Éksodo 39:1-43
39 Nan a usa hilu blou, hilu di lana koló püs i hilu kòrá bibu+ pa tehe* paña bunita pa sirbi den e lugá santu. Nan a traha e pañanan di saserdote* pa Áròn,+ manera Yehova a manda Moises.
2 Bezalel a traha e efòt+ di sumo saserdote ku oro, hilu blou, hilu di lana koló püs, hilu kòrá bibu i hilu di lenen di bon kalidat.*
3 Nan a bati plachi di oro pa hasi nan plat. Kaba, Bezalel a kòrta nan na hilu fini pa tehe nan huntu ku e hilu blou, hilu di lana koló püs, hilu kòrá bibu i hilu di lenen di bon kalidat. Nan a usa e materialnan ei pa bòrda e efòt.
4 Nan a traha strèp ku tabata pasa riba skouder pa pega na e efòt; e strèpnan tabata pegá na e efòt na su dos puntanan ariba.
5 I nan a traha e faha,* ku tabata kosé na e efòt i ku a sirbi pa tene e efòt na su lugá,+ di e mesun materialnan, esta, oro, hilu blou, hilu di lana koló püs, hilu kòrá bibu i hilu di lenen di bon kalidat, manera Yehova a manda Moises.
6 Despues, nan a hinka e dos piedranan di òneks den montura di oro, i nan a graba nòmber di e yu hòmbernan di Israel riba nan; nan a hasi esei manera ta graba un seyo.+
7 Bezalel a pega e piedranan riba e strèpnan di e efòt komo rekordatorio pa* e yunan di Israel,+ manera Yehova a manda Moises hasi.
8 Despues, Bezalel a bòrda e saku pa bisti riba pechu+ manera el a bòrda e efòt; el a bòrda e saku ku oro, hilu blou, hilu di lana koló püs, hilu kòrá bibu i hilu di lenen di bon kalidat.+
9 Nan a traha e saku di tal manera ku ora dobla e tela na dos, e tabata forma un firkant ku tabata un span di man* largu i un span di man hanchu.
10 Nan a pega kuater kareda di piedra presioso riba e saku. Nan a pone kada piedra den un montura. E promé kareda tabatin rubí, topasio i esmeralda.
11 E di dos kareda tabatin turkesa, safiro i yaspe.
12 E di tres kareda tabatin lèshem,* ágata i amatista.
13 I e di kuater kareda tabatin krisólito,* òneks i yade. Nan a pone tur e piedranan ei den montura di oro.
14 Tabatin un piedra pa kada un di e 12 yu hòmbernan di Israel. Riba kada piedra a graba nòmber di un di e 12 tribunan; sí, a graba nan manera ta graba un seyo.
15 Despues, nan a traha kadena di oro puru, di flèktu manera kabuya, pa pega na e saku pa bisti riba pechu.+
16 Nan a traha dos montura di oro i dos renchi di oro. Nan a pega e dos renchinan na e dos skinanan ariba na e saku.
17 Despues, nan a pasa e dos kabuyanan di oro den e renchinan na e dos skinanan di e saku.
18 Nan a pega e dos puntanan di e dos kabuyanan na e monturanan ku tabatin riba e strèpnan di e efòt pa e saku keda parti dilanti di e efòt.
19 Despues, nan a traha dos renchi di oro. Nan a pega nan na e dos skinanan abou na e rant parti paden di e saku, pegá ku e efòt.+
20 Anto nan a traha dos renchi di oro mas. Nan a pega nan kaminda e faha ta pega na e efòt, esta, parti dilanti di e efòt, mas abou di e dos strèpnan ku ta pasa riba skouder, nèt riba e faha bòrdá.
21 Finalmente, pa tene e saku na su lugá, nan a pasa un sinta blou den e renchinan di e saku i e renchinan di e efòt, i nan a mara e sinta. Esei a tene e saku na su lugá riba e efòt, nèt riba e faha bòrdá, manera Yehova a manda Moises.
22 Anto Bezalel a traha e trahe sin manga pa bisti bou di e efòt. El a traha* henter e trahe ku hilu blou.+
23 Meimei parti ariba, tabatin un habrí manera e habrí di un harnas. Rònt di e habrí tabatin un rant pa e no tòrnu.
24 Despues, nan a dekorá zòm di e trahe sin manga ku granatapel. Nan a traha e granatapelnan ei ku hilu blou, hilu di lana koló püs i hilu kòrá bibu ku nan a flèktu den otro.
