Karta pa e Galationan 6:1-18
6 Rumannan, suponé ku un hende dal un paso robes sin ku el a realisá esei. E ora ei, boso ku ta spiritualmente madurá* mester purba di trese e hende ei bèk riba e kaminda korekto. Hasi esei ku suavedat.+ Pero wak boso mes bon+ pa boso tambe no kai den tentashon pa hasi loke ta malu.+
2 Boso kada un sigui yuda otro karga su karga;+ asina boso ta kumpli ku lei di Kristu.+
3 Si un hende ta kere ku e ta masha kos siendo ku e no ta,+ ta su mes e ta gaña.
4 Pero laga kada hende analisá loke e mes ta hasi;+ e ora ei, lo e por ta kontentu ku loke e mes ta hasi, sin ku e ta kompará su mes ku otro hende.+
5 Pasobra kada hende mester kumpli ku su mes responsabilidatnan.*+
6 Ademas, laga un persona ku ta ser siñá palabra di Dios kompartí tur loke ta bon ku e persona ku ta siñ’é.+
7 No gaña boso mes: Dios no ta laga hende hasi bofon di dje. Loke un hende sembra, ta esei lo e kosechá.+
8 Un persona ku ta sigui e deseonan di su kurpa imperfekto lo kosechá morto.* Pero un persona ku ta sigui e guia di spiritu santu lo kosechá bida eterno for di spiritu santu.+
9 Pues, laga nos no stòp di hasi loke ta bon, pasobra na e debido tempu nos lo kosechá bon resultado si nos no entregá.*+
10 Tanten ku nos tin e oportunidat,* laga nos hasi loke ta bon pa tur hende, pero spesialmente pa nos rumannan den fe.
11 Mi a skirbi boso e karta akí ku mi mes man. Wak kon grandi e lèternan ta!
12 E hendenan ku ta purba di obligá boso pa ser sirkunsidá ke haña aprobashon di otro hende.* Nan ta hasi esei pasobra nan no ke ser persiguí pa motibu ku nan ta prediká tokante Kristu, kende a muri na staka.*
13 Bon mirá, ni e hendenan ku ta laga sirkunsidá nan mes no ta kumpli ku Lei.+ Nan ke pa boso ser sirkunsidá pa nan por broma ku loke boso a hasi ku boso kurpa.*
14 Pero ami sí nunka lo no ke broma ku nada otro ku no ta nos Señor Hesukristu, kende a muri na staka.*+ For di mi punto di bista, mundu a ser kondená na morto* pa medio di Kristu su morto. For di punto di bista di mundu, ta ami a ser kondená na morto pa medio di su morto.
15 Pues, no ta importante si un hende ta sirkunsidá òf nò;+ importante ta ku Dios ta hasi un persona un kreashon nobo.+
16 Pas i miserikòrdia sea ku tur hende ku ta biba di akuerdo ku e prinsipio* ei, sí, ku tur e hendenan ku ta forma parti di e Israel di Dios.+
17 Mi no ke pa niun hende molestiá mi mas, pasobra e markanan ku ami tin riba mi kurpa ta marka di un esklabo di Hesus.+
18 Rumannan, mi ta deseá pa boso haña e bondat inmeresí di nos Señor Hesukristu pa e bon aktitut* ku boso ta demostrá. Amèn.
Nota
^ Òf: “ku ta ser guiá pa spiritu santu.”
^ Òf: “mester karga su propio karga di responsabilidat.”
^ Lit.: “korupshon.”
^ Òf: “kansa.”
^ Lit.: “tempu stipulá.”
^ Lit.: “ke duna un bon impreshon den karni.”
^ Lit.: “broma den boso karni.”
^ Òf: “ser klabá na staka.”
^ Lit.: “e regla di kondukta.”
^ Lit.: “spiritu.”
