“Laga bo bon spiritu guia mi na e tera di rektitut.”​—SAL. 143:10.

1, 2. (a) Menshoná algun okashon den kua Yehova a usa su spiritu santu pa yuda su sirbidónan. (b) Ta na okashonnan spesial so spiritu santu ta obra? Bo por splika?

SI BO tin ku pensa riba maneranan ku Yehova ta usa su spiritu santu, kiko ta bini na bo mente? E hazañanan di Gideon i di Samson? (Hues. 6:33, 34; 15:14, 15) Kisas e kurashi ku kristiannan di promé siglo a desplegá? Òf lo bo pensa riba e serenidat di Esteban ora e tabata dilanti di Sanedrin? (Echo. 4:31; 6:15) Awor kiko di e goso ku ta reina na nos kongresonan internashonal, e integridat di rumannan ku ta será pa motibu di nan neutralidat i e oumento remarkabel ku e trabou di prediká ta trese kuné? Tur esakinan ta evidensia ku e spiritu di Dios ta obra riba su sirbidónan.

² Awor, ta na okashonnan spesial òf bou di sirkunstansia ekstraordinario so e spiritu di Dios ta obra? Nò. E Palabra di Dios ta bisa ku kristiannan ta ‘kana segun spiritu,’ ‘biba segun spiritu’ i ser ‘guiá pa spiritu.’ (Gal. 5:​16, 18, 25) E ekspreshonnan akí ta laga nos komprondé ku spiritu santu por influensiá nos bida tur ora bai. P’esei, no laga niun dia pasa sin ku nos pidi Yehova guia nos pensamentu, abla i echonan pa medio di su spiritu. (Lesa Salmo 143:10.) Si nos laga spiritu santu obra libremente den nos bida, lo e yuda nos produsí kualidatnan ku ta agradabel pa otro hende i ku ta duna gloria na Dios.

3. (a) Dikon nos tin ku laga e spiritu di Dios guia nos? (b) Ki preguntanan nos lo kontestá den e artíkulo akí?

³ Dikon ta masha importante pa nos laga e spiritu di Dios guia nos? Pasobra tin un otro forsa ku ta obra kontrali ku spiritu santu i, si nos no tene kuidou, e por dominá nos fásilmente. E Skritura ta mustra ku e otro forsa ei ta nos propio “karni,” esta, e inklinashonnan pekaminoso di e kurpa imperfekto ku nos a heredá di Adam. (Lesa Galationan 5:17.) Awor bon, kon nos por laga e spiritu di Dios guia nos? Ki medidanan práktiko nos tin ku tuma pa dominá nos deseonan di karni? Nos lo kontestá e preguntanan akí segun ku nos ta analisá e otro seis aspektonan di e ‘fruta di spiritu,’ esta, ‘pasenshi, amabilidat, bondat, fe, suavedat i dominio propio.’​—Gal. 5:​22, 23, NW.

Pasenshi i Suavedat Ta Promové Pas den Kongregashon

4. Kon pasenshi i suavedat ta promové pas den kongregashon?

⁴ Lesa Kolosensenan 3:​12 i 13. Pa promové pas den kongregashon, nos mester di dos kualidat ku ta masha ligá ku otro: pasenshi i suavedat (òf mansedumbre). Ámbos ta yuda nos pa trata hende ku kortesia, pa keda kalmu ora hende provoká nos i pa no tuma represaya ora un persona ofendé nos òf trata nos malu. Si nos tin un desakuerdo ku un ruman, e kualidatnan ei ta yuda nos hasi tur loke nos por pa drecha asuntu en bes di ignorá e ruman. Awor, pasenshi i suavedat ta realmente nesesario den nos trato ku otro den kongregashon? Sí, pasobra nos tur ta imperfekto.

5. Kiko a pasa ku Pablo i Barnabas, i kiko esaki ta mustra nos bon kla?

 ⁵ Wak kiko a pasa ku Pablo i Barnabas, kendenan a traha hopi aña huntu pa plama e bon notisia di Reino. Aunke nan tur dos tabatin ekselente kualidatnan, tòg na un okashon a surgi “un desakuerdo asina grandi [entre nan] ku nan a separá for di otro.” (Echo. 15:​36-39) E insidente akí ta mustra bon kla ku asta entre fiel sirbidónan di Dios por surgi desakuerdo de bes en kuando. Awor si abo haña bo den un situashon asina, kiko bo por hasi pa evitá ku kos ta sali for di man i ku bo ta keda rabiá ku bo ruman?

