Karta pa e Galationan 1:1-24
1 Esaki ta un karta di ami, Pablo, un apòstel. No ta hende a manda mi òf nombra mi komo apòstel. Mas bien, ta Hesukristu+ i Dios a nombra mi komo apòstel, sí, Dios, nos Tata,+ kende a lanta Kristu for di morto.
2 Ami i tur e rumannan ku ta huntu ku mi ta manda kumindamentu pa e kongregashonnan na Galasia.
3 Mi ta deseá pa boso haña bondat inmeresí i pas ku ta bini di Dios, nos Tata, i di nos Señor Hesukristu.
4 Kristu a sakrifiká su bida pa nos pikánan,+ pa asina e por libra nos for di e mundu* malbado akí.+ El a hasi esei pasobra esei tabata boluntat di Dios, nos Tata.+
5 Alabá Dios pa tur eternidat. Amèn.*
6 Dios a skohe boso pa medio di e bondat inmeresí ku Kristu a demostrá. P’esei, mi a keda masha asombrá ku boso a bira lomba pa Dios asina lihé i ku boso a bai skucha un otro mensahe komo si fuera ta bon notisia di Dios e ta.+
7 Pero, bon mirá, no tin niun otro bon notisia. Mas bien, ta algun hende ta trose e bon notisianan tokante Kristu i asina purba di pone boso desviá.+
8 Sinembargo, asta si un di nos òf un angel for di shelu prediká bon notisia na boso ku ta otro for di e bon notisianan ku nos a prediká na boso, laga e persona ei ser maldishoná.
9 Manera nos a bisa kaba, asina mi ta bolbe bisa awor: Ken ku prediká bon notisia na boso ku ta otro for di loke boso a aseptá, laga e persona ei ser maldishoná.
10 Mi no ta buskando aprobashon di hende, mas bien, aprobashon di Dios. Nò, mi no ta purba di agradá hende. Si ainda mi tabata agradá hende, lo mi no tabata esklabo di Kristu.
11 Rumannan, mi ke pa boso sa ku e bon notisianan ku mi a prediká na boso no ta algu ku hende a inventá;+
12 mi no a haña e bon notisianan ei for di hende ni ta hende a siña mi nan. Mas bien, ta Hesukristu a revelá nan na mi.
13 Mi tin sigur ku boso a tende di mi komportashon tempu ku mi tabata den e religion hudiu;+ mi tabata persiguí e kongregashon di Dios kruelmente, i mi a purba di kaba kuné.+
14 Mi a hasi mas progreso den e religion hudiu ku hopi otro hudiu di mi edat, ya ku mi tabata hopi mas determiná* pa kumpli ku e tradishonnan di mi antepasadonan.+
15 Pero Dios, kende a kousa mi nasementu, a yama mi pa medio di su bondat inmeresí.+ Anto Dios a haña ta bon
16 pa usa mi pa prediká bon notisia tokante su Yu na hende di e nashonnan*+ i asina yuda nan siña konosé su Yu. Ora Dios a skohe mi pa hasi esei, mi no a bai buska konseho serka niun hende.*
17 Tampoko mi no a subi bai Herúsalèm serka e rumannan ku tabata apòstel promé ku mi. Mas bien, mi a bai Arabia, i despues, mi a bolbe bini Damasko.+
18 Tres aña despues, mi a subi bai Herúsalèm+ pa bishitá Séfas,*+ i mi a keda 15 dia serka dje.
19 Anto ta un otro apòstel so mi a mira, esta, Santiago,+ ruman di Señor.
20 Mi ta hura dilanti di Dios ku no ta gaña mi ta gaña boso tokante e kosnan ku mi ta skirbiendo akí.
21 Despues di esei, mi a bishitá vários lugá na Siria i Silisia.+
22 Pero e disipelnan di Kristu den e kongregashonnan na Hudea no tabata konosé mi personalmente.
23 E úniko kos ku nan tabata tende hende bisa ta: “E hòmber ku ántes tabata persiguí nos+ i ku kier a kaba ku nos religion,* awor ta prediká bon notisia di e religion ei.”+
24 Pues, nan a kuminsá alabá Dios pa motibu di loke a pasa ku mi.
