yochena. Mumbafunika kudya ntsembe mwiyo m’malo yochena, mobverana na vomwe Mulungu adanilamula.”
19 Aroni adadawira Mose kuti: “Lero apereka ntsembe yawo yamachimo na ntsembe yawo yoshoka kwa Yahova, koma olo nteno, vinthu ivi vanichitikira. Manje nidakati nadya ntsembe ya machimo lero, ko Yahova adakakondwera navo?”
20 Mose padabva vimwevi, adabvesa.