6, 7. (a) Ki konseho bíbliko nos por sigui pa evitá ku un kòmbersashon ta kaba na pleitamentu? (b) Kiko ta e benefisionan di ser “lihé pa tende, no lihé pa papia i no lihé pa rabia”?

⁶ E ekspreshon ‘a bini un desakuerdo grandi’ ta duna e idea di ku ta diripiente Pablo i Barnabas a kuminsá diskutí fuertemente ku otro. P’esei, ora bo ta trata un asuntu ku un ruman i bo sinti ku bo a kuminsá kushi paden, ta sabí pa bo sigui e konseho di ser “lihé pa tende, no lihé pa papia i no lihé pa rabia; pasobra rabia di hende no ta produsí e hustisia di Dios,” manera Santiago 1:​19 i 20 ta bisa. Pues, dependiendo di e sirkunstansianan, sea purba kambia di tema, laga e asuntu para pa un otro okashon òf pone fin na e kòmbersashon pa e no kaba na pleitamentu.​—Pro. 12:16; 17:14; 29:11.

⁷ Awor kiko ta e benefisionan di sigui e konseho ei? Ora bo ta tuma tempu pa kalma bo mes, pa hasi orashon tokante e asuntu i pa pensa bon kon ta e mihó manera pa reakshoná, bo ta demostrá ku bo ta laga e spiritu di Dios guia bo. (Pro. 15:​1, 28) I spiritu santu por yuda bo desplegá suavedat i pasenshi. E ora ei bo ta mihó prepará pa sigui e konseho na Efesionan 4:​26 i 29, ku ta bisa: “Rabia, ma no hasi piká; . . . No laga ningun palabra dañino sali for di boso boka, sino solamente palabra ku ta bon pa edifikashon, konforme e nesesidat di e momento, pa esaki por duna grasia na esnan ku ta tende.” Sí, ora nos ta bisti nos mes ku suavedat i pasenshi, nos ta kontribuí na e pas i union ku tin den kongregashon.

Trata Bo Famia ku Amabilidat i Bondat

8, 9. Kiko amabilidat i bondat ta enserá, i ki efekto e kualidatnan akí tin riba e ambiente di kas?

⁸ Lesa Efesionan 4:​31 i 32; 5:​8 i 9. Meskos ku un glas di awa friu i un brisa suave ta refreská hende ora ta hasi kalor, amabilidat i bondat tin bon efekto riba hende. Por ehèmpel, ora miembronan di famia ta desplegá e kualidatnan positivo i atraktivo akí, nan ta krea un ambiente agradabel den nan hogar.  Awor bon, un hende amabel ta mustra interes sinsero den otro hende; e ta kla pa yuda i ta papia na un manera kariñoso ku hende. Un persona bondadoso, meskos ku un persona amabel, ta generoso i ta gusta hasi bon pa hende. (Echo. 9:​36, 39; 16:​14, 15) Pero, bondat ta impliká algu mas.

⁹ Bondat ta enserá ser bon den tur sentido di palabra. E tin di aber no solamente ku nos echonan, sino mas importante ainda, ku e persona ku nos ta di paden. Bondat ta manera un fruta hechu i dushi ku no tin ningun parti ku ta putrí, ni paden ni pafó. Meskos tambe, un kristian ku ta kultivá e fruta di bondat ku yudansa di spiritu santu ta demostrá esei den tur faseta di su bida.

10. Kiko por yuda miembronan di famia kultivá fruta di spiritu?

¹⁰ Kiko por yuda un famia kristian ser amabel ku otro i trata otro ku bondat? Konosementu eksakto di e Palabra di Dios ta hunga un papel importante den esei. (Kol. 3:​9, 10) Algun kabes di famia ta skohe pa studia e aspektonan di e fruta di spiritu durante nan Adorashon Komo Famia. I esei no ta difísil pa hasi. Nos tin un kantidat di material di estudio na nos disposishon. Kisas boso por buska artíkulonan ku ta trata e aspektonan di e fruta di spiritu i analisá djis un par di paragraf kada siman; asina boso por konsiderá tur e aspektonan akí durante vários siman. Segun ku boso ta analisá e informashon, lesa i papia riba e tekstonan sitá. Wak kon boso por apliká loke boso ta siña i pidi Yehova bendishoná boso esfuerso. (1 Tim. 4:15; 1 Juan 5:​14, 15) Di bèrdat un estudio asina por yuda miembronan di famia trata otro mihó?

