Maabig so Resulta na Inkaalerto!

ALERTO ka ta’n manpulong ed kada posiblin pankanawnawa diad teritorya na kongregasyon yo? Ontan iray agagi tayo ed syudad na Turku, Finland, tan maabig so resulta na inkaalerto da.

Naimano na saray agagi tayo ed Turku ya walaray lalakin nanlapud Asia a sinmabi’d lugar da pian mantrabaho diad sakey a pagawaay barko. Akabatan na sakey ya agi tayo no iner a hotel so tutuloyan da. Naamtaan to met ya walaray bus a kabkabuasan a mangaabet ed sarayan trabahador tan mangiyaakar ed sikara diad pier. Sarayan impormasyon et impakabat ton tampol ed saray agagi ed Ingles a kongregasyon diad Turku.

Amoria na saray elder ed satan a kongregasyon a say insabi na sarayan dayo et maabig a pankanawnawa pian inabang ed sikara so mensahe na Panarian. Kanian inyeskedyul dan tampol so espisyal a kampanya pian napulongan irayan trabahador. Diad saman met lanlamang a simba, nambabana so samploran agagi tayo diad panag-alagaran na bus ed alas-siete na kabuasan. Balet ta anggapoy nanengneng dan trabahador. ‘Atrasado ti’la amo’ so kuan da. ‘Ompan inmalis la ra.’ Nagugunoyan balet et nitan lay sakey ya akasulong na para trabaho. Insan wala lamet so sinmabi, ya anggad mansasbi la ran amin. Pinulongan iran tampol na saray agagi tayo, tan inopresian da ra na Ingles iran publikasyon tayo. Maong labat ta sakey oras ni antis ya inmalis iramay bus kanian akatongtong da lawarin amin iray trabahador. Akapangipalima iray agagi tayo na 126 a brosyur tan 329 a magasin!

Lapud sayan maabig a resulta, apaseseg iray agagi ya uliten iyan kampanya diad ontumbok a simba, a nibanbana’d bisita na manangasikaso na sirkito. Kanian anggano onuuran et indaulo na manangasikaso na sirkito so pantitipon parad lawak na kimeyan diad 6:30 na kabuasan, tan 24 a manangipalapag so amaarap ed panag-alagaran na bus. Natan et wala la ray awit dan Tagalog iran publikasyon ta naamtaan dan karaklan ed saramay dayo et Pilipino. Diad saman a kabuasan et naopresian na agagi tayo irayan trabahador na 7 libro, 69 brosyur, tan 479 magasin. Talagan malikeliket iray agagi tayon akibiang ed sayan kampanya!

Antis a sinmempet irayan trabahador ed bansa ra, arum ed sikara et abisita na agagi tayo diad saray hotel a tinuloyan da tan mas nipaliwawa’d sikara so mensahe na Panarian. Walaray trabahador ya angibagan akatongtong la ra na saray Tasi diad arum a bansa. Imbalikas day pisalsalamat da ed saray agagi a nansagpot pian nakatongtong ira legan a wala ra’d Finland.

Alerto ka met kasi ed saray nikadkaduman pankanawnawa a makapanpulong diad teritorya na kongregasyon yo? Manggagawa ka ta’y paraan pian napulongan moy amin a klase na too? No ontan so gagawaen mo, naliketan ka met a singa saramay agagi tayo ed Turku.

[Mapa/Litrato ed pahina 32]

(Parad aktual a format, nengnengen so publikasyon)

FINLAND

HELSINKI

Turku

[Credit Line]

STX Europe