Karta pa e Galationan 4:1-31
4 Awor, suponé ku un heredero ta un mucha chikitu. Maske tur kos ta di dje, e no ta mas ku un esklabo den kas.
2 Pues, te na e dia ku su tata a stipulá di antemano, e mucha chikitu ta keda bou di supervishon di hende ku ta kuid’é i di hende enkargá ku maneho di kas.*
3 Asina nos tambe tabata tempu ku nos tabata mucha. Nos tabata esklabo di e mundu akí su manera di pensa i di komportá.*+
4 Pero ora e tempu stipulá a yega, Dios a manda su Yu, kende a nase di un muhé+ i kende tabata bou di Lei.+
5 Dios a manda su Yu pa e Yu por a paga e preis pa libra hende ku tabata bou di Lei.+ Komo resultado, Dios por a adoptá nos.+
6 Awor, komo ku boso ta yu di Dios, Dios a pone e spiritu santu+ ku su Yu a risibí den nos kurason.+ I e spiritu santu ei ta pone nos grita: “Aba,* Tata!”+
7 Pues, boso* no ta esklabo mas, sino yu di Dios. I si boso ta yu di Dios, Dios lo duna boso tambe un herensia.+
8 Sinembargo, tempu ku boso no tabata konosé Dios, boso tabata esklabo di kos ku no ta realmente dios.
9 Pero awor boso a siña konosé Dios òf, mihó bisá, awor Dios konosé boso. Kon bini antó ku boso ke bolbe bira esklabo di e kosnan bano+ i sin balor di e mundu akí?*+
10 Boso ta kere ku sierto dia, luna,+ temporada i aña ta spesial, i boso ta asta selebrá nan!
11 Mi tin miedu ku tur mi esfuerso pa yuda boso tabata pòrnada.
12 Un tempu, mi tambe tabata sigui e kosnan ei estriktamente meskos ku boso, pero mi a kambia. P’esei, Rumannan, mi ta roga boso pa boso tambe kambia.+ Den pasado, boso no a trata mi malu.
13 Boso ta kòrda e promé biaha ku mi a haña chèns di prediká bon notisia na boso? Esei tabata tempu ku mi a keda serka boso pasobra mi tabata malu.
14 Aunke mi kondishon físiko tabata un prueba pa boso, boso no a trata mi ku despresio ni ku asko.* Al kontrario, boso a risibí mi manera un angel di Dios, òf manera Kristu Hesus.
15 E tempu ei, boso tabata masha felis. Kiko a pasa ku e felisidat ku boso tabatin ora ku boso a risibí mi? Mi tin sigur ku, si tabata posibel, boso lo a saka boso wowo duna mi e tempu ei.+
16 Ta boso enemigu mi a bira pasobra mi ta bisa boso bèrdat?
17 Tin hende ku ta hasi tur nan esfuerso pa gana boso na nan banda, pero no ta pasobra nan ta interesá den boso bienestar. Mas bien, nan kier separá boso for di mi, pa asina boso sigui nan tras.
18 Klaru ku semper ta bon si nan ta mustra interes den boso, tanten ku nan ta hasi esei ku bon intenshon. Pero nan no mester hasi esei solamente ora mi ta serka boso.
19 Mi yunan stimá,+ pa boso motibu, mi ta sinti doló atrobe, manera ora un muhé tin doló di parto. I lo mi sigui sinti esei te ora boso ta reflehá e personalidat di Kristu plenamente.
20 Mare mi tabata serka boso aworakí pa mi por a papia na un manera mas suave ku boso, pasobra mi no ta komprondé kiko ta pasando ku boso.
21 Boso ku ke ta bou di Lei, bisa mi: Boso no sa kiko Lei ta bisa?
22 Por ehèmpel, ta pará skirbí ku Ábraham tabatin dos yu hòmber, un ku un kriá+ i un ku un muhé liber.+
23 Yu di e kriá a nase na un manera normal,*+ i yu di e muhé liber a nase danki na un promesa di Dios.+
24 E susesonan ei tin un nifikashon simbóliko, pasobra kada un di e muhénan ei ta representá un pakto entre Dios i hende. Un di e paktonan ei a ser será na seru Sinaí.+ Tur hende den e pakto ei ta esklabo, i e pakto ei ta manera Hágar.
25 Hágar ta representá Sinaí,+ un seru na Arabia, i su situashon ta manera e situashon di Herúsalèm djawe, pasobra Herúsalèm ta den sklabitut huntu ku e hendenan ku ta biba den dje, ku ta manera su yunan.
26 Di otro banda, Herúsalèm djariba ta manera nos mama, i e ta un muhé liber.
27 Pasobra den Skritura ta pará skirbí: “Abo, hende muhé ku nunka a haña yu, alegrá! Sí, grita di alegria maske nunka bo no a sinti doló di parto. E yunan di e hende muhé bandoná ta mas tantu ku e yunan di e hende muhé ku ta kasá.”+
28 Rumannan, boso ta yu ku a nase debí na un promesa di Dios, meskos ku Ísak.+
29 E tempu ei, e yu ku a nase na e manera normal a kuminsá persiguí e yu ku a nase pa medio di poder di spiritu santu.+ I awe ta sosodé meskos.+
30 Sinembargo, kiko Skritura ta bisa? “Kore ku e kriá i ku su yu hòmber, pasobra yu di e muhé liber di niun manera lo no parti su herensia ku yu di e kriá.”+
31 Pues, Rumannan, nos no ta yu di un kriá, sino yu di e muhé liber.
Nota
^ Lit.: “esklabo di e kosnan básiko di mundu.”
^ Aba tabata un ekspreshon hebreo òf arameo. Ora yu tabata papia ku nan tata, nan tabata yam’é Aba. Aba tabata un ekspreshon di kariño i di rèspèt.
^ Lit.: “bo.”
^ Lit.: “kosnan básiko ku ta suak i miserabel?”
^ Òf: “ni boso no a skupi mi.”
^ Lit.: “segun karni.”