11, 12. Ki bon resultado dos pareha kristian tabatin ora nan a studia e kualidat di bondat?

¹¹ Un pareha hóben ku tabata ke pa nan matrimonio bira un éksito a disidí di hasi un análisis profundo di e fruta di spiritu. Kon esaki a benefisiá nan? E esposa a bisa: “Nos a siña ku bondat tin di aber ku lealtat i fieldat; esaki a yuda nos trata otro mihó te dia djawe. Nos a siña sede i pordoná otro. Ademas, nos a siña ku nos mester yama ‘danki’ i pidi despensa ora esei ta na su lugá.”

¹² Un pareha kristian ku tabatin problema matrimonial a realisá ku nan no tabata trata otro ku bondat. Pues, nan a disidí di studia e kualidat akí huntu. E esposo a konta kon e estudio a benefisiá nan: “Nos a siña ku nos mester duna otro e benefisio di duda i no kore pensa malu di otro sino di buska e bon den otro. Nos a kuminsá mustra mas interes  den otro su nesesidatnan. Pa mustra mas bondat, mi mester a animá mi esposa pa e ekspresá su mes libremente i skuch’é sin sinti mi ofendí. Esei a nifiká ku mi mester a guli mi orguyo. Segun ku nos a kuminsá trata otro ku bondat, nos no tabata asina defensivo mas. Esei tabata un berdadero alivio.” Bo famia tambe lo benefisiá di un estudio di e fruta di spiritu?

Berdadero Fe Asta Ora Bo Ta Bo So

13. Kontra ki peliger pa nos spiritualidat nos tin ku protehá nos mes?

¹³ Kristiannan mester laga e spiritu di Dios guia nan, tantu den públiko komo ora nan ta so. Awe, e mundu di Satanas ta bombardiá hende ku mas i mas esenanan inmoral i entretenimentu degradante. I e kosnan akí por ta un peliger pa kristiannan. P’esei kiko nos por hasi pa protehá nos mes spiritualmente? E Palabra di Dios ta instruí nos: ‘Pone un banda tur sushedat i tur loke ta keda di maldat, i den humildat risibí e palabra ku a wòrdu plantá den boso, kual por salba boso almanan.’ (Sant. 1:21) P’esei, laga nos konsiderá kon fe, un otro aspekto di e fruta di spiritu, por yuda nos keda limpi den bista di Yehova.

14. Kon un falta di fe por hiba na mal kondukta?

¹⁴ Fe ta nifiká básikamente: mira Yehova Dios komo un persona real. Si Dios no ta real pa nos, fásilmente nos por hasi loke ta malu. Wak kiko a pasa den e pueblo di Dios di antigwedat. Dado momento, algun israelita a kuminsá hasi kosnan detestabel ora otro hende no tabata mira nan. Yehova a bisa profeta Ezekiel: “Yu di hende, bo ta mira kiko e ansianonan di e kas di Israel ta hasi den skuridat, kada hòmber den su kuarto di imágennan grabá? Pasobra nan ta bisa: ‘SEÑOR no ta mira nos; SEÑOR a bandoná e tera.’” (Eze. 8:12) Bo a ripara kiko tabata nan problema? Yehova no tabata real pa nan. Nan a kere ku Yehova no tabata mira loke nan tabata hasi.

15. Kon un fe fuerte den Yehova ta protehá nos?

¹⁵ Konsiderá awor e ehèmpel di Hosé. Aunke e tabata leu for di su famia i su pueblo, el a nenga di kometé adulterio ku e kasá di Potifar. Dikon? Hosé a bisa: “Kon anto mi por hasi e maldat grandi akí i peka kontra Dios?” (Gén. 39:​7-9) Sí, Yehova tabata real p’e. Si Dios ta real pa nos, ora nos ta nos so, nos lo no wak entretenimentu impuru ni hasi nada otro ku nos sa ta desagrad’é. Nos lo ke tin e mesun determinashon ku e salmista, kende a kanta: “Lo mi kana den mi kas den e integridat di mi kurason. Lo mi no pone nada malu dilanti di mi wowo.”​—Sal. 101:​2, 3.

 Ehersé Dominio Propio pa Protehá Bo Kurason

16, 17. (a) Segun e buki di Proverbionan, kon un ‘hóben ku tabata falta komprondementu’ a kai den un trampa ku a hib’é na piká serio? (b) Manera e plachi na página 30 ta ilustrá, kon algu similar por pasa ku kualke un di nos awe?