25 Anto rònt di zòm di e trahe sin manga, nan a traha bèl di oro puru, i nan a pone e bèlnan meimei di e granatapelnan.
26 Nan a pone un bèl, un granatapel, un bèl, un granatapel, rònt di e zòm di e trahe sin manga ku saserdote tabata bisti ora di rindi sirbishi, manera Yehova a manda Moises hasi.
27 I nan a traha e bistínan largu di lenen di bon kalidat pa Áròn i su yu hòmbernan,+
28 e tulband spesial+ di lenen di bon kalidat pa Áròn, e tulbandnan bunita dòrná+ di lenen di bon kalidat pa e yu hòmbernan di Áròn, e shòrtnan* di lenen+ di bon kalidat
29 i e fahanan. Nan a tehe e fahanan ku hilu di lenen di bon kalidat, hilu blou, hilu di lana koló püs i hilu kòrá bibu. Nan a traha tur e kosnan ei manera Yehova a manda Moises hasi.
30 Finalmente, nan a traha e plachi lombrante di oro puru, esta, e plachi ku a duna prueba ku Áròn tabata dediká na Dios.* Nan a graba riba dje, manera ta graba un seyo, e siguiente palabranan: “Yehova ta santu.”+
31 Nan a pega e plachi na e tulband spesial ku un sinta trahá di hilu blou, manera Yehova a manda Moises hasi.
32 Asina nan a kaba ku tur trabou relashoná ku e tabernakel, esta, e tènt di reunion, i e israelitanan a hasi tur loke Yehova a manda Moises hasi.+ Nan a hasi presis asina.
33 Despues, nan a hiba tur e partinan di e tabernakel+ pa Moises, esta, e telanan di tènt+ i tur e artíkulonan ku ta pertenesé na e tabernakel: su haknan,+ su erantenan,+ su baranan,+ su pilánan i su basenan;+
34 pa tapa e tabernakel, e tela di kueru di chubatu di karné tinzjá kòrá+ i e tela di kueru di kachó di awa; e kortina di separashon;+
35 e arka di Testimonio ku su baranan+ i su tapa;+
36 e mesa, tur su artíkulonan di uso+ i e pannan di ofrenda;
37 e kándelar di oro puru ku su lampinan+ (esta, henter e rei di lampi) i tur su artíkulonan di uso+ i zeta pa e lampinan;+
38 e altar+ di oro, zeta santu,+ sensia ku ta hole dushi+ i e kortina*+ di entrada di e tènt;
39 e altar di koper+ i su roster di koper, su baranan+ i tur su artíkulonan di uso+ i e baki ku su pia;+
40 e kortinanan di e plenchi ku nan pilánan i nan basenan,+ e kortina*+ di entrada di e plenchi ku su stakanan i su kabuyanan+ i tur e artíkulonan ku ta usa pa sirbishi na e tabernakel, esta, na e tènt di reunion;
41 e pañanan ku nan a tehe na un manera bunita pa sirbi den e lugá santu, e pañanan santu* pa Saserdote Áròn+ i e pañanan di saserdote pa su yu hòmbernan.
42 E israelitanan a hasi tur e trabounan manera Yehova a manda Moises hasi.+
43 Ora Moises a inspekshoná tur e trabounan ku nan a hasi, el a mira ku nan a hasi nan presis manera Yehova a manda. I Moises a bendishoná nan.
Nota
^ Òf: “e pañanan santu.”
^ Na hulandes, e verbo ta weven.
^ Lit.: “lenen fini lorá den otro.”
^ Òf: “e bant pa sintura.”
^ Òf: “komo piedra di rekordatorio pa.”
^ Hende no sa ta kua piedra esei ta. Posiblemente, e ta referí na ámber, yasinto, opal òf turmalina.
^ Na hebreo, tarshish. Un piedra presioso hel òf bèrdè.
^ Òf: “tehe.” Na hulandes, e verbo ta weven.
^ Òf: “e pañanan djabou.”
^ Òf: “e korona santu.”
^ Òf: “skrin.”
^ Òf: “skrin.”
^ Òf: “e pañanan di saserdote.”
