Karta pa e Galationan 2:1-21
2 Anto despues di 14 aña, mi a bolbe bai Herúsalèm, huntu ku Bárnabas.+ Mi a hiba Tito tambe huntu ku mi.+
2 Mi a bai Herúsalèm pasobra mi a haña un revelashon ku mi mester bai einan. Anto mi a splika e ruman hòmbernan ku tabata masha respetá tokante e bon notisianan ku mi ta prediká na hende di e nashonnan. Pero mi a konta nan esei den un reunion privá, pasobra mi kier a hasi sigur ku mi tabata hasi mi trabou den Dios su sirbishi bon. Si no tabata asina, loke mi a hasi lo tabata enbano.
3 Maske Tito,+ kende tabata huntu ku mi, tabata griego, nan no a oblig’é pa laga sirkunsidá*+ su mes.
4 Esei a bira un problema pa motibu di e rumannan falsu.+ Nan a slùip drenta den kongregashon manera spion pa purba di stroba nos di disfrutá di e libertat+ ku nos tin komo disipel di Kristu Hesus. Nan kier a obligá nos bira esklabo di Lei atrobe.+
5 Pero niun ora so nos no a baha kabes pa nan,+ pa asina boso por keda firme den e bèrdat ku ta parti di e bon notisianan.
6 Bon mirá, e rumannan ei ku tabata ser konsiderá importante,+ e hòmbernan masha respetá ei, no a kompartí nada nobo ku mi. (Pa mi no ta hasi niun diferensia kon importante nan tabata ántes, pasobra Dios no ta hasi distinshon di persona.*)
7 Al kontrario, nan a mira ku mi a haña e enkargo pa prediká bon notisia na hende ku no ta sirkunsidá,+ meskos ku Pedro a haña e enkargo pa prediká na hende sirkunsidá.
8 Pasobra Dios, kende a kapasitá Pedro pa sirbi komo apòstel pa hende sirkunsidá, a kapasitá ami tambe pa sirbi komo apòstel pa hende di e nashonnan.+
9 I e rumannan a rekonosé ku Dios a demostrá mi bondat inmeresí.+ P’esei, Santiago,+ Séfas* i Huan, e rumannan rekonosé komo pilá di kongregashon, a duna ami ku Bárnabas+ man pa indiká ku nos tur ta kompañero di trabou.* Pues, nan a bai di akuerdo ku nos ta bai serka hende di e nashonnan i ku nan ta bai serka hende sirkunsidá.
10 Un kos so nan a pidi nos pa hasi: pa sigui kòrda riba e rumannan pober. Anto esei ta loke mi a purba di hasi diligentemente.+
11 Sinembargo, ora Séfas+ a bini Antiokia,+ mi a bis’é den su kara ku e no a hasi bon.*
12 E kos ta ku promé ku sierto ruman ku Santiago+ a manda a yega, Séfas tabatin kustumber di kome ku hende di e nashonnan.+ Pero despues ku e rumannan ei a yega, el a stòp di hasi esei, i e no tabata anda mas ku hende di e nashonnan. El a hasi asina pasobra e tabatin miedu di e rumannan ku tabata forma parti di e grupo di ruman sirkunsidá.+
13 E otro hudiunan tambe a kuminsá hasi kos di hipókrita meskos kuné, i asta Bárnabas a bai nan tras i el a hasi meskos ku nan.
14 Pero ora mi a mira ku nan komportashon no tabata di akuerdo ku e bèrdat ku boso a risibí for di e bon notisianan,+ mi a bisa Séfas dilanti di tur hende: “Abo ta hudiu, pero bo ta biba manera hende di e nashonnan i no manera e hudiunan. Dikon bo ta obligá hende di e nashonnan biba segun kustumber hudiu antó?”+
15 Nos ku ta hudiu di nasementu, i ku no ta manera e pekadónan di e nashonnan,
16 sa ku Dios no ta konsiderá un hende hustu pasobra e ta hasi loke Lei ta bisa.* Mas bien, Dios ta konsiderá un hende hustu solamente si e ta pone fe+ den Hesukristu.+ P’esei, nos a pone fe den Kristu Hesus pa Dios por konsiderá nos hustu pa medio di fe den Kristu, i no pasobra nos ta hasi loke Lei ta bisa. Pasobra Dios lo no konsiderá niun hende* hustu djis pasobra nan ta hasi loke Lei ta bisa.+
17 Awor, si nos ta hasi esfuerso pa Dios konsiderá nos hustu pa medio di Kristu i tòg nos ta ser mirá komo pekadó, akaso esei ke men ku ta Kristu ta animá nos pa kometé piká? Klaru ku nò!
18 Si mi bolbe traha e mesun kosnan ku un tempu mi a basha abou, lo mi bira un kibradó di Lei.
19 Komo ku mi tabata sigui Lei, mi a ser librá di Lei*+ pa mi por biba pa Dios.
20 Awor, mi ta klabá na staka huntu ku Kristu.+ Mi no ta biba mas pa mi mes;+ mas bien, mi ta hiba un bida ku ta den union ku Kristu.* Sí, e bida ku mi ta biba awor den e kurpa akí,* mi ta bib’é di akuerdo ku e fe ku mi tin den e Yu di Dios,+ kende a stima mi i entregá su mes pa mi.+
21 Ami no ta rechasá e bondat inmeresí ei di Dios.+ Pasobra si un hende ta bira hustu debí ku e ta kumpli ku Lei, e ora ei ta pòrnada Kristu a muri.+
Nota
^ Lit.: “no ta bai tras di aparensia di hende.”
^ Konosí tambe komo Pedro.
^ Òf: “ta sosio.” Lit.: “man drechi di kooperashon.”
^ Òf: “mi a konfront’é kara kara, pasobra tabata bisto ku e tabata robes.”
^ Lit.: “karni.”
^ Òf: “hustu pa medio di obra di Lei.”
^ Òf: “Pasobra, pa medio di Lei, mi a muri en konekshon ku Lei.”
^ Lit.: “No ta ami ta biba mas, sino ta Kristu ta biba den mi.”
^ Lit.: “den karni.”