¹⁶ Dominio propio, e último aspekto di e fruta di spiritu, ta yuda nos bisa nò na kosnan ku Dios ta kondená. I esei na su turno por yuda nos protehá nos kurason. (Pro. 4:23) Wak kiko a pasa ‘un hóben ku tabata falta komprondementu,’ segun Proverbionan 7:​6-23. El a hañ’é den problema pasobra el a bai tras di labiamentu di un prostituta. Kon bin el a kai den e trampa ei? E relato ta bisa ku el ‘a pasa den e kaya pegá ku e skina kaminda e muhé tabata biba.’ Kisas ta pa kuriosidat el a hasi esei. Pero manera un bobo el a bai tras di e prostituta, sin realisá mes ku esei “lo [a] kost’é su bida.”

¹⁷ Awor kon e hóben ei por a evitá di kometé e eror fatal ei? E mester a hasi kaso di e spièrtamentu pa “no dual bai den [e prostituta] su bereanan.” (Pro. 7:25) Kiko nos por siña for di e relato akí? Si nos ke pa e spiritu di Dios guia nos, nos mester evitá di hinka nos mes den tentashon. Por ehèmpel, si un persona ta sinta kambia kanal di televishon pa loko òf sùrf riba Internet sin ningun propósito, e por ta kometiendo e mesun bobedat di e ‘hóben ku tabata falta komprondementu.’ Kisas sea ku e ke òf nò, e por haña su mes ku esenanan erótiko. Pokopoko pero sigur e por desaroyá e kustumber impuru di wak pornografia, loke por tin konsekuensianan desastroso, pasobra esei por lag’é ku un konsenshi sushi i daña su relashon ku Dios. E por asta pèrdè su bida pa motibu di esei.​—Lesa Romanonan 8:​5-8.

18. Ki medida un kristian por tuma pa protehá su kurason, i ki relashon esei tin ku dominio propio?

¹⁸ Si nos haña nos ku esenanan inmoral, nos tin ku tuma medida mesora; di e manera ei, nos ta demostrá ku nos por i, realmente, mester ehersé dominio propio. Pero no ta muchu mas mihó pa nos evitá di hinka nos mes den situashonnan asina? (Pro. 22:3) P’esei ta bon pa tuma medida di protekshon i tene nos mes na esakinan. Esei tambe ta un manera pa ehersé dominio propio. Por ehèmpel, bo por pone e kòmpiuter den sala, kaminda tur hende por mira kiko bo ta hasi. Algun ta preferá di no usa kòmpiuter ni wak televishon ora no tin otro hende na kas. Otronan a disidí di no usa Internet mes. (Lesa Mateo 5:​27-30.) Laga nos tuma e medidanan nesesario pa protehá nos mes i nos famia pa nos por adorá Yehova ku ‘un kurason puru, un bon konsenshi i un fe sinsero.’​—1 Tim. 1:5.

19. Ora nos laga e spiritu di Dios guia nos, kon esei ta benefisiá nos?

¹⁹ Sin duda, e kualidatnan ku spiritu santu ta yuda nos kultivá ta trese hopi benefisio. Pasenshi i suavedat ta promové pas den kongregashon. Amabilidat i bondat ta kontribuí na felisidat den famia. Fe i dominio propio ta yuda nos mantené un bon relashon ku Yehova i keda limpi den su bista. Es mas, Galationan 6:8 ta duna nos e siguransa ku “esun ku sembra pa e spiritu lo kosechá bida eterno for di e spiritu.” Sí, a base di e reskate di Kristu, Yehova lo usa su spiritu santu pa duna tur hende ku a laga spiritu santu guia nan bida eterno.

Kon Lo Bo Kontestá?

• Kon pasenshi i suavedat ta promové pas den kongregashon?

• Kiko lo yuda un kristian trata su famia na un manera amabel i bondadoso?

• Kon fe i dominio propio ta yuda un kristian protehá su kurason?

[Preguntanan di Estudio]

[Plachi na página 28]

Kon bo por evitá ku un desakuerdo ta kaba na pleitamentu?

[Plachi na página 29]

Un análisis di e aspektonan di e fruta di spiritu lo benefisiá bo famia

[Plachi na página 30]

Ki peliger nos ta evitá ora nos ta ehersé fe i dominio propio?