Levitiko 7:1-38
7 Lamulo ya ntsembe yopalamula ni iyi: Ntsembe mwiyi ni yopatulika maninge.
2 Nyama ya ntsembe yopalamula ambaiphere pamalo yomwe aphera nyama yantsembe yoshoka, ndipo magazi yake yambawaziwe mbali zose za guwa yantsembe.
3 Ambapereke mafuta yake yose, kuphatanidzapo nchira wamafuta, mafuta yokukutidza matumbo,
4 mphewa ziwiri zomwe ziri pafupi na chiuno na mafuta yokukutidza mphewa mwizo. Ambachose pomwe mafuta ya pachiwindi pabodzi na mphewa mwizo.
5 Wantsembe ambawotche vinthu vimwevi paguwa yantsembe ninge ntsembe yowotcha pamoto yoperekewa kwa Yahova. Mwiyi ni ntsembe yopalamula.
6 Mwamuna aliyese yemwe ni wantsembe ambadye nyama mwiyo ndipo ambaidyere m’malo yochena. Ntsembe mwiyi ni yopatulika maninge.
7 Lamulo ya ntsembe yopalamula ni yolingana na ya ntsembe yamachimo. Nyama ya ntsembe mwiyi imbakhale ya wantsembe yemwe wapereka ntsembe mwiyo popsyimphiriza machimo.
8 Wantsembe akaperekera munthu ntsembe yoshoka, chikumba cha ntsembe mwiyo chimbakhale cha wantsembe yemwe wapereka ntsembe mwiyo.
9 Ntsembe iriyose yambewu yomwe yaphikiriwa mu uvuni panango muchiwaya* imbakhale ya wantsembe yemwe wapereka ntsembe mwiyo. Imbakhale yake.
10 Koma ntsembe yambewu iriyose yothira mafuta panango yosathira mafuta imbakhale ya wana wose amuna wa Aroni, ambagawane molingana.
11 Manje lamulo ya ntsembe yachibverano yomwe aliyese ambapereke kwa Yahova ni iyi:
12 “Peno akupereka ntsembe mwiyo pakuwonesa kutembeja, ambapereke ntsembe yotembeja pabodzi na nkate walaundi wobowola pakati, ulibe vofufumisa, wothira mafuta. Ambapereke pomwe tumitanda twa nkate tothasalala tulibe vofufumisa, topakasira mafuta na nkate walaundi wobowola pakati, wothira mafuta, wophika na ufa wonyodoka wosanganisa bwino na mafuta.
13 Ambapereke ntsembe yake pabodzi na mitanda ya nkate yalaundi yobowola pakati, yokhala na vofufumisa. Ambayaperekere pabodzi na ntsembe zachibverano zomwe ankuzipereka pakuwonesa kutembeja.
14 Pa vinthu vimwevi ambapereke ntanda ubodzi wa ntsembe iriyose kuti ikhale gawo yopatulika yoperekewa kwa Yahova. Ntanda muyo umbakhale wa wantsembe yemwe wawaza magazi ya ntsembe zachibverano mwizo paguwa yantsembe.
15 Nyama ya ntsembe zachibverano zomwe zaperekewa ninge ntsembe yotembeja ambaidye pantsiku yomwe waipereka. Osati asunge nyama iriyose mpakana machibesebese.
16 Peno akupereka ntsembe ndawa ya polomisi yomwe adaichita panango peno akupereka ntsembe yaufulu, ambaidye pantsiku yomwe wapereka ntsembe mwiyo, ndipo yokhalira angaidye pomwe mangwana yake.
17 Koma peno nyama ya ntsembe mwiyo yakhalira mpakana ntsiku yachitatu, afunika kuishoka pamoto.
18 Koma peno nyama iriyose ya ntsembe yachibverano yadyewa pantsiku yachitatu, Mulungu adzakondwerelini na munthu yemwe wapereka ntsembe mwiyo. Ntsembe yake mwiyo idzakhale iribe phindu. Idzakhale chinthu chopasa nyantsi, ndipo munthu yemwe wadya ntsembe mwiyo adzadawire mulandu ndawa ya kuphonya kwake.
19 Nyama yomwe yagumirira chinthu chirichose chopsyipiziwa, ifunikalini kudyewa. Mumbaishoke pamoto. Koma aliyese wochena angadye nyama yomwe iribe kupsyipiziwa.
