E kindegi, ji mang’eny wacho ni gin Jokristo, kata kamano, gitimoga gik maricho ma hinyo jowetegi. Moko kuomgi onge gi hera madier, ok gin joratiro, kendo ok gikech jowetegi. Moko bende chodo kata obedo ni gin e kend. Timbe kaka mago miyo jomoko penjore niya: ‘To kare bedo Jakristo tiende en ang’o?’

Tiend Bedo Jakristo

 Yot mondo ng’ato owacho ni en Jakristo. To mano kende ok oromo. Muma wacho ni Jakristo en japuonjre Yesu Kristo. (Tich Joote 11:26) Yesu nowacho niya: “Ka usiko e wachna, un jopuonjrena adier.” (Johana 8:31) En adier ni onge ng’at ma nyalo luwo Yesu e yo makare chuth nikech wan dhano ma joricho. Kata kamano, Jakristo en ng’at ma temo matek mondo oti gi puonj mag Yesu e ngimane pile ka pile. Ne ane moko kuom gik ma Yesu nopuonjo.

Jokristo nyiso hera madier

 Gima Yesu nowacho: “Amiyou chik manyien, ni ubed gi hera e kindu; mana kaka aseherou, un bende herreuru e kindu. Ma e ma nomi ji duto ong’e ni un jopuonjrena ka un gi hera e kindu uwegi.”​—Johana 13:34, 35.

 Gima Yesu notimo: Yesu nohero ji duto gadier ma ok odewo oganda ma ne giwuokie kata kaka ne gipon. Nochango joma tuwo, nopidho ji, kendo nochiwo ngimane ne dhano duto.​—Mathayo 14:14-21; 20:28.

 Gima Jakristo onego otim: Jokristo nyiso hera madier sama gibedo jochiwo, ok gibuon ji, kendo giweyo ne jomamoko kethogi. Giikore konyo joma chandore, kendo giyie tuonore gik ma gihero mondo gikony jomamoko.​—1 Johana 3:16.

Jokristo gin joratiro

 Gima Yesu nowacho: “An . . . e adiera.”​—Johana 14:6.

 Gima Yesu notimo: Yesu ne en jaratiro e wechene kod timbene. Ne ok owuondo ji mondo gitim gik modwaro kata wacho miriambo. Nowacho adiera kinde duto kata ka timo mano ne nyalo miyo jomamoko kwede.​—Mathayo 22:16; 26:63-67.

 Gima Jakristo onego otim: Jokristo gin joratiro. Gichuloga osuru mowinjore, ok gikwel, kendo gitiyoga kuom seche ma giwinjoree gi joma ondikogi. (Jo-Rumi 13:5-7; Jo-Efeso 4:28) Ok gin jomibadhi, ok gikwal penj, kendo ok gindik weche ma ok kare e barupegi mag manyo tich.​—Jo-Hibrania 13:18.

Jokristo kecho ji

 Gima Yesu nowacho: “Biuru ira, un duto mujony kendo ma ting’ turou, to anamiu yueyo. Keturu jok mara kuomu kendo puonjreuru kuoma, nimar adembora kendo chunya muol, to ununwang’ yueyo. Nikech jok mara yom kendo ting’na yot.”​—Mathayo 11:28-30.

 Gima Yesu notimo: Yesu ne dewo ji gadier kendo wuoyo kode ne yot. Norwako nyithindo ire, nohoyo joma chunygi nonyosore, kendo nomiyo ji duto luor.​—Mariko 10:13-15; Luka 9:11.

 Gima Jakristo onego otim: Jokristo wuoyoga gi jomamoko e yo mang’won; ok gitiga gi weche mag ayany kata achaya. (Jo-Efeso 4:29, 31, 32) Gidewo jomamoko gadier kendo giikore konyogi.​—Jo-Galatia 6:10.

Jokristo makore gi joma gikendorego

 Gima Yesu nowacho: “Gima Nyasaye oseriwo, dhano moro amora kik opogi.”​—Mariko 10:9.

 Gima Yesu notimo: Kata obedo ni Yesu ne ok okendo, nojiwo joma nie kend mondo gimakre gi joma gikendorego. (Mathayo 19:9) Nosiemo ji ni gitang’ gi timbe ma nyalo miyo ng’ato odonj e chode ma keth hera kod winjruok ma en-go gi jaode.​—Mathayo 5:28.

 Gima Jakristo onego otim: Jokristo kwedoga timbe ma ok mi kend luor. (Jo-Hibrania 13:4) Dichwo gi dhako mokendore nyisore hera kendo gimiyore luor.​—Jo-Efeso 5:28, 33.