20 Munthu aliyese wopsyipiziwa yemwe wadya nyama ya ntsembe yachibverano, yomwe ni ya Yahova, ambaphewe kuti osati akhale pomwe pakati pa wanthu wa khaindi yake.
21 Munthu akagumirira chirichose chopsyipiziwa, peno ni chopsyipiziwa chochokera kwa munthu panango nyama yopsyipiziwa, panango chinthumbo chirichose chopasa nyantsi chopsyipiziwa, nkudyako nyama ya ntsembe yachibverano, yomwe ni ya Yahova, munthu muyo ambaphewe kuti osati akhale pomwe pakati pa wanthu wa khaindi yake.’”
22 Yahova adapitiriza kuyankhula na Mose kuti:
23 “Uwauze Aizirayeli kuti: ‘Ayi kuti mumbadye mafuta yaliyose ya ng’ombe, ya mwana wankhosa panango ya mbuzi.
24 Mafuta ya nyama yomwe mwaigumana yakufa na mafuta ya nyama yomwe yaphewa na nyama inzake, mungayaphatise basa iriyose, koma ayi kumbayadya olo pang’ono.
25 Aliyese yemwe wadya mafuta ya nyama yomwe waipereka kwa Yahova ninge ntsembe yoshoka pamoto, ambaphewe kuti osati akhale pomwe pakati pa wanthu wa khaindi yake.
26 Ayi kumbadya magazi yaliyose kulikose komwe mungakhale, peno yakhale magazi ya mbalani panango ya nyama.
27 Munthu aliyese yemwe wadya magazi yaliyose ambaphewe kuti osati akhale pomwe pakati pa wanthu wa khaindi yake.’”
28 Yahova adapitiriza kuyankhula na Mose kuti:
29 “Uwauze Aizirayeli kuti: ‘Munthu yemwe ankubweresa ntsembe yake yachibverano kwa Yahova, ambapereke mbali ya ntsembe yachibverano mwiyo kwa Yahova.
30 Iye ambabwerese yekha mafuta pabodzi na nganga ninge ntsembe yowotcha pamoto yoperekewa kwa Yahova. Ndipo ambayendese vinthu vimwivo uku na uku ninge ntsembe yoyendesewa uku na uku yoperekewa kwa Yahova.
31 Wantsembe ambashoke mafuta mwayo paguwa ya ntsembe, koma nganga mwiyo imbakhale ya Aroni na wana wake.
32 Mwendo wa kumbuyo wa kumakulu mumbaupereke kwa wantsembe ninge gawo yopatulika yochokera pantsembe zanu zachibverano.
33 Mwana wa Aroni yemwe wapereka kwa Mulungu magazi ya ntsembe yachibverano na mafuta, ambatenge mwendo wa kumbuyo wa kumakulu ninge gawo yake.
34 Inepano nikutenga nganga ya ntsembe yoyendesa uku na uku na mwendo womwe ni mbali yopatulika. Ninkutenga vimwevi pa ntsembe zachibverano za Aizirayeli nkuzipereka kwa Aroni wantsembe na wana wake. Mwiyi ni lamulo kwa Aizirayeli mpakana kalekale.
35 Mwiyi yenze gawo ya Aroni na wana wake ninge antsembe. Gawo mwiyi yenze yochokera pantsembe zowotcha pamoto zoperekewa kwa Yahova, mobverana na vomwe adawalamula pantsiku yomwe adaperekewa kuti atumikire ninge antsembe kwa Yahova.
36 Yahova adalamula kuti ambawapase gawo mwiyi kuchokera kwa Aizirayeli, pantsiku yomwe adawadzodza. Mwiyi ni lamulo ku mibadwo yawo yose mpakana kalekale.’”
37 Mwiyi ni lamulo yonena va ntsembe yoshoka, ntsembe yambewu, ntsembe yamachimo, ntsembe yopalamula, nyama yoperekewa pakuikha munthu kuti akhale wantsembe na ntsembe yachibverano,
38 mobverana na vomwe Yahova adalamula Mose paphiri ya Sinai, pantsiku yomwe adalamula Aizirayeli kuti ambapereke ntsembe zawo kwa Yahova muchipululu cha Sinai.
Mawu ya m’nyantsi
^ Panango kuti: “muchiweye.”